O rawa ni veivuke ena cakacaka ni Kalou.

Na cakacaka kei na lagilagi ni Kalou oya mera tucake tale mai na mate na tamata kecega ka rawata na bula tawamudu. Na tawamate rawa oya na bula vakaoti tu ena yago sa vakaturicake tale. Na bula tawamudu, se bula vakacerecerei, oya na vakataka vakalevu na Kalou ka bula tawamudu tu vata kei Koya vakamatavuvale. Sa yaco na ka kecega oqo ena vuku i Jisu Karisito kei na Nona Veisorovaki. O rawa ni vakararavi Vua.

O rawa ni veivuke ena cakacaka ni Kalou ena nomu lako mai vei Karisito ka vukea eso tale mera cakava vakakina. Ena gauna ga o cakava kina e dua na ka mo vukea kina e dua me muri Jisu Karisito, o sa veivuke tiko ena cakacaka ni Kalou.

Bulataka na kosipeli. Taracake na nomu vakabauti Jisu Karisito. Veivutuni e veisiga. Ciqoma na cakacaka vakalotu ni matabete ni Kalou ka maroroya na nomu veiyalayalati. Cakava me ivakarau tudei tu ni nomu bula.

Vukei ira na vakaleqai tu. Vakaraica na sala mo veivuke ka qaravi ira kina na tani, oka kina na nomu matavuvale, nomu itokani, kei na nomu itikotiko raraba. Dua na sala levu mera vukei kina na vakaleqai tu oya na muri ni lawa ni lolo kei na dolei ni isolisoli ni lolo.

Sureta na tamata kecega me ciqoma na kosipeli. Me vakavotukanataki na nomu vosa kei na ivalavala ena nomu vakabauti Jisu Karisito. Mo tu vakarau ni tukuna vua e dua ka tarogi iko me baleta na inuinui kei na bula marau o vakila vaka Nona tisaipeli. Vei ira na cauravou, na veiqaravi vakaulotu tudei esa dua na itavi vakamatabete. Vei ira na goneyalewa, esa dua tu na madigi kaukauwa; masulaka mo kila ke vinakata na Turaga mo veiqaravi. Vakavakarau mo wasea na kosipeli ena nomu bula taucoko.

Vakaduavatataka na matavuvale me tawamudu ena qaravi ni cakacaka ni tuva kawa kei na valetabu. Vulica na veika baleti ira na tubumu. Vaqaqa o cei e gadreva tu na cakacaka vakalotu ni valetabu. Lako ki na valetabu ena kena levu ga o rawata mo papitaiso ka vakadeitaki tu ena vukudra. Kevaka o gadreva na veivuke, gole ki na FamilySearch.org.

O na rawata na veivuke ni Kalou. E sega ni namaki iko na Tamada Vakalomalagi mo cakava vakataki iko na cakacaka oqo. Sa tiko vata kei iko o Koya. Ni o dolea ena yalomalumalumu na nomu gauna kei na lomamu, ena caka ka veivakurabuitaki o Koya ena vukumu. Sa nomu qaqa o Jisu Karisito!

O na vakasinaiti ena reki. Na cakacaka ni Kalou sa cakacaka rekitaki! Ni ko vakaitavi kina, o na vakila na reki e vakila o Koya. Raitayaloyalotaka na reki o na wasea kei na Tamada Vakalomalagi kei ira na Luvena o sa vukea tu ni kauta mai Vua!