Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Sēnesi 1:1–25: Ko e Fakatupú

“Sēnesi 1:1–25: Ko e Fakatupú,” Fuakava Motuʻá – Tohi Lēsoni maʻá e Faiako Seminelí (2026)

“Sēnesi 1:1–25: Ko e Fakatupú,” Fuakava Motuʻá – Tohi Lēsoni maʻá e Faiako Seminelí

Sēnesi 1–2; Mōsese 2–3; ʻĒpalahame 4–5: Lēsoni 7

Sēnesi 1:1–25

Ko e Fakatupú

ʻOku fakamoʻoni ʻa e fakaʻeiʻeiki mo e fakaʻofoʻofa ʻo hotau māmaní ki he ongo Fakatupu nāunauʻia te Na lava ʻo liliu ha meʻa ʻoku “fuofuonoa … mo lala,” (vakai, Sēnesi 1:2) ki he ngaahi meʻa fakaofo ʻo e māmani ko ʻení. ʻE lava ke tokoni ʻa e lēsoni ko ʻení ke ongoʻi ʻe he kau akó ha ʻofa mo ha houngaʻia ʻi he Tamai Hēvaní mo Sīsū Kalaisi ʻi heʻenau ako ki hono Fakatupu ʻo e māmaní.

Teuteu ʻa e tokotaha akó: Fakaafeʻi ʻa e kau akó ke fakalaulauloto ki he fakaʻofoʻofa ʻo e māmaní mo e kotoa ʻo e ngaahi fakatupu ʻa e ʻOtuá. Fakaafeʻi kinautolu ke omi mo ha fakatātā pe mateuteu ke talanoa fekauʻaki mo ha meʻa ʻi he māmani ko ʻení ʻoku nau fiefia ai.

Ngaahi ʻEkitivitī Ako ʻOku Ala Fakahokó

Fakatokangaʻi ange: Neongo ʻoku toe maʻu ʻa e ngaahi fakamatala ki hono Fakatupu ʻo e māmaní ʻi he Mōsese 2 mo e ʻĒpalahame 4, ka ʻe nofotaha ʻa e lēsoni ko ʻení ʻi he fakamatala ʻoku lekooti ʻi he Sēnesi 1.

Ongo fakatupú mo e ngaahi fakatupu maʻongoʻongá

Ke kamata ʻa e kalasí, fakakaukau ke fakaʻaliʻali ha ngaahi fakatātā ʻo ha fale fakaʻofoʻofa ʻa ia ko ha feituʻu manakoa ia ʻi homou feituʻú. Te ke lava ʻo fai ha ngaahi fehuʻi hangē ko ʻení:

ʻOkú ke pehē ko e hā ʻokú ne ʻai ʻa e kakaí ke nau fie ʻaʻahi ki ha fale hangē ko ʻení?
ʻOkú ke pehē ʻoku ongoʻi fēfē ʻa e kakai ne nau langa ʻa e ngaahi fale fakaʻofoʻofá ʻi he taimi ʻoku fiefia ai ʻa e kakaí ʻi heʻenau ngāué?

Hili iá, ʻe lava ke ke fakaʻaliʻali ha fakatātā ʻo ha fonua fakaʻofoʻofa ʻoku ofi ki homou feituʻú. Fakaafeʻi ʻa e kau akó ke nau fai ʻeni ke tokoni ki hono teuteuʻi kinautolu ki he lēsoni ʻo e ʻaho ní.

Fakakaukau ki hoʻo ongo pe ngaahi fakakaukau ʻokú ke maʻu ʻi he taimi ʻokú ke mamata ai ki he fakaʻofoʻofa mo e fakaʻeiʻeiki ʻo e māmaní. Fakakaukau pe ko e hā hono tuʻo lahi haʻo tuku ha taimi ke vakavakaiʻi pe fakahoungaʻi ai ʻa e ngaahi meʻa fakaofo ko ʻeni ʻi he māmaní. ʻI hoʻo ako ʻi he ʻaho ní, fakaafeʻi ʻi he faʻa lotu ʻa e Laumālie Māʻoniʻoní ke tokoni atu ke ke ongoʻi ha ʻofa mo ha houngaʻia ki he Tamai Hēvaní mo Sīsū Kalaisi ʻi hono fakatupu ʻo e māmani ko ʻení.

