Na ka dina ena sereki kemudou

Na Tamada Vakalomalagi e vinakati ira na Luvena yalewa kei na tagane me ra dau vuli tikoga. E tiko ruarua vei iko na inaki vakayago ka vakayalo mo qara ka taleitaka na vuli. Na vuli e sega walega ni baleta na kena rawati na ilavo. E sa tiki ni nomu lalawa tawamudu mo vakataka sara na Tamada Vakalomalagi.

Na bula ena yalodina sa kena ibalebale ni ko taleitaka na ka sa dodonu ena mata ni Kalou—mai na nomu taleitaka na tiko vakacegu, nomu kilai, se ka veiganiti. Kena ibalebale na caka tu ni ka dodonu baleta ga ni sa dodonu.

E tiko vei iko e dua na ka vakasakiti mo wasea. Na kosipeli i Jisu Karisito e umana tu na isau ni vakatataro ni bula. E sa sala ki na veivakacegui kei na bula marau. O na rairai sega ni kila na ka kecega, ia sa veirauti na ka o kila mo lomana na wekamu, wasea vei ira na ivakavuvuli dina, ka sureti ira me ra vulica eso tale na ka.

Mo dau vuli tikoga. Vakaraica na madigi eso mo vakarabailevutaka kina na nomu vakasama kei na kila maqosa. Na veimadigi oqo e rawa ni oka kina na vuli matau e koronivuli se vuli cakacaka, vakakina na vuli wale mai na ivurevure eso o nuitaka. Okata na Turaga ena nomu sasaga, ka na tuberi iko o Koya.

Vulica na veika dina vakayalo. Ni o vulica na veika baleta na vuravura wavoliti iko, vulica talega na veika baleta na iVakabula, ka bulia na vuravura. Vulica na Nona bula kei na ivakavuvuli. Me sa tiki ni nomu vuli ena bula taucoko na semineri, inisitute, kei na vulici ni kosipeli. E rawa ni vakarautaki iko ki na veiqaravi vakaulotu ka wasea na kosipeli ena nomu bula taucoko.

Bula ena yalodina. Kakua ni butako, lasu, lawaki, se veicavilaki ena sala cava ga—e koronivuli, e vanua ni cakacaka, initaneti, vanua kecega. Mo sa imuri yalodina tu ga i Jisu Karisito ena matanalevu kei na kena vakaitaukei.

Na vuli e vakalevutaka na nomu rawa ni qarava na Turaga, oka kina na kaulotu. E vakaukauwataki iko mo vakalougatataki ira na tani, vakabibi na nomu matavuvale. Na levu ga ni nomu vuli, na levu ni nomu rawa ni veivuke ni tara na matanitu ni Kalou ka vakayarayarataka vinaka na vuravura.

Na yalodina e vakavurea na vakacegu kei na veidokai. Ni veidonui kei na ka dina na nomu vosa kei na ivalavala, o vakaraitaka ni rawa ni nuitaki iko na tamata tale eso kei na Turaga.

Ni ko tutaka na ivakavuvuli i Jisu Karisito, sa duri tu vata kei iko o Koya. Sa nomu qaqa o Jisu Karisito! Ena sega beka ni duavata kei na veika o vakabauta o ira na tani, ia ena vakilai na nomu yaloqaqa kei na lomavinaka. Ke ra muria se sega na tani na nomu ivakaraitaki, ena tubu na nomu ivakadinadina, yalodei, kei na vakabauti Karisito.