Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Mōsese 1:27–42: “Ko ʻEku Ngāué ʻEni mo Hoku Nāunaú”

“Mōsese 1:27–42: ‘Ko ʻEku Ngāué ʻEni mo Hoku Nāunaú,’” Fuakava Motuʻá – Tohi Lēsoni maʻá e Faiako Seminelí (2026)

“Mōsese 1:27–42: ‘Ko ʻEku Ngāué ʻEni mo Hoku Nāunaú,’” Fuakava Motuʻá – Tohi Lēsoni maʻá e Faiako Seminelí

Mōsese 1; ʻĒpalahame 3: Lēsoni 6

Mōsese 1:27–42

“Ko ʻEku Ngāué ʻEni mo Hoku Nāunaú”

Kuo fakatupu ʻe Sīsū Kalaisi ha ngaahi māmani taʻefaʻalaua, ʻi he malumalu ʻo e fakahinohino ʻa e Tamai Hēvaní. Ko e fakatupu maʻongoʻonga taha ʻa e Tamai Hēvaní ko Hono ngaahi foha mo e ngaahi ʻofefine fakalaumālié. ʻE lava ke tokoni ʻa e lēsoni ko ʻení ke ongoʻi houngaʻia ʻa e kau akó ʻi he Tamai Hēvaní mo ʻEne ngāue ke ʻomi ʻa e moʻui taʻe-faʻa-maté mo e moʻui taʻengatá ki Heʻene fānaú kotoa.

Teuteu ʻa e tokotaha akó: Fakaafeʻi ʻa e kau akó ke fakakaukau ki he lahi ʻo e ngaahi fakatupu ʻa e Tamai Hēvaní pea mo e ʻofa ʻoku maʻu ʻe he Tamai Hēvaní maʻanautolu takitahá. Ko e founga ʻe taha te nau lava ʻo fai ai ʻení ko haʻanau vakai ki he langí ʻi ha pō mālū pea fakakaukau ki he ongo ʻoku maʻu ʻe he Tamai Hēvaní kiate kinautolu ʻi he lotolotonga ʻo e ngaahi fetuʻu, palanite, mo e ngaahi kaniva lahi kuó Ne fakatupú.

Ngaahi ʻEkitivitī Ako ʻOku Ala Fakahokó

Ngaahi foha mo e ngaahi ʻofefine ʻo e ʻOtuá naʻe fakatupú

Fakakaukau ke ʻomi ha faʻoʻanga meʻa kuo fonu ai ha ʻoneʻone pea mo ha ipu vai ki he kalasí. Kole ki ha tokotaha ako ke haʻu ki muʻa ʻi he kalasí pea unu hono tuhú ki he loto ʻaiʻanga vaí pea unu leva ʻa e foʻi tuhu ko iá ʻi he ʻaiʻanga ʻoneʻoné. Pe, ko hoʻo fakaʻaliʻali ki he kau akó ʻa e fakatātā ko ʻení. Hili iá, kole ki he kau akó ke nau fakafuofuaʻi pe ko e foʻi ʻoneʻone ʻe fiha ʻoku pipiki ʻi he nima ʻo e tokotahá.

Lau ʻa e Mōsese 1:27–29, ʻo kumi ʻa e meʻa naʻe fakafehoanaki ʻe Mōsese ki he ʻoneʻone ʻi he matātahí pea mo hono ʻuhingá.

Ko e hā ʻoku makehe kiate koe mei he vīsone ko ʻení?

Tali ʻa e ngaahi fehuʻi ko ʻení ʻi hoʻo tohinoa akó:

Ko e hā naʻe fakatupu ai ʻe he ʻOtuá ʻa e ʻunivēsí?
Ko e hā naʻe fakatupu ai kitautolu ʻe he ʻOtuá?
Ko e hā ʻeku ongo kau ki he ʻOtuá mo e meʻa ʻokú Ne fai maʻakú?

