Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Mōsese 1:12–26: “Ke ke ʻAlu Mei Heni, ʻe Sētane”

“Mōsese 1:12–26: ‘Ke ke ʻAlu Mei Heni, ʻe Sētane,’” Fuakava Motuʻá – Tohi Lēsoni maʻá e Faiako Seminelí (2026)

“Mōsese 1:12–26: ‘Ke ke ʻAlu Mei Heni, ʻe Sētane,’” Fuakava Motuʻá – Tohi Lēsoni maʻá e Faiako Seminelí

Mōsese 1; ʻĒpalahame 3: Lēsoni 5

Mōsese 1:12–26

“Ke ke ʻAlu Mei Heni, ʻe Sētane”

Kuo tau ongoʻi kotoa ʻa e ngaahi ʻahiʻahi ʻa Sētané. Ka neongo ia, hangē ko Mōsesé, ʻi heʻetau manatuʻi ko hai moʻoni kitautolú, te tau lava ʻo maʻu ha mālohi mei he ʻOtuá ke ikunaʻi ʻa Sētane mo ʻene ngaahi ʻahiʻahí ʻi heʻetau moʻuí. Ko e taumuʻa ʻo e lēsoni ko ʻení ke tokoniʻi ʻa e kau akó ke maʻu ha mālohi mei he ʻOtuá ke ikunaʻi honau ngaahi ʻahiʻahi fakatāutahá.

Teuteu ʻa e tokotaha akó: Fakaafeʻi ʻa e kau akó ke fakalaulauloto ki ha taha ʻo e ngaahi ʻahiʻahi ʻoku nau fehangahangai fakataautaha mo iá pea haʻu mateuteu ki he kalasí ke ako ʻa e founga ke ikunaʻi ai iá.

Ngaahi ʻEkitivitī Ako ʻOku Ala Fakahokó

Fehangahangai mo e ʻahiʻahí

Ke teuteuʻi ʻa e kau akó ke ako fekauʻaki mo hono ikunaʻi ʻo e ngaahi ʻahiʻahí, fakakaukau ke vahevahe ʻa e fakamatala mo e ngaahi fehuʻi ko ʻení.

Naʻe akonaki ʻa Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku mau lea mālohí he ʻoku fakamoʻomoʻoni pē feinga ia ʻa Sētane ke fakaʻauha kimoutolú pea ʻoku mou fehangahangai mo hono ivi tākiekiná ʻi ha taʻu kei iiki ange. (“ʻOku Tau Kau Kotoa he Tokoní,” Liahona, Nōvema 2011, 45)

Ko e hā hoʻo ongo fekauʻaki mo e kupuʻi lea ko ʻeni meia Palesiteni Hōlaní?
Ko e hā ha niʻihi ʻo e ngaahi ʻahiʻahi ʻoku fehangahangai mo e toʻu tupu ʻo e Siasí?

ʻE ala tokoni ke hiki ʻi he palakipoé ʻa e ngaahi ʻahiʻahi ʻe talaatu ʻe he kau akó. Te ke kole ki he kau akó ke nau fakakaukau ki he ngaahi meʻá ni ʻamui ange ʻi he lēsoní.

ʻI he ngaahi fehuʻi ko ʻení, mahalo te ke fakakaukau ke fakaafeʻi ʻa e kau akó ke hiki ʻenau ngaahi talí ʻi ha tohinoa ako.

Fakalaulauloto ki ha ʻahiʻahi kuó ke fehangahangai pe fefaʻuhi mo ia. Fakakaukau ki heni:

Ko e hā ʻokú ne fakafaingataʻaʻiaʻi hoʻo fakaʻehiʻehi mei he ʻahiʻahi ko iá?
Ko e hā ʻokú ke fai ke fekumi ki ha tokoni mo ha mālohi ke tekeʻi iá?
Ko e hā ʻa e tuʻunga hoʻo ongo ki hoʻo ikunaʻi ho ʻahiʻahí?

