Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

ʻĒseta, Konga 2: “Kapau Te u Mate Ai, Te u Mate Pē”

“ʻĒseta, Konga 2: ‘Kapau Te u Mate Ai, Te u Mate Pē,’” Fuakava Motuʻá – Tohi Lēsoni ʻa e Faiako Seminelí (2026)

“ʻĒseta, Konga 2: ‘Kapau Te u Mate Ai, Te u Mate Pē,’” Fuakava Motuʻá – Tohi Lēsoni ʻa e Faiako Seminelí

ʻĒseta: Lēsoni 95

ʻĒseta, Konga 2

“Kapau Te u Mate Ai, Te u Mate Pē”

Screenshot from the video Esthers Courage

ʻI heʻetau hoko ko e kau muimui ʻo Sīsū Kalaisí, te tau maʻu kotoa ha ngaahi taimi ʻe fiemaʻu ai ke tau fakahaaʻi ha loto-toʻa, neongo ʻe kehekehe hotau ngaahi tūkungá. Naʻe fakahaaʻi ʻe ʻĒseta ha loto-toʻa ʻi heʻene falala ki he ʻEikí lolotonga ʻene fehangahangai mo e maté kae lava ke fakahaofi hono kakaí. ʻE lava ke tokoni ʻa e lēsoni ko ʻení ki he kau akó ke nau ngāue ʻi he loto-toʻa ke fai e finangalo ʻo e ʻEikí.

Teuteu ʻa e tokotaha akó: Fakaafeʻi e kau akó ke nau teuteu ke vahevahe ha sīpinga ʻo ha taimi naʻe fakahaaʻi ai ʻe ha taha ʻoku nau ʻiloʻi ha loto-toʻa ke fai e finangalo ʻo e ʻEikí

Ngaahi ʻEkitivitī Ako ʻOku Ala Fakahokó

Ko ha ui ki he loto-toʻá

Fakakaukau ke kamata e kalasí ʻaki hano vahevahe ha aʻusia ʻo ha taimi naʻe fakahaaʻi ai ʻe ha taha ha loto-toʻa, hangē ko e talanoa ko ʻení.

Naʻe vahevahe ʻe Palesiteni Tōmasi S. Monisoni ʻa e talanoa ko ʻení:

16:18

Naʻá ku ʻilo ha ngaahi ngāue loto-lahi, ngaahi tōʻonga taʻe-ilifia, mo ha ngaahi sīpinga ʻo e loto-toʻá lolotonga ʻeku ngāue he Tautahi ʻa e ʻIunaiteti Siteití ʻi he Tau Lahi ʻa Māmani Hono II. Ko e taha he ʻikai toe ngalo ʻiate aú ko e loto-toʻa fakalongolongo ʻa ha kauvaka kei taʻu 18—naʻe ʻikai ke tau siasi—[ka] naʻe ʻikai fuʻu fiefia ke lotu. ʻI he kau tangata ʻe toko 250 ʻi he konga kaú, ko ia tokotaha pē naʻe tūʻulutui ʻi hono veʻe mohengá he pō kotoa pē, ko e ngaahi taimi ʻe niʻihi naʻe fai ia ʻi he fakamatalili ʻa e kau houtamakí mo e kau taʻetuí. Naʻe punou hono ʻulú ʻo lotu ki he ʻOtuá. Naʻe ʻikai teitei tuka. Naʻe ʻikai teitei momou. Naʻe loto-toʻa. (“Ke ke Mālohi Peá ke Loto-toʻa,” Liahona, Mē 2014, 67)

Ko hai ʻokú ke fakakaukau ki ai ʻi he taimi ‘okú ke fanongo ai ki he foʻi lea loto-toʻá?
Ko e hā ha ngaahi tūkunga ʻe ala fiemaʻu ai ʻe he toʻu tupu ʻo e Siasí ke fakahaaʻi ʻenau loto-toʻá?

Fakalaulauloto ki ha tūkunga pau, hangē ko e akó, ʻi ʻapi, pe feohi mo ho ngaahi kaungāmeʻá, ʻa ia ʻokú ke ongoʻi ʻe fiemaʻu ai koe ʻe he Tamai Hēvaní ke ke fakahaaʻi ha loto-toʻa ʻoku lahi angé. Hiki e tūkunga ko ʻení ʻi hoʻo tohinoa akó.