Fakaafeʻi ʻa e kau akó ke tānaki ki heʻenau ngaahi talí ʻi he lele ʻa e lēsoní. Fakamanatu kiate kinautolu ʻe lava ke tokoni hono lekooti ʻenau ngaahi fakakaukaú ʻi ha tohinoa akó ke fakaafeʻi ʻa e ivi tākiekina ʻo e Laumālie Māʻoniʻoní ki heʻenau akó.

Ko e ngāue mo e nāunau ʻo e Tamai Hēvaní

Lau ʻa e Mōsese 1:30, ʻo kumi mo fakaʻilongaʻi ʻa e ongo fehuʻi naʻe maʻu ʻe Mōsese ʻi heʻene mamata ki he māmaní mo e ngaahi foha mo e ngaahi ʻofefine ʻo e ʻOtuá ne fakatupú.

Ko e Mōsese 1:39 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻu ngofua kinautolu.

Lau ʻa e Mōsese 1:31–33, 39, ʻo kumi ʻa e tali ʻa e ‘Eikí ki he ngaahi fehuʻi ʻa Mōsesé.

Ko e hā ha ngaahi moʻoni te tau lava ʻo ako mei he ngaahi tali ʻa e ʻOtuá ʻi he ngaahi veesi ko ʻení?

ʻI he ngaahi moʻoni ʻe ala maʻu ʻe he kau akó, tokoni ke nau ʻiloʻi ko e ngāue mo e nāunau ʻo e ʻOtuá ke fakahoko ʻa e moʻui taʻe-faʻa-mate mo e moʻui taʻengata ʻa ʻEne fānaú.

Ke ʻilo ʻa e meʻa ʻoku mahino ki he kau akó fekauʻaki mo e moʻui taʻe-faʻa-maté mo e moʻui taʻengatá, te ke lava ʻo kole ange ke nau vahevahe ʻa e founga te nau fakamatalaʻi ai kinauá. Kapau ʻe ʻaonga, ʻe lava ke kumi ʻe he kau akó ʻa e “Moʻui Taʻe-Faʻa-Maté” mo e “Moʻui Taʻengatá” ʻi he Fakahinohino ki he Ngaahi Folofolá pe Ngaahi Tefitó mo e Ngaahi Fehuʻí ʻi he ChurchofJesusChrist.org. Pe, ko hoʻo vahevahe ʻa e ʻuhinga ko ʻení:

ʻOku ʻuhinga ʻa e moʻui taʻe-faʻa-maté ki he moʻui ʻo taʻengata ko ha taha kuo toetuʻu. “Ko e moʻui taʻengatá, pe hakeakiʻí, ko e hoko ʻo tatau mo e ʻOtuá pea nofo ʻi Hono ʻaó ʻo taʻengata ko ha ngaahi fāmili” (Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 1.1, Gospel Library).

ʻE tokoni fēfē ʻa e moʻoni ʻoku maʻu ʻi he Mōsese 1:39 ke mahino kiate koe ʻa e ʻuhinga naʻe fakatupu ai ʻe he ʻOtuá ʻa e māmaní?

Naʻe fakamatalaʻi ʻe Palesiteni Tieta F. ʻUkitofa, ʻo e Kau Palesitenisī ʻUluakí ʻi he taimi ko iá, ʻa e taumuʻa ʻo e ngaahi fakatupu ʻa e ʻOtuá.