ʻI hoʻo ako ʻa e Mōsese 1:1–26 ʻi he ʻaho ní, fekumi ki ha fakahinohino mei he Laumālie Māʻoniʻoní ke ʻiloʻi ʻa e ngaahi moʻoni te ne lava ʻo fakamālohia koe ʻi hoʻo fehangahangai mo e ʻahiʻahí.

ʻOku ʻahiʻahiʻi ʻa Mōsese ʻe Sētane

Fakaafeʻi ʻa e kau akó ke vahevahe ʻa e meʻa ʻoku nau manatuʻi mei he lēsoni kuo ʻosí, pe te nau toe vakaiʻi nounou ʻa e Mōsese 1:1–10 pea fakakaukau ki he meʻa ne nau akó. Kapau ʻe fiemaʻu, fakamanatu ange naʻe “mamata [ʻa Mōsese] ki he ʻOtuá ko e mata ki he mata, peá ne fakatau folofola kiate ia” (Mōsese 1:2) pea naʻe tuʻo tolu hono akoʻi ʻe he ʻOtuá ʻa Mōsese ko Hono foha ia (vakai, veesi 4, 6, mo e 7).

Neongo ko ha palōfita maʻongoʻonga ʻa Mōsese, ka naʻá ne fehangahangai foki mo ha ʻahiʻahi lahi. Hili ha taimi nounou mei he aʻusia ʻa Mōsese mo e ʻOtuá, naʻá ne aʻusia ha meʻa mātuʻaki faingataʻa ʻaupito ʻa ia “naʻe haʻu [ai] ʻa Sētane ʻo ʻahiʻahiʻi ia” (Mōsese 1:12). Koeʻuhí ko e meʻa naʻe ʻilo mo fai ʻe Mōsesé, naʻá ne lava ai ʻo ikuna. Lau ʻa e Mōsese 1:12–22, ʻo kumi ʻa e meʻa naʻe tokoni kia Mōsese ke ne ikunaʻi ai ʻa e ngaahi ʻahiʻahi ʻa Sētané. Fakakaukau ke fakaʻilongaʻi ʻa e meʻa ʻokú ke maʻú.

Mahalo te ke fakakaukau ke huluʻi ʻa e foʻi vitiō “I Am a Son of God” mei he taimi 2:50 ki he 6:30, pe ko e foʻi vitioó kakato kapau naʻe ʻikai ke ke huluʻi ki he kau akó ʻa e konga ʻuluakí ʻi he lēsoni kuo ʻosí. Hili ʻa e vitioó, te ke lava ʻo fakaafeʻi ʻa e kau akó ke lau ʻa e ngaahi vēsí, ʻo kumi ʻa e meʻa naʻe tokoni kia Mōsese ke ne ikunaʻi ʻa e ngaahi ʻahiʻahi ʻa Sētané. Hili iá, ʻe lava ke aleaʻi ʻe he kau akó ʻa e ngaahi fehuʻi ko ʻení ʻi ha ngaahi hoa pe fanga kiʻi kulupu iiki:

6:31

Ko e hā ʻokú ke ako mei he aʻusia ʻa Mōsesé ʻe lava ʻo tokoni ke tau ikunaʻi hotau ngaahi ʻahiʻahí?

