Na cakacaka vakalotu kei na veiyalayalati ni valetabu eso sa tadolava vakalevu vei iko na veivakalougatataki ni Kalou

Na edaumeni sa isolisoli ni kilaka kei na kaukauwa. Ena cakacaka vakalotu ni edaumeni ni valetabu, o sa taura vakalevu tu kivei iko na yaca ni iVakabula. O yalataka ni talairawarawa tu kivua na Kalou, solibula mo vakayacora na Lomana, bulataka na kosipeli i Jisu Karisito, talairawarawa ki na lawa ni tiko savasava, ka vakatabuya—se solia—na nomu bula kei na ka kecega sa solia vei iko na Kalou ki na Nona Lotu. Sai ira oqo na nomu yalayala. Sa yalataka tu na Kalou me vakalougatataki iko ena kilaka levu cake, veitaqomaki, kei na rawati ni Nona kaukauwa. Sa yalataka talega me solia vei iko na bula tawamudu vata kei Koya. Me tiki ni edaumeni, sa nomu na madigi bibi ni daramaka tu na qameni ni matabete tabu. Na qameni sa ivakatakarakara i Jisu Karisito ka sa ivakananumi ni nomu veiyalayalati ena valetabu.

Na veivauci ena valetabu sa vakaduavatataki ira na veiwatini kei na matavuvale me tawamudu. Ena cakacaka vakalotu ni veivauci ena valetabu, drau na cakava vakaveiwatini e dua na veiyalayalati kei na Kalou vakakina vakai kemudrau. O na yalataka mo doka vakataucoko sara na Kalou kei kemudrau talega, veilomani ka veiqaravi vakai kemudrau, ka cakacaka vata ni muria tu na lawa ni Kalou. Sai koya oqo na nomu yalayala. Sa yalataka na Kalou ni sa rawa ni ka vakataucoko na nomu veimaliwai kei na watimu kei ira na luvemu. Sa yalataka talega ni ko rawa ni ciqoma na lagilagi cecere duadua vata kei Koya ena matanitu vakasilesitieli ni ko maroroya tu na nomu veiyalayalati. Na veivakalougatataki oqo sa vakatokai na bula vakacerecerei.

Me tiko ga na nomu ivolatara ni valetabu. Veivosaki kei na dua na lewe ni nomu matabisopi mo taura e dua. Ena vakatarogi iko o Koya ena ivakarau ni nomu bulataka tu na ivakatagedegede ni Turaga ni kena curumi na Nona vale tabu. Railesuva wasoma na veitaro oqo. (O rawa ni raica tu ena ikuri ni vakamacala ki na idusidusi oqo.) Kevaka madaga o tiko yawaka na valetabu, me sa ivakatakarakara ni nomu lomana na Turaga na nomu ivolatara kei na veidinadinati mo bulataka na Nona ivakatagedegede.

Gole ki na valetabu ena kena levu ga o rawata. Ena nomu ivolatara ni valetabu, o rawa ni curuma na vale ni Turaga ka papitaiso ka vakadeitaki tu ena vukudra na tubumu, me rawa ni ra ciqoma na veivakalougatataki sa soli tu vei iko. Vakayagataka na madigi kecega mo tiko kina ena valetabu. Qara na Turaga ena Nona vale. Vakaraici Koya ena cakacaka vakalotu eso, na ivakatakarakara eso, kei na Yalo o vakila. O na raici Koya.

Vakavakarau mo vakayaco veiyalayalati ena vale ni Turaga. Dua na sala vinaka duadua me vakayacori kina qo oya mo maroroya na nomu veiyalayalati ni papitaiso. Me sa dua tu na nomu takete veituberi na ciqomi ni cakacaka vakalotu ni valetabu eso ka dua tu na daunimaroroi veiyalayalati ena bula taucoko. Tekivu oqo mo bulataka na lawa eso o na yalataka ni muria ena valetabu: talairawarawa ki na ivunau ni Kalou, solibula, na kosipeli i Jisu Karisito, tiko savasava, kei na solika. E rawa ni vukei iko na nomu matavuvale, bisopi, kei na iliuliu ni Lotu tale eso.

O rawa ni vakataki Jisu Karisito vakalevu tu. Ena vukei iko o Koya mo dua tu na imuri levu sara ni buladodonu. Na cakacaka vakalotu kei na veiyalayalati ni valetabu eso ena vakatavulici iko ena sala mo laki tu kina ena mata ni Kalou ka ciqoma vata kei Koya na bula tawamudu.

O na vakaiyaragitaki ena kaukauwa ni Kalou. E vakavurea na veiyalayalati ni valetabu na yalayala ni na tiko vata kei iko na kaukauwa kei na lagilagi ni Kalou. Era na wanonovi iko tu na Nona agilosi.

Na gauna ena valetabu ena semati iko vakavoleka sara vei Jisu Karisito kei na Yalo Tabu. O na vakila na tiko sautu kei na vakacegu ni Kalou. O na rogoca na Domona ni matata vakalevu sara. Ena tadola vei iko o lomalagi, ka ko na kila vinaka sara na Nona sala. Ena kalevu sara na nomu kaukauwa mo sotava na nomu bolebole eso baleta ni sa semati tu ki na Lomana na lomamu.