iKuri ni Vakamacala

Sa sureti iko na Tamamu Vakalomalagi mo ciqoma na veicakacaka tabu vakalotu. Na cakacaka vakalotu oqo e oka kina na veiyalayalati—o cakava na yalayala eso kei na Kalou, ka yalayala vata kei iko o Koya. O sa cakava na veiyalayalati oqo, me ivakaraitaki, ni o papitaiso ka vakadeitaki, nio vakaedaumeni, kei na gauna o vauci kina me baleta na gauna oqo kei na veigauna tawamudu ena vale ni Turaga. Na nomu cakava ka maroroya na veiyalayalati ena kauta mai vei iko na reki kei na marau ka na vakatara vei iko mo rawata na kaukauwa ni Kalou me vukei iko mo lesu tale ki na Nona iserau, me rawa nio marautaka kina na bula tawamudu vata kei Koya.

Mo vulica e levu tale na ka o sa yalataka vua na Kalou nio vakayacora na veiyalayalati oqo—kei na ka sa yalataka vei iko o Koya—raica na iVoladusidusi Raraba: Veiqaravi e Na Lotu i Jisu Karisito ni Yalododonu Edaidai, 3.5, Valenivola ni Kosipeli.

Vakasamataka vakatitobu na taro eso e toka e ra. Sa ira oqo na taro o na vakatarogi kina mo ciqoma e dua na ivolatara ni valetabu, ia e sega ni gadrevi mo waraka na veivakatarogi. Vakayacora ga na nomu vakadidike vakayalo vakai iko ena gauna ga o vinakata kina.

Na iToko ni Goneyalewa, na iToko ni Kuoramu ni Matabete i Eroni, kei na iVunau e Tini e rawa talega ni veivuke ena nomu vakadidike vakai iko.

Taro ni iVolatara ni Valetabu me Baleti ira na iTabagone

O vakabauta ka vakadinadinataka li na Kalou, na Tamada Tawamudu; Na Luvena, o Jisu Karisito; kei na Yalo Tabu?
E tiko li na nomu ivakadinadina ni Veisorovaki i Jisu Karisito kei na Nona itavi vaka nomu iVakabula ka Dauveivueti?
E tiko li na nomu ivakadinadina me baleta na Vakalesui mai ni kosipeli i Jisu Karisito?
O tokona li na Peresitedi ni Lotu i Jisu Karisito ni Yalododonu Edaidai ni sa parofita, daurairai, ka dauvakatakila ka sa ikoya duadua ga na tamata e vuravura e vakadonui me vakayagataka na idola kece sara ni matabete? O tokoni ira li na lewe ni Mataveiliutaki Taumada kei na Kuoramu ni Apositolo Le Tinikarua nirasa parofita, daurairai, ka daunivakatakila? O tokoni ira li na Vakaitutu Raraba kei ira na iliuliu ni Lotu ena noda vanua?
Sa kaya na Turaga ni ka kece me “caka vakasavasava” e Matana (Vunau kei na Veiyalayalati 42:41). O sasagataka tu li me savasava na nomu vakasama kei na itovo? O sa talairawarawa tiko li ki na lawa ni tiko savasava?
O sa muria tiko li na ivakavuvuli ni Lotu i Jisu Karisito ena nomu bula kei na nomu veimaliwai kei ira na nomu lewe ni vuvale kei ira tale eso?
O tokona se tutaka li na ivakavuvuli, ivalavala, se ivunau e veisaqasaqa kei na kena ena Lotu i Jisu Karisito ni Yalododonu Edaidai?
O sasagataka tu li mo vakatabuya na Siga ni Vakacecegu, e vale kei na valenilotu; tiko ena nomu veisoqoni; vakavakarau ka bula kilikili mo vakaivotavota ena sakaramede; ka bulataka na nomu bula me veiganiti kaya na lawa kei na ivakaro ni kosipeli?
O sasagataka tu li mo dau dina ena veika kece o cakava?
O sa sauma vakadodonu tiko li na nomu ikatini?
O sa kila vinaka ka muria tiko li na Vosa ni Vuku?
E tiko beka eso na caka cala bibi ena nomu bula e dodonu me tusanaki vei ira na matabete vakatulewa me tiki ni nomu veivutuni?
O nanuma li ni sa kilikili na nomu bula mo curuma na vale ni Turaga ka vakaitavi ena cakacaka tabu vakalotu eso?

iToko ni Goneyalewa

O au e dua na luvena yalewa lomani na itubutubu vakalomalagi, ena ituvaki vakalou kei na icavacava tawamudu.

Niu dua na tisaipeli i Jisu Karisito, au sa sasagataka meu vakataki Koya tu. Au vakasaqara ka cakacakataka na noqu vakatakila ka qaravi ira na tani e na Yacana tabu.

Au na duri meu ivakadinadina ni Kalou e na veigauna kecega kei na veika kecega kei na veivanua kecega.

Niu sasagataka meu rawata na bula vakalou, au vakamareqeta na isolisoli ni veivutuni ka qara meu na caka vinaka e veisiga. Ena vakabauta, au na vakaqaqacotaka na noqu itikotiko kei na matavuvale, vakayacora ka muria na veiyalayalati tabu, ka ciqoma na veicakacaka vakalotu kei na veivakalougatataki ni valetabu.

Na iToko ni Kuoramu ni Matabete i Eroni

O au e dua na luvena tagane na Kalou, ka tiko na Nona cakacaka meu cakava.

Au na lomana na Kalou, ena lomaqu, igu, vakasama kei na kaukauwa taucoko, maroroya noqu veiyalayalati, ka vakayagataka na Nona matabete meu qaravi ira kina na tani, vakatekivu ena noqu matavuvale.

Niu sasagataka meu veiqaravi, cakacakataka na vakabauta, veivutuni, ka caka vinaka e veisiga, au na ciqoma tu na veivakalougatataki ni valetabu kei na rekitaki ni kosipeli.

Au na vakavakarau meu daukaulotu gugumatua, tagane vakawati yalodina, ka tama dauloloma niu dua tu na tisaipeli dina i Jisu Karisito.

Au na veivuke ni vakarautaka na vuravura ena lesu mai ni iVakabula ena sureti na tamata kecega mera lako mai vei Karisito ka ciqoma na veivakalougatataki ni Nona Veisorovaki.

Na iVunau e Tini

Me kakua vei iko na kalou tani, koi au duadua ga.
Mo kakua ni cakava vei iko e dua na matakau ceuceu.
Mo kakua ni cavuta walega na yaca i Jiova na nomu Kalou.
Mo nanuma na siga ni vakacecegu, mo vakatabuya.
Mo vakarokorokotaki rau na tamamu kei na tinamu.
Mo kakua ni laba.
Mo kakua ni ia na veibutakoci.
Mo kakua ni butako.
Mo kakua ni beitaka vakailasu na kai nomu.
Mo kakua ni kocokoco.

Raica na Lako Yani 20:3–17.