Sarafo
Appendix

Appendix

Semom won Nang a etiwok omw kopwe angei angangepin. Ekkei angangepin mi pachenong pwon mi pin—ka fori pwon ren Kot, me I a fori pwon ngonuk. Ka fori ekkei pwon mi pin, ren awewe, nupwen ka papatais me kapunguno, nupwen ka kepinino, me nupwen ka riri ren fansoun me unusen esemuch non imwen ewe Samon. Fori me apwonueta pwon mi pin epwe ngonuk mwanek me pwapwa me epwe mut ngonuk ewe tufich ngeni an Kot manaman an epwe anisuk ne niwin ngeni fan Mesan, ikewe ka tongeni pwapwaiti manau esemuch ren I.

Om kopwe kaeo pwan ekkoch usun met ka pwonei ngeni Kot nupwen ka fori ekkei pwon mi pin—me met I a pwonei ngonuk—nengeni Pukenapen Emwen: Angang non Ewe Mwichefenin Jises Kraist ren Aramas mi Pin non Fansoun Soponon, 3.5, Nenien Puken Kapas allim.

Ekipwichi ekkewe kapaseis fan. Ir ekkewe kapaseis ka eis nupwen ka interfiu om kopwe angei eu taropwen mumuta ne tonong non ewe tempel, nge ese namot kopwe witiwit ngeni eu interfiu. Kopwe pwisin fori eu opungun inisum non pekin ngun inet chok ka mochen.

Ewe Itenapen Mwichen Ekkewe Fopun, ewe Itenapen Mwichen Aaronik Pristut, me ekkewe Engon Annuk ra tongeni pwan pisekin aninis non om apungu pwisin inisum.

Kapaseisen Toropwen Mumutan ne Tonong non Tempel fan iten Serafo

  • Mi wor om nuku non me eu kapasen pwäratä usun Kot ewe Sam mi Napanap; Noun we At, Jises Kraist; me ewe Ngun mi Fel?

  • A wor om kapasen pwäratä usun ewe Achasefan an Jises Kraist me usun Wisan pwe I om Chon Amanau me Chon Angasano?

  • A wor om kapasen pwäratä usun ewe Niwinsefaniton ewe kapas allimen Jises Kraist?

  • En mi etiwa ewe Presetenin Ewe Mwichefenin Jises Kraist ren Aramas mi Pin non Fansoun Soponon pwe i ewe soufos, chon osini, me chon pwäratä me i ewe emon chok aramas won fonufan a mwumwuta ne aea meinisin ekkewe kien pristut? En mi etiwa chon ewe Aewin Presetensi me ewe Mwichen Engon me Ruemon Aposel pwe ir soufos, chon osini, me chon pwäratä? En mi etiwa ekkewe pwan ekkoch Meinap Unus me ekkewe souemwenin ewe Mwichefen non pwisin neniom?

  • Ewe Samon a apasa pwe mettoch meinisin repwe fis non nimenimoch me mwen I (Doctrine and Covenants 42:41). En mi achocho ngeni an epwe wor nimenimoch mi pung non om ekiek me mwokutukut? En mi anneasochisi ewe annukun nimenimoch?

  • En mi tapweno mwirin ekkewe asukunen ewe Mwichefenin Jises Kraist non om mwokututuk mi monomon me pwano ngeni chon om famini me ekkoch?

  • En mi etiwa ika pesei och afanafan, foffor, ika annuk mi ungeni ekkewe chon ewe Mwichefenin Jises Kraist ren Aramas mi Pin non Fansoun Soponon?

  • En mi achocho ne epini ewe ranin Sabbath, non imw me non fan; fiti om kewe mwich; mwoneta ngeni me angei ewe sakrament non minenimoch; me manaueni manauom epwe fich ngeni ekkewe annukun ewe kapas allim?

  • En mi achocho kopwe wenechar non mettoch meinisin en mi fori?

  • En mi chon monatiw unusen eu ne engon?

  • En mi weweiti me anneasochisi ewe Kapasen Emirit?

  • Mi wor tipis mi anieput non manauom mi auchea an epwe wesino me ren souemwinin pristut pwe pekin om aier?

  • En mi ekieki pwe en mi nimenimoch ne tonong non imwen ewe Samon me fori ekkewe angang mi pin non tempel?

Itenapen Mwichen Ekkewe Fopun Unus

Ngang achengichengin fopun noun semei me inei non nang, fiti napanapan nang me fetanin manau esemuch.

Usun emon noun Jises Kraist chon kuno, ua achocho upwe winiti usun I. Ua kutta me fori ren ai pusin pwarata me iamwir ngeni ekkoch non Itan mi pin.”

Upwe uta usun emon chon pwaratan Kot non fansoun meinisin me non mettoch meinisin me non neni meinisin.

Nupwen ua achocho ai upwe tufich ngeni ewe manau tekia, ua echeni ewe niffangen aier me kutta ai upwe murinnono iteiten ran. Ren nuku, upwe apochokuna imwei me ai famini, fori me aponueta ekkewe pwon mi pin, me angei ekkewe angangepin me feioch seni ewe tempel mi pin.

Itenapen Mwichen Aaronic Pristut

Ngang emon noun Kot at, me a wor eu an angang fan itei ai upwe fori.

Ren unusen netipei, ai tongeni, ekieki, me pochokun, upwe tongei Kot, apwonueta ai pwon mi pin, me aea An pristut ne angang ngeni ekkoch, poputa me non pwisin imwei.

Nupwen ua achocho ai upwe angang ngeni ekkoch, aea nuku, aier, me murinnono iteiten ran, upwe fich ngeni ai upwe angei efeiochun tempel me ewe pwapwan ewe kapas allim mi feinfeino.

Upwe monneta ai upwe winiti emon misineri mi achocho, mwan pupunu mi nukuchar, me sam mi tong ren ai upwe ennetin emon chon kuno noun Jises Kraist.

Upwe aninis ne amonnata ewe fonufan fan iten an ewe chon Amanau niwinsefan ren ai tungorei aramas meinisin ar repwe feito ren Kraist me ar repwe angei ekkewe feiochun An Achesefan.

Ekkewe Engon Annuk

  • Ousap pin ngeni emon kot nge oupwe chok pin ngeni ei.

  • Ousap fori niosun anu muan.

  • Ousap pan-muani iten ewe Samon ami Kot.

  • Chechemeni ewe ranin sabbath, pwe oupwe pinini.

  • Oupwe afona sememi me inemi.

  • Ousap ninni.

  • Ousap fori nisou.

  • Ousap sona.

  • Ousap tipi-muan ngeni emon.

  • Ousap mochenia.

Nengeni Exodus 20:3–17.