Fakakaukau ke hiki ʻa e tefitoʻi moʻoni taʻe kakato ko ʻení ʻi he palakipoé: Te tau lava ʻo maʻu ʻa e tokoni ʻa e ʻOtuá ke ikunaʻi ʻa e ngaahi ʻahiʻahí ʻaki ʻetau … Fakaafeʻi ʻa e kau akó ke nau omi ki he palakipoé ʻo fakaʻosi ʻa e tefitoʻi moʻoní ʻaki ha ngaahi lea pē ʻanautolu. Kapau ʻoku fiemaʻu tokoni ʻa e kau akó, te ke lava ʻo tataki kinautolu ʻaki hano fai ha ngaahi fehuʻi hangē ko ʻení:

Ko e hā naʻe ui ʻaki ʻe Sētane ʻa Mōsese ʻi he veesi 12, pea naʻe tali fēfē ia ʻe Mōsese ʻi he veesi 13?
Ko e hā naʻe manatuʻi ʻe Mōsese mei heʻene aʻusia fakalaumālie mo e ʻOtuá naʻe tokoni kiate ia ʻi he taimi naʻá ne fehangahangai ai mo e ʻahiʻahí?

ʻE lava ke fakaʻosi ʻe he kau akó ʻa e tefitoʻi moʻoní ʻi ha ngaahi founga lahi, kau ai ha niʻihi ʻo e ngaahi foungá ni:

… manatuʻi ko e fānau kitautolu ʻa e ʻOtuá

… manatu ki he ngaahi aʻusia fakalaumālie ʻo e kuohilí

… ui ki he ʻOtuá ke maʻu ha mālohi

Hili hono maʻu ha ngaahi tefitoʻi moʻoni lahi, fakakaukau ke fakaʻaongaʻi ʻa e ngaahi lea mo e ngaahi fehuʻi ko ʻení ke tokoni ke fakaloloto ʻa e mahino ʻa e kau akó ki he ngaahi moʻoni ne nau maʻú.

Naʻe vahevahe ʻe Palesiteni Lāsolo M. Nalesoni ʻa e meʻá ni fekauʻaki mo e mālohi ʻo hono manatuʻi ko e fānau kitautolu ʻa e ʻOtuá:

Siʻoku ngaahi kaungāmeʻa ʻofeina, ko e fānau fakalaumālie moʻoni kimoutolu ʻa e ʻOtuá. Kuo mou hivaʻi ʻa e foʻi moʻoni ko ʻení talu mei hoʻomou ako ʻa e ngaahi lea ʻo e “Fānau Au ʻa e ʻOtua.” Ka ʻoku tohitongi nai ʻa e moʻoni taʻengata ko iá ʻi homou lotó? Kuo fakahaofi nai koe ʻe he foʻi moʻoni ko ʻení ʻi hoʻo fehangahangai mo e ʻahiʻahí? (“Ngaahi Fili ki he Taʻengatá” [fakataha lotu fakaemāmani lahi maʻá e kakai lalahi kei talavoú, 15 Mē, 2022])

ʻOkú ke pehē ʻoku ʻuhinga ki he hā ʻa e tohitongi ʻi ho lotó ʻa e foʻi moʻoni ko e fānau koe ʻa e ʻOtuá?
ʻE fakamālohia fēfē nai kitautolu ʻe heʻetau manatuʻi ko e fānau kitautolu ʻa e ʻOtuá ʻi he taimi ʻoku tau fehangahangai ai mo e ʻahiʻahí?
ʻOkú ke pehē ko e hā ʻoku tau fiemaʻu ai ʻa e tokoni ʻa e ʻOtuá ke ikunaʻi ʻa e ʻahiʻahí?

Fakaafeʻi ʻa e kau akó ke vahevahe ha ngaahi sīpinga ʻo e taimi kuo fakamālohia ai ʻe he ʻOtuá ha taha ke fehangahangai mo e ʻahiʻahí. ʻE lava ke maʻu ʻeni mei he folofolá, kakai ʻoku ofi kiate kinautolú, pe mei heʻenau moʻuí. ʻI he fakataautaha ʻa e ngaahi ʻahiʻahí, fakamanatu ki he kau akó ke ʻoua naʻa nau vahevahe ha faʻahinga ʻahiʻahi pau.

