Na ituvatuva ni Kalou esa baleti iko

Na Tamada Vakalomalagi sa daunivakatulewa ni tuvatuva. O Koya na Tama ni yalomu, ka sa lomani iko. Sa vinakata o Koya me solia vei iko na Nona veivakalougatataki levu duadua—na bula tawamudu vata kei Koya. Ena dua tale na kena ivosavosa, sa vinakata o Koya mo vakataki Koya vakalevu cake ka bulataka na bula marau, lagilagi e bulataka tu. Sa Nona na kaukauwa kecega ka sa kila na ka kecega. O rawa ni vakararavi Vua, ena gauna madaga e dredre kina na bula.

Sa vakataudeitaka o Jisu Karisito na ituvatuva. Ni bera ni buli na vuravura, sa digitaki Koya na Tamada Vakalomalagi me nomu iVakabula. Sai Jisu Karisito duadua ga ena kauti iko lesu mai kivua na Tamamu mai Lomalagi. Oqo na vuna eda digitaka kina meda muri Koya. Na veika kece sa vakatau tu ki na digidigi oya!

Na vakawati kei na matavuvale sa ka bibi ki na ituvatuva ni Kalou. O sa tiki ni matavuvale ni Kalou, ka ra sa lako kece mai na Luvena vakayalo ki vuravura mai vua e dua na tina kei na tama. Sa vinakata na Kalou mera rawaka vata na Luvena yalewa kei na tagane ki na bula uasivi tawamudu. Na turaga kei na marama era cau yadua vakatautauvata ki na vakawati lomani, vakaduavatataki. Na bula vakamatavuvale eke e vuravura—ena kena tawadodonu taucoko sara—sa rawa ni vakavure marau levu. E sa kena inaki me veivuke ni vakarautaki iko ki na bula tawamudu vata kei na Kalou.

Tugana na veika tawamudu. Ena gauna cavaga o sotava kina na veitemaki, veivakatovolei, rarawa, se digidigi dredre eso, vakananumi iko ena ituvatuva ni Kalou. Raica na sala e rawa ni vukei iko kina na dina tawamudu o kila tu me baleta na Nona ituvatuva mo raica na nomu bolebole eso ena sala duidui.

Vakaraica na liga ni Kalou ena nomu bula. Siqema na sala eso sa vakalougatataki iko tiko kina na Kalou. E rawa tu ni dua na ivalavala vinaka mai vua e dua, e dua na gauna ni vakacegu, se isau ni dua na masu.

Digitaka mo muria na ituvatuva ni Kalou. Vulica na ka e vinakata na Tamamu Vakalomalagi mo cakava. Qara na Nona veituberi ni ko vulica na ivolanikalou, nodra vosa na parofita bula, ivakaro ni matavuvale, kei na nomu veivakalougatataki vakapeteriaki. Oqo ena vukea na nomu vakavakarau ni qarava na Turaga, vakadaukaulotu kei na nomu bula taucoko. Cakava na veiqaravi vua na Turaga, vakamau tawamudu, kei na nodra susugi na gone me ka bibi sara. Cakava na nomu itavi mo dua oqo na matavuvale mamarau ena muri ni vakavuvuli i Jisu Karisito.

O rawa ni sotava na veivakatovolei ni bula ena yaloqaqa kei na inuinui vei Karisito. Baleta ni ko sa kila na ituvatuva tawamudu ni Kalou, sa tiko vei iko e dua na iyaya ni cakacaka yaga e rawa ni vukei iko ena veigauna dredre. O kila ni sa levu tu na ka ni bula mai na ka e yaco ena maliwa ni sucu kei na mate. O sa kilai iko tu vakaidina, na nomu inaki, kei o cei o rawa ni vakataka ena veivuke ni iVakabula. Sa nomu qaqa o Jisu Karisito.

O rawa ni ciqoma na bula tawamudu ni ko muri Jisu Karisito. Ena solia vei iko o Koya na kaukauwa mo vakataki Koya vakalevu cake, lesu vei rau na nomu itubutubu vakalomalagi, ka bula marau vata kei ira na nomu daulomani me tawamudu. Vakararavi vei Jisu Karisito.