Family Looking Towards the Light, seni Lovetta Reyes Cairo. A kawor seni Havenlight

Inisum mi pin

1 Corinth 6:18–20

Inisum eu amwararen niffang seni Semom won Nang. An wor inisum a ngonuk eu napenon manaman ne aea om ngaseno ne fini nefinen pung me muan. Ewe kapas allimen Jises Kraist mi niwinsefan a tongeni anisuk ne kuna inisum usun an Kot nenengeni. Me ei a efisata watten siwin non om pekin finata usun met kopwe fori ngeni inisum me ifa usun kopwe tumunu.

Ennet Esemuch

Inisum a nom non ununun Kot—ewe Emon mi wesen ning, amwarar non ekkewe fonufan me fan nang. Ekkewe pukefel ra anonno fengeni inisich ngeni eu tempel mi pin, eu neni ikewe ewe Ngun a tongeni nonnom ie. Ewer, inisum ese unusoch iei. Nge ekkewe mettoch a fis ngonuk ren inisum ra tongeni anisuk kopwe monneta ngeni eu ran kopwe angei eu unusochun, manausefanin, ningen inis.

Om fisita a foruta seni inisum me ngunum. Ren ei popun, manawen inisum me manawen ngunum ra men arap fengen. Ewe Chon Amanau a pwarano ewe Kapasen Emirit an epwe osukuna nongonongen tumunun inisum me pwonei feiochun inis me ngun.

Memmefin nisou ir eu auchean kinikinin an Kot kokkot ne forata apupunu mi pwapwa me famini esemuch. Ekkei memmef rese tipis—ir mi pin. Pokiten memmefin nisou ra fokkun pin me manaman, Kot a fen ngonuk An annukun nimenimoch ne amonnaoketa om kopwe aea ekkei memmef usun I a ota. Ewe annukun nimenimoch a apasa pwe Kot a tipeew ngeni mwokututkutun nisou nefinen chok emon mwan me emon fefin ir mi pupunu. Chommong aramas ra epinengaw seni ika turunufasa an Kot annuk, nge ewe Samon a etiwa kich sipwe Noun chon kuno me manaueni eu nongonong mi tekia.

Tingor

Tumunu inisum—me inisin ekkoch—ren sufon. Nupwen ka fori om pekin finata usun ufom, forun mokurom, me nikinikum, eisinuk pwisin, ‘Ngang mi osufonu inisi ussun ew niffang seni Kot mi pin?’” Samach won Nang a mochen sipwe kuna fengeni kich usun ion wesewesen kich: esap chok ren ewe inis nge Noun semirit achengicheng ren eu fetanin manau seni nang. Suseni napanapen nikinik mi pwarano ika wato ekiekingaw ngeni inisum me nge esap fen wesewesen ion en usun emon noun Kot ren eu fansoun mwom esemuch. Mut ngeni nimenimochun pungoch me tongen Kot epwe emweni om finata. Kutta ourour seni om famini.

Fori mettoch epwe apochokuna inisum, esap mettoch repwe efeiengaw ika angawa. Pwapwaiti ekkewe chommong mettoch mi och ren kinisou minne Kot a awora. Chechemeni pwe sakaw, supwa, kofi, tii, me ekkoch safei mi efeiengaw me ekkoch mettoch resap minen inisum me ngunum. Pwan mwo mettoch mi aninisoch, usun ren safei mi ourour ngonuk, ra tongeni repwe ngaw ika kose aeaoch.

Anommu nisou me memmefin nisou epwe pin. Resap pisekin turunufas ika minen urumot. Nukun pupunu nefinen emon mwan me emon fefin, mi muan ami oupwe atapa ewe kinikinin inisin emon monomon me pin, pwan mwo ika mi ufouf. Non om finata ussun met ka fori, nengeni, anneani, rongorong ngeni, ekieki ussun, postini, ika mak, amonungaw seni mettoch mi fis an epwe awora memefin mochen nisou ngeni ekkoch ika pwisin en. Ei mi pachenong sasing mi ngaw non och sokkun napanap. Ika ka kuna pwe ekkoch nikinik ika urumot ra fori sossot epwe pochokununo, susenir. En mi sinei met ekkei nikinik me urumot. Me ika kose fatoch, ewe Ngun, om famini, me noum souemwen ra tongeni anisuk kopwe sinei. Pwar ngeni Semom won Nang pwe ka afona me asufonu ewe manaman mi pin ne fori manau.