Ko hono ikunaʻi ʻo e ngaahi ʻahiʻahi fakatāutahá

Ke tokoni ke mahino ki hoʻo kau akó ʻa e founga te nau lava ai ʻo moʻui ʻaki ʻa e ngaahi tefitoʻi moʻoni naʻe aleaʻi ʻi he ʻaho ní, fakaafeʻi kinautolu ke fili ha ʻahiʻahi ʻe taha pe ua naʻe hiki ʻi he palakipoé kimuʻa ange ʻi he lēsoní. Fakaafeʻi ʻa e kau akó ke nau fakakaukau fakakalasi pe fakakulupu iiki ki ha ngaahi founga ʻe lava ke fakaʻaongaʻi ai ʻe ha taha ʻoku fehangahangai mo e ʻahiʻahi ko iá ʻa e ngaahi tefitoʻi moʻoni ko ʻení, ke ikunaʻi ʻaki ʻa e ʻahiʻahi ko iá.

Fakakaukau ke fakaafeʻi ʻa e kau akó ke hiki ʻenau ngaahi fakakaukaú ʻi he palakipoé, pe ko hoʻo fakaʻaliʻali ha niʻihi ʻo e ngaahi fakakaukau ko ʻení.

Ngaahi founga ke fakaʻaongaʻi ai ʻa e meʻa ʻoku tau ako ʻi he Mōsese 1:12–26:

Lekooti ʻi hoʻo tohinoá ha taimi naʻá ke ongoʻi ai ʻa e ʻofa ʻa e ʻEikí peá ke ʻiloʻi ko e fānau koe ʻa e ʻOtuá. Te mou lava ʻo toe vakaiʻi ʻeni lolotonga ʻa e ngaahi taimi ʻo e ʻahiʻahí.
Ako ma‘uloto pea akoako lau ha ngaahi potufolofola ueʻi fakalaumālie, ngaahi himi, pe ongo lotu sākalamēnití ke ke toutou fakamanatu atu ʻi he taimi ‘oku ʻahi‘ahiʻi ai koé. (Ko ha founga ʻeni naʻe fakaʻaongaʻi ʻe he Fakamoʻuí ʻi he Mātiu 4:1–11.)
Lotua fakaʻaho ʻa e ivi mo e mālohi ʻo e ʻEikí ke ikunaʻi ʻa e ʻahiʻahí. Lotu ki he Tamai Hēvaní ʻi he efiafi kotoa pē ke fakamālō kiate Ia, fakahaaʻi ha faʻahinga vaivaiʻanga, kole fakamolemole, mo tukupā ke hokohoko atu hoʻo feingá (vakai, 3 Nīfai 18:15, 18).
Manatu ki he ngaahi meʻa fakalaumālie kuó ke aʻusia ʻi he kuohilí peá ke hiki kinautolu ʻi ha tohinoa. Vakai ki he ngaahi meʻá ni ʻi he taimi ʻoku hoko ai ʻa e ʻahiʻahí.
Aleaʻi mo e mātuʻá pe kakai lalahi falalaʻanga pe ngaahi kaungāmeʻá ʻa e founga kuo tokoniʻi ai kinautolu ʻe he ngaahi tefitoʻi moʻoni ko ʻení mo e ngaahi founga te nau fokotuʻu atu ke ke fakaʻaongaʻi ai kinautolú.

Fakaafeʻi ʻa e kau akó ke faʻu ha palani ke tokoniʻi kinautolu ke ikunaʻi ʻa e ngaahi ʻahiʻahi ʻoku nau fehangahangai mo iá. Te ke lava ʻo fai ʻeni ʻaki haʻo ʻoange ʻa e ngaahi fakahinohino ko ʻení:

Fakamanatu ʻa e ʻahiʻahi naʻá ke fakalaulauloto ki ai ʻi he kamataʻanga ʻo e lēsoní pe ko ha ʻahiʻahi kehe ʻokú ke fefaʻuhi mo ia.

