Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻĒseta, Konga 1: Koeʻuhí ko ha Kuonga Peheni

“ʻĒseta, Konga 1: Koeʻuhí ko ha Kuonga Peheni,” Fuakava Motuʻá – Tohi Lēsoni ʻa e Faiako Seminelí (2026)

“ʻĒseta, Konga 1: Koeʻuhí ko ha Kuonga Peheni,” Fuakava Motuʻá – Tohi Lēsoni ʻa e Faiako Seminelí

ʻĒseta: Lēsoni 94

ʻĒseta, Konga 1

Ki ha Taimi Hangē ko ʻEní

Mormon Messages: Having Courage & Trusting the Lord: Stand Up for What You Believe In

Kuó ke fifili nai ki he ʻuhinga kuo ʻomi ai koe ʻe he Tamai Hēvaní ki he feituʻú ni, ʻi he taimi ko ʻení, pea ko e hā ʻEne ngāue ke ke faí? Mahalo naʻe maʻu ʻe ha fefine Siu ka ko ha paea ko hono hingoá ko ʻĒseta ha ngaahi fehuʻi tatau. Naʻe hanga ʻe he nofo pōpula ʻa ʻĒseta ʻi Peasiá ʻo fokotuʻu ia ʻi ha tuʻunga ke tokoni ki he ʻEikí ʻi hono fakahaofi Hono kakaí, ʻa e kau Siú. ʻE lava ke tokoni ʻa e lēsoni ko ʻení ke fakatokangaʻi ʻe he kau akó ʻa e founga ʻoku fokotuʻu ai kitautolu ʻe he Tamai Hēvaní ʻi ha ngaahi tūkunga ke tokoni kiate Ia ʻi hono fakahoko ʻEne ngāué.

Teuteu ʻa e tokotaha akó: Fakakaukau ke kole ki he kau akó ke nau fakalaulauloto ʻi he faʻa lotu ki he founga ʻe lava ke fakahoko ai ʻe he Tamai Hēvaní ʻEne ngāué ʻo fakafou ʻiate kinautolu ʻi he kalasi semineli ko ʻení pe ko honau uōtí pe koló, ʻapiakó, feituʻú, pe fāmilí

Ngaahi ʻEkitivitī Ako ʻOku Ala Fakahokó

Palani fakalangí

Fakakaukau ke kamata e kalasí ʻaki hano fakaʻaliʻali ha papa veimau mo ha ʻū pate pe ko ha fakatātā ʻo ha veimau. Fakaafeʻi e kau akó ke vahevahe e meʻa ʻoku nau ʻilo fekauʻaki mo e vaʻinga veimaú. Kapau ʻe fiemaʻu, fakamatalaʻi ange ʻoku fakahoko ʻa e vaʻingá ʻi he taimi ʻoku hiki ai ʻe he kau vaʻingá ʻenau paté ki ha ngaahi tuʻunga mahuʻinga ke ikuna ʻa e vaʻingá. Te ke lava ʻo fehuʻi ki he kau akó pe ʻoku nau pehē ko e hā e meʻa ʻokú ne ʻai ha tokotaha ke ne hoko ʻo taukei ʻi he vaʻinga veimaú. Kapau he ʻikai tala atu ia ʻe he kau akó, fakakaukau ke vahevahe ange ʻoku tomuʻa mapeʻi ʻe he kau vaʻinga taukeí ʻenau ngaahi ngaʻunú ʻi he hokohoko atu e vaʻingá. Hili iá, te ke lava ʻo kole ki he kau akó ke nau fakakaukau ki he founga ʻe lava ke hangē ai ʻetau moʻuí ko ha vaʻinga veimaú, ʻo vahevahe e fakamatala ʻa ʻEletā Lasipení.

Naʻe akoʻi ʻe ʻEletā Lānolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku hangē ʻetau moʻuí ko ha papa veimau, ʻo ʻunuakiʻi kitautolu ʻe he ʻEikí mei he feituʻu ʻe taha ki ha feituʻu ʻe taha—kapau ʻoku tau talangofua ki he ueʻi ʻa e laumālié. ʻI heʻetau sio ki he kuohilí, te tau lava ʻo mamata ki Hono toʻukupú ʻi heʻetau moʻuí. (“ʻI ha Palani Fakalangi,” Liahona, Nōvema 2017, 55)

ʻOkú ke pehē ko e hā e ʻuhinga ka faingofua ange ai ke fakatokangaʻi ʻa e ivi tākiekina ʻo e ʻOtuá ʻi heʻetau moʻuí ʻi heʻetau vakai ki he kuohilí, kae ʻikai ko e taimí ni?

