4.
Jises Kraist epwe anisuk
Konupin 147:3
Jises Kraist I om pochokun! I a fen fori mettoch meinisin mi namot fan itom an epwe wor om pwapwa non ei manau me feinfeino. Ren om fini I me An kapas allim, ka finata pwapwa me mwanek esemuch.
Pwan mwo nupwen ka sotuni om tongeni ne fori mi och, fan ekkoch kopwe fori mi muan. Kopwe fori mettoch ka aneanei pwe kose. Meinisin mi foffori. Nupwen ei a fis, mi mecheres om kopwe mefi epinukunukungaw are aureki ika pwe kopwe nafoch. Nge mi wor porousoch—amwararen, epinukunukun porous! Pokiten Kot mi tongeok, A tinato Noun we, Jises Kraist, ewe a wata won Inisin om tipis pwe kopwe tongeni aier, musono, me soposopono me fetanoch.
Ennet Esemuch
Jises Kraist epwe apochokunok. I epwe anisuk ne siwini om mochen, om ekiek, om foffor. Nupwen ka noninen, nuokus, me atures non och napanap, I epwe ekinamweuk. I epwe anisuk non unusen napanapen manauom. Ka tongeni epinukunuku I.
Aier esap eu niwinin tipis; ina ewe anen an ewe Chon Amanau angasa kich seni tipis. Ne aier wewen siwin—kun seni tipis ngeni Kot. A wewen kopwe murinnono me angei omusomusen tipis. Ei sokkun siwin esap eu mettoch a fis fan eu chok; eu mwokutukut mi chok fifis.
Tingor
Fori Jises Kraist epwe ionapen manauom. Kutta An aninis non mettoch meinisin ka fori.
Aier. Kun ngeni ewe Samon ren eu mochenin murinnono. Nupwen ka fen fori och mettoch mi muan, wenechar ne fangeta me mwen Kot me, ika mi namot, ngeni noum pisop me ion mei fen feiengaw. Fori om tongeni fori mettoch repwe pung.
Pwapwa non ewe niffang ne murinnono me murinnono. Pwan mwo nupwen ese mecheres me a nakatam seni om sani, kosap tongeni kouno ne sossot. Achocho ne angang me epinukunuku non ewe Samon. I epwe anisuk non unusen om achocho.
Pwonen Feioch
Samach won Nang epwe omusano me echikaraok nupwen ka aier. I epwe siwini om mefi tipis ren kinamwe me pwapwa. I esap chiwen chechemeni om kewe tipis. Jises Kraist i om pochokun, me ren An pochokun, om mochen ne apwonueta An kewe annuk epwe napeno.
I epwe siwini netipom me manauom. Ekis me ekis, oupwe marita me winiti usun chok I.
Ekkewe Kapaseis me Ponuwan
Ifa usun ua sinei ika Kot a fen omusaeino? Kot a pwonei I epwe omusano ekkewe ra aier. Nupwen ka mefi kinamwe seni ewe Ngun, ka tongeni sinei pwe ewe manamanen achasefan An ewe Chon Amanau a angang non manauom.
Inet a namot ngeniei ewe aninis seni ewe pisop ai upwe aier? Noum pisop a amwochu kiien pristut me a wor an niffangen ngun an epwe anisuk ne aier. Ka tongeni kutta an aninis me ourour inet chok. Ika ak fen fori watten muan, usun ren atai ewe annukun nimenimoch, churi noum we pisop. I esap apunguk. I emon chon tupuni Jises Kraist me epwe anisuk om kopwe sinei ifa usun kopwe unusen aier me angei an ewe Chon Amanau echikar me pochokunen manaman.
Ua achocho ne aier, nge ua chok pwan soun fori ekkewe chok muan. Met upwe fori? Kosap fangeta. Kun ngeni Kraist, me wanong om nuku non I. An chen mi naf. Achocho ngeni sefan! Kose anamon non om achocho om kopwe fetanoch. Jises Kraist mi nom reom fansoun meinisin.
Nengeni Enos 1:6 (memmefin tipis mi tongeni tonuno); Mosaia 4:3 (me ren ewe Ngun mi Fel, Kot a mut ngonuk kopwe sinei pwe ka musono); 26:30 (ewe Chon Amanau a amusano fan chommong nupwen sia aier); Ether 12:27 (an ewe Chon Amanau chen a tongeni fori mettoch mi apwangapwang repwe pochokun); Moronai 6:8 (ekkewe ir ra aier ra musono); 10:32 (kopwe unusono non Kraist); Doctrine and Covenants 1:32 (ewe Samon a omusano ekkewe ra aier); 58:42–43 (aier mi pachenong ach affata me nikitano ach tipis).
Kapaseisen Taropwen Mumutan non Tempel
-
A wor om kapasen pwäratä usun ewe Achasefan an Jises Kraist me usun Wisan pwe I om Chon Amanau me Chon Angasano?
-
Mi wor tipis mi anieput non manauom mi auchea an epwe wesino me ren souemwinin pristut pwe pekin om aier?