12.
Jises Kraist a wato pwapwa
Doctrine and Covenants 101:36
Semom won Nang mi uren pwapwa. I a mochen en, Noun semirit, pwe epwe wor om watten pwapwa usun epwe tufich. Ina pwata I a amonnata ewe kokkoten pwapwa. A tinato Noun we, Jises Kraist, pwe epwe om Chon Amanau me aituk An kapas allim. Ewe kapas kapas allim wewen “porousoch,” me ewe porousoch pwe pokiten Jises Kraist, a tongeni wor om pwapwa non ei manau me eu unusen pwapwa ren fansoun esemuch.
Ennet Esemuch
En ita epwe wor om pwapwa me mwanek. Ina ewe popun manauom. Ina ewe popun an Samach won Nang kokkoten pwapwa. Ei esap wewen pwe kosap tongeni netipengaw ika wor om fansoun weires. Nge a wewen pwe ewe Chon Amanau a tongeni anisuk kopwe wes seni om fansoun weires me kuna pwapwa.
Pwapwa ese feito seni nonnomum; a feito seni om tapweno mwirin Jises Kraist. Menin epwe wor om ran mi ngaw, eu wiik mi ngaw, ika ew ier mi ngaw. Nge pwapwa esap ren an ese wor netipengaw non manauom; ina nonnomun Kraist non manauom.
An ewe Chon Amanau pwapwa a nap me a kon fochofoch nap seni och mettoch. Setan epwe sotunuk om kopwe kutta apwapwa me menemenoch non napanap mi aapangaw ika seni apwapwan fonufan. Och mettoch mi ungeni Jises Kraist me An kewe annuk rese tongeni ngonuk ennetin mwanek me pwapwa mi fochofoch. Chechemeni pwe ekkewe mettochun ei fonufan ir mi mwochomwoch nonnomur. Ewe kapas allimen Jises Kraist a awora mwanek me pwapwa minne ir mi anonnon, pin, me esemuch.
Etiwetiw
Fini pwapwa. Inamo mi ennet pwe mi wor netipengaw me weires non ei fonufan, Samach non Nang a pwan ourano ewe fonufan ren chommong mettoch mi ning, me murinno. Kutter. Achocho ne apareni ekkewe popun om kopwe pwapwa iteiten ran—menin kopwe fen makkeretiw. Ekkei ekkewe niffang seni Semom won Nang mi tong.
Wano mwanek me pwapwa ngeni ekkoch. Jises Kraist a kuna eu unusen pwapwa non an wato ngeni kich pwapwa. Ka tongeni tapweno mwirin An nenien appiru ren om kuna mwanek me pwapwa ne angang ngeni ekkoch. Anisi emon epwe mefi tong. Awora ennetin kapasen mwareiti. Pesei emon mi ettures. Ika ka mefi usun pwe a namot ngonuk pwan och pwapwa non manauom, sotuni ne ngeni pwan emon pwapwa
Kopwe uren pwapwa non om fen ngeni ewe Samon. Nupwen ka no fan, anomu om ekiek won ewe pwapwa minne Jises Kraist a ngonuk, me mwareiti I ren ena! Fori wisom ne aninis ngeni an epwe wor eu memefin pwapwan ngun non om kewe mwichen Mwichefen. Fori kon mi pin epwe pekin om fen ngeni non imw me non fan.
Pwonen Feioch
Ka tongeni mefi pwapwa pwan mwo nupwen manau mi weires. Ka tongeni aureki ifa usun ei epwe tufich, nge mi ennet. Om nuku non Jises Kraist, An manamanen echikar, me An kewe pwon esemuch ra tongeni ngonuk pwapwa fansoun meinisin. An pwapwa a okkufu netipengaw me wato kinamwe minne mi nuseni weweoch meinisin.
Eu unusen pwapwa a awitiwituk me non An Kot muun selestial. Jises Kraist a okkufu mettoch meinisin mi eppetuk seni om kopwe angei pwapwa esemuch. Nupwen ka nuku I me tapweno mwirin I, ei pwapwa epwe om.
Ekkewe Kapaseis me Ponuwan
Ika ewe kapas allim mi emeseik, pwata ka mefi netipengaw? Mefi netipengaw esap eu esisinen pwe kose manaueni ewe kapas allim. Manauen emon me emon mi pachenong osukosuk, sossot, me netipengaw. Ach tapweno mwirin Jises Kraist ese siwini ei, nge a ochuk ngeni emon Chon Amanau ewe a tongeni oururuk me anisuk kopwe kuna mwanek me pwapwa.
Pwata a kon watte riaffou non ewe fonufan? Ekkoch ekkewe riaffou non ewe fonufan ra feito pokiten aramas ra aea ar pungun finata ne fori finier mi muan. Ei a tongeni efisata riaffou fan iter pwisin me fan iten ekkoch. Non ekkoch nikinik, riaffou esap tipisin emon—a chok eu pungunon ach manau non eu fonufan ese unusoch. Ese nifinifin met popun, mi tongeni epwe emetek ach kuna emon a riaffou, akkaewin emon en mi tongei. Kopwe epinukunukoch pwe Kot mi pwan netipengaw nupwen ka riaffou. I a mutata ekkewe sossotun manau won fonufan ar repwe anisuk kopwe marita me monneta ngeni pwapwa esemuch ren I, nge I ese nikitukono om kopwe riaffou anamon. A tinato Jises Kraist an epwe wata won Inisin om metek pwe I epwe tongeni anisuk. Jises Kraist I om pochokun! Me I a etiwok, usun emon Noun chon tapweno mwirin, om kopwe fori met ka tongeni om kopwe aninis ne angasa riaffoun ekkoch.
Nengeni Psalm 16:11 (me mwen Kot mi wor unusen pwapwa); 95:1 (kong ngeni ewe Samon); John 16:33 (kopwe pwapwa; Jises a okkufu ewe fonufan); Galatian 5:22 (ewe uwan ewe Ngun mi pwapwa); Hebrew 12:2 (Jises a engino ngeni An riaffou pokiten ewe pwapwan an angasa noun Kot semirit); 2 Nifai 2:25 (Kot a mochen epwe wor om pwapwa); Alma 26:15–16 (fori an Kot angang a efisata pwapwa); Doctrine and Covenants 18:15–16 (epwe ifan me watten om pwapwa nupwen ka anisi ekkoch repwe feito ren Kraist).
Kapaseisen Taropwen mumuta ne tonong non ewe tempel
-
A wor om kapasen pwäratä usun ewe Achasefan an Jises Kraist me usun Wisan pwe I om Chon Amanau me Chon Angasano?