Vahevahe hoʻo fakamoʻoni fekauʻaki mo e mālohi mo e ivi ʻo e ʻEikí kuó ke aʻusia ʻi hoʻo moʻuí pea mo ʻEne hōifua ke tokoniʻi hoʻo kau akó ke ikunaʻi honau ngaahi ʻahiʻahí. Fakahaaʻi ho loto-falala kiate kinautolu mo ʻenau malava ke ikunaʻi honau ngaahi ʻahiʻahí ʻi he tokoni ʻa e ʻOtuá.

ʻI hoʻo kole ki he Tamai Hēvaní ke maʻu ha fakahinohinó, fakakakato ʻa e fakamatala ko ʻení ʻi hoʻo tohinoa akó pe ʻi ho ʻatamaí: “Ke tokoniʻi au ke u mateuteu ki he ʻahiʻahi ko ʻení, te u .”

Ngaahi Maʻuʻanga Tokoni Kehé

ʻE tokoniʻi fēfē au ʻe heʻeku manatuʻi ʻa e ʻofa ʻa e ʻOtuá kiate au ko ʻEne fānau ʻi he taimi ʻoku ʻahiʻahiʻi ai aú?

Naʻe pehē ʻe Palesiteni M. Lāsolo Pālati (1928–2023) ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻUluakí, manatuʻi muʻa, ʻoku ʻofa hoʻo Tamai Hēvaní ʻiate koe, pea ko hono uá, ʻoku ʻofa ʻa ho Fakamoʻuí, ʻa e ʻEiki ko Sīsū Kalaisí ʻiate koe. Maʻu ʻa e ngaahi moʻoni ko ʻení ʻi ho ʻatamaí pea fakatōloloto kinautolu ki ho lotó. Te Na ʻoatu ha kāpasa ki he meʻa ʻoku totonu ke ke faí mo e tōʻonga ʻoku totonu ke ke fai ki he niʻihi kehé, pea te Na ʻoatu kiate koe ʻa e mālohi ke ikunaʻi ʻa e ʻahiʻahí mo nofo maʻu ʻi he hala ʻo e fuakava ʻo e Siasí. (“Children of Heavenly Father” [Brigham Young University devotional, Mar. 3, 2020])

ʻE tokoni fēfē ʻetau manatu ki heʻetau ngaahi aʻusia fakalaumālie ʻi he kuohilí ke tau ikunaʻi ʻa e ʻahiʻahí?

Naʻe naʻinaʻi ʻa Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻI he momeniti ʻo e ilifiá, veiveiuá pe taimi faingataʻá, tuʻu maʻu ʻi he tui kuó ke ʻosi maʻú, tatau ai pē kapau ko e tui ko iá ʻoku siʻisiʻi. … ʻI he hoko mai ʻa e ngaahi taimi peheé pea hoko mo e palopalemá, pea ʻikai maʻu vave hano fakaleleiʻí, pīkitai ki he meʻa kuó ke ʻosi ʻiló pea tuʻu maʻu kae ʻoua kuo maʻu ha ʻilo lahi ange. … ʻOku ʻikai mahuʻinga ʻa e lahi ʻo hoʻo tuí pe tuʻunga ʻo hoʻo ʻiló—ka ko e angatonu ko ē ʻokú ke fakahaaʻi ki he tui ʻokú ke maʻú mo e moʻoni kuó ke ʻosi ʻiló. (“ʻEiki, ʻOku Ou Tui,” Liahona, Mē 2013, 93–94)

Ko e hā ʻoku faʻa hoko mai ai ʻa e ngaahi ʻahiʻahí ʻi he taimi ʻoku ou feinga ai ke fakalakalaka fakalaumālié pe hili ʻeku maʻu ha ngaahi aʻusia fakalaumālié?

