Vakararai Tu ki na Rarama na Matavuvale, mai vei Lovetta Reyes Cairo. iLoloma i Havenlight

Sa ka tabu na yagomu.

1 Korinica 6:18–20

Na yagomu sa dua na isolisoli vakasakiti mai vua na Tamamu Vakalomalagi. Na vakayago e solia vei iko na kaukauwa levu mo cakacakataka na nomu galala mo digitaka kina na dodonu se cala. Na kosipeli vakalesui mai i Jisu Karisito e rawa ni vukei iko mo raica na yagomu mai na vakadidike ni Kalou. Sa vakavuna qo na veisau levu ki na nomu digidigi me baleta na ka me vakayacori ki na yagomu kei na sala mo qarauna kina.

Dina Tawamudu

Na yagomu sa ivakatakarakara ni Kalou—na Kabula lagilagi, ka vakaturaga duadua e vuravura taucoko. Na ivolanikalou e vakatauvatana na yagoda ki na valetabu, na vanua e rawa ni tiko kina na Yalotabu. E dina, e sega ni vinaka sara tu qo na yagomu. Ia na veika o lako curuma tu ena yagomu sa rawa ni vukea na nomu vakavakarau ni ciqoma ena dua na siga na yago uasivi, vakaturi cake, ka lagilagi.

Sa buli o iko mai na yagomu kei na yalomu. Ena vuku ni ka oqo, sa semati vakavoleka sara na tiko bulabula vakayago kei na tiko bulabula vakayalo. Sa vakatakila na Vosa ni Vuku na iVakabula me vakatavulica na ivakavuvuli ni kena qarauni na yagomu ka yalataka tu na veivakalougatataki vakayago ka vakayalo.

Na vakanananu ni veiyacovi sa tiki bibi ni tuvatuva ni Kalou me tauyavutaka na vakawati marautaki kei na matavuvale tawamudu. Na vakanananu oqo era sega ni vakacalai—era sa ka tabu. Baleta ni sa rui ka tabu ka kaukauwa sara na vakanananu ni veiyacovi, sa solia vei iko na Kalou na Nona lawa ni tiko savasava me vakarautaki iko ni vakayagataka na veivakanananu vakaoqo me vaka na Nona inaki. E vakamacalataka na lawa ni tiko savasava ni sa vakadonuya na Kalou na veiyacovi voli kivua duaduaga na tagane kei na yalewa esa vakawati. Vuqa na tamata e vakatitiqataka se vakawalena tu na lawa ni Kalou, ia sa sureti keda na Turaga meda Nona tisaipeli ka bulataka na ivakatagedegede cecere sara.

Veisureti

Qarava na yagomu—kei na yagodra na tani—ena vakarokoroko. Ni ko vakatulewataka tu na nomu isulusulu, ikotikoti, kei na irairai, tarogi iko, “Au sa doka tu li na yagoqu me sa isolisoli tabu mai vua na Kalou?” E vinakata na Tamada Vakalomalagi me da veiraici vakai keda e na keda ituvaki dina sara: sega walega ena yago vakatamata ia vaka Luvena lomani ena icavacava vakalou. Vorata na ivukivuki eso e vakadreta se vakayarayarataka vakatawadodonu na yagomu mai na kemu ituvaki dina vaka luve ni Kalou ena icavacava tawamudu. Me sa tubera na nomu digidigi na bula savasava kei na loloma ni Kalou. Qara ivakasala mai na nomu matavuvale.

Cakava na ka kecega ena vaqaqacotaka na yagomu, sega ni ka era na vakamavoataka se vakacacana. Marautaka ena vakavinavinakataki na veika vinaka e vuqa e vakarautaka tu na Kalou. Nanuma na alakaolo, tavako, kofi, ti, kei na waigaga rerevaki tale eso sa sega ni baleta na yagomu se yalomu. Na veika madaga e rawa ni veivuke, vaka na wainimate ni tauvimate, e rawa ni veivakarusai ke sega ni vakayagataki vakadodonu.

Me sa ka tabu na veiyacovi kei na vakanananu ni veiyacovi. E sega ni dodonu mera ulutaga tu ni veiwali se veivakamarautaki. Ena taudaku ni vakawati ni dua na turaga kei na dua na marama, sa cala me tarai na veitikina vuni, tabu ni yagona tale e dua na tamata, kevaka mada ga e vakaisulu tu. Ena nomu digidigi eso baleta na ka o cakava, vakaraica, wilika, vakarogoca, vakasamataka, positaka, se teks, vorata na ka cavaga e nakiti me iwalewale veivagaroi tu vei ira na tani se vei iko. Oqo e oka kina na iyaloyalo vakasisila ena kena ituvaki cava ga. Kevaka o raica ni vakaukauwataka tu na veitemaki na ituvaki se itaviqaravi eso, vorati ira. O sa na kila vinaka tu na veika e baleta na ituvaki kei na itaviqaravi oya. Kevaka o sega ni vakadeitaka rawa, na Yalotabu, nomu matavuvale, kei na nomu iliuliu eso e rawa ni vukei iko mo kila. Vakaraitaka vua na Tamamu mai Lomalagi ni ko doka ka rokova na kaukauwa tabu mo vakavure bula.

