Ena Sega na ka me Yali vei Au, mai vei Yongsung Kim. iLoloma nei Havenlight
5.
Lako ena rarama ni Kalou
Kalatia 5:25
O vakayaco digidigi vinaka cake ni ko rawa ni raica vakamatata na ka eso. Oya na vuna esa rui bibi kina na rarama; na rarama sa vakarawarawataka na raici ni salatu dodonu. Sa solia tu vei iko na Tamada Vakalomalagi na dodonu ki na ivurevure ni rarama vakalomalagi—na isolisoli ni Yalo Tabu—me vukei iko ni raica vakamatata na ka vinaka kei na ka ca, dodonu kei na cala.
Dina Tawamudu
E rawa ni tiko vei iko na Yalo Tabu me nomu itokani tudei. Ena gauna o a vakadeitaki kina mo lewe ni Lotu, o a sureti mo “ciqoma na Yalo Tabu.” Na madigi ni kena tiko vata kei iko na Yalotabu me nomu itokani tudei esa dua na isolisoli levu sara ni Kalou vei iko.
Na vakayaco digidigi vinaka sa vakavinakataka tu na nomu vakila rawa na Yalotabu. E vuqa sara na ka vinaka ka taucoko era tiko ena vuravura oqo. Me vaka ga ni na vakatakilai na yagomu mai na ka o kania ka gunuva, esa vakatakilai vinaka na nomu vakasama kei na yalomu mai na ka o wilika, sarava, ka vakarorogo kina.
Veisureti
Tikica e dua na gauna vua na Turaga e veisiga. Vuli mai Vua. Dau nanumi Koya. Masuta na Tamamu Vakalomalagi. Vulica na ivolanikalou tabu kei na nodra vosa na parofita bula. Qai saga mo bulataka na ka o vulica.
Qara na veika e veilaveti, veivakauqeti, ka sureta na Yalotabu. Ni ko vakayaco digidigi ena ka mo sarava, wilika, vakarogoca, se vakaitavi kina, vakasamataka na veika o vakila mai kina. Era sureta tu li na vakasama vinaka? Yawaka na ka cavaga e vakalialia na veika tabu se tawasavasava tu. Kakua ni vakaitavi ena dua na ka e vakabuwawataka na nomu vakatulewa se kauwai ki na Yalotabu, vaka na ivalavala kaukauwa, wai ni veivakamatenitaki, kei na waigaga rerevaki. Yalodei tu mo bokoca e dua na vidio se qito, lako tani mai na dua na iyaloyalo se danisi, veisautaka na nomu ivakatagi, se yawaka na ka cavaga e sega ni salavata kei na Yalotabu.
Vakayagataka na vakauitukutuku raraba me veilaveti. Na vakauitukutuku raraba e rawa ni dua na gacagaca kaukauwa ni veitaratara. Kevaka o vakayagataka, vakanamata ki na rarama, vakabauta, kei na dina. Kakua ni vakatauvatana na nomu bula ki na ka era sotava tiko na tamata tale eso. Nanuma na kemu yaga sa vu mai na nomu luvedrau na itubutubu vakalomalagi, sega ni mai na vakauitukutuku raraba.
Qara na veika e taucoko, kei na veimaliwai dina ka tawayalani. Qarauna me kakua ni sosomitaka na nomu gauna vata kei na matavuvale kei ira na itokani na nomu vakayagataka na tekinolaji kei na vakauitukutuku. Na vakauitukutuku raraba kei na tekinolaji tale eso sa rawa ni taura e levu na nomu gauna ka sega na ka yaga e vakavurea. Vakacegu mada mai na vuravura tawamacala ka semati kivei ira na tamata bula dina tu.
Veivakalougatataki Yalataki
Sa rawa ni tiko vata kei iko na Yalotabu ena veigauna. Na yalayala qo sa tiki ni veiyalayalati o vakayacora ena veigauna o vakayagataka kina na sakaramede. Na Yalotabu ena vakadinadinataka na Tamada Vakalomalagi kei Jisu Karisito vei iko. Ena vakacegui, tuberi, vakaroti, ka vakasavasavataki iko. Ena vukei iko o Koya ni kila na ka dina ka raica na ka vinaka e vuravura.
Taro kei na Kedra iSau
Au rawa vakacava ni kila keu sa vakila tiko na Yalo Tabu? Na vulici ni kena vakilai na Yalotabu e taura na gauna, vakatovotovo, kei na vosota. E vosa o Koya vei ira na tamata duidui ena sala duidui eso. Kakua ni vakawalena na veika rawarawa—na yalo vakacegu o rawata ena rogoci ni vakadinadina ni dua na tamata se na yalo veilecayaki o rawata ni oti na vakayaco digidigi cala. Vakasaqara na ivolanikalou ena sala duidui eso e veivosaki kina na Yalotabu, masulaka, ka vakaraica na madigi eso mo vakila kina na Yalotabu.
Na cava na iyaloyalo vakasisila? Cava na vuna meu levea kina? Na iyaloyalo vakasisila e dua na ivakaraitaki, ena iyaloyalo se vosa eso, e caka me vakayavalata na vakanananu ni veiyacovi. Na iyaloyalo vakasisila e basika ena vuqa na ituvaki, oka kina na vidio, iyaloyalo, ivola, qito, kei na ivakatagi eso. E rawa talega ni tukutuku se vakatakarakara eso era veiwaseitaka na veitokani. Na iyaloyalo vakasisila—era vakalolovirataka na veika tabu—na yagoda kei na vakanananu ni veiyacovi. O na rairai sotava na iyaloyalo vakasisila ena sala e sega ni nakiti. Ke o sotava na iyaloyalo vakasisila ena sala nakita se sega, yawaka kusarawa sara. O rawa talega ni veitalanoa kei na dua na itubutubu se dua tale na uabula nuitaki. Na saravi ni yaloyalo vakasisila nakiti esa ivalavala ca ka sa vakaleqa na nomu vakila rawa na Yalotabu. E vakamalumalumutaka na nomu lewa vakai iko ka vakaseva na iwalewale o raici iko kina kei ira na tani. Sa qaqa o Jisu Karisito me vukei iko ni vorata na iyaloyalo vakasisila ka veivutuni. Gole ki Vua ka yawaka na butobuto. Sa rawa ni vukei iko na nomu bisopi mo ciqoma na kaukauwa kei na veivosoti mai vua na iVakabula. Sa nomu qaqa o Jisu Karisito!
Raica na Same 119:105 (Na vosa ni Kalou sa vaka na rarama ena noda sala); Emosi 5:14 (qara na ka vinaka); Kalatia 5:22–23 (na vua ni Yalotabu); Moronai 7:18–19 (na rarama i Karisito); Vunau kei na Veiyalayalati 6:23 (sa veivakacegui na Turaga); 20:77, 79 (na masu ni sakaramede).
Taro ni iVolatara ni Valetabu
-
Sa kaya na Turaga me “caka vakasavasava” na ka kecega e Matana (Vunau kei na Veiyalayalati 42:41). O sa segata li na ivalavala vakadonui ni bula savasava ena nomu vakasama kei na itovo?