ʻOku fakahaaʻi ʻe he talanoa kia ʻĒsetá ʻa e founga naʻe fokotuʻu ai ʻe he ivi tākiekina ʻo e ʻOtuá ʻi he moʻui ʻa ʻĒsetá ke ne ʻi ha tuʻunga ke fakahoko ai ʻEne ngāué. Te ke ako ʻi he lēsoni ko ʻení ʻa e konga ʻuluaki ʻo e talanoa ko ʻení. ʻI hoʻo akó, fekumi ʻi he faʻa lotu ki he Laumālie Māʻoniʻoní ke tokoniʻi koe ke ke ʻiloʻi ʻa e founga ʻe ala fokotuʻu ai ʻe he Tamai Hēvaní koe ʻi ha ngaahi tuʻunga ke tokoni kiate Ia ke fakahoko ʻEne ngāué.

Koeʻuhí ko ha kuonga peheni

Hili hono ikunaʻi ʻe he kakai Peasiá ʻa Pāpiloné, naʻe nofo ha kau Siu tokolahi ʻi Peasia, kau ai ʻa ʻĒseta mo hono tauhi ko Motekiaí. Naʻe kamata ke taʻefiemālie ʻa e tuʻi ʻo Peasia ko ʻAhasiveló ʻi hono uaifi ko Vāsití, peá ne fekauʻi ia ke ne mavahe (vakai, ʻĒseta 1:1–12). ʻI hono kumi ʻe ʻAhasivelo hano mali foʻoú, naʻá ne ʻomi ʻa e kakai fefine kotoa pē ʻo Peasiá ki hono ʻaó (vakai, ʻĒseta 2:1–4).

Ke tokoni ke mahino ki he kau akó e talanoa ʻo ʻĒsetá, te ke lava ʻo fokotuʻutuʻu e kau akó ki ha fanga kiʻi kulupu iiki ke ako ha taha ʻo e ngaahi konga folofola ko ʻení. Fakaafeʻi e ngaahi kulupú ke fakamatalaʻi fakanounou ʻenau konga ʻo e talanoá ki he kalasí. Mahalo te ke fie fakakaukau ki ha founga mālie ʻe lava ke fakamatalaʻi fakanounou ai ʻe he kau akó ʻenau talanoá. Te nau lava ʻo tā ha fakaʻilonga ʻi ha laʻipepa ke fakafofongaʻi ʻa e talanoá (hangē ko ʻení, ko ha kalauni pe veili mali, ko ha foʻi mama fakatuʻi, ko ha heletā, pe ko ha kiʻi fakatātā [emoji] ʻoku tangi). ʻE lava ke fakatātaaʻi ʻe he kau akó ʻa e talanoá lolotonga hono lau ia ʻe he niʻihi kehé.

Lau hoʻo potufolofola ne vahe atú ʻo kumi e ngaahi tūkunga faingataʻa naʻe fehangahangai mo ʻĒseta mo Motekiaí.

ʻĒseta 2:5–11, 15–17

ʻĒseta 3:1–13

ʻĒseta 4:1–9

ʻI he vahevahe ʻa e kau akó, feinga ke ke ʻiloʻi ʻa e taimí ke ʻoua naʻa fakamoleki ʻe he kau akó ha taimi lōloa ke fakamatalaʻi fakanounou ai ʻa e ngaahi talanoa ko ʻení.

ʻOkú ke pehē ko e hā e ongo naʻe maʻu ʻe he Tamai Hēvaní mo Sīsū Kalaisi fekauʻaki mo e ngaahi meʻa naʻe hoko ʻi he ngaahi veesi ko ʻení? Fekauʻaki mo Motekiaí? Fekauʻaki mo ʻĒsetá?

