9.
Ka feioch seni kiien me mumutan pristut
Matthew 16:18–19
Nupwen Jises a aiti Peter usun mumutan pristut, A kapas usun kii. Kii ra aea ne kiiei me suki mettoch. Kiien pristut ra tongeni suki an Kot manaman, niffang, me feioch non manauom.
Ennet Esemuch
Meinisin kiin me mumutan pristut ra feito seni Jises Kraist. Emon me emon chon amwochu pristut a tongeni atapwa an pristut sefan ngeni I. Ewe Chon Amanau a finata ion epwe angei ei mumuta me ion epwe angei kiien pristut. Sia epinukunuku An unusochun mirit.
Jises Kraist a fen eniwinato sefan An pristut non ach fansoun. A emweni ifa usun aean ewe pristut. Adam, Moses, Peter, me chommong ekkoch soufos non unusen uruo ra angei kiien pristut. Non ach fansoun, Joseph Smith a angei kiien pristut seni John ewe Sou papatais, Peter, Moses, Elias, Elijah, me ekkoch. Ekkewe chon ewe Aewin Presetensi me ewe Mwichen Engon me Ruemon Aposel ra amwochu kiien pristut won fonufan ikenai. Souemwenin pristut non neniach me presetenin mwich ra pwan amwochu kiien pristut fan iten wiser. Kiien pristut a emweni an Kot angang. Ra mutata me apochokuna mwan me fefin ar repwe aninis non ena angang.
Mumutan pristut a efeiochu noun Kot semirit meinisin. Pokiten ewe pristut a niwinsefan, ka tongeni angei angangepin me fori pwon mi pin ren Kot. Ka tongeni foffor non iten ewe Kot nupwen ka angei eu wis ika kokko seni emon mi nom non nemenem.
Tingor
Etiwa kokkon Mwichefen me angang nikitu. Nupwen ka angei eu kokkon Mwichefen, ka efeioch ngeni ena wis fiti mumuta seni Kot om kopwe angang non ena wis. Ka pwan tongeni angei emwen seni Kot fan iten om angang. Nupwen ka angang, ka tupuni Jises Kraist. Ngeni I om mwurino.
Etiwa me anisi ekkewe Kot a fen korir repwe angang. Om kowe etiwa me anisi wewen mi nap seni om kopwe chok eitieta poum nupwen eu it a anneau non eu mwichen Mwichefen. A wewen kopwe peser me anisir. Kukutta anen om kopwe pwari pwe ka etiwa me anisi ekkewe aramas Jises Kraist a fen kokkorir repwe angang non An Mwichefen.
Apwonueta wis seni noum kewe souemwenin Mwichefen—mi pachenong seni om we mwich ika klasin presetensi. Mi wor ar mumuta seni Kot, minne ra ewisa ngonuk ren ena angang. Meni kopwe ewis ngeni om kopwe iamwir ngeni emon, etiwa aramas nupwen ra wareto ngeni mwichen sakrament, ika aninis ren eu urumot. Met ewe chok angang, kuna pwe eu tufichin om kopwe emon chon kuno noun Jises Kraist me angang ngeni noun Kot semirit.
Pwonen Feioch
Ka tongeni epinukunuk pwe ekkewe angangepin ka angei ra mumuta me ren Jises Kraist. Iei eu me nein ekkewe mettoch ra fori ewe Mwichefenin Jises Kraist epwe sokkono. Non ekkewe angangepinen pristut, ewe manamanen Kot a pwano.
Kopwe winiti emon chon aninis me ne poun Kot. Nupwen ka angang ngeni ewe Samon ren An mumuta me fan emwenin Noun kewe chon angang ekkewe ir mi amwochu kiien pristut, I epwe anisuk kopwe sinei ifa usun kopwe angang ngeni ekkoch non An angang. Jises Kraist I om pochokun! Om angang epwe anisuk ne arap ngeni I me ngonuk pwapwa.
Ekkewe Kapaseis me Ponuwan
Ion non ai wart a amwochu kiien pristut? Ewe pisop me ekkewe presetenin ekkewe elter, sense, me mwichen tiken ra amwochu kiien pristut. Ei wewen ewe Samon a fen ewiser ar repwe emweni epwe ifa usun aean ewe pristut ne angang me efeiochu meinisin non ewe wart.
Ifa usun kiien pristut ra efeiochuei? Angangepin usun papatais me ewe sakrament ra mumuta me ren ekkewe kiien pristut. Nupwen ka angei eu kokkon Mwichefen, ka efeioch ngeni ena wis fan emwenien emon mi amwochu kii. Ei a efeiochuk ren ewe mumuta ne angang non ena wis. Souemwenin Mwichefen me sense ir mi angang ngonuk ra pwan angei mumutan pristut seni ekkewe kii.
Ifa usun mwan me fefin ra angang ren mumutan pristut? Mwan mi nimenimoch mi wor rer ewe pristut a kawor ngenir me seikita ngeni ofesin pristut usun tiken, sense, prist, me elter. Ir me ruemon fefin me mwan ekkewe ra efeioch ngeni ar repwe angang non eu kokko ra fen angei ewisen mumutan pristut seni Kot ar repwe apwonueta ena kokko. Usun chok mi ennet ren fefin me mwan ekkewe ra angei eu wis seni emon souemwenin Mwichefen.
Nengeni Doctrine and Covenants 35:24–27 (ewe Mwichefen mi emwen me ren kii ewe Samon a fen awora); 107:18–20 (kiien ewe Melkisetek Pristut me Aaronik Pristut); 110:11–16 (Moses, Elias, me Elijah ra eniwini kii).
Kapaseisen Taropwen Mumutan non Tempel
-
En mi etiwa ewe Presetenin Ewe Mwichefenin Jises Kraist ren Aramas mi Pin non Fansoun Soponon pwe i ewe soufos, chon osini, me chon pwäratä me i ewe emon chok aramas won fonufan a mwumwuta ne aea meinisin ekkewe kien pristut?
-
En mi etiwa chon ewe Aewin Presetensi me ewe Mwichen Engon me Ruemon Aposel pwe ir soufos, chon osini, me chon pwäratä?
-
En mi etiwa ekkewe pwan ekkoch Meinap Unus me ekkewe souemwenin ewe Mwichefen non pwisin neniom?