6.
Lomana na Kalou, lomana na kainomu
Maciu 22:37–40
Me vukea na nomu vakayaco digidigi vinaka, sa soli vakaro na Kalou. E vakayacora oqo o Koya baleta ni lomani iko. Na vuna vinaka duadua mo muria kina na ivakaro ni Kalou baleta ni o lomani Koya. Na loloma esa uto ni ivakaro ni Kalou.
Dina Tawamudu
Sa lomani iko na Kalou. Sa Tamamu o Koya. Na Nona loloma uasivi sa rawa ni vakauqeti iko mo lomani Koya. Ni sa veivakayarayarataki bibi duadua ki na nomu bula na nomu lomana na Tamada Vakalomalagi, sa rawarawa sara e vuqa na vakatulewa.
Na rua na ivunau levu duadua vakaoti na lomana na Kalou kei na lomana na kainomu. O cei na kainomu? Na tamata kecega! Na ka kece tale eso e vakatavulici ena ivolanikalou vakakina mai vei ira na parofita sa semati tu ki na rua na ivakaro oqo.
Sa tacimu ka ganemu na tamata taucoko—oka kina, vakaidina, na tamata ka ra duatani mai vei iko se sega ni duavata kei iko. Sa vinakata na Tamada Vakalomalagi mera veilomani vakai ira na Luvena. Ni o qaravi ira na Luvena, o sa qaravi Koya tiko.
Veisureti
Vakaraitaka na loloma kivua na Kalou ena muri ni Nona ivunau. Me ivakaraitaki, ena vakatabui ni Siga ni Vakacecegu, oka kina na vakavakarau ki na kei na vakayagataki ni sakaramede ena yalodina, o vakaraitaka vua na Kalou ni ko sa lomasoli mo vakatabuya e dua na siga ena veimacawa ki Vua. Ni ko lolo ka sauma na ikatini kei na isolisoli tale eso, o vakaraitaka vua na Kalou ni sa bibi vakalevu vei iko na Nona cakacaka mai na veika vakayago. Ni ko vakayagataka na yaca ni Kalou kei Karisito ena vakarokoroko, sega ena sala tawayaga se mamada, o vakaraitaka ni ko sa vakavinavinakataka na ka taucoko Rau sa vakayacora ena vukumu.
Qarava na tamata kecega vaka luve ni Kalou. Vaka tisaipeli i Jisu Karisito, o rawa ni liutaka na nodra qaravi na kawatamata kecega, veimatalotu, kei na ilawalawa tale eso ena loloma kei na veidokai—vakabibi o ira ka rawai tu ena vosa kei na ivalavala mosimosi. Sudra yani vei ira ka rairai galili, tiko tani, se luluqa tu. Vukei ira ni vakila na loloma ni Tamada Vakalomalagi ena vukumu. Wasea vei ira na veivakalougatataki sa solia vei iko o Koya, ka sureti ira mera muri Jisu Karisito.
Vakadeitaka ni sa ucuya tu na nomu lomana na Kalou kei ira na tani na nomu vosa—ena nomu veivosaki e matana votu se initaneti. Cavuta na veika e veilaveti—sega na ka e veisei, mosimosi, se veivakacudrui, vaka veiwali madaga. E rawa ni qaqaco tu na nomu vosa. Me ra sa qaqaco tu vakavinaka sara.
Vakaraitaka na loloma ki na nomu matavuvale. Sa tekivu e vale na lomani ni luve ni Kalou taucoko. Vakayacora na nomu itavi mo cakava na nomu itikotiko me vanua era rawa ni vakila kina na tamata kecega na loloma ni iVakabula.
Veivakalougatataki Yalataki
Na nomu veimaliwai kei na Kalou ena vakatitobutaki ni ko vakaraitaka na loloma ena nomu muria na Nona ivunau ka maroroya tu na nomu veiyalayalati kei Koya.
Na nomu veimaliwai kei ira na tani ena vakatitobutaki ni ko vakaraitaka na loloma ena nomu veiqaravi va-Karisito. O na kune reki ni o cakava tu na vuravura me dua na vanua lomani vakalevu sara.