Ko e Fakatupú

Kimuʻa pea fakafeʻiloaki ʻa e ʻekitivitī ako ko ʻení, fakakaukau ke fakaafeʻi ʻa e kau akó ke vahevahe ʻa e meʻa ʻoku nau ʻilo fekauʻaki mo hono fakatupu ʻo e māmaní. Hili iá pea ʻai ke vakai ʻa e kau akó ki he sētesi ko ʻení mei he “Ko e Kalaisi Moʻuí: Ko e Fakamoʻoni ʻa e Kau ʻAposetoló.” Fakaafeʻi ʻa e kau akó ke hiki ʻa e foʻi moʻoni ko ʻení ʻi heʻenau tohinoa akó pe ko ha kiʻi fakamatala ʻi heʻenau folofolá. Te ke lava foki ʻo tohi ʻeni ʻi he palakipoé.

ʻI he “Ko e Kalaisi Moʻuí: Ko e Fakamoʻoni ʻa e Kau ʻAposetoló,” ʻoku tau ako ai:

Ko [Sīsū Kalaisi] naʻá Ne fakatupu ʻa e māmaní ʻi he fakahinohino ʻa ʻEne Tamaí. (“Ko e Kalaisi Moʻuí: Ko e Fakamoʻoni ʻa e Kau ʻAposetoló,” ChurchofJesusChrist.org)

ʻOku ʻi he Sēnesi 1 ha niʻihi ʻo e ngaahi fakaikiiki fekauʻaki mo hono fakatupu ʻe Sīsū Kalaisi ʻa e māmaní. Lau ʻa e fakamatala ki he ʻuluaki vahaʻataimi fakatupu ʻe ono mei he Sēnesi 1, ʻo kumi ʻa e meʻa ʻoku tau ako fekauʻaki mo e Tupuʻangá mo e fakatupú.

ʻI hono ako ʻe he kau akó ʻa e ngaahi veesi ko ʻení, te ke lava ʻo fakaafeʻi kinautolu ke nau kumi pea fakaʻilongaʻi ʻa e “ʻaho” takitaha ʻo e Fakatupú ʻi heʻenau folofolá. Ko e founga ʻe taha ke fai ai ʻení ko hono hiki ʻa e saati ko ʻení ʻi he palakipoé pea ʻoange ha taimi ki he kau akó ke fakakakato ia. Te ke lava ʻo vahevahe ʻa e kau akó ki ha fanga kiʻi kulupu iiki ange pea vahe ki he kulupu takitaha ha ngaahi veesi ke nau ako mei he sātí.

ʻE ala tokoni ke fakamatalaʻi ange ʻoku ʻuhinga ʻa e foʻi lea “ʻahó” ki ha vahaʻataimi ʻo e fakatupú, kae ʻikai ko ha vahaʻataimi pau (vakai, ʻĒpalahame 4, ʻa ia ʻoku fakahingoa ai ʻa e ngaahi vahaʻataimi fakatupú ko e “ko hono tuʻo …”). Fakatokangaʻi ange: ʻE loloto ange ʻa e ako ki hono fakatupu ʻo e tangatá mo e fefiné ʻi he ongo lēsoni “Sēnesi 1:26–27” mo e “Sēnesi 1:28–2:25.”

Tokanga ke ʻoua naʻa fuʻu fuoloa ʻa e konga ko ʻeni ʻo e lēsoní koeʻuhí ke maʻu ʻe he kau akó ha taimi feʻunga ke tokanga taha ki he konga ʻoku ui “Ko e fatongia ʻo e Fakamoʻuí ko e Tupuʻangá.”

ʻAho 1: Sēnesi 1:1–5	Vaheʻi ʻa e māmá mei he fakapoʻulí
ʻAho 2: Sēnesi 1:6–8
ʻAho 3: Sēnesi 1:9–13
ʻAho 4: Sēnesi 1:14–19
ʻAho 5: Sēnesi 1:20–23
ʻAho 7: Sēnesi 1:24–27

Ko e hā ha ngaahi fakakaukau pe ongo ʻokú ke maʻu ki he Tamai Hēvaní mo Sīsū Kalaisi ʻi hoʻo ako ʻa e ngaahi veesi ko ʻení?

