O Jisu Karisito na vu ni reki

E sa nakiti mo rawata na bula marau kei na reki. Oqori na inaki ni nomu bula. E sa inaki ni tuvatuva ni bula marau ni Tamada Vakalomalagi. E sega ni kena ibalebale oqo ni o na segai ni rarawa se sotavi dredre tu. Ia sa kena ibalebale ni rawa ni vukei iko na iVakabula mo ulabaleta na veigauna dredre ka kune reki.

Na reki e sega ni yaco ena veika o lako curuma; e yaco tu ena muri Jisu Karisito. Ena dua beka na nomu siga ca, macawa ca, se yabaki ca. Ia na reki e sega ni kena yali na rarawa ena nomu bula; sai koya na tikori i Karisito ki na nomu bula.

Na reki ni iVakabula sa levu ka balavu sara mai na ka kecega. Ena temaki iko o Setani mo vakasaqara na marau kei na vakacegu ena sala kocokoco eso se marau vakavuravura. Na cava ga e veisaqasaqa kei Jisu Karisito kei na Nona ivunau e sega ni rawa ni vakavurea vei iko na reki, kei na marau dina tawayalani. Nanuma ni sa vagauna ga na veika ni vuravura oqo. Na kosipeli i Jisu Karisito sa dolea na reki kei na marau e titobu, savasava, ka tawayalani.

Digitaka na reki. E dina ga ni tiko na rarawa kei na dredre ena vuravura oqo, sa vakatawana talega na vuravura na Tamada Vakalomalagi ena vuqa na ka totoka, ka maucokona. Vakasaqarai ira. Tovolea ni siqema na vuna mo reki kina ena veisiga—de rawa mo na vola tu. Sai ira oqo na isolisoli mai vua na Tamamu lomani mai Lomalagi.

Vakavu reki kei na marau vei ira na tani. Sa kune marau vakalevu o Jisu Karisito ni vakamarautaki keda tu. O rawa ni muria na Nona ivakaraitaki ni kunea na reki kei na marau ena nodra qaravi na tani. Vukea e dua me vakila ni lomani. Vakacaucautaki koya tu. Vakayaloqaqataka e dua ka sotavi dredre tu. Kevaka o vakila tu nio gadreva vakalevu na marau ena nomu bula, segata ni vakamarautaka e dua tale.

Marautaka na sokalou kivua na Turaga. Nio lako i lotu, raica matua na marau e dolea vei iko o Jisu Karisito, ka vakacaucautaki Koya kina! Cakava na nomu itavi mo cau ki na vakamarautaki yalo ena nomu soqoni ni Lotu. Cakava me tiki ni nomu sokalou e vale vakakina e valenilotu na sereivakatagi tabu.

O rawa ni kune marau ena gauna madaga e dredre kina na bula. O na vaqaqa beka na iwalewale e rawa kina oqo, ia sa dina sara. Na nomu vakabauti Jisu Karisito, na Nona kaukauwa veivakabulai, kei na Nona yalayala tawamudu sa rawa ni vakamarautaki iko saraga. Nona marau sa lako curuma na rarawa ka vakavurea na vakacegu e ulabaleta na ka kecega e kilai rawa.

Na taucoko ni marau sa waraki iko tu ena matanitu vakasilesitieli ni Kalou. Sa ulabaleta o Jisu Karisito na ka kecega e rawa ni tarovi iko ni ciqoma na marau tawamudu. Nio vakararavi Vua ka muri Koya, ena nomu na marau oqo.