ʻI hoʻo ako ki he toenga ʻo e talanoa ʻo ʻĒsetá, fakaafeʻi ʻa e Laumālie Māʻoniʻoní ke tokoni atu ke ke ʻiloʻi ʻa e founga ʻe lava ke tokoniʻi ai koe ʻe he Tamai Hēvaní mo Sīsū Kalaisi ke ke fehangahangai mo e tūkunga ko iá ʻi he loto-toʻa.

Loto-toʻa ʻa ʻĒsetá

Mormon Messages: Having Courage & Trusting the Lord: Stand Up for What You Believe In

Naʻe hoko ʻa ʻĒseta ko e kuini ki he Tuʻi ko ʻAhasivelo ʻo Peasiá. Naʻe fakafisi ʻa e tauhi ʻo ʻĒseta ko Motekiaí ke punou kia Hāmani, ko e faifekau pule ʻa e tuʻí. Naʻe ʻita ʻa Hāmani peá ne maʻu ha ngofua mei he tuʻí ke fakaʻauha ʻa e kau Siu pē ʻi he puleʻangá. Naʻe kole ʻe Motekiai kia ʻĒseta ke kole ha tokoni mei he tuʻí, ʻo talaange mahalo naʻe tuku ia ʻe he ʻOtuá ki he lakanga ko ʻení “koeʻuhí ko ha kuonga peheni” (ʻĒseta 4:14).

Kapau ʻoku fiemaʻu tokoni ʻa e kau akó ʻi hono tali e fehuʻi ko ʻení, te ke lava ʻo fakaafeʻi kinautolu ke lau ʻa e ʻĒseta 4:10–11.

Ko e hā e ʻuhinga ka fiemaʻu ai ha loto-toʻa lahi ke hū ki he tuʻí?

Lau ʻa e ʻĒseta 4:15–17, ʻo kumi e founga naʻe fakahaaʻi ai ʻe ʻĒseta ʻa e loto-toʻá ʻi heʻene teuteu ke hū ki he tuʻí.

Ko e hā ha meʻa ʻoku makehe kiate koe fekauʻaki mo ʻĒseta?
Ko e hā ha ngaahi tefitoʻi moʻoni te tau lava ʻo ako mei he veesi 15–17 ʻa ia ʻe lava ʻo tokoni kiate kitautolu ʻi he taimi ʻoku tau fiemaʻu ai ha loto-toʻá?

Fakamālō ki he kau akó ʻi he ngaahi tefitoʻi moʻoni mahuʻinga naʻa nau vahevahé. Kapau naʻe teʻeki ke ke lave ki ai, te ke lava ʻo tokoniʻi kinautolu ke nau ʻiloʻi ʻa e tefitoʻi moʻoni ko ʻení: ʻI heʻeku falala ki he Tamai Hēvaní mo Sīsū Kalaisí, te Na ʻomi kiate au ha loto-toʻa.
Ko e hā ha fakamoʻoni ʻokú ke vakai ki ai naʻe falala ʻa ʻĒseta ki he ʻEikí? Naʻe tokoni fēfē nai ʻeni kiate iá?

Ngaahi tōʻonga loto-toʻa

ʻE lava ke tokoni e ngaahi potufolofola ko ʻení ke ʻilo ʻe he kau akó ʻa e founga naʻe hokohoko atu ai ke tāpuakiʻi ʻe he ʻEikí ʻa ʻĒseta ʻaki ʻa e loto-toʻá.

Fakakaukau ke vahevahe ʻa e kau akó ki ha ngaahi kulupu iiki pe ngaahi hoa. Vahe ki he kulupu pe hoa takitaha ha taha ʻo e ngaahi potufolofola ko ʻení. Pe ko hono takitaha ako ʻe he kau ako ʻi he kulupu tatau ha taha ʻo e ngaahi potufolofolá pea teuteu ke fevahevaheʻaki.

Ako ha taha ʻo e ngaahi potufolofola ko ʻení, ʻo kumi e founga naʻe fakahaaʻi ai ʻe ʻĒseta ʻa e loto-toʻá.

ʻĒseta 5:1–4. Ko e hū ʻa ʻĒseta ki he ʻao ʻo e tuʻí.
ʻĒseta 7:1–4. Naʻe kau fakataha ʻa ʻĒseta, ko e tuʻí, mo Hāmani ki ha houa kai makehe.
ʻĒseta 8:3–6. Naʻe aleaʻi ʻe ʻĒseta mo e tuʻí ʻa ʻene tuʻutuʻuni ke tāmateʻi ʻa e kau Siú.