Mahalo ʻe ʻi ai ha ngaahi fehuʻi ʻa e kau akó fekauʻaki mo ha niʻihi ʻo e ngaahi fakaikiiki ʻo e Fakatupú. Tokoni ke mahino kiate kinautolu ʻoku ʻikai fakataumuʻa ʻa e ngaahi fakamatala ʻo e Fakatupú ke ʻomi ha fakamatala moʻoni fakasaienisi ʻo e ngaahi foungá, vahaʻataimí, pe ngaahi meʻa pau naʻe hokó. Mahalo ʻe tokoni ke lau ʻa e Tokāteline mo e Ngaahi Fuakava 101:32–34 pea fakapapauʻi ki he kau akó ʻe fakahā ʻe he Fakamoʻuí ʻa e meʻa kotoa pē ʻi Hono taimí.

Ko e fatongia ʻo e Fakamoʻuí ko e Tupuʻangá

ʻOange ha faingamālie ki he kau akó ke fakaloloto ʻenau houngaʻia ʻia Sīsū Kalaisi ko e Tupuʻangá. Ko e founga ʻe taha ke fai ai ʻení ko hano tā ha fakatātā ʻo e māmaní ʻi he palakipoé pea fakaʻaliʻali ʻa e ngaahi potufolofola ko ʻení ke ako ʻe he kau akó. Te ke lava ʻo fakaafeʻi kinautolu ke ako ha niʻihi pe kotoa ʻo e ngaahi vēsí pea nau omi ki he palakipoé ke hiki ha ngaahi kupuʻi lea mahuʻinga ne nau maʻu takatakai ʻi he fakatātā ʻo e māmaní.

ʻI hono ako ʻe he kau akó ʻa e ngaahi veesi ko ʻení, fakaafeʻi kinautolu ke nau tokanga makehe ki he founga ʻe lava ke fakamoʻoniʻi ai ʻe he Laumālié kiate kinautolu ʻa e fatongia ʻo e Fakamoʻuí ko e Tupuʻangá.

Fili ha taha ʻo e ngaahi veesi ko ʻení pe ha ngaahi veesi lahi ange ke ke ako, ʻo kumi ʻa e ngaahi akonaki te ne lava ʻo fakalahi hoʻo mahino mo e houngaʻia ʻia Sīsū Kalaisi ko e Tupuʻangá.

ʻAlamā 30:43–44

Tokāteline mo e Ngaahi Fuakava 38:1–3

Tokāteline mo e Ngaahi Fuakava 59:18–20

Tokāteline mo e Ngaahi Fuakava 76:22–24

Mōsese 1:33, 39

Mōsese 6:63

Fakaafeʻi ʻa e kau akó ke vahevahe ʻenau ngaahi fakakaukaú. Ko e founga ʻe taha te ke lava ʻo fai ai ʻení ko hano fakaʻaliʻali ʻa e ngaahi fehuʻi ko ʻení ke aleaʻi ʻe he kau akó.

Ko e hā ha ngaahi foʻi lea pe kupuʻi lea mahuʻinga mei he ngaahi veesi naʻá ke akó? Ko e hā hono ʻuhingá?
Ko e hā ha meʻa naʻe tokoni ʻa e ngaahi veesi ko ʻení ke ke ako pe ongoʻi fekauʻaki mo e Tamai Hēvaní mo Sīsū Kalaisí?

Fakahaaʻi hoʻo houngaʻia ki he Tupuʻangá

ʻOku fakataumuʻa ʻa e konga ko ʻeni ʻo e lēsoní ke tokoniʻi ʻa e kau akó ke fakahaaʻi ʻenau ʻofa mo e loto-houngaʻia kia Sīsū Kalaisi koeʻuhí ko Hono fatongia ko e Tupuʻangá. Ke tokoni ke nau fai ʻení, fakakaukau ke fakaʻaongaʻi ha ʻekitivitī ʻe taha pe lahi ange mei he ngaahi ʻekitivitī ko ʻení. Te ke lava ʻo fakaʻaliʻali ʻa e ngaahi meʻa ʻokú ke filí pea fakaafeʻi ʻa e kau akó ke nau fili ha meʻa ʻe taha ke fakakakato.

