Ena vukei iko o Jisu Karisito

Same 147:3.

Sa nomu qaqa o Jisu Karisito. Sa vakayacora o Koya na ka taucoko e gadrevi mo tiko marau tu ga kina ena bula oqo. Ni sa digitaki o Koya kei na Nona kosipeli, o sa digitaka tu na bula marau kei na reki tawamudu.

Kevaka madaga o tovolea ena nomu vinaka taucoko mo vakayaco digidigi vinaka, o na caka cala ena so na gauna. O na vakayacora na veika o diva tu o sega ni cakava. Sa vakaoqori na tamata kecega. Ni yaco oqo, dau rawarawa ni da yalolailai se vakataroga ke da na vinaka cake beka. Ia sa tiko na itukutuku vinaka—itukutuku totoka, ka nuitaki! Ni sa lomani iko tu na Kalou, sa tala mai na Luvena, o Jisu Karisito, ka a colata na nomu ivalavala ca mo rawa tu ni veivutuni, vosoti, ka toso cake tikoga.

Dina Tawamudu

Ena vaqaqacotaki iko o Jisu Karisito. Ena vukei iko o Koya ni veisautaka na nomu gagadre, nomu vakasama, kei na nomu ivalavala. Ni ko lomaleqa, rere, se sotavi dredre tu ena sala cavaga, ena vakacegui iko o Koya. Ena vukei iko o Koya ena ituvaki kecega ni nomu bula. O rawa ni vakararavu Vua.

E sega ni totogi ni valavala ca na veivutuni; esa sala e sereki keda kina na iVakabula mai na ivalavala ca. Nai balebale ni veivutuni na veisau—mo vuki tani mai na ivalavala ca ka goleva na Kalou. E kena ibalebale mo vinaka cake ka ciqoma na veivosoti. Na mataqali veisau vakaoqo e sega ni ka vakavu dua; esa ivalavala tomani tikoga.

Veisureti

Vakatabakiduataki Jisu Karisito ki na nomu bula. Qara na Nona veivuke ena ka kecega o cakava.

Veivutuni. Gole vua na Turaga ena gagadre ni vinaka cake. Ni ko sa caka cala, tusanaka vakaidina kivua na Kalou, ke na gadrevi tu, kivua na nomu bisopi kei na dua tale o a rairai vakacala. Cakava na nomu vinaka taucoko mo vakadodonutaka na ka kece.

Rekitaka na isolisoli ni caka vinaka ka vinaka sara tu. Kevaka e sega madaga ni rawarawa ka taura tu e dua na gauna balavu, kakua ni tarova na nomu sasaga. Cakacaka ka vakararavi tikoga kivua na Turaga. Ena vukei iko o Koya ena veikalawa kece sara.

Dabe tiko o Jisu ena tobu wai kei na yalewa ni Samaria

Veivakalougatataki Yalataki

Ena vosoti iko ka vakabulai iko na Tamada Vakalomalagi ni ko veivutuni. Ena sosomitaka na nomu caka cala ena vakacegu kei na reki. Ena sega tale ni nanuma o Koya na nomu ivalavala ca. Sa nomu qaqa o Jisu Karisito, ena Nona kaukauwa, na nomu gagadre ni muria na Nona ivunau ena vakalevutaki.

Ena veisautaka o Koya na lomamu kei na nomu bula. Vakalailai voli, o na tubu ka vakataki Koya vakalevu cake.

Taro kei na Kedra iSau

Au dau kila vakacava ni sa vosoti au na Kalou? Sa yalataka na Kalou ni na vosoti ira ka veivutuni. Nio vakila na veivakacegui ni Yalotabu, o rawa ni kila ni sa cakacaka tiko kina nomu bula na kaukauwa veivueti ni iVakabula.

Na gauna cava au dau gadreva kina na veivuke ni bisopi meu veivutuni? E taura tu na nomu bisopi na idola ni matabete ka sa tiko vua na isolisoli vakayalo eso me vukea na nomu veivutuni. O rawa ni qara na nona veivuke kei na ivakasala ena dua ga na gauna. Kevaka o sa vakayaco cala bibi eso, vaka na voroki ni lawa ni tiko savasava, veitalanoa kei na nomu bisopi. Ena sega ni beitaki iko o koya. Sa matataki Jisu Karisito o koya ka na vukei iko ni kila na sala mo veivutuni vakataucoko kina ka ciqoma na kaukauwa ni veivakabulai kei na veivaqaqacotaki ni iVakabula.

Au sa tovolea tiko meu veivutuni, ia au se cakava tikoga na cala vataga. Na cava meu cakava? Kakua ni soro. Gole vei Karisito, ka vakabauti Koya tu. Sa veiganiti na Nona loloma soliwale. Tovolea tale. O sa sega ni tiko taudua ena nomu sasaga mo toso ki liu. O Jisu Karisito sa tiko vata tu ga kei iko.

Raica na Inosi 1:6 (sa rawa ni savai tani na cala); Mosaia 4:3 (ena vuku ni Yalo Tabu, sa vakatakila vei iko na Kalou ni ko sa vosoti); 26:30 (sa veivosoti tu na iVakabula ena veigauna eda veivutuni kina); Ica 12:27 (na loloma soliwale ni iVakabula sa rawa ni cakava na veika malumalumu me ka kaukauwa); Moronai 6:8 (o ira ka veivutuni sa vosoti); 10:32 (mo vinaka sara tu vei Karisito); Vunau kei na Veiyalayalati 1:32 (na Turaga sa vosoti ira ka veivutuni); 58:42–43 (na veivutuni e oka kina na vakatusai kei na vakatikitikitaki ni ivalavala ca).

Taro ni iVolatara ni Valetabu

E tiko li na nomu ivakadinadina baleta na Veisorovaki i Jisu Karisito kei na Nona itavi vaka nomu iVakabula ka Dauveivueti?
E tiko li eso na caka cala bibi ena nomu bula e gadrevi tu me na wali mai vei ira na matabete vakatulewa me tiki ni nomu veivutuni?