Hili iá, pea aleaʻi ʻa e ngaahi fehuʻi ko ʻení:

ʻOku hoko fēfē e ngaahi ngāue ʻa ʻĒsetá ko hano fakahaaʻi ʻa e loto-toʻá?
ʻOkú ke pehē ko e hā e meʻa ʻoku fiemaʻu ke ʻilo ʻe ha taha fekauʻaki mo e ʻOtuá ka ne fai ʻa e fili naʻe fai ʻe ʻĒsetá?

Fakaafeʻi ha kau ako ʻe loto-fiemālie ke vahevahe ʻa e meʻa ne nau aleaʻi mo e kalasí.

ʻI hono tokoniʻi e kau akó ke fokotuʻu ʻa Sīsū Kalaisi ko e uho ʻo ʻenau akó, ʻoku fakaafeʻi ai ʻa e Laumālie Māʻoniʻoní ke fakamoʻoni kiate Ia. ʻE lava ke tokoni ʻeni ki he kau akó ke nau maʻu ha aʻusia fakaako ʻoku fakataautaha mo mālohi ange. Ko e founga ʻe taha ʻe lava ke tau fakahoko ai ʻení ko hono fakafehokotaki e talanoa ʻo ʻĒsetá ki he moʻui mo e sīpinga ʻo Sīsū Kalaisí.

(Ki ha ako lahi ange ki hono tokoniʻi ʻo e kau akó ke fakafehokotaki ʻa e meʻa ʻoku nau akó ki he moʻui mo e sīpinga ʻa Sīsū Kalaisí, vakai, “Fakamamafaʻi ʻa e sīpinga ʻa Sīsū Kalaisí” ʻi he Fakatupulaki ʻa e Ngaahi Taukei ʻa e Faiakó [2022], 5.)

Fakaʻaliʻali ha fakatātā ʻo Sīsū Kalaisi ʻi he palakipoé. Fakakaukau ke ʻeke ha fehuʻi ʻe taha pe fakatouʻosi pē ʻa e ongo fehuʻi ko ʻení.
ʻOku fakamanatu fēfē atu ʻe ʻĒseta kiate koe ʻa e Fakamoʻuí?
Ko e hā ha ngaahi sīpinga mei he moʻui ʻa e Fakamoʻuí naʻá Ne fakahaaʻi ai ʻa e loto-toʻá?

Ke teuteuʻi e kau akó ke vahevahe ʻenau ngaahi aʻusiá, fakakaukau ke huluʻi ha foʻi vitiō hangē ko e “Having Courage and Trusting the Lord” (3:18), ‘oku maʻu ʻi he ChurchofJesusChrist.org.

3:18
Ko e fē ha taimi naʻá ke fakafalala ai, pe ko ha taha ʻokú ke ʻilo, ki he ʻEikí pea naʻe tāpuekina ʻaki ha loto-toʻa?

Ko ʻeku ngāue fakataautaha ʻo e loto-toʻá

ʻE lava ke tokoni ʻa e ngaahi fokotuʻu ko ʻení ki he kau akó ke nau fakaʻaongaʻi ʻa e meʻa naʻa nau ako mei he talanoa kia ʻĒsetá.

Fakakaukau ki he tūkunga naʻá ke fakakaukau ki ai ʻi he kamataʻanga ʻo e lēsoní. Fekumi ki ha fakahinohino mei he Laumālié ʻi hoʻo fakalaulauloto ki he founga te ke lava ai ʻo fakahaaʻi ha loto-toʻa mo falala ki he ʻEikí ʻi he tūkunga ko iá.

Toe lau ʻa e ʻĒseta 4:16, ‘o fakamamafaʻi ʻa e fakamatala ko ʻení: “… pea ko ia te u hū ai ki he tuʻí, ʻa ia ʻoku ʻikai taau mo e fonó: pea kapau te u mate ai, te u mate pē.”

Ke tokoni ke fakamamafaʻi ʻe he kau akó ʻa e fakamatala ʻi he veesi 16, te nau lava ʻo fakaʻilongaʻi ia kapau ʻe fiemaʻu. Hili iá, fakakaukau ke fakaafeʻi kinautolu ke toe hiki ʻa e fakamatalá ʻi heʻenau tohinoa akó ʻo fakaʻaongaʻi ʻa e ngaahi fakakaukau ʻi laló.