Hiki ha foʻi maau pe tohinoa ʻokú ne fakahaaʻi ha loto-houngaʻia kia Sīsū Kalaisi mo ʻEne ngaahi fakatupú.
Tā ha fakatātā ʻokú ne fakafofongaʻi hoʻo ngaahi ongo ki he Fakamoʻuí mo ʻEne ngaahi fakatupú.
Fili ha himi ʻoku fekauʻaki mo e Fakamoʻuí mo ʻEne ngaahi fakatupú. Ako ʻa e ngaahi lea ki he hivá. Te ke lava ʻo kumi ʻa e “Sīsū Kalaisi—Ko e Tupuʻangá” ʻi he konga Tefito ʻo e tohi himí. Te ke lava ʻo hiki ha veesi ʻe taha ki he himí ʻokú ne fakahaaʻi hoʻo ngaahi ongo fekauʻaki mo e Tamai Hēvaní, Sīsū Kalaisi, pea mo e Fakatupú.

Ngaahi Maʻuʻanga Tokoni Kehé

ʻE tokoniʻi fēfē au ʻe he Fakamoʻuí koeʻuhí ko Ia ʻa e Tupuʻangá?

Naʻe fakaʻaongaʻi ʻe Palesiteni Poiti K. Peeka (1924–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e talanoa ko ʻení ke fakamamafaʻi ʻa e mālohi ʻo e fatongia ʻo e Fakamoʻuí ko e Tupuʻangá.

ʻI he ngaahi taʻu kuohilí, ʻi heʻeku feinga ke hanganoá, kuó u tā tongitongi ai ha fanga manupuna papa. Taimi ʻe niʻihi, naʻe faʻa aʻu ʻo taʻu ʻe taha hono tā tongitongi ha foʻi manupuna ʻe tahá. Te u ʻomai ha kiʻi manupuna pea fua hono ngaahi fulufulú pea vakavakaiʻi hono ngaahi lanú peá u tā tongitongi leva kinautolu. Te u tā tongitongi ha nofoʻanga maʻanautolu. Naʻe fakanonga ʻaupito. ʻI he taimi ʻe niʻihi ne u taʻefiemālie aí, ʻe pehē mai hoku uaifí, “Mahalo ʻoku sai ke ke ʻalu ʻo tā tongitongi ha foʻi manupuna!” Ko ha meʻa fakanonga moʻoni ia ʻi heʻeku moʻuí.

Ne ʻi ai ha ʻaho ʻe taha ne u ʻalu ai mo ʻEletā A. Fiotoa Tatolo ki kolo. Naʻe ʻia au ha taha ʻo e ngaahi tā tongitongí. Naʻá ku ʻalu mo iá ke fakaʻaliʻali ki ha taha. Ne ma tuku ia ʻi he sea muí. ʻI ha mangafā ʻe taha, naʻe moloki ʻe [ʻEletā Tatolo] ʻa e taʻofí pea tō ʻa e tā tongitongí ki he falikí ʻo movete. Naʻá ne afe ki he tafaʻakí ʻo ne vakaiʻi. Naʻá ne loto-mamahi ʻaupito. Naʻe ʻikai ke u loto-mamahi au.

Naʻe ʻikai ke u tokanga ki ai, peá u pehē ange, “Sai pē ia. Ko au naʻá ku taá. Te u lava ʻo fakaleleiʻi ia.” Pea ne u fai ia. Naʻá ku ngaohi ia ke fefeka ange ʻi he tuʻunga naʻe ʻi aí. Naʻá ku fakaleleiʻi ia ʻo toe kiʻi lelei ange. …

ʻOku ʻikai ha meʻa ʻi heʻete moʻuí ʻe ngaofe pe maumau ʻe taʻe malava [ʻe Sīsū Kalaisi] ʻo ngaohi pea mo fakaleleiʻi. Kuo pau ke ke fai ha fili. Kapau kuo fai ʻe hamou niʻihi ha ngaahi fehalaaki peá ke pehē kuó ke heva atu pea ʻikai lava ke toe fakafoki mai, ta ʻoku ʻikai ke ke ʻiloʻi ʻe koe ʻa e tokāteline ʻo e Siasí. ʻOku ʻikai ke ke ʻilo ʻa e taumuʻa ʻo e Fakaleleí pea ko hai ʻa e ʻEikí pea mo Hono mālohi ʻi hoʻo moʻuí. (“The Instrument of Your Mind and the Foundation of Your Character” [fakataha lotu ʻa e ʻUnivēsiti Pilikihami ʻIongí, 2 Fēpueli, 2003])

Ko e hā hotau fatongia ʻi hono tokangaʻi ʻa e ngaahi fakatupu ʻa e ʻOtuá?