19:30

Pea neongo te tau vakai atu ki he lahi ʻo e ʻunivēsí mo pehē, “Ko e hā ʻa e tangatá ʻi hono fakafehoanaki ki he nāunauʻia ʻo e fakatupú?” Naʻe folofola pē ʻa e ʻOtuá Tonu ko kitautolu ʻa e ʻuhinga naʻá Ne fakatupu ai ʻa e ʻunivēsí! Ko ʻEne ngāué mo Hono nāunaú—ʻa e taumuʻa ʻo e ʻuniveesi fakaofó ni—ke fakahaofi mo hakeakiʻi ʻa e faʻahinga ʻo e tangatá. ʻI hono fakalea ʻe tahá, ʻoku fakatupu kotoa ʻa e lahi ʻo ʻitānití, ʻa e ngaahi nāunaú mo e ngaahi meʻa lilo ʻo e taʻe-fakangatangata ʻa e ʻataá mo e taimí, maʻá e lelei ʻa e kakai matelie hangē ko koe mo aú. Naʻe fakatupu ʻe heʻetau Tamai Hēvaní ʻa e ʻunivēsí ke tau ala aʻusia ai ʻa e ngaahi meʻa ʻoku tau malavá ʻi heʻetau hoko ko Hono ngaahi foha mo e ngaahi ʻofefiné. (“ʻOkú ke Mahuʻinga Kiate Ia,” Liahona, Nōvema 2011, 20)

Ko e hā ʻoku tokoni ʻa e fakamatala ko ʻení ke mahino kiate koe fekauʻaki mo e Tamai Hēvaní?
Ko e hā ʻoku tokoni ʻa e fakamatala ko ʻení ke mahino kiate koe fekauʻaki mo koé?

ʻOku tokoniʻi kitautolu ʻe he Tamai Hēvaní ke tau maʻu ʻa e moʻui taʻe-faʻa-maté mo e moʻui taʻengatá

Fakakaukau ke vahevahe ʻa e kau akó ki ha fanga kiʻi kulupu iiki ki he ʻekitivitī ko ʻení. Te ke lava ʻo ʻoange ki he kulupu takitaha ha laʻipepa pea fakaafeʻi ʻa e kau akó ke nau hiki ʻa e ngaahi fehuʻi ko ʻení ʻi ʻolunga ʻi heʻenau laʻipepá. Hili iá, ʻe lava ke hiki ʻe he kau akó ʻenau ngaahi talí ʻi lalo ʻi he ngaahi fehuʻí. Kapau ʻe lava, te ke lava ʻo fakaafeʻi a e kau akó ke kumi ha potufolofola ʻokú ne fakamoʻoniʻi ha niʻihi pe kotoa ʻo ʻenau ngaahi talí.

Ko e hā kuo fai ʻe he Tamai Hēvaní mo Sīsū Kalaisi ke fakahoko ai ʻetau moʻui taʻe-faʻa-maté?
Ko e hā kuó Na fai mo hokohoko atu ke fai ke tokoni ke tau maʻu ʻa e moʻui taʻengatá?

Ke tokoniʻi ʻa e kau akó ke nau ako ʻiate kinautolu peé, ʻoange ha taimi feʻunga ke nau tali ai ʻa e ngaahi fehuʻi kimuʻá. Kole ange leva ke nau tānaki atu ki heʻenau lisí ʻaki hono lau ʻa e Sione 3:16 pea mo e lea ko ʻeni ʻa Palesiteni Tieta F. ʻUkitofá.

Naʻe vahevahe ʻe Palesiteni Tieta F. ʻUkitofa, ʻo e Kau Palesitenisī ʻUluaki ʻi he taimi ko iá, ha ngaahi founga kehe ʻoku fakahoko ai ʻe he Tamai Hēvaní ʻetau moʻui taʻe-faʻa-maté mo e moʻui taʻengatá.

Kuo foaki mai [ʻe he Tamai Hēvaní] maʻatautolu ʻa e ongoongoleleí pea mo e Siasi ʻo Sīsū Kalaisí. Kuó Ne foaki mai maʻatautolu ʻa e palani ʻo e huhuʻí, ʻa e palani ʻo e fakamoʻuí, ʻa e palani ʻo e fiefiá. …

Kuó Ne foaki mai maʻatautolu ʻa e meʻa-foaki mahuʻinga ʻo e Laumālie Māʻoniʻoní. …

Kuó Ne foaki mai maʻatautolu ʻa e ngofua ke tau hū ai kiate Ia ʻi ha faʻahinga taimi pē, ʻo fakafou ʻi he ngaahi lotu ʻo e tuí mo e ngaahi kole tāumaʻu ʻo e loto-moʻoní.