Jises Kraist a ekiek me a iteta won wokun we

Pwonen Feioch

Om sufonutuk me ekkoch epwe napeno nupwen ka afona inisum seni om napanap, nikinik, me uf.

Ewe Samon a pwonei watten auchean mirit ngeni ekkewe ra apwonueta ewe Kapasen Emirit. Eu manawen inis, seni umwesinon mettoch, pwan napenon om tufichin angei pwisin pwarata, ekiek fatoch, me angang ngeni ewe Samon.

Manaueni ewe annukun nimenimoch a wato an Kot etipew me om pwisin manamanen pekin ngun. A eppetuk me om famini non fansoun mwom. Nupwen ka pupunu, ei annuk epwe wato watten tong, epinukunuk, me tipew ngeni om apupunu. Aneasochisi ei annuk epwe fori an epwe tufich ren om kopwe fetanoch fochofoch me winiti usun Semom won Nang. Om epinukunk epwe marino nupwen ka manau usun emon chon kuno noun Jises Kraist.

Ekkewe Kapaseis me Ponuwan

Met an ewe Samon nongonong usun uf, tumunun nikinikin inis, me pwangeni inis ren nounoun ring? An ewe Samon nongonong a wor om kopwe afona pinin inisum, pwan mwo nupwen ei wewen kopwe sokkono seni ekkoch aramas. Mut ngeni ei ennet me ewe Ngun repwe om emwen nupwen ka fori finiom—akkaewin finiom minne mi nakatam mwirimwirin ngeni inisum. Kopwe mirit me nikitu, me kutta ourour seni om famini me souemwen.

Ifa usun ua tongeni okkufu sossot me oreni mi ngaw? Samach won Nang me Jises Kraist a wor ar manaman ar repwe anisuk. Amwosowa manauom ren mettoch mi etiwa Ar manaman non manauom, usun ren iotek, kaeo pukefel, me angang ngeni ekkoch. Kun ngeni Jises Kraist me An kapas allim, me kopwe kuna pwe apwangapwang ra tongeni winiti pochokun. Kutta aninis seni om famini, souemwen, me chon ourour mi sinenap en mi nukur ika mi namot. Ra tongeni anisuk kopwe angei sefan om nemenem won manauom. Meni epwe ekis tam fansoun, kopwe tipepos, me kosap fangeta.

Ngang ua sani aramas usui chok ren nengin ngeni nengin ika at ngeni at. Ifa usun ekkei nongonong ra wewe ngeniei? Memmefin sani nengin ngeni nengin ika at ngeni at esap eu tipis. Ika mi wor reom ekkei memmef me kose atapwer ika foffor wor, ka manaueni an Samach won Nang we annukun nimenimoch mi pin. En emon achengicheng noun Kot me emon chon kuno noun Jises Kraist. Chechemeni pwe ewe Chon Amanau mi weweiti mettoch ka mefi. Seni om kewe pwonen riri ngeni I, kopwe kuna pochokun ne aneasochisi an Kot kewe annuk me angei ekkewe feioch I a pwonei. Epinukunuku I me An kapas allim.

A fen wor chon urumwotei ei, me ua mefi saw. Ngang mi tipis? No. Om emon chon feiengawen och urumwotek ika rochongaw ese fori om kopwe tipis. Ewe Chon Amanau a tongeok. I om pochokun. I a mochen epwe anisuk, echikarok, me ngonuk kinamwe. Chon ourour mi sinenap en mi nuku non, chochon om famini, me noum souemwen ra tongeni aninis.

Nengeni Genesis 1:27 (kich sia nom non ununun Kot); John 14:18 (ewe Chon Amanau a pwonei kinamwe); Philippian 4:7 (ewe kinamwen Kot a nap seni weweoch meinisin); Mosaia 2:41 (ekkewe ra apwonueta an Kot annuk ra feioch non pekin inis mi ngun); Doctrine and Covenants 88:15 (ewe ngun me ewe inis ir met ra efisakicheta); 89 (ewe Kapasen Emirit); 121:45 (nimenimochun ekiek a efisata napenon epinukunuk).

Kapaseisen Taropwen Mumutan non Tempel

Ewe Samon a apasa pwe mettoch meinisin repwe fis non nimenimoch me mwen I (Doctrine and Covenants 42:41). En mi achocho ngeni an epwe wor nimenimoch mi pung non om ekiek me mwokutukut?
En mi anneasochisi ewe annukun nimenimoch?
En mi weweiti me anneasochisi ewe Kapasen Emirit?