3.
Ka tongeni aninis ren an Kot angang
Moses 1:39
Samach won Nang a tongei meinisin Noun semirit. A mochen anisir repwe kuna pwapwa me mwanek, niwin ngeni I, me angei manau esemuch. Ei a iteni An angangen amanau me manau tekia, me I a tingoreok kopwe aninis!
Ennet Esemuch
An Kot angang me ning epwe apwonueta om manau fochofoch me manau esemuch. Manau fochofoch wewen om kopwe manau feinfeino ren eu inis mi manausefan. Manau esemuch, ika manau tekia, ina ach sipwe winiti usun Kot me nonnom ren I feinfeino usun famini. Meinisin ekkei a tufich pokiten Jises Kraist me An Achasefan. Ka tongeni epinukunuku I.
Ka tongeni aninis ren an Kot angang ren om feito ren Kraist me anisi ekkoch ne fori pwan ena chok. Inet chok ka fori och mettoch ne anisi emon epwe tapweno mwirin Jises Kraist, ka aninis ren an Kot angang.
Tingor
Manaueni ewe kapas allim. Amari om nuku non Jises Kraist. Aier iteiten ran. Angei an Kot angangepinen pristut me apwonueta om pwon mi pin. Fori ena epwe ewe tettenin kokkot ren unusen manauom.
Tumunu ekkewe mi osupwang. Kutta anen om kopwe angang me iamwir ngeni ekkoch, mi pachenong om famini, chiechiom, me om mwicheich. Eu ochun anen om kopwe anisi aramas mi osupwang ina kopwe aneasochisi ewe annukun ewe echikipin me awora asoren echikipin.
Etiwa meinisin pwe repwe angei ewe kapas allim. Mut ngeni om kapas me foffor repwe engunuwa om nuku non Jises Kraist. Kopwe monneta ne ureni ion chok e eisinuk usun ewe epinukunuk me pwapwa ka mefi usun Noun chon kuno. Ren anuon, angangen eu unusen fansoun misin ina eu wisen pristut. Ren fopun, ina eu pochokunen tufich; iotek ne sinei ika ewe Samon a mochen kopwe no won misin. Amonata omw kopwe afanafana ewe kapas allim non unusen manauom.
Ochufengeni famini ren fansoun esemuch ren om fori uruon famini me angangen tempel. Kaeo usun om neuo. Kutta ion mi namot ngeni angangepinen tempel. Feinno ngeni ewe tempel fan chommong ren ukukun om tongeni om kopwe papatais me kapunguno fan iter. Ika mi namot ngonuk aninis, feino ngeni FamilySearch.org.
Pwonen Feioch
Epwe wor reom an Kot aninis. Samach won Nang ese esukuk pwe kopwe fori ei angang won winikapom. I mi nomw reom. Nupwen ka tekison ne fangeta om fansoun me netipom, I epwe fori amwararen mettoch me non en. Jises Kraist I om pochokun!
Kopwe ureno ren pwapwa. An Kot angang eu angang mi apwapwa! Nupwen ka angang non, ka tongeni mefi ewe pwapwa I mi mefi. Aneanei ewe pwapwa kopwe aea fengen fiti Samach won Nang me Noun kewe semirit ekkewe ka anisir ne uweireto ngeni I.
Ekkewe Kapaseis me Ponuwan
Kot mi tongeni aea ngang non An angang? Ewer! Mei wor chommong anen ach sipwe aninis non ewe angang. Menin epwe usun ekkoch aramas ra kon angangoch ika sinenap, nge Samach won Nang a kuna om tufich. I a fen ngonuk ekkewe niffang minne ka tongeni aea ne anisi me ionfengeni Noun semirit. Mi OCH ika ekkei niffang ra sokkono seni met mi wor ren ekkoch aramas. Ennetin, ina pwata om kewe niffang ra fokkun auchea. En mi namot!
Nengeni Matthew 10:39 (Ika ka amuchu manauom non an ewe Chon Amanau angang, kopwe kuna safani); 1 Corinthian 12:14–27 (meinisin memper ir mi namot me non inisin Kraist; Philippian 1:6 (kopwe epinukunuk pwe Kot mi angang non en); Jacob 5:72 (ewe Samonun ewe ataken kreip a fituk ne angang); Doctrine and Covenants 18:15–16 (om pwapwa epwe nap ren ekkewe ka wareto ren Kraist); 64:33–34 (eu angang mi nap a feito seni mettoch mi kukkun me mecheres); Moses 1:6 (“A wor eu angang fan itom”); 6:31–34 (Kot a otufichi ekkewe I a kokkorir, pwan mwo ika ra mefi pwe rese ukungeni).
Kapaseisen Taropwen mumuta ne tonong non ewe tempel
-
A wor om kapasen pwäratä usun ewe Niwinsefaniton ewe kapas allimen Jises Kraist?