Toe fakalea ʻa e fakamatala ko ʻení ke fakahaaʻi hoʻo tukupā ke fakahaaʻi ha loto-toʻa mo falala ki he ʻEikí ʻi ho tūkungá. Ke tokoni kiate koe ke fakahoko ʻení, fakakaukau ke fakakakato ʻa e ngaahi fakakaukau ko ʻení:

Ko ia, te u (ko e ngāue te ke fie fakahoko ke fakahaaʻi hoʻo loto-toʻá). Pea kapau (ko ha ikuʻanga ʻe malava ke hoko), te u (meʻa te ke fai ke falala ai ki he ʻEikí).

ʻE ala tokoni ke ʻoange ha sīpinga, hangē ko ʻení:

Fakakaukauloto ʻokú ke ongoʻi ʻoku finangalo ʻa e Tamai Hēvaní ke ke maʻu ʻa e loto-toʻa ke taʻofi hono fakaʻaongaʻi ʻo e ngaahi lea taʻefeʻunga mo fakatupu ‘itá mo hoʻo ngaahi kaungāmeʻá. Te ke lava ʻo toe fakalea ʻa e ʻĒseta 4:16 ke pehē: “Pea ko ia he ʻikai ke u toe fakaʻaongaʻi ha lea kovi, naʻa mo e taimi fakakatá. Pea kapau ʻe fakamataliliʻi pe manukiʻi au ʻe hoku ngaahi kaungāmeʻá, te u lotua leva ha mālohi ke kei feinga pē.”

Fakaafeʻi ha kau ako ‘oku nau loto-lelei ke nau vahevahe ‘a e meʻa ne nau tohí. Kapau ʻoku toe lahi e taimí, ʻe lava ke fevahevaheʻaki ʻe he kau akó ha faleʻi fekauʻaki mo e ngaahi tūkunga ʻoku nau vahevahé.

Fakamoʻoni ki he sīpinga ʻa e ʻEikí ʻo e loto-toʻá. Fakahaaʻi hoʻo tui ki he malava hoʻo kau akó ke fehangahangai mo honau ngaahi faingataʻaʻiá ʻi he loto-toʻa ʻi heʻenau falala ki he ʻEikí ke fai Hono finangaló.

Ngaahi Maʻuʻanga Tokoni Kehé

ʻE tāpuekina fēfē au ʻi heʻeku fakahaaʻi ha loto-toʻa faka-Kalaisí?

Naʻe akoʻi ‘e ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá:

10:35

ʻOku ou palōmesi atu ʻe fakamālohia kimoutolu ʻe he ʻEikí. “He kuo ʻikai ke ʻomi ʻe he ʻOtuá kiate kitautolu ʻa e laumālie ʻo e ilifiá; ka ʻo e mālohí” [2 Tīmote 1:7]. Te Ne fakapaleʻi kimoutolu ʻi hoʻomou loto-toʻá mo e ʻulungaanga māʻoniʻoní—ʻaki e fiefia mo e nēkeneka. Ko e loto-toʻa peheé ko e ola ia ʻo hoʻomou tui kia Sīsū Kalaisi mo ʻEne Fakaleleí, hoʻomou ngaahi lotú, mo hoʻo talangofua ki he ngaahi fekaú. (“Ke Mou Vilitaki ʻi he Loto-toʻa, Mālohi, pea Longomoʻui,” Liahona, Nōvema 2012, 52)

Naʻe naʻinaʻi ʻa Palesiteni Tōmasi S. Monisoni ʻo pehē:

16:18

Te tau fehangahangai kotoa pē mo e manavasiʻí, foua e manukí, fehangahangai mo e fakaangá. ʻAi ke tau maʻu—ʻe kitautolu kotoa—ha loto-toʻa ke fakafepakiʻi e tui fakatokolahí, mo e loto-toʻa ke taukaveʻi ʻetau tefitoʻi moʻoní. ʻOku ʻomi ʻe he loto-toʻá, kae ʻikai ko e tukuhifo ʻo e tuʻunga moʻuí, ʻa e hōifua ʻa e ʻOtuá. ʻOku hoko e loto-toʻá ko ha ʻulungaanga matamata-lelei ʻi he taimi ʻoku ʻikai [lau ai] pē ko ha loto-fiemālie ke mate ngali tangatá, ka ko e fakapapau ke moʻui fakaʻeiʻeikí. ʻI heʻetau laka atu, mo feinga ke moʻui hangē ko ia ʻoku tonu ke tau faí, kuo pau ke tau maʻu e tokoni mei he ʻEikí mo lava ke maʻu ha nonga ʻi Heʻene ngaahi folofolá. (“Ke ke Mālohi Peá ke Loto-toʻa,” Liahona, Mē 2014, 69)

Ko e hā mo ha toe ngaahi lēsoni te u lava ʻo ako mei he tohi ʻa ʻĒsetá?

