1.
An Kot kokkot a fis fan itom
Me mwen om feito fonufan, ka nonnom ren semom me inom non nang. En nour semirit mi achengicheng. Non nang, ka kaeo usun an Kot kokkot fan iten An famini. Ka angei ei kokkot non pwapwa pokiten epwe anisuk me marita me fefeita ne winiti usun Kot ren om angei eu inisin aion, om choni eu famini won fonufan, me sisinei ei manau won fonufan. Ekkoch me nein ekkei mettoch mi fis repwe weires. Samach mi sinei ei, iwe ren pekin An kokkot, A tinato emon Chon Amanau, Jises Kraist, an epwe anisuk. Sia eita ei ewe kokkoten amanau ika ewe kokkoten pwapwa.
Ennet Esemuch
Samach won Nang i ewe chon makkei ewe kokkot. I ewe Semen ngunum, me I mi tongeok. A mochen epwe ngonuk An watten feioch—manau esemuch ren I. Non ekkoch kapas, I a mochen kopwe winiti usun I me manaueni ewe apwapwan, ningen manau I mi manaueni. Mi wor ren unusen manaman me mi sinei mettoch meinisin. Ka tongeni epinukunuku I, pwan mwo nupwen manau mi weires.
Jises Kraist a fori ewe kokkot epwe tufich. Me mwen ewe fonufan a foruta, Samach won Nang a fini I pwe epwe ach Chon Amanau. Jises Kraist i ewe chok emon a tongeni uweisefanuk ngeni Semom won Nang. Ina pwata sia fini ne tapweno mwirin I. Mettoch meinisin a anongonong won ena pekin finata!
Pupunu me famini ir mi auchea ngeni an Kot kokkot. En pekin ewe faminien Kot, me meinisin Noun kewe semirit ngun ra feito ngeni fonufan seni emon in me emon sam. Kot a mochen Noun fopun me anuon repwe fetanoch fengen ngeni unusoch esemuch. Emon me emon mwan me fefin a nonno fengen an aninis ngeni eu apupunu mi uren tong, me ochufengen. Manauen famini ikei won fonufan—pwan mwo fiti an eseunusoch—a tongeni wato watten pwapwa. A fis pwe epwe aninis ne amonnoketa ngeni manau esemuch ren Kot.
Tingor
Ekieki usun mettoch ren omw sinei usun fenfeinno. Inet chok ka mesengeni sossot, weires, tipitipingaw, ika pekin finata mi weires, achema ngonuk pwisin usun an Kot kokkot. Katon ifa usun ekkewe ennet esemuch en mi sinei usun An kokkot a tongeni anisuk an epwe asokkono om nenengeni om kewe weires.
Kukkuta poun Kot non manauom. Apareni ekkewe anen an Kot mi efeiochuk. Meni epwe eu sokkun foffor seni emon, eu fansoun kinamwe, ika eu ponuwen iotek.
Finata ne tapweno mwirin an Kot kokkot. Kaeo usun met Semom won Nang a mochen kopwe fori. Kutta An emwen nupwen ka kaeo ekkewe pukefel, kapasen soufos mi manau, ewe esinesinen famini, me noum efeioch seni petriark. Ei epwe anisuk om kopwe monneta ne angang ngeni ewe Samon, usun emon misineri me non unusen manauom. Fori angang ngeni ewe Samon, apupunu esemuch, me amari semirit epwe eu mettoch mi kon auchea. Fori wisom an epwe wor om famini mi pwapwa iei ren om tapweno mwirin afanafanen Jises Kraist.
Pwonen Feioch
Ka tongeni mesengeni sossotun manau ren pwaracho me epinukunuk non Kraist. Pokiten en mi sinei usun an Kot kokkot esemuch, a wor om eu auchean pisek minne mi tongeni anisuk fansoun weires. En mi sinei pwe mi nap mettochun manau nap seni met a fis nefinen uputiw me mano. En mi sinei ion wesewesen en, met om we popun, me ion en mi tongeni winiti ren an ewe Chon Amanau aninis. Jises Kraist I om pochokun!
Ka tongeni angei manau esemuch nupwen ka tapweno mwirin Jises Kraist. I epwe ngonuk manaman omw kopwe winiti usun I, niwin ngeni semom me inom non nang, me manau non pwapwa ren atongeom kewe feinfeino. Nuku Jises Kraist.
Ekkewe Kapaseis me Ponuwan
Pwata ei manau a weires fan ekkoch? Ifa usun ai upwe kuna pochokun? Om sisinei mettoch non ei manau—pwan mwo ekkewe mi kon weires—ra tongeni repwe och ngonuk. Ra tongeni anisuk kopwe marita me fetanoch nupwen ka kun ngeni ewe Chon Amanau. Ese wor och mettoch a fis ngonuk minne Jises Kraist ese weweiti pokiten an we asoren achasefan. I mi wesewesen sinei ifa usun an epwe anisuk. Anonga manauom won I, me I epwe chunokota asanapen meinisin tipemwaramwar me nuokus.
Fan ekkoch, ewe ekiekin pwapwa non famini me apupunu usun mi towaweno. Ifa usun ai upwe kuna epinukunuk? Met chok nonnomum, kosap fangeta won an Samach won Nang we kokkot. I esap tongeni epwe fangetanuk. Ika en mi nikitu ngeni ewe Chon Amanau me om kewe pwon mi pin, kopwe kuna ponuwen mettoch me non ekkewe afanafan an Jises Kraist. I mi weweiti mettoch meinisin ka mefi. Non I, kopwe angei pochokun ne aneasochisi an Kot annuk me angei ekkewe feioch I a pwonei. Nuku I me An kapas allim.
Nengeni 2 Nifai 9:13 (ifa usun watten ewe kokkotun ach Kot!); Mosiah 2:41 (ekkewe ra apwonueta ekkewe annuk ra tongeni nom ren Kot non ewe pwapwa ese much); Alma 12:28–34 (Kot a fori ewe kokkoten ngaseno mi fateno ngeni Noun semirit); Abraham 3:22–26 (An Kot kokkot mi pachenong an tinikicheto fonufan, ikewe sia tongeni fini fan itach ne tapweno mwirin An kewe annuk).
Kapaseisen Taropwen Mumuta non Tempel
-
Mi wor om nuku non me eu kapasen pwäratä usun Kot ewe Sam mi Napanap; Noun we At, Jises Kraist; me ewe Ngun mi Fel?