Kametip won ewe Kapas, seni Liz Lemon Swindle. A kawor seni Havenlight
11.
Ennet epwe angasokeno
John 8:32
Semom won Nang i emon Koten ennet. I mi sinei-mettoch meinisin. Ennet meinisin ra feito seni I me emwen ngeni I. Ka pwari pwe en mi aucehani ennet nupwen ka kutta pekin kaeo, manau ren wenechar, me pwaracho ne peni met en mi sinei pwe mi pung—ika mwo kopwe uta anamon.
Ennet Esemuch
Samach won Nang a mochen Noun nengin me at pwe repwe kaeo fansoun meinisin. Mi wor me ru om popun ren pekin inis me ngun om kopwe kutta me tongei pekin kaeo. Kaeon ren pekin sukun esap chok usun ren angangen angei moni. Ina eu pekin om kokkot esemuch om kopwe winiti usun Samach won Nang.
Manau ren wenechar wewen ka tongeni met mi pung me ne mesen Kot—nap seni om tongei pwisin om kinamwe, itefouno, ika mecheresum. Wewen om fori met mi pung pokiten mi pung.
Mi wor reom och mettoch mi auchea om kopwe afanafana. Ewe kapas allimen Jises Kraist a amwochu ekkewe ponuwen kapaseisen manau. Ina ewe anen kinamwe me pwapwa. Meni kosap sinei mettoch meinisin, nge a naf met en mi sinei om kopwe tongei chon orum, afanafana ennetin nongonong ngenir, me etiwer repwe pwan kaeo ekkoch.
Tingor
Kopwe kakaeo fansoun meinisin. Kukutta tufich om kopwe anapano om ekiek me om sinenap. Ekkei tufich ra tongeni pachenong wesewesen kaeo non sukun ika kaeon pekin angang, usun pwan pekin kaeo mi chok mecheres seni pekin aninis en mi nuku. Apachanong ewe Samon non om kewe angang, me I epwe emwenuk.
Kaeo ennetin pekin ngun. Nupwen ka kaeo usun ewe fonufan unukum, pwan kaeo usun ewe Chon Amanau, ewe a forata ewe fonufan. Kaeo usun Manauan me an afanafan. Fori pwe seminary, institute, me pwisin om kaeo kapas allim repwe kinikinin om kakaeo non unusen manauom. A tongeni amonnokota om kopwe anganga eu misin me afanafana ewe kapas allim non unusen manauom.
Manau ren wenechar. Kosap sona, mwaken, chofona, ika otuputup non och sokkun napanap—non sukun, non angang, online, ekis meinisin. Kopwe chok ewe chon tapweno mwirin Jises Kraist mi nikitu me non neni meinisin me non monomon.
Pwonen Feioch
Kaeon ren pekin sukun a anapano om tufichin angang ngeni ewe Samon, mi pachenong usun om emon misineri. A apochokunok om kopwe efeiochu ekkoch, akkaewin om famini. Ren wattenon om kaeo, pwan ina wattenon om tongeni aninis ne aueta muun Kot me pesei ewe fonufan epwe murinnono.
Wenechar a wato kinamwe me sufonun inis. Nupwen om kapas me foffor ra wenengeni ennet, ka pwari pwe en mi tongeni epinukunuk me ren ekkoch aramas me pwan ren ewe Samon.
Nupwen ka peni ekkewe osukunen Jises Kraist, I a anisuk. Jises Kraist I om pochokun! Ekkoch menin resap tipeew ngeni om nuku, nge om pwaracho me ennet repwe pwano. Ika pwe ekkoch repwe are resap tapweno mwirin om nenien appiru, om kapasen pwarata, epinukunuk, me nuku non Kraist epwe marino.
Ekkewe Kapaseis me Ponuwan
Mi muan an epwe wor om kapaseis usun ewe Mwichefen? Ifa usun ai upwe kuna ponuwan? An wor om kapaseis esap eu esisinen apwangapwang ika nafangawen nuku. Ennetin, om eis kapaseis a tongeni anisi ne amari nuku. Ewe Niwinsefaniton ewe kapas allim a poputa nupwen 14-ier Joseph Smith a eis kapaseis ren nuku. Kutta ponuwen kapaseis non ekkewe pukefel, non ekkewe kapas an noun Kot soufos, seni noum souemwen me nukucharen chochon famini, me seni Pwisin Kot. Ika ponuwan rese mwitir feito, epinukunuku pwe kopwe kaeo ekis me ekis. Soposopono ne manau ren met ka fen sinei, me soposopono ne kutta ennet.
Ifa usun upwe tongeni uta ren met mi pung me usapw asonga ekkewe mi sokkono ar nuku? Poputa ren om tumunochu pwe om kapas me foffor ra ourour me ren tongen Kot me Noun semirit. Afanafana ewe kapas allim esap fis non eu ngunun anini nge ren fatafatoch, mosonoson, me kirekiroch. Ka tongeni pwarano tong ngeni ekkoch ika mwo kose tipeew ngeni ar ekiek. Kopwe eu aweweochun chon tapweno mwirin Jises Kraist ren napanapen manauom.
Nengeni Matthew 5:14–16 (mut ngeni om saram epwe sarameno); John 14:6 (Jises i ewe ennet); 1 Peter 3:15 (kopwe monneta om kopwe aporousa om epinukunuk non Kraist fansoun meinisin); Doctrine and Covenants 88:77–80 (mettoch ewe Samon a mochen kich sipwe kaeo); 88:118 (kutta mirit seni ekkewe puk murinno); 93:36 (ewe ningen Kot mi tipachem); 124:15 (wenechar wewen tongei met mi pung); 130:18 (ach tipachem epwe fiti kich nupwen sia manausafan).
Kapaseisen Taropwen Mumuta non Tempel
-
En mi achocho kopwe wenechar non mettoch meinisin en mi fori?
-
En mi etiwa ika pesei och afanafan, foffor, ika annuk mi ungeni ekkewe chon ewe Mwichefenin Jises Kraist ren Aramas mi Pin non Fansoun Soponon?