Kuó Ne foaki mai maʻatautolu ha kau ʻaposetolo mo e kau palōfita ʻo onopōní, ʻa ia ʻoku nau fakahā ʻa e folofola ʻa e ʻOtuá ʻi hotau kuongá. …

Kuó Ne toe fakafoki mai ʻa Hono Siasí. …

Kuó Ne foaki mai maʻatautolu ʻa e folofola toputapú—ʻa ʻEne folofola kuo hiki kiate kitautolú.

Kuó Ne foaki mai ha ngaahi meʻa ngāue taʻefaʻalaua ʻo e tekinolosia fakaonopōní ke tokoniʻi kitautolu ʻi heʻetau ngāue fakaākongá. …

Ko e hā kuo foaki mai ai ʻe he Tamai Hēvaní ʻa e tokoni lahi pehē maʻatautolú? Koeʻuhí he ʻokú Ne ʻofa ʻiate kitautolu. Pea koeʻuhí, ʻi Heʻene folofola kau kiate Iá “Ko ʻeku ngāué ʻeni mo hoku nāunaú—ke fakahoko ʻa e moʻui taʻe-faʻa-mate mo e moʻui taʻengata ʻa e tangatá” (Mōsese 1:39). (“Ko ʻEtau Tamai, Ko Hotau Faifakahinohino,” Liahona, Sune 2016, 5)

Fakaafeʻi ʻa e kau akó ke fili ha niʻihi ʻo e ngaahi founga ʻoku mahuʻingamālie taha kiate kinautolú ʻi heʻenau tali ʻa e ngaahi fehuʻi ko ʻení.

ʻE tokoni fēfē ʻa e ngaahi foungá ni ki heʻetau fakalakalaka ki he moʻui taʻengatá?
Kuo tokoniʻi fēfē koe ʻe ha niʻihi ʻo e ngaahi founga ko ʻení ke ke hangē ange ko e Tamai Hēvaní?

Fakaafeʻi ha kau ako kehekehe ke vahevahe ha founga ʻe taha ne nau fili pea mo ʻenau tali ki he ongo fehuʻi ʻi ʻolungá. Kumi ha ngaahi founga ke fakamālō mo fakapapauʻi ai kinautolu ʻi heʻenau ngaahi talí. Kapau ʻoku ʻikai fakanatula ʻa e tokanga ʻa e kau akó ki he Fakamoʻuí, vakai ki he Sione 3:16 mo e Mōsaia 4:2, pea kole ki he kau akó ke vahevahe ʻa e founga ʻoku tokoniʻi ai kinautolu ʻe he Fakamoʻuí ke nau fakalakalaka pea hoko ʻo hangē ange ko e Tamai Hēvaní.

Loto-houngaʻia ʻi he Tamai Hēvaní

Ke tokoni ki he kau akó ke nau ongoʻi houngaʻia lahi ange ʻi he Tamai Hēvaní mo ʻEne ngāue ke fakahoko ʻenau moʻui taʻe-faʻa-maté mo e moʻui taʻengatá, fakaafeʻi kinautolu ke fekumi ki he tokoni ʻa e ʻEikí ʻi heʻenau tali ʻa e ngaahi fehuʻi ko ʻení ʻi heʻenau tohinoa akó. Pe, ko e tohi ʻa e kau akó ha fakamatala ʻo fakahaaʻi ʻenau houngaʻia ki he Tamai Hēvaní ʻi he meʻa ʻokú Ne fai maʻanautolú.

Ko e hā kuó ke ako pe ongoʻi ʻi he ʻahó ni ʻokú ke fie manatuʻi?
Ko e hā hoʻo ongo fekauʻaki mo e Tamai Hēvaní mo Sīsū Kalaisi pea mo e meʻa ʻokú Na fai ke tokoniʻi koe ke ke toe foki ange kiate Kinauá?