Naʻe akoʻi ʻe Pīsope Sēlati Kōsei ʻo e Kau Pīsopeliki Pulé:

12:17

ʻI heʻetau hoko ko e kau tauhi ʻo e ngaahi fakatupu ʻa e ʻOtuá, ʻoku ʻi ai hotau fatongia ke fakaʻapaʻapaʻi mo tokangaʻi kinautolu.

ʻI heʻetau hoko ko e fānau ʻa e ʻOtuá, ʻoku tau maʻu ʻa e fatongia ko e kau tauhi, tokangaʻi, mo e kau maluʻi ʻo ʻEne ngaahi fakatupu fakalangí. …

ʻOku fakangofua kitautolu ʻe heʻetau Tamai Hēvaní ke fakaʻaongaʻi ʻa e ngaahi naunau ʻi he māmaní fakatatau ki heʻetau tauʻatāiná. ʻI he taimi tatau ʻoku ʻikai totonu ke tau pehē ai ʻoku tau maʻu ʻa e ngofua ke ngāue ʻaki pe fakaʻaongaʻi taʻe-fakapotopoto pe taʻe-fakangatangata ʻa e ngaahi koloa ʻo e māmaní. …

Naʻe pehē ‘e Palesiteni Lāsolo M. Nalesoni: “Ko e hā te tau fai ʻi heʻetau maʻu e ngaahi monūʻia ʻo e Fakatupu fakalangí? ʻOku totonu ke tau tokangaʻi ʻa e māmaní, hoko ko ha kau tauhi fakapotopoto ki ai, pea fakatolonga ia maʻá e ngaahi toʻu tangata ʻo e kahaʻú.” (Liahona, Siulai 2000, 104)

Makehe mei heʻene hoko ko ha fiemaʻu fakasaienisi pe fakapolitikale, ko hono tokangaʻi ʻo e māmaní mo hotau ʻātakai fakanatulá ko ha fatongia toputapu kuo fakafalala mai ʻe he ʻOtuá kiate kitautolu, ʻoku tonu ai ke tau ongoʻi moʻoni ʻa e fatongiá pea ʻi he loto-fakatōkilalo. Ko ha konga mahuʻinga foki ia ʻo hotau tuʻunga fakaākongá. Te tau fakaʻapaʻapa mo ʻofa fēfē ki he Tamai Hēvaní mo Sīsū Kalaisi kae ʻikai fakaʻapaʻapaʻi mo ʻofaʻi ʻEna ngaahi fakatupú? (“Ko Hotau Fatongia Tauhi ʻi he Māmaní,” Liahona, Nōvema 2022, 57–58)

Te u maʻu ʻi fē ʻa e tali ki he ngaahi fehuʻi fekauʻaki mo e fakatupú?

“What does the Church believe about evolution?,” New Era, Oct. 2016, 41

“What does the Church believe about dinosaurs?,” New Era, Feb. 2016, 41

“The Origin of Man,” Improvement Era, Nov. 1909, 78, Ensign, Feb. 2002, 29

“Fakatupú,” Ngaahi Tefitó mo e Ngaahi Fehuʻí ChurchofJesusChrist.org

Ngaahi ʻEkitivitī Fakalahi ki he Akó

Ngaahi fakamatala fakafolofola kehe ki he Fakatupú

Mahalo ʻe tokoni ke fakaafeʻi ʻa e kau akó ke nau fekumi ʻi he ngaahi fakamatala kehe ʻo e Fakatupú pea tānaki atu ki heʻenau ako ʻa e Sēnesi 1:1–25. Fakakaukau ke hiki ʻa e Mōsese 2:1–25 mo e ʻĒpalahame 4:1–25 ʻi he palakipoé. Vaeua ʻa e kalasí pea fakaafeʻi ʻa e vaeua takitaha ke ako ha taha ʻo e ngaahi potufolofolá, ʻo fakaʻilongaʻi ʻa e ngaahi foʻi lea mo e kupuʻi lea ʻokú ne fakalahi ʻenau mahino ki he founga fakatupú. Hili iá, ʻe lava ke vahevahe ʻe he kau akó ʻa e meʻa ne nau maʻú mo e vaheua ʻe taha ʻo e kalasí.