Naʻe akoʻi ʻe he Palōfita ko Siosefa Sāmitá (1805–44) ʻo pehē:

Ko e ofi ange ko ia ha taha ki he ʻEikí, ko e lahi ange ia ʻa e mālohi ʻe fakahā mai ʻe he filí ke taʻofi hono fakahoko ʻEne ngaahi taumuʻá. (ʻi he Orson F. Whitney, Life of Heber C. Kimball [Salt Lake City: Bookcraft, 1967], 132)

Naʻe pehē ʻe Palesiteni Sefilī R. Hōlani:

“… ʻOku ou fie poupou kiate kimoutolu kotoa ʻi he ʻahó ni kau ki he fakafepaki ko ia ʻoku faʻa hoko mai hili hano fai ha ngaahi fili kuo fakamāmaʻí, hili hano ʻomi ʻe he fakahā mo e loto-fakapapaú kiate kitautolu ha nonga mo ha fakapapau ne tau pehē he ʻikai toe mole meiate kitautolu. …

He ʻikai ke tau lava ʻo fakamoʻoni ʻi ha taimi ki ha mahuʻinga taʻengata mo ha nunuʻa tuʻuloa pehē taʻe ʻiloʻi ʻe hoko ia ko ha tau—ko ha tau lelei mo ha tau ikuna, ka ko ha tau. (“Cast Not Away Therefore Your Confidence” [Brigham Young University devotional, Mar. 1999], 2–3)

Te tau lava fēfē ʻo tekeʻi ʻa e mālohi ʻo Sētané?

Naʻe vahevahe ʻe ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni fekauʻaki mo hono ikunaʻi ʻo e ʻahiʻahí:

14:47

ʻOku fiemaʻu ha moʻui mateaki mo ha faivelenga ʻi he toenga ʻo e moʻuí ʻi hono fakafepakiʻi ʻo e ʻahiʻahí. ʻOku fiemaʻu ke tau ʻiloʻi ʻoku mateuteu ʻa e ʻEikí ke Ne tokoniʻi kitautolu ʻi heʻetau feinga fakatāutahá pea ʻokú Ne palōmesi mai ha ngaahi tāpuaki fakaofo kapau te tau kātaki ki he ngataʻangá. (“Fekumi kia Kalaisi ʻi he Fakakaukau Kotoa Pē,” Liahona, Nōvema 2020, 83)

Ngaahi ʻEkitivitī Fakalahi ki he Akó

Ko ha sīpinga moʻoni ʻo hono ikunaʻi ʻo e ʻahiʻahí

Ke tokoni ki he kau ako mahalo kuo nau ʻosi fakavaivai ki ha ʻahiʻahi pe fefaʻuhi mo e maʻunimaá, fakakaukau ke huluʻi ʻa e foʻi vitiō “Let God Guide You: From Weakness to Strength” (6:07), ko e talanoa ʻo ha tangata naʻá ne maʻu e mālohi mo e ivi ʻo e ʻEikí ke ikunaʻi hono ngaahi ʻahiʻahí mo e maʻunimā ia ʻe he ponokalafí. Mahalo ʻe tokoni lahi ʻa e vitiō ko ʻení ki he kau ako kuo fakavaivai ki he ʻahiʻahí. Hili ʻa e vitioó, fehuʻi ki he kau akó pe ko e hā ha ngaahi fakakaukau ne nau maʻu fekauʻaki mo hono ikunaʻi ʻo e ʻahiʻahí pea mo e fatongia ʻo e ʻOtuá ʻi hotau ivi malava ke ikunaʻi kinautolú. Fakakaukau ke huluʻi ʻa e foʻi vitioó kimuʻa ʻi he konga “Ko hono ikunaʻi ʻo e ngaahi ʻahiʻahi fakataautaha” ʻo e lēsoní.