Taro kei na Kedra iSau
Au rawa ni vakila vakacava na loloma ni Kalou? Sa dau tiko ga na loloma ni Tamada Vakalomalagi. Vosa wasoma ki Vua ena masumasu. Wasea vata kei Koya na nomu nanuma, ka tu vakarau ki na veivakauqeti eso mai Vua. Wilika na Nona vosa ena ivolanikalou. Vakasamataka na ka taucoko sa vakayacora o Koya ena vukumu. Vakayagataki gauna ena vanua kei na itaviqaravi eso e tiko kina na Yalona.
Sa namaka li na Turaga meu lomani ira na tamata kecega, o ira madaga ka vakararawataki au? Sa namaka na Turaga mo lomani ira na nomu meca ka masulaki ira ka vakacacani iko. Ia, e sega ni kena ibalebale oqori ni sa dodonu mo tiko ena dua na ituvaki e vakavuna tu na rarawa ni lomamu, yagomu, se yalomu. Tuvalaka na yalayala bulabula eso mo taqomaki tu kina. Kevaka o sa vakasaurarataki se vakacacani, se kila ni yaco tiko oqo kina dua tale, veitalanoa kei na dua na qase nuitaki.
Na gauna kei na sala cava sa dodonu meu veikilai kina kei ira ka duidui mai vei au na yagodra ni sucu? Na sala vinaka duadua mo kilai ira kina na tani oya mai na veitokani vakaidina. Nio se gone, tara cake na veitokani vinaka kei na vuqa na tamata. Ena so na itovo vakavanua, era veikilai na itabagone kei ira ka duidui na yagodra ni sucu mai na itaviqaravi momona vakailawalawa eso. Me baleta na vakatorocaketaki ni lomamu kei na yalomu kei na tataqomaki, vakadaroya na itaviqaravi vakataurua eso me yacova ni o sa matua—na yabaki 16 sa dua na idusidusi vinaka. Veitalanoa kei na nomu matavuvale kei na iliuliu eso. Maroroya na veimaliwai tawanamaki ni ko sa qase cake. Vakayagataki gauna kei ira ka vukei iko ni maroroya na nomu veidinadinati kei Jisu Karisito.
Na cava au rawa ni cakava ke sa sega ni vanua ni loloma na noqu itikotiko? Sa kila na nomu iVakabula na nomu ituvaki, ka sa lomani iko. Dauvosota, tomana ni muria tu na ivunau ni Kalou, ka ivakaraitaki vinaka ki na nomu matavuvale. Na nomu cakacaka rawarawa ni loloma sa rawa ni vakavu veisau levu sara. O rawa talega ni tara cake na veimaliwai ena loma ni nomu matavuvale ni tabanalevu. Vakavakarau oqo mo tara cake na nomu matavuvale e yavutaki tu ena ivakavuvuli i Jisu Karisito. Nanuma: Sa nomu qaqa o Jisu Karisito!
Raica na Aisea 58:3–11 (na inaki eso ni lolo); 58:13–14 (na veivakalougatataki ni kena rokovi na Siga ni Vakacecegu); Malakai 3:8–10 (na veivakalougatataki ni saumi ikatini); Luke 6:27–28 (lomani ira na nomu meca); 10:25–37 (o cei na kainoqu?); Joni 3:16–17 (Sa lomani keda na Kalou, sa tala mai kina na Luvena); 14:15 (eda muria na ivunau baleta ni da lomana na Kalou); 1 Joni 4:19 (eda lomana na Kalou baleta ni sa lomani keda o Koya); Mosaia 2:17 (ni da qaravi ira na tani, eda sa qarava tiko na Kalou).
Taro ni iVolatara ni Valetabu
-
O sa muria li na ivakavuvuli ni Lotu i Jisu Karisito ena nomu ivalavala taukeni ka raraba kei ira na lewe ni nomu matavuvale kei na so tale?
-
O sa dua li na dausaumi katini vakataucoko?