Saienisí mo Hono Maʻu ʻo e ʻIlo Fakalaumālié

Ke tokoni ki he kau akó ke nau akoako tali ʻa e ngaahi fehuʻi ʻoku nau maʻu pe ko ha niʻihi kehe fekauʻaki mo e Fakatupú, fakakaukau ke ʻoange ʻa e tūkunga ko ʻení pe ko ha meʻa tatau mo ia. Fakaafeʻi ʻa e kau akó ke nau fakafonu atu ʻa e ngaahi fakaikiiki ʻokú ne ʻai ʻa e tūkungá ke felāveʻi mo e ngaahi hohaʻa ʻoku nau maʻu pe te nau fehangahangai mo ia mei he niʻihi kehé. Hili iá, fakaafeʻi ʻa e kau akó ke fakaʻaongaʻi ʻa e ngaahi tefitoʻi moʻoni ki hono Maʻu ʻo e ʻIlo Fakalaumālié ke tali ʻa e ongo fehuʻí.

ʻOku vahevahe ʻe hoʻo kaungāmeʻa ko Lolenisoú naʻá ne ako ʻi he kalasi saienisí ha ngaahi meʻa ʻe niʻihi ʻoku ʻikai fenāpasi mo e meʻa naʻá ne lau ʻi he Sēnesi 1.

Ko e hā ha ngaahi moʻoni ʻoku tau ʻilo ʻe ala tokoni kia Lolenisou?
Ko e hā ha ngaahi maʻuʻanga tokoni kuo fokotuʻu fakalangi te ke vahevahe ʻe ala tokoni kia Lolenisou ke ne maʻu ha fakakaukau ʻoku taʻengatá pea ngāue ʻi he tuí?

Te ke lava ʻo fekau ʻa e kau akó ke vakai ki he ngaahi kupuʻi lea mo e ngaahi fakamatala ʻoku maʻu ʻi he “Ngaahi Maʻuʻanga Tokoni Kehé” mo e ngaahi potufolofola hangē ko e Tokāteline mo e Ngaahi Fuakava 101:32–34.

ʻOku fakamoʻoni ʻa e ngaahi meʻa kotoa pē kia Kalaisi

Ke tokoni ke mahino ki he kau akó ʻa e founga ʻoku fakamoʻoni ai ʻa e ngaahi fakatupu ʻo e māmani ko ʻení kia Sīsū Kalaisí, te ke lava ʻo fakaafeʻi kinautolu ke nau lau mo fakaʻilongaʻi ʻa e Mōsese 6:63. Tuku leva ke hiki ʻe he kau akó ʻi he palakipoé ha niʻihi ʻo e ngaahi fakatupu ʻo e māmaní. ʻI haʻanau ngāue mo ha hoa pe ʻi ha fanga kiʻi kulupu iiki, ʻe lava ke fili ʻe he kau akó ha meʻa mei he palakipoé pea aleaʻi ʻa e founga ʻoku fakamoʻoni ai kia Sīsū Kalaisí. Kapau ʻoku fiemaʻu ʻe he kau akó ha fakahinohino lahi ange, te ke ala fakaʻaongaʻi ha sīpinga hangē ko ha siolaʻā ʻoku ngaʻunu ke muimui ʻi he laʻaá lolotonga ʻa e ʻahó. ʻOku totonu ke tau fakapapauʻi maʻu pē ʻoku tau muimui kia Sīsū Kalaisi ko e tupuʻanga ʻo e maama kotoa pē.

Ke maʻu ha ngaahi fakakaukau lahi angé, te ke lava ʻo huluʻi ha taha ʻo e ngaahi fokotuʻu fakavitiō ʻi laló.

Ngaahi vitiō ke fili mei aí

ʻE lava ke fakaʻaongaʻi ʻa e ngaahi vitiō ko ʻení ke tokoni ke ongoʻi ʻe he kau akó ʻa e fakaʻofoʻofa mo e fakaʻeiʻeiki ʻo e māmaní mo ha loto-houngaʻia ʻi he ngaahi fakatupu ʻa e ʻOtuá.

“The Creation of the Earth” (2:05)

2:9

“Our Home” (1:34)

1:35

“Good to Be Alive” (3:30)

3:31

“The Creation” (5:14)

5:14

“ʻE ʻOtua ko e Tapuhā” (5:07)

5:8