Naʻe fakamatala ʻa Palesiteni Kamila N. Sionisoni, ko e Palesiteni Lahi ʻo e Fineʻofá, ʻo pehē:

10:8

Ko ʻĒsetá ko ha sīpinga fakaʻofoʻofa ia ʻe taha ʻo e tuku ke lāngilangiʻia ʻa e ʻOtuá. Naʻe ʻikai ke ne nofo pē ʻi ha moʻui tokanga ke maluʻi pē ia, ka naʻá ne fakaʻaongaʻi e tuí, ʻo ne momoi kakato ia ki he ʻEikí. …

Naʻe loto-fiemālie ʻa ʻĒseta ke fatu ʻe he Fakamoʻuí ʻene moʻuí, neongo naʻe mei fakatuʻutāmaki e ikuʻangá, ʻi he vakai fakamatelié. Kae monūʻiá, he naʻe tali ʻe he tuʻí ʻa ʻĒseta, pea naʻe fakahaofi ʻa e kakai Siu ʻi Peasiá.

ʻIo, ʻoku hāhāmolofia ke kole meiate kitautolu e faʻahinga loto-toʻa ʻa ʻĒsetá. Ka ko hono tuku ko ia ke lāngilangiʻia ʻa e ʻOtuá, ʻo tuku ke Ne hoko ko e kamataʻanga mo e ngataʻanga ʻo ʻetau moʻuí, ʻoku fiemaʻu ia ke tau tauhi ʻEne ngaahi fekaú mo e ngaahi fuakava kuo tau fakahokó. Ko ʻetau tauhi ʻa e fekaú mo e fuakavá ʻe fakaava ai ʻa e laine fetuʻutaki ke tau maʻu ʻa e fakahaá ʻi he Laumālie Māʻoniʻoní. Pea te tau ongoʻi hono tataki ʻe he toʻukupu ʻo e ʻEikí ʻetau moʻuí, ʻo fakafou ʻi he ngaahi fakahā ʻa e Laumālié. (“Fakaafeʻi ʻa Kalaisi ko e Kamataʻanga Hoʻo Moʻuí,” Liahona, Nōvema 2021, 81)

Ngaahi ʻEkitivitī Fakalahi ki he Akó

Ko ha founga ʻe taha ki hono lau e talanoa ʻa ʻĒsetá

Ki ha founga ʻe taha ke ako ai ʻa e talanoa ʻo ʻĒseta ʻi he ʻuluʻi tohi ko e “Ngaahi tōʻonga loto-toʻá,” ʻe lava ke fakaafeʻi e kau akó ke nau lau ʻa e fakamatalá ʻi ha founga ʻoku faitatau ai hono lau ʻi he ʻaho mālōlō faka-Siu ʻo e Pulimí. Naʻe kau ʻi he kātoanga ko ʻení hono lau leʻolahi e talanoa ʻo ʻĒsetá ki he fānaú. ʻI he taimi ʻoku lave ai ki he hingoa ʻo Motekiaí, ʻoku nau kalanga fiefia kotoa; ʻi he taimi ʻoku lau ai e hingoa ʻo Hāmaní, ʻoku nau fakahaaʻi ʻenau taʻefiemālié.

Fakaafeʻi ha ongo tamaiki ako ke na lau ʻa e ongo potufolofola ko ʻení kae lau ʻe ha tokotaha ako ʻe taha ʻa e konga ʻo e tokotaha fakamatalá.

Tokotaha Fakamatalá: Hili hono ʻeke ange ʻe he tuʻí kia ʻĒseta pe ko e hā ʻokú ne fiemaʻu meiate iá, naʻe kole ange ʻe ʻĒseta pe te ne fie hāʻele ange mo Hāmani ki ha houa taumafa te ne teuteu maʻanautolu. Naʻe tali ʻe he tuʻí mo Hāmani ʻa e fakaafé.