Ako Ma‘uloto

Mahalo te ke fie tokoni ki he kau akó ke ako maʻuloto ʻa e potufolofola fakataukei fakatokāteliné mo e kupuʻi lea folofola mahuʻingá lolotonga ʻa e lēsoni ko ʻení pea toe fakamanatu ia ʻi he ngaahi lēsoni ʻi he kahaʻú. Ko e kupuʻi lea folofola mahuʻingá ko e “Ko ʻeku ngāué ʻeni mo hoku nāunaú—ke fakahoko ʻa e moʻui taʻe-faʻa-mate mo e moʻui taʻengata ʻa e tangatá.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

Ngaahi Maʻuʻanga Tokoni Kehé

ʻOku tokoni fēfē ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ke fakahoko ʻa e moʻui taʻe-faʻa-mate mo e moʻui taʻengata ʻa e tangatá?

Naʻe pehē ʻe Sisitā Leina I. ʻApeto ʻo e Kau Palesitenisī Lahi mālōlō ʻo e Fineʻofá:

10:0

Talu mei he kamataʻangá mo hono tānaki mo fakanofonofo ʻe he ʻOtuá ʻEne fānaú “ke fakahoko ʻa [ʻetau] moʻui taʻe-faʻa-maté mo e moʻui taʻengatá” (Mōsese 1:39). ʻI he taumuʻa ko iá, naʻá Ne fakahinohinoʻi kitautolu ke langa ha ngaahi feituʻu ʻo e moihuú, ke tau maʻu ai ʻa e ʻiló mo e ngaahi ouau ʻo e fakamoʻuí mo e hakeakiʻí; fakahoko mo tauhi ʻa e ngaahi fuakava ʻoku nau haʻi kitautolu kia Sīsū Kalaisí; pea fakakoloaʻi ʻaki ʻa e “mālohi faka-ʻOtuá” (Tokāteline mo e Ngaahi Fuakava 84:20); mo faʻa fakataha ke manatua ʻa Sīsū mo fefakamālohiaʻaki ʻiate Ia. ʻOku fokotuʻu ʻa e houalotu ʻa e Siasí mo hono ngaahi falé ki heʻetau lelei fakalaumālié. (“Ko Kitautolu ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní,” Liahona, Mē 2022, 11)

Te u ʻilo fēfē ʻoku ʻofa ʻa e Tamai Hēvaní mo Sīsū Kalaisi ʻiate au?

Naʻe vahevahe ʻe Palesiteni Henelī B. ʻAealingi ʻo e Kau Palesitenisī ʻUluakí ʻo pehē:

15:59

ʻOku ʻafioʻi mo ʻofa ʻa e Tamai Hēvaní mo Sīsū Kalaisi ʻiate koe. ʻOkú Na finangalo ke ke foki ange kiate Kinaua pea hoko ʻo hangē ko Kinauá. ʻOku hoko hoʻo lavameʻá ko ʻEna lavameʻa. Kuó ke ongoʻi ʻa hono fakapapauʻi mai ʻa e ʻofa ko iá ʻe he Laumālie Māʻoniʻoní ʻi he taimi naʻá ke lau pe fanongo ai ki he ngaahi leá ni: “He vakai ko ʻeku ngāué ʻeni mo hoku nāunaú—ke fakahoko ʻa e moʻui taʻe-faʻa-mate mo e moʻui taʻengata ʻa e tangatá.” (“ʻOsi Siviʻi, Fakamoʻoniʻi, pea Fakaleleiʻi,” Liahona, Nōvema 2020, 97)