Lau ʻa e ʻĒseta 4:10–14, ʻo kumi e founga naʻe tokoniʻi ai ʻe Motekiai ʻa ʻĒseta ke ne ʻiloʻi ʻa e ivi tākiekina naʻe maʻu ʻe he Tamai Hēvaní ʻi he ngaahi tūkunga ʻo ʻene moʻuí.

Mahalo te ke fiemaʻu ke fakaʻilongaʻi ʻe he kau akó ʻa e fehuʻi “ko hai ʻokú ne ʻiloʻi naʻa kuó ke hoko ai koe ki he puleʻangá koeʻuhí ko ha kuonga peheni?” (veesi 14).

Naʻe fakamoʻoni ʻa ʻEletā Lasipeni ʻoku tākiekina ʻe he ʻOtuá ʻa e ngaahi tūkunga ʻo ʻetau moʻuí ke fakahoko ʻEne ngāué.

ʻOku ou ʻilo ʻe ʻunuakiʻi kitautolu ʻe he ʻEikí ki ha feituʻu ʻe taha ke fai ʻEne ngāué. Ko hono moʻoní, ko e meʻa ko ia ʻoku ngali naʻe hoko fakatuʻupakeé, ʻoku ʻafioʻi ia ʻe ha Tamai Hēvani ʻofa, he ʻokú ne lava ʻo lau e louʻulu he foʻi ʻulu kotoa pē. Naʻa mo ha manupuna ʻoku tō ki he kelekelé, ʻoku afioʻi ia ʻe heʻetau Tamaí. ʻOku kau ʻa e ʻEikí ʻi he ngaahi meʻa iiki ʻo ʻetau moʻuí, pea teuteuʻi kitautolu ʻe he ngaahi meʻa mo e faingamālie ko iá ke langaki hotau fāmilí mo e niʻihi kehé, ʻi heʻetau langa e puleʻanga ʻo e ʻOtuá ʻi he māmaní. …

ʻOku lava ke tuku kitautolu ʻe he Tamai Hēvaní ʻi ha tūkunga koeʻuhi ko ha taumuʻa pau. Kuó Ne fai ia ʻi heʻeku moʻuí, pea pehē foki kiate kimoutolu. (“ʻI ha Palani Fakalangi,” Liahona, Nōvema 2017, 55–56)

Ko e hā ha ngaahi moʻoni te tau lava ʻo ako fekauʻaki mo e Tamai Hēvaní mei he fakamatala kia ʻĒsetá mo ʻEletā Lasipení?

ʻI hono vahevahe ʻe he kau akó ʻenau ngaahi talí, hiki ha foʻi moʻoni ʻi he palakipoé ʻo fakaʻaongaʻi e ngaahi lea ʻa e kau akó hangē ko e ʻoku fokotuʻu kitautolu ʻe he Tamai Hēvaní ʻi ha ngaahi tūkunga te tau lava ai ʻo tokoni ke fakahoko ʻEne ngāué.

Fakatokangaʻi ange: ʻE ako ʻa e loto-toʻa ʻa ʻĒseta ke ʻalu ki he ʻao ʻo e tuʻí ke fakahaofi hono kakaí ʻi he Lēsoni 95: “ʻĒseta, Konga 2.”

Ko hono ʻiloʻi e fakahinohino ʻa e Tamai Hēvaní

Kuo foaki fēfē atu ʻe he ʻEikí kiate koe pe ko ha taha ʻokú ke ʻilo ha faingamālie ke hoko ko ha meʻangāue ʻi Hono toʻukupú?

Fakakaukau ke vahevahe ha aʻusia kuó ke fakatokangaʻi ai ha ngaahi faingamālie kuo foaki atu ʻe he Tamai Hēvaní ke ke tokoni ke fakahoko ʻEne ngāué.

Ke tokoni ki he kau akó ke nau fakakaukau ki he founga kuo tuku ai kinautolu ʻe he Tamai Hēvaní ʻi ha ngaahi tūkunga ke fakahoko ʻEne ngāué, te ke lava ʻo ʻoange ha taimi ke nau fakalaulauloto fakalongolongo ai ki heʻenau ngaahi tali ki he fehuʻi ko ʻení. ʻE lava ke nau lekooti ʻenau ngaahi fakakaukaú ʻi heʻenau tohinoa akó.
ʻOkú ke pehē ʻe fakamatalaʻi fēfē koe ʻe he lea ʻa Motekiai ʻi he veesi 14?

