I Shall Not Want, seni Yongsung Kim. A kawor seni Havenlight
5.
Fetan non An Kot Saram
Galatia 5:25
Ka fori murinnon finata nupwen ka kuna fatochu mettoch. Ina pwata saram mi fokkun auchea; saram a fori an epwe mecheres sipwe kuan ewe aan mi pung. Samach won Nang a fen ngonuk tufich ngeni eu popunapen saram seni nang—ewe niffangen ewe Ngun mi Fel—an epwe anisuk kopwe kunafatochu met mi och me ngaw, pung me muan.
Ennet Esemuch
Nge mi tongeni wor ewe Ngun mi Fel epwe chiechiom fansoun meinisin. Nupwen ka kapunguno emon chon ewe Mwichefen, ka ketiw ne “angei ewe Ngun mi Fel.” Ewe tufich an ewe Ngun epwe chiechiom fansoun meinisin ina eu me nein an Kot kewe niffang mi napanap ngonuk.
Fori finiom mi och a anapano om tufichin mefi ewe Ngun. Mi wor chommong mettoch mi och me murinno non ei fonufan. Usun chok inisum mi siwin seni met ka ani me unumi, om ekiek me ngunum ra fokkun pwan siwin seni met ka anneani, katon, me ausening ngeni.
Tingor
Awora om fansoun ngeni ewe Samon iteiten ran. Kaeo usun I. Chechemeni I fansoun meinisin. Iotek ngeni Semom won Nang Kaeo ekkewe pukefel me ekkewe kapasen soufos mi pin. Mwirin achocho ne manaueni met ka kaeo.
Kutta met minne mi apochokunata, pesei, me etiwa ewe Ngun. Nupwen ka fori finiom usun met kopwe katon, anneani, ausening ngeni, ika choni, ekieki ifa usun a fori kopwe mefi. A etiwa ekiek mi och? Atowawokeno seni och mettoch mi turunufasa mettoch mi pin ika mi ngau. Kosap choni och mettoch epwe affatangawa om opungu mettoch ika mefiochu ewe Ngun, usun ren rochongaw, sakaw, me safei mi efeiengaw. Kopwe pwaracho ne offeno echo fitio ika urumot, fetaneu seni eu kachito ika pworuk, siwini noum kon, ika kununo seni och mettoch minne ese fitioch ngeni ewe Ngun.
Aea social media om kopwe amwasangata ekkoch. Social media a tongeni epwe eu pisekin aporous epwe pochokun. Ika ka aea, nenengeni ewe saram, nuku, me ennet. Kosap anonno fengeni manauom ngeni met usun a fisn ngeni ekkoch aramas. Chechemeni pwe aucheaom a fis pokiten en emon noun sam me in non nang, esap seni social media.
Kutta mettoch mi fifis mi murinno me ennet, nefinen aramas mi fochofoch. Tumunochu pwe om nounoun technology me media esap siwini om awora fansoun ngeni emon me mon me ren famini me chiechiom. Social media me ekkoch technology ra tongeni aunusano om fansoun me nukun ar awora sefani met mi namot. Asoso seni ewe awewen fonufan fis me chu ngeni aramas no ennetin manau.
Pwonen Feioch
Ka tongeni anomu ewe Ngun reom fansoun meinisin. Ei pwon ina eu pekin ewe pwon ka fori iteiten fansoun ka angei ewe sakrament. Ewe Ngun mi Fel epwe pwarata ngonuk usun Samach won Nang me Jises Kraist. I epwe oururuk, emwenuk, fonok, me epinakono. I epwe anisuk om kopwe esinna ennet me kuna ewe och non ewe fonufan.
Ekkewe Kapaseis me Ponuwan
Ifa usun upwe sinei ika ngang mi mefi ewe Ngun mi Fel? Om kopwe kaeo ne apareni ewe Ngun a tam fansoun, kaeo, me tipepos. A kapas ngeni sokopaten aramas non sokopaten napanap. Kosap nenneno seni mettoch mi mecheres—ewe kinamwein memmef ka mefi om ausening ngeni an emon kapasen pwarata ika ewe memmefin noninen ka mefi mwirin om fini mi muan. Anneani ekkewe pukefel ren sokopaten anen ewe Ngun a kakapas, iotek usun, me soposopono ne kutta tufichin mefi ewe Ngun.
Met pornography? Pwata upwe epinengaw seni? Pornography eu esisin, non sasing ika kapas, a foruno an epwe amwasangata memmefin nisou. Pornography a fis non chommong napanap, mi pachenong fitio, sasing, puk, urumot, me kon. Ir mi pwan tongeni ekkewe porous ika sasing chichei ir mi tinifengeni. Pornography enikiniki mettoch mi pin—inisich me ach memmefin nisou—ren sufonungaw. Meni kopwe kuna pornography me nukun om okokkota. Ika pwe kopwe kuna sasing mi ngaw ren om ota ika apw, mwitir kunnuno seni. Kopwe pwan mochen fos ngeni emon sam ika pwan emon mu mwukono en mi nukunuk non. Om ota om kopwe katon sasing mi ngaw mi tipis me mi efeiengaw ngeni om tufichin mefi ewe Ngun. A apwangapwangano om om tufichin nemeni mwokutukutum me angawa om pwisin kuna pwisin inisum me ekkoch. Jises Kraist a wor an manaman ne anisuk kopwe ungeni pornography me aier. Kun ngeni I me kunnuno seni rochopwak. Noum we pisop a tongeni anisuk om kopwe angei pochokun me omusomus me ren ewe Chon Amanau. Jises Kraist I om pochokun!
Nengeni Psalm 119:105 (An Kot kapas a usun eu saram won ach aan); Amos 5:14 (kutta mi och); Galatia 5:22–23 (ekkewe uwan ewe Ngun); Moronai 7:18–19 (ewe saramen Kraist); Doctrine and Covenants 6:23 (ewe Samon a kapas kinamwe); 20:77, 79 (ekkewe iotekin sakrament).
Kapaseisen Taropwen mumuta ne tonong non ewe tempel
-
Ewe Samon a apasa pwe mettoch meinisin repwe fis non nimenimoch me mwen I (Doctrine and Covenants 42:41). En mi achocho ngeni an epwe wor nimenimoch mi pung non om ekiek me mwokutukut?