6.
Tongei Kot, tongei chon orum
Matthew 22:37–40
An epwe anisuk kopwe fori finiom mi och, Kot a ngonuk annuk. A fori ei pokiten I mi tongeok. Me ewe murinnon popun kopwe aneasochisi an Kot annuk pwe pokiten en mi tongei I. Tong ina ewe auchean an Kot kewe annuk.
Ennet Esemuch
Kot mi tongeok. I semom. An unusochun tong a tongeni peseok om kopwe tongei I. Nupwen om tong fan iten Semom won Nang ina ewe pochokun mi kon auchea non manauom, chommong pekin finata epwe mecheres.
Ekkewe ru annuk mi napanap seni meinisin ir tongei Kot me tongei chon orum. Me ion chon orum? Emon me emon meinisin! Mettoch meinisin a aitikich me non ekkewe pukefel me seni ekkewe soufos mi pachengeni ekkei ru annuk.
Aramas meinisin ir pwium me fefinom/mwengeom—mi pachenong, ewer, aramas mi sokkono sonuk ika rese tipew ngonuk. Samach won Nang a mochen Noun semirit meinisin repwe tong fengen. Nupwen ka angang ngeni Noun semirit, ka angang ngeni I.
Tingor
Pwarano tong ngeni Kot ren om apwonueta An kewe annuk. Ren awewe, ren om apwonueta ewe ranin Sabbath epwe pin, mi pachenong om nikitu ne amonneta ngeni me angei ewe sakrament, ka pwar ngeni Kot pwe ka mochen epinano eu ran non eu wiik ngeni I. Nupwen ka echikipin me moni eu ne engon me asor, ka pwar ngeni Kot pwe An angang mi kon auchea ngonuk nap seni mettochun pisekisek. Nupwen ka aea iten Kot me Jises ren sufon, esap non napanap mi namotmuan ika tumunungaw, ka pwari pwe en mi kinisou ren mettoch meinsin Ir ra fen fori fan itom.
Ekieki emon me emon meinisin pwe i emon noun Kot. Usun emon chon kuno noun Jises Kraist, ka tongeni poputani ne ekieki aramas seni sokkopaten mwicheich, kinikinin neni, me pwan ekkoch mwich ren tong me sufon—akkaewin ir ekkewe fan ekkoch ra feiengaw ren kapas me foffor. Anisi ekkewe repwe mefi anamon, imuno, ika nipwakingaw. Anisir repwe mefi an Samach won Nang tong me reom. Aea fengen ngenir ekkewe feioch I a fen ngonuk, me etiwer repwe tapweno mwirin Jises Kraist.
“Tumunuochu om kapas epwe pwarano om tongen Kot me ekkoch—ika mo ke porous non pukupukun aramas ika won ekkoch pisekin poraus fengen. Apasa mettoch epwe apwapwa—esap wor kapas nikotuputup, kapas ametek, ika kapas mi assong, ika mo ren chok urumot. Om kapas mi tongeni epwe pochokun. Mut ngenir repwe pochokun fan iten murinno.
Pwarano tong ngeni om famini. Tongei noun Kot semirit meinisin a poputa non imw. Fori wisom ne efisi imwom epwe eu neni ikewe meinisin repwe meifi an ewe Chon Amanau tong.
Pwonen Feioch
Nefinom ngeni Kot epwe anonnoneno nupwen ka pwarano om tong ren om aneasochisi An kewe annuk me apwonueta om kopwe pwon mi pin ngeni I.
Nefinom ngeni ekkoch epwe anonnoneno nupwen ka pwarano om tong seni om angang ngeni ekkoch non napanapen Kraist. Kopwe kuna pwapwa ne fori ewe fonufan eu neni mi kon uren tong.
Ekkewe Kapaseis me Ponuwan
Ifa usun ua tongeni mefi an Kot tong? An Samach won Nang tong mi chok nonnom. Kapas ngeni I fan chommong non iotek. Aporousa om memmef ngeni I, me tumunochu om kopwe einga I. Anneani An kapas non ekkewe pukefel. Ekieki usun meinisin met I a fen fori fan itom. Awora fansoun non ekkewe neni me urumot ikewe Ngunun mi nonnom ie.
Ewe Samon a esuku ai upwe tongei meinisin, pwan mwo ekkewe ra fofforungaw ngeniei? Ewe Samon a esukuk kopwe tongei chon koum ngonuk me iotek fan iten ekkewe ra erianuk. Inamo, ena esap wewen pwe kopwe nomwetiw non eu nikinik mi efisi ngonuk efeiengawen netip, inis, ika ngun. Awora mamawochun kinikin om kopwe fori pwe kopwe tumun. Ika pwe ka kuna riaffou ika fofor mi ngaw ngonuk, ika en mi sinei pwe ei a fis ngeni pwan emon, fos ngeni emon mi mwukono en mi nukunuk non.
Inet ika ifa usun upwe sisinei ekkewe ir opponuei? Ewe murinnon anen om kopwe sisinei ekkoch epwe seni ennetin chiechioch. Nupwen en mi chok kukkun, amari ochun chiechioch ngeni chommong aramas. Non ekkoch oreni, sarafo ra kan sisinei ekkewe opponuer seni murinnon mwichen uruomot. Ren maritan me tumunun om memmef mi ngunum, ammangano urumot en mi akkanamon ngeni emon tori om ka mwukono—ier 16 ina eu ochun emwen. Ourour fengen me om famini me souemwenin. Ewitiwitano nefinen chok ruemon ngeni nupwen ka marita. Awora om fansoun ngeni ekkewe ir ra anisuk kopwe apwonueta om nukuchar ngeni Jises Kraist.
Met ua tongeni fori ika imwei we esap eu nenien tong? Om Chon Amanau mi sinei nonnomum, me I mi tongeok. Kopwe tipepos, soposopono ne apwonueta an Kot kewe annuk, me kopwe emon minen appiru mi och ngeni om famini. Om mecheresin fofforun tong a tongeni efisata auchean ekkesiwin. Ka tongeni pwan amari nefinen om we faminien wart. Monneta iei ne aueta om pwisin famini epwe nom won ekkewe afanafanen Jises Kraist. Chechemeni: Jises Kraist I om pochokun!
Nengeni Isaiah 58:3–11 (popun echikipin); 58:13–14 (feiochun epini ewe Sabbath); Malachi 3:8–10 (feiochun moni eu-ne-engon); Luke 6:27–28 (tongei chon koum ngonuk); 10:25–37 (ion chon orui?); John 3:16–17 (Kot mi tongei kich, iwe A tinato Noun we); 14:15 (sia apwonueta ekkewe annuk pokiten sia tongei Kot); 1 John 4:19 (sia tongei Kot pokiten I a tongei kich); Mosaia 2:17 (nupwen sia angang ngeni ekkoch, sia angeni ngeni Kot).
Kapaseisen Taropwen Mumutan non Tempel
-
En mi tapweno mwirin ekkewe asukunen ewe Mwichefenin Jises Kraist non om mwokututuk mi monomon me pwano ngeni chon om famini me ekkoch?
-
En mi chon monatiw unusen eu ne engon?