Kapau ʻokú ke ongoʻi ʻoku fiemaʻu ʻe he kau akó ha tokoni lahi ange ke fakatokangaʻi ʻa e ngaahi faingamālie ko ʻení ʻi heʻenau moʻuí, te ke lava ʻo ʻai ke fakakakato ʻe he kau akó ʻa e ʻekitivitī ko ʻení.

Hiki ʻi hoʻo tohinoa akó ʻa e hingoa ʻo ha taha ʻi hoʻo moʻuí (fāmili, ʻapiako, siasi, pe ko ha toe feituʻu kehe). Hili iá peá ke tali ha taha ʻo e ngaahi meʻá ni ʻi hoʻo tohinoá.

Ko e hā ha fakamoʻoni kuó ke mamata ai kuo tuku mai ʻe he Tamai Hēvaní ʻa e tokotaha ko iá ki hoʻo moʻuí “koeʻuhí ko ha kuonga peheni?” (ʻĒseta 4:14)?
Ko e fē ha taimi kuó ke mamata ai ki hono tuku koe ʻe he toʻukupu ʻo e ʻEikí ke ke feohi mo ha kakai pau pe ʻi ha ngaahi tūkunga pau “koeʻuhí ko ha kuonga peheni?” (ʻĒseta 4:14)?

Fakakaukau ke fakaafeʻi ha kau ako ʻe loto-fiemālie ke vahevahe ʻa e meʻa ne nau tohí mo e kalasí, ʻo ka taau ke fai ia. ʻE lava ke ke poupouʻi e kau akó ke ngāueʻi ha faʻahinga ueʻi fakalaumālie pē kuo nau maʻu lolotonga ʻa e lēsoní.

Ngaahi Maʻuʻanga Tokoni Kehé

ʻOku ngāue fakataha fēfē ʻa e ivi tākiekina fakalangi ʻo e ʻEikí mo e tefitoʻi moʻoni ʻo e tauʻatāina ke filí?

Naʻe fakamanatu mai ʻe Sisitā Uenitī W. Nalesoni:

Siʻoku ngaahi kaungāmeʻa kei talavou, naʻe ʻomi hota tufakangá ʻi he maama fakalumālié ko ha misiona fakaʻofoʻofa ke ta fakahoko lolotonga ʻeta ʻi he māmaní.

ʻOkú ta maʻu ha ngaahi faingamālie ke fakahoko hota misiona fakamatelié, ka ʻoku ʻikai ko ha tuʻutuʻuni ia. He ʻikai fakakounaʻi kitaua ʻe ha taha. ʻOkú ta maʻu ʻa e tauʻatāina ke fili ʻa e founga ke fakamoleki ai hota taimí mo e iví, tālenití mo e ngaahi maʻuʻanga tokoní. Ko hono moʻoní, ko e meʻa ko ia te ta fili ke faí ko ha konga ia hota siviʻí.

Ko e filí ʻoku ʻataua ia ke fai. Te ta fili nai ke fai ʻa e meʻa kotoa pē ke fakahoko ai e misiona fisifisimuʻa ko ia naʻe ʻuhinga ai hono ʻomi kitaua ki he māmaní? …

Siʻoku kāinga ʻofeina, ko e ngaahi ʻaho fakaʻosí moʻoni ʻeni! Kuo teʻeki ai ha taimi peheni ʻi he hisitōlia ʻo e māmani ko ʻení. [Teʻeki] ʻAupito! Naʻá ta tukupā ʻi he maama fakalaumālié ke ta fakahoko ha ngāue maʻongoʻonga ʻi he māmaní. Pea ʻi he tokoni mai ʻa e ʻEikí, te tau lava ke fai ia! (“ʻAmanakiʻanga ʻo ʻIsilelí” [fakataha lotu fakaemāmani lahi ʻa e toʻu tupú, 3 Sune 2018], Gospel Library)

Te u lava fēfē ʻo hoko ko ha meʻangāue ʻi he toʻukupu ʻo e ʻEikí?