Vakasama ka kukube tu o Jisu Karisito ena nona matanakilagi

Veivakalougatataki Yalataki

Na nomu rokovi iko vakai iko kei ira na tani ena vakalevutaki ni ko doka na yagomu ena nomu itovo, irairai, kei na isulusulu.

Sa yalataka tu na Turaga na iyautalei levu ni kilaka vei ira ka muria na Vosa ni Vuku. Na yago bulabula, galala mai na veivakatotogani, e vakalevutaka talega na nomu rawa ni ciqoma na ivakatakila yadua, vakasama vakamatata, ka qarava na Turaga.

Na bulataki ni lawa ni tiko savasava e kauta mai na veivakadonui ni Kalou kei na nomu kaukauwa vakayalo. Sa taqomaki iko kei na nomu matavuvale muri mai. Ni ko sa vakamau tu, na lawa oqo ena kauta mai na loloma levu sara, veivakabauti, kei na duavata ki na nomu bula vakawati. Na muri ni lawa oqo ena rawa kina vei iko mo toso tawauduki liu ka vakataka vakalevu tu na Tamamu Vakalomalagi. Ena tubu na nomu yalodei ni ko bula vaka e dua na tisaipeli i Jisu Karisito.

Taro kei na Kedra iSau

Na cava na ivakaitagede ni Turaga ena isulusulu, irairai, samuqawe, kei na culai ni yago? Na ivakaitagede ni Turaga esa baleta na nomu doka na veikja tabu ni yagomu, ke sa kena ibalebale tu mo duatani tu mai vei ira na tamata tale eso. Me sa nomu idusidusi na dina oqo kei na Yalotabu ni ko vakayaco vakatulewa—vakabibi na vakatulewa era veivakataudeitaki ki na yagomu. Mo yalomatua ka yalodina, ka qara ivakasala mai na nomu matavuvale kei na iliuliu eso.

Au rawa ni ulabaleta vakacava na veitemaki kei na itovo ca eso? Sa tiko na kaukauwa vua na Tamada Vakalomalagi kei Jisu Karisito me vukei iko. Vakatawana nomu bula ena veika e sureta na Nodrau kaukauwa ki na nomu bula, vaka na masumasu, vuli ivolanikalou, kei na nodra qaravi na tani. Golevi Jisu Karisito kei na Nona kosipeli, o na raica tu ni sa rawa ni vakavu kaukauwa na veika malumalumu. Qara veivuke mai na matavuvale, iliuliu, kei na daunivakasala nuitaki eso ni gadrevi tu. Era rawa ni vukei iko ni qarauni vinaka tu na nomu bula. E rawa ni taura na gauna, mo vosota ga, ka kakua ni soro.

Au dau maleleci ira na tamata e tautauvata na noqu yagonisucu. Era sa baleti au vakacava na ivakatagedegede eso oqo? E sega ni valavala ca na vakananu na veimaleleci vaka yagonisucu vata. Ke sa vakaoqo na nomu vakanananu ka sega ni douvaka se vakayacora tu, o sa bulataka tiko na lawa tabu ni tiko savasava ni Tamada Vakalomalagi. O sa dua na luvena daulomani na Kalou ka tisaipeli i Jisu Karisito. Nanuma ni sa kila vinaka tu na iVakabula na ka kecega o sotava. Ena semati ni nomu veiyalayalati kei Koya, o na vakaukauwataki mo muria na ivunau ni Kalou ka ciqoma na veivakalougatataki sa yalataka tu o Koya. Vakararavi Vua kei na Nona kosipeli.

Au a vakatotogani, ka sa madua tu. Au sa vakacalai li ena ivalavala ca? Sega. E sega ni vakacalai iko ena ivalavala ca na nomu rawai tu ena veivakatotogani cavaga se veivala. Sa lomani iko na iVakabula. Sa nomu qaqa O Koya. Sa via vukei iko o Koya, vakabulai iko, ka vakacegui iko. Sa rawa talega ni vukei iko na daunivakasala nuitaki eso, nomu lewe ni matavuvale, kei ira na nomu iliuliu.

Raica na Vakatekivu 1:27 (eda sa ucuya tu na Kalou); Joni 14:18 (sa yalataka na iVakabula na vakacegu); Filipai 4:7 (na vakacegu ni Kalou sa uasivia na ka kecega sa kilai rawa); Mosaia 2:41 (o ira ka muria na ivunau ni Kalou sa vakalougatataki vakayago ka vakayalo); Vunau kei na Veiyalayalati 88:15 (na yalo kei na yago sa yaco me tamata vakayalo); 89 (na Vosa ni Vuku); 121:45 (na vakasama savasava era sa muataki ki na yalonuidei vakaikuritaki).

Taro ni iVolatara ni Valetabu

Sa kaya na Turaga na ka kecega me sa “caka vakasavasava” e Matana (Vunau kei na Veiyalayalati 42:41). O sa segata li na veika ni bula savasava ena nomu vakasama kei na itovo?
O sa muria tu li na lawa ni tiko savasava?
O sa kila vinaka ka muriatu li na Vosa ni Vuku?