O sa vakalougatataki ena idola kei na dodonu ni lewa ni matabete

Na idola kei na dodonu ni lewa taucoko ni matabete sa vu mai vei Jisu Karisito. Na lewe ni matabete taucoko sa rawa ni taleva lesu na nona dodonu ni lewa ki Vua. Sa vakatau vua na iVakabula o cei e ciqoma tu na dodonu ni lewa oqo kei cei e ciqoma tu na idola ni matabete. Eda sa vakararavi ki na Nona kilaka vinaka sara.

Sa vakalesuya mai o Jisu Karisito na Nona matabete ena noda gauna. Sa dusimaka o Koya na iwalewale ni kena vakayagataki na matabete. Era a ciqoma na idola ni matabete o Atama, Mosese, Pita, kei na vuqa tale na parofita ena veitabagauna. Ena noda gauna, a ciqoma o Josefa Simici na idola ni matabete mai vei Joni na Dauveipapitaisotaki, Pita, Mosese, Ilaisa, Ilaija, kei na so tale. Nikua era sa taura tu na idola oqo na lewe ni Mataveiliutaki Taumada kei na Kuoramu ni Apositolo Le Tinikarua. Sa tiko talega vei ira na iliuliu ni matabete kei na peresitedi ni kuoramu na idola ni matabete me baleta na nodra veikacivi. Na idola ni matabete e vakatulewataka na cakacaka ni Kalou. Era vakatarai ka vakaukauwataki ira na turaga kei na marama mera veivuke ena cakacaka oya.

Na dodonu ni lewa ni matabete e vakalougatataki ira taucoko na luve ni Kalou. Ni sa vakalesui tu mai na matabete, o rawa ni ciqoma na cakacaka vakalotu eso ka vakayaco veiyalayalati kei na Kalou. O rawa ni qaravi tavi ena yaca ni Kalou ni o ciqoma e dua na ilesilesi se veikacivi mai vua e dua e tiko vua na dodonu ni lewa.

Vakadonuya na veikacivi ni Lotu ka veiqaravi ena yalodina. Ni o ciqoma e dua na veikacivi ni Lotu, o sa tabaki ena dodonu ni lewa mai vua na Kalou mo qarava na itavi oya. O rawa talega ni ciqoma na veituberi mai vua na Kalou me baleta na nomu veiqaravi. Ni ko veiqaravi, o sa matataki Jisu Karisito. Solia Vua na nomu vinaka taucoko.

Tokoni ira sa kaciva tu na Kalou mera veiqaravi. Na veitokoni e vakaibalebale vakalevu cake mai na nomu laveliga ni sa wiliki e dua na yaca ena soqoni ni Lotu. Sa kena ibalebale mo veitokoni ka veivuke. Vakaraica na sala eso mo vakaraitaka ni o tokoni ira na tamata sa kaciva tu o Jisu Karisito me veiqaravi ena Nona Lotu.

Vakayacora vakavinaka na ilesilesi eso mai vei ira na nomuni iliuliu ni Lotu—oka kina na nomu mataveiliutaki ni kuoramu se kalasi. Sa tiko vei ira na dodonu ni lewa mai vua na Kalou, ka ra lesia vei iko me baleta na ilesilesi oya. O rawa ni lesi tu mo qarava e dua na tamata, kidavaki ira na tamata ni ra basika ena soqoni ni sakaramede, se veivuke ena dua na itaviqaravi. Se cava ga na ilesilesi, raica tu me dua na madigi mo tisaipeli kina i Jisu Karisito ka qaravi ira na luve ni Kalou.

O rawa ni nuitaka ni cakacaka vakalotu eso o ciqoma sa vakadonui mai vei Jisu Karisito. Oqo e dua vei ira na ka e matalia tu kina na Lotu i Jisu Karisito. Mai na cakacaka vakalotu ni matabete eso, sa vakatakilai tu na kaukauwa ni Kalou.

Sa yaco mo dua tu na iyaya ni cakacaka ena liga ni Turaga. Ni ko qarava na Turaga ena Nona dodonu ni lewa kei na nodra veidusimaki na Nona italai ka taura tu na idola ni matabete, ena vukei iko o Koya ni kila na sala mo qaravi ira kina na tani ena Nona cakacaka. Sa nomu qaqa o Jisu Karisito. Na nomu veiqaravi ena vukei iko ni toro voleka ki Vua ka vakamarautaki iko.