Naʻe pehē ʻe ʻEletā Kalosi B. Kotoi ʻo e Kau Palesitenisī ʻo e Kau Fitungofulú:

ʻE kāinga, te ke fie hoko nai ko ha meʻangāue ʻi he toʻukupu ʻa e ʻEikí? Te ke fie hoko nai ko ha taha ʻo e kau ʻāngelo ko ʻení? Ko ha talafekau ne fekauʻi ʻe he ʻOtuá, mei he tafaʻaki ko ʻeni ʻo e veilí, ki ha taha ʻokú Ne hohaʻa ki ai? ʻOkú Ne fiemaʻu koe. ʻOku nau fiemaʻu koe. …

ʻE kāinga, ʻoku ou tui ki he kau ʻāngeló! ʻOku tau ʻi heni kotoa he ʻaho ní, ko ha fuʻu kongakau ʻo ha kau ʻāngelo ne vaheʻi mai ki he ngaahi ʻaho kimui ní, ke ngāue fakaetauhi ki he niʻihi kehé ʻa ia ko hono fakamafao atu ia e toʻukupu ʻofa ʻo e Tupuʻangá. ʻOku ou palōmesi atu kapau te tau loto-fiemālie ke tokoni, ʻe ʻomi ʻe he ʻEikí ha ngaahi faingamālie ke tau hoko ai ko e kau ʻāngelo tauhi. ʻOkú Ne ʻafioʻi ʻa kinautolu ʻoku nau fiemaʻu ha tokoni mei he ʻāngeló, pea te Ne tuku kinautolu ʻi hotau hala fonongá. ʻOku tuku ʻe he ʻEikí ʻa e niʻihi ʻoku nau fiemaʻu ha tokoni mei ha ʻāngeló ʻi heʻetau moʻuí he ʻaho kotoa pē. (“ʻOku ou Tui ki he Kau ʻĀngeló,” Liahona, Nōvema 2020, 87, 88)

Naʻe fakamatalaʻi ʻe ʻEletā Silo Simeili ʻo e Kau Fitungofulú ʻa e founga te tau lava ai ʻo ʻiloʻi lelei ange ʻa e ngaahi faingamālie ke fakahoko ʻa e ngaahi taumuʻa ʻa e ʻEikí:

Hangē ko ia naʻá Ne fai kia ʻĒsetá, ʻoku tuku kitautolu ʻe he ʻEikí ki ha feituʻu te tau lava ʻo tokoni ai ke fakahoko ʻEne ngaahi taumuʻá. ʻI he ʻuhingá ni, kuo pau ke tau mateuteu mo taau ʻi he taimi ʻoku tau fehangahangai ai mo e ngaahi faingamālie ʻokú Ne foaki maí.

ʻOku ʻākilotoa kitautolu ʻe he ngaahi faingamālie ke hoko ko ha meʻangāue ʻi he toʻukupu ʻo e ʻEikí. Ko hotau fatongiá ke mateuteu ke ngāue. ʻOku ʻikai ke tau faʻa ʻilo e taimi pe founga ʻe ʻomi ai e ngaahi faingamālie ko iá. ʻOku fiemaʻu ke tau moʻui taau mo e takaua ʻa e Laumālie Māʻoniʻoní pea maʻu ha loto fie ngāue. Pea ʻe tataki leva kitautolu ʻe he ʻEikí ʻi he meʻa ʻokú Ne finangalo ke tau faí. (“Ko ha Meʻangāue ʻi he Toʻukupu ʻo e ʻEikí,” Liahona, Siulai 2022, 43)

Ngaahi ʻEkitivitī Fakalahi ki he Akó

ʻOku mahuʻinga ʻa e konga takitaha ʻo e pāsoló ki he ʻOtuá

Ke tokoni ke fakatokangaʻi ʻe he kau akó ʻa e konga mahuʻinga te nau lava ʻo fakahoko ʻi he palani ʻa e Tamai Hēvaní, te ke lava ʻo kosi ha fakatātā ki ha ʻū kongokonga pāsolo ke feʻunga ki he tokotaha ako takitaha. Fakaafeʻi e kau akó ke hiki honau ngaahi hingoá ʻi he ʻū konga pāsoló. Hili iá, ʻe lava ke fakakakato ʻe he kau akó ʻa e pāsoló. Te ke lava ʻo fakaafeʻi ha fealēleaʻaki ʻaki ha fehuʻi hangē ko ʻení:

Ko e hā e meʻa ʻoku akoʻi mai ʻe he ʻekitivitī ko ʻení fekauʻaki mo e mahuʻinga ʻo e mēmipa takitaha ʻo e kalasi semineli ko ʻení?