Tokotaha ako 1: ʻĒseta 5:9, 12–14

Tokotaha Fakamatalá: Naʻe ʻikai lava e tuʻí ʻo mohe ʻi he pō kimuʻa he houa taumafá. Naʻe lau kiate ia ha ngaahi lipooti fakaʻofisiale peá ne ʻilo ai naʻe fakahaofi ʻe Motekiai ʻene moʻuí ʻaki ʻene taʻofi ha feinga ke fakapoongi ia. Ko hono olá, naʻá ne fekau ʻa Hāmani ke foaki ha fakalāngilangi maʻongoʻonga kia Motekiai, ʻo ne toe tafunaki lahi ange ai ʻa e tāufehiʻa ʻa Hāmani kia Motekiai mo e kau Siú.

Tokotaha Ako 2: ʻĒseta 7:1–6, 9–10

Tokotaha Fakamatalá: Hili e mālōlō ʻa Hāmaní, naʻe fai ʻe he Tuʻi ko ʻAhasiveló ha tuʻutuʻuni hono ua ke maluʻi ʻa e kau Siú pea foaki kiate kinautolu ʻa e mālohi ke fakaʻauha honau ngaahi fili ʻi he puleʻangá. Naʻe fokotuʻu ʻa e Kātoanga Pulimí ke tokoni ki he kau Siú ke nau manatuʻi honau fakahaofi meia Hāmaní. Naʻe hikiʻi hake ʻa Motekiai ko ha pule fika ua ʻi he puleʻangá.

Ko e mahuʻinga ʻo e feilaulau ʻaukaí

Kapau naʻe ʻikai ke ke akoʻi fekauʻaki mo e ʻaukaí ʻi he Lēsoni 92: ʻĒsela, te ke lava ʻo fakamamafaʻi ia ʻi he lēsoni ko ʻení. Hili hono ako ʻe he kau akó ʻa e ʻĒseta 4:15–17, te ke lava ʻo fehuʻi ange pe ʻoku nau pehē ko e hā e ʻuhinga naʻe fili ai ʻa ʻĒseta mo e kau Siú ke ʻaukai lolotonga e ngaahi tūkunga vivili peheé. Hili iá, ʻe lava ke ke fakaʻaliʻali e fakamatala ko ʻení:

Naʻe akoʻi ʻe ʻEletā Siaosi F. Sepalosi ʻo e Kau Fitungofulú ʻo pehē:

ʻOku ʻomi ʻe he ʻaukaí ha mālohi fakalaumālie pea teuteuʻi ai kitautolu ke tau matuʻuaki e ngaahi ʻahiʻahi ʻo e moʻuí. (“Ko Hono Langa ha Moʻui ʻokú ne Matuʻuaki ʻa e Filí,” Liahona, Nōvema 2022, 51)

Tokoni ke ʻiloʻi ʻe he kau akó ha foʻi moʻoni, hangē ko e: ʻE lava ke tāpuakiʻi kitautolu ʻe he ʻEikí ʻaki ha mālohi fakalaumālie ʻi heʻetau ʻaukai fakamātoató. ʻE lava ke vahevahe ʻe he kau akó ha ngaahi sīpinga kehe ʻoku nau ʻilo mei he folofolá pe mei heʻenau moʻuí naʻe tāpuakiʻi ai ʻe he ʻEikí ha taha ʻaki ha mālohi fakalaumālie ko ha ola ʻo ha ʻaukai fakamātoato.

ʻE lava ke hoko e loto-hikisiá mo e ʻitá ko ha ʻauhaʻanga

Kapau ʻe ʻaonga ki he kau akó hano aleaʻi e ngaahi kovi ʻo e hīkisiá mo e ʻitá, fakakaukau ke fakaafeʻi e kau akó ke lau ʻa e ʻĒseta 3:1–6, 8–11 mo e 5:9–14. ʻE lava ke kumi ʻe he kau akó e ngaahi ongo, lea, mo e ngaahi angafai ʻa Hāmaní. Fehuʻi ki he kau akó pe ko e hā e meʻa ʻoku nau ako fekauʻaki mo Hāmani mo ʻene ngaahi taumuʻá. Hili iá, fakakaukau ke lau pe fakamatalaʻi fakanounou ʻa e ʻĒseta 7 ke sio ki he meʻa naʻe hoko kia Hāmaní.

ʻE lava ke sivisiviʻi ʻe he kau akó ʻa e meʻa ʻokú ne fakaʻaiʻai ʻenau ngaahi ongó mo e tōʻongá. Fakaafeʻi kinautolu ke tafoki ki he Tamai Hēvaní ki ha tokoni ʻi he taimi ʻoku nau fakatokangaʻi ai ha taha ʻo e ngaahi ongo pe tōʻonga ko ʻení ʻi heʻenau moʻuí.