Ngaahi ʻEkitivitī Fakalahi ki he Akó

Founga ʻe taha ke kamata ʻaki ʻa e lēsoní

Ke tokoni ke fakakaukau ʻa e kau akó ki he Tamai Hēvaní mo ʻEne ngāué, te ke lava ʻo fakaafeʻi ʻa e kau akó ke hiki ha lisi ʻo e ngaahi meʻa ʻoku fai ʻe he kakaí ʻoku nau saiʻia aí. ʻE lava ke kau heni ʻa e ngaahi ngāué, ngaahi manakó, ngaahi fatongiá, mo e alā meʻa peheé. ʻE lava ke aleaʻi ʻe he kau akó ʻa e founga ʻe lava ke ʻomi ai ʻe he ngaahi meʻá ni ha fiefia ki he kakai lalahí ni.

Te ke lava leva ʻo ʻeke ange ʻa e ongo fehuʻí ni:

Ko e hā ʻokú ke ʻilo fekauʻaki mo e ngāue ʻoku fakahoko ʻe he Tamai Hēvaní?
ʻOkú ke pehē ko e hā ʻokú ne ʻomi kiate Ia ʻa e fiefia ʻi Heʻene ngāué? (Vakai, 3 Nīfai 17:20–21; Tokāteline mo e Ngaahi Fuakava 18:11–13.)

Hili iá, ʻe lava ke fakalaulauloto ʻa e kau akó ki heʻenau ngaahi tali ki he ongo fehuʻí ni:

ʻOku lelei fēfē ʻeku mahino ki he meʻa kuo fai ʻe he Tamai Hēvaní maʻakú?
ʻOku lelei fēfē ʻeku ʻilo mo fakahaaʻi ʻeku houngaʻia ʻi he meʻa ʻoku fai ʻe he Tamai Hēvaní maʻaku ʻi heʻeku moʻuí?

Naʻe fakafoki mai ʻe Siosefa Sāmita ha ngaahi moʻoni naʻe mole

Ke tokoni ke ʻiloʻi ʻe he kau akó ʻa e fatongia mahuʻinga ʻo Siosefa Sāmita ʻi hono Fakafoki Mai ʻo e ongoongoleleí, te nau lava ʻo lau ʻa e Mōsese 1:40–41. ʻE lava ke nau kumi ʻa e meʻa naʻe fekau ʻe he ʻEikí kia Mōsese ke ne faí (hiki ʻa e ngaahi moʻoní ʻi ha tohi, ko e Tohi Tapú), ko e meʻa naʻe hoko ki he meʻa naʻá ne tohí (ngaahi moʻoni naʻe toʻo mei he Tohi Tapú; vakai, 1 Nīfai 13:24–28; Mōsese 1:23), mo e founga naʻe ʻomi ai ʻe he ʻEikí ha founga ke tau maʻu ai ʻa e ngaahi moʻoni ko iá ʻi hotau kuongá (ʻo fakafou ʻia Siosefa Sāmita mo e Tohi ʻa Molomoná [vakai, 2 Nīfai 3:6–15; Mōsese 1:41]).

Mītia ke fili mei aí

“A Great Work.” ʻOku fakamatala ʻa e veesi hono tolu ʻo e hivá ni ki he ngāue mo e nāunau ʻo e ʻEikí pea pehē ki he fehokotaki ʻa e toʻu tupú mo iá.

4:17

“What is the Purpose and Meaning of Life? Now You Know.” Te ke lava ʻo sio mei he taimi 0:23 ki he 0:58 ke akoʻi ʻa e kau akó fekauʻaki mo e fehokotaki ʻi he Mōsese 1:39 pea mo e palani ʻo e fakamoʻui ʻa e Tamai Hēvaní.

7:43

“Tamai Fakaemāmaní, Tamai Hēvaní” (3:59). ʻOku tokoni ʻa e vitiō ko ʻení ke mahino ki he kau akó ʻa e meʻa te tau lava ʻo ako fekauʻaki mo e Tamai Hēvaní ʻo fakafou ʻi he fofonga ʻo e ngaahi tamai fakaemāmaní.

3:55