6:7

Mōsese 1 ʻi he Mataʻitofe Mahuʻingá kae ʻikai ko e tohi ʻa Sēnesí

Kapau ʻokú ke pehē ʻe ʻaonga ki he kau akó hano aleaʻi ʻa e ʻuhinga ʻoku ʻikai kau ai ʻa e Mōsese 1 ʻi he tohi ʻa Sēnesí, fakaafeʻi kinautolu ke nau lau ʻa e Mōsese 1:23, ʻo kumi ʻa e ʻuhinga ʻoku ʻikai fakakau aí. Fakakaukau ke ʻeke ange ʻa e ongo fehuʻi ko ʻení:

ʻOkú ke pehē ko e hā naʻe ʻikai fiemaʻu ai ʻe Sētane ke maʻu ʻa e fakamatala ko ʻení “ʻi he lotolotonga ʻo e fānau ʻa e tangatá” (Mōsese 1:23)?
Ko e hā ha ngaahi ʻuhinga ʻokú ke fiefia ai ʻi hono fakafoki mai ʻe he ʻEikí ʻa e vahe ko ʻení ʻo fakafou ʻia Siosefa Sāmitá?

Ko hono fakafehoanaki ʻa e aʻusia ʻe Mōsesé mo e aʻusia ʻa Siosefa Sāmitá

Ke tokoni ke mahino lelei ange ki he kau akó ʻa e founga ke tekeʻi ʻaki ʻa e ngaahi ʻahiʻahi ʻa Sētané pea mo e ngaahi tāpuaki ʻe lava ke maʻu ʻi hono fai iá, fakaafeʻi ʻa e kau akó ke fakafehoanaki ʻa e ngaahi aʻusia ʻa Mōsese mo Siosefa Sāmitá.

ʻE lava ke tā ʻe he kau akó ʻi heʻenau tohinoa akó ha fakatātā faingofua ʻo fakahingoa ko Mōsese mo ha fakatātā ʻe taha ʻo fakahingoa ko Siosefa Sāmita. Te nau lava leva ʻo fakafehoanaki ʻa e Mōsese 1:12–22 mo e Siosefa Sāmita—Hisitōlia 1:13–16, ʻo kumi ʻa e ngaahi fakaikiiki mahuʻinga ʻi he fehangahangai takitaha mo Sētané, pea mo e meʻa naʻe fai ʻe Mōsese mo Siosefa Sāmita ke ikunaʻi ai iá. Te nau lava ʻo hiki ʻa e ngaahi fakaikiiki ko ʻení ʻi lalo ʻi he fakatātā takitaha.

Kapau ʻoku fiemaʻu tokoni ʻa e kau akó, fakakaukau ke fakaʻaliʻali ha ngaahi fehuʻi hangē ko e:

Ko e hā ha aʻusia fakalaumālie te ke lava ʻo manatuʻi naʻe maʻu ʻe he palōfitá kimuʻa pea fehangahangai mo Sētané?
Naʻe faifai pea ikunaʻi fēfē ʻe he Palōfitá ʻa Sētané?
Ko e hā naʻe hoko ko ha ola ʻo hono ikunaʻi ʻe he Palōfitá ʻa Sētané (vakai, Mōsese 1:24-25; Siosefa Sāmita—Hisitōlia 1:17)?

ʻOku mōlia atu ʻa e ʻahiʻahí ʻi heʻetau fekumi kia Kalaisi ʻi he fakakaukau kotoa peé

Ke tokoni ke ʻilo ʻe he kau akó ʻa e mahuʻinga ʻo e tokanga taha kia Kalaisi lolotonga ʻa e ʻahiʻahí, tokoni ke nau ʻiloʻi naʻe tokanga taha ʻa Mōsese kia Sīsū Kalaisi lolotonga ʻene fehangahangai mo Sētané (vakai, Mōsese 1:13, 16–18). Hulu e foʻi vitiō “Temptation Fades as We Seek Christ in Every Thought” (2:57), pea kole ki he kau akó ke vahevahe ha ngaahi fakakaukau kehe ʻoku nau maʻu fekauʻaki mo hono ikunaʻi ʻo e ʻahiʻahí.

2:58