7.
Annuk me pwon mi pin ra ngonuk tufich ngeni an Kot kewe feioch
Doctrine and Covenants 84:20
Semom won Nang i wesen mochen epwe aituk me efeiochuk. Eu nikinik I a fori ei ina seni ekkewe angangepin usun papatais, kapunguno, me ewe sakrament. Seni angangepin usun ekkei, sia fori eu pwon mi pin, ika pwon, ren Kot. Apwonueta pwon mi pin a anapano an Kot manaman non manauom me anisuk kopwe monneta ngeni manau esemuch. Ina pwata angangepin me pwon mi pin ir mi auchea ngeni kich—pokiten ra apochokuna nefinach me Samach won Nang me ach Chon Amanau me anisi kich ne winiti usun Ir.
Ennet Esemuch
Angangepin eitinuk ngeni Jises Kraist. Angangepin ew mwokutukut mi pin fiti esisinen awewe mi aiti kich usun Jises Kraist. Ewe sakrament, ren awewe, esap chok pinewa me konik. A achema ngeni kich usun ewe Chon Amanau.
Pwon mi pin ir eu esisin usun an Kot tong, epinukunuk, me esukusuk. Ir nefinom kewe ngeni Kot non eu anonnonun kinikin. Fori eu pwon mi pin a pwari pwe ka tongei Kot me ka nukuchar ngeni I. Ka tongeni epinukunuku I, me I a tongeni epinukunukuk. Ren ena anonnonen nukuchar a wor watten tufich ngeni An manaman me aninis nupwen ka aneasochisi om kewe pwon mi pin.
Ka fori pwon mi pin ren Kot nupwen ka papatais me kapunguno me nupwen ka angei ewe sakrament. Nupwen ka papatais, ka pwonei pwe kopwe wata wom iten Jises Kraist, angang ngeni I, me apwonueta An kewe annuk non unusen manauom. Fansoun ewe sakrament, ka pwan pwon pwe kopwe chechemeni I fansoun meinisin. Ikkei om kewe pwon. Usun ka mochen apwonureta, Kot a pwonei pwe epwe ngonuk ewe Ngun mi Fel pwe epwe chiechiom fansoun meinisin.
Tingor
Tumunu ewe sakrament usun eu niffang mi pin. Pwarano om nukuchar ngeni Jises Kraist ren om amonnata ngeni eu mettoch mi pin fansoun ewe sakrament. Ekipwichi met ka tongeni fori ne efisi pwe ei angangepin epwe eu murinnon pekin ngun me non om we wiik.
Kutta ewe Chon Amanau me non ekkewe angangepin. Nupwen ka katon ika fiti eu angangepin, eisinuk pwisin, “Met ua kaeo seni ei usun Jises Kraist?” ika “Ifa usun a uweiei arap ngeni I?” Tumunoch ngeni met ewe Ngun a aituk.
Mut ngeni om pwon mi pin epwe emweni om foffor. Nupwen mi wor om pekin finata kopwe fori chechemeni pwonen nefinom mi pin ngeni Kot. Kopwa tupwon ngeni I. Eisinuk pwisin: Ei mi wenengeni ai kewe pwon mi pin? Ren awewe, ngang mi tongei me iamwir ngeni ekkoch, oururu aramas kewe mi namot ngenir ourur, me uta usun emon chon pwarata usun Kraist—ekis meinisin me fansoun meinisin?
Pwonen Feioch
A tongeni wor om manaman ne okkufu sossot, tipis, me ekkewe sossotun manau. Fori me apwonueta pwon mi pin a ngonuk tufich ngeni an Kot manaman. Ren ena manaman, ka tongeni mesengeni och mettoch ren epinukunuk. Jises Kraist I om pochokun!
Ka tongeni nimenimoch me musono. Pekin an Kot pwon ngonuk ren om apwonueta om pwonen papatais mi pin ina eu omusomusen om kewe tipis. Ena wewen pwe nupwen ka aier me apwonueta om kewe pwon ren Kot, I epwe omusokono me anisuk kopwe murinnono.
Oua tongeni annomu remi ewe Ngun mi Fel fansoun meinisin. Pwan eu pwon mi pachengeni papatais me ewe sakrament ina ewe chiechien Ngunun fansoun meinisin me ewe iamwirin chon nang. Kosap chiwen tongeni anamon ne mesengeni om kewe weires. Kot ese tongeni nikitano Noun kewe semiritin pwon—kopwe epinukunuk won ena.
Oua tongeni angei ewe aninisin noun Kot aramasen pwon. Oua choni eu mwicheichen aramas pwon me non an ewe Chon Amanau ewe Mwichefen. Oua chunata me pesefengeni kemi. Oua netipeta me pwapwa fengen. Oua mware fengeni ami chou. Om famini, noum pisop, souemwen, me ekkoch chon Mwichefen ra nom ar repwe anisuk, me ka tongeni anisir.
Ekkewe Kapaseis me Ponuwan
Ngang mi tongeni upwe emon mi murinno chon tapweno mwirin Jises Kraist me nukun ekkewe angangepin me pwon mi pin? Mi chommong aramas mi och ekkewe ra ennetin tapweno mwirin Jises Kraist, inamo ika rese mwo papatais ika non tempel. Nge inamo, Samach won Nang a mochen Noun semirit meinsin repwe angei An kewe angangepin me fori pwon mi pin ren I pwe repwe tongeni angei watten tufich ngeni An aninis, umoumoch, me pochokun. Ina eu me nein ekkewe popunapen Jises Kraist a eniwinato An Mwichefen! Emon me emon semirit noun Kot epwe wor ren ewe tufich—non ei manau ika ewe mwirin—an epwe etiwa ekkewe angangepin me pwon mi pin mi namot ngeni manau esemuch.
Ngang use nikitu fansoun meinisin ngeni ai kewe pwon mi pin. Mi wor epinukunuk fan itei? Ewer! Ewe kapas allimen Jises Kraist eu kapas allimen epinukunuk me minafon nepoputan! Ina pwata sia angei ewe sakrament iteiten wiik. Samach won Nang mi sinei pwe sipwe fori mi muan ma epwe namot ngeni kich eu minafon nepoputan. Ewe Chon Amanau a fangeno Manauan an epwe ngonuk eu aan sefan. Nupwen ka aea nuku non Jises Kraist me aier, ka tongeni angei sefan tufich ngeni an Kot manaman.
Nengeni 1 Corinth 11:23–26 (angei ewe sakrament ne pwarano pwe sia nuku non Jises Kraist me An Achasefan); Mosaia 18:10, 13 (ewe pwonen papatais); Doctrine and Covenants 13 (ewe Aaronik Pristut mi pachenong ekkewe kiien aier, papatais, me ewe iamwirin chon nang); 20:37 (met kewe mi namot ngeni papatais); 20:77, 79 (iotekin sakrament).
Kapaseisen Taropwen mumuta ne tonong non ewe tempel
-
En mi achocho ne epini ewe ranin Sabbath, non imw me non fan; fiti om kewe mwich; mwoneta ngeni me angei ewe sakrament non minenimoch; me manaueni manauom epwe fich ngeni ekkewe annukun ewe kapas allim?