Fakalahi ki he vitiō ʻo e talanoa ʻo ʻĒsetá

ʻI hono ako ʻe he kau akó e talanoa kia ʻĒsetá, mahalo ʻe tokoni ke tānaki atu ki he potufolofolá ʻa e vitiō ʻo e talanoá. Hili hono vahevahe ʻe he ngaahi kulupú ʻenau konga ʻo e talanoa ʻo ʻĒsetá, te ke lava ʻo fakaʻaliʻali ʻa e ngaahi konga ko ʻeni ʻo e “Koeʻuhí Ko Ha Kuonga Peheni”:

Konga 1: Taimi 00:00 ki he 01:50.

Konga 2: Taimi 01:51 ki he 05:08.

Konga 3: Taimi 05:09 ki he 11:10.

13:55

Ko e fakaʻosinga ʻo e talanoa ʻo ʻĒsetá (taimi 11:10 ki he 13:44 ʻe akoʻi ia ʻi he Lēsoni 95: “ʻĒseta, Konga 2”).

Niʻihi kehe naʻe fekauʻi mai ke tokoni ki he ʻEikí ʻi hono fakahoko ʻEne ngāué

ʻE ala ʻaonga ki he kau akó ʻenau vakai ki ha ngaahi sīpinga fakafolofola kehe ʻo e toʻukupu ʻo e ʻEikí ʻi he moʻui ʻa e kakaí ke fakahoko ʻEne ngāué. Ko e founga ʻe taha ke fai ai ʻení ko hono fakaafeʻi e kau akó ke fili ha taha mei he folofolá pe hisitōlia ʻo e Siasí ʻa ia ʻoku nau ongoʻi ʻoku fakahaaʻi ʻe heʻene talanoá ʻa e ivi tākiekina fakalangi ʻo e ʻEikí. Kapau ʻoku fiemaʻu ʻe he kau akó ha fakahinohino, te ke lava ʻo fili ha niʻihi ʻo e ngaahi meʻá ni ke vahevahe mo e kau akó:

Lute mo Nāomi: Lute 1:14–19
Faʻē ʻi Salifatí mo ʻIlaisiā: 1 Ngaahi Tuʻi 17:8–16
Kaunangá mo Neamani: 2 Ngaahi Tuʻi 5:1–3
ʻĀpisi mo e kau Leimaná: ʻAlamā 19:16–17
ʻŌliva Kautele mo Siosefa Sāmita: Siosefa Sāmita—Hisitōlia 1:66–67

ʻE lava ke teuteu ʻe he kau akó ha fakaʻaliʻali vitiō nounou ki he tokotaha naʻa nau filí mo e founga ʻoku nau vakai ai ki hono ʻave ʻe he Tamai Hēvaní ʻa e tokotahá ni ki ha ngaahi tūkunga ke fakahoko ʻEne ngāué.

ʻOku fakaafeʻi kitautolu ʻe he ʻEikí ke tau tokoni ki he niʻihi kehé ʻi Hono huafá

Ke tokoni ke ʻilo ʻe he kau akó ʻa e founga te tau lava ai ʻo tokoni ki he ʻEikí ke fakahoko ʻEne ngāué ʻi heʻetau ngāue fakaetauhi ki he niʻihi kehé, te ke lava ʻo huluʻi ʻa e vitiō “One-on-One (Ministering with Love)” mei he taimi 1:21 ki he 5:55.

13:2

ʻOku vahevahe ʻe Palesiteni Nalesoni ha ngaahi sīpinga ʻo e fokotuʻutuʻu fakalangi ʻe he Tamai Hēvaní ʻa ʻene moʻuí ʻi he “Sweet Power of Prayer” (Liahona, May 2003, 8) mei he taimi 4:21 ki he 8:21 pea mo e “Ko ha Tautapa ki Hoku Tuofāfiné” (Liahona, Nōvema 2015, 96) mei he taimi 8:28 ki he 10:52.

16:47

15:34