Fori ourourochun pekin finata

Non Ren ewe Pochokunen Sarafo, kopwe kuna ekkewe afanafan an Jises Kraist me Noun soufos. Ren ekkei ennet usun om emwen, ka tongeni fori ourourochun pekin finata minne epwe efeiochuk iei me non unusen fansoun esemuch.

En emon achengicheng noun Kot semirit ngun. An watten kokkoten pwapwa a otufichi ngonuk ne marita non ngun me awatteno om tufich seni nang. A tinato Jises Kraist pwe epwe om Chon Amanau.

Semom we non Nang a epinukunukuk. I a fen ngonuk watten feioch, mi pachenong ewe unusen ewe kapas allim me angangepin me pwon mi pin minne mi ochuk ngeni I me wato An manaman non manauom. Ren ekkei pwon mi pin a pwan wor kapachetan pwapwa me wis. I mi sinei pwe ka tongeni fori mettoch epwe sokkono me non ewe fonufan, me ena a anomota, non chommong nikinik, ach sipwe sokkono seni ewe fonufan. Kutta an Semom won Nang emwen nupwen ka fori pekin finata. I epwe efeiochuk ren ourour me ren ewe Ngun mi Fel.

Jises Kraist i ewe aan ngeni pwapwa esemuch. Nupwen ka aea om ngaseno ne finata om kopwe tapweno mwirin Jises Kraist, ka nom won ewe aan mi emwen ngeni pwapwa esemuch. Fori Jises Kraist epwe om nongonong, om foun nongonong m pochokun. Aueta manauom won An kewe osukun, me auku om kepwe pekin finata senir. Ekkewe pwon mi pin ka fori atun papatais, fansoun ewe sakrament, me non ewe tempel ir kautan kinikinin om pochokunen nongonong non Kraist. Kopwe chok mesengeni weires me sossot, nge Samach won Nang me ewe Chon Amanau repwe anisuk non ir meinisin.

Ewe popun Ren ewe Pochokunen Sarafo esap ren an epwe ngonuk eu “ewer” ika “apw” usun meinisin tufichin pekin finata kopwe tongeni mesengeni. Nge, ewe Samon mi etiwok om kopwe nonnom non eu napanap mi tekia me mi kon pinino—eu manau mi anonga ennet esemuch me an ewe Samon kewe pwonen feioch. Iei An we aan. Ei emwen epwe aituk usun An we aan. A awewei ennet I a fen pwarano. Fori ekkei ennet repwe om emwen ne fori pekin finata—watten pekin finata, usun fori pwon mi pin non ewe tempel me angang won eu misin, usun pwan pekin finata iteiten ran, ren ifa usun sipwe tumunu aramas ika ifa usun sipwe aea ach fansoun.

Nupwen ekkoch ra tongeni anisuk, om marita non pekin ngun epwe fis won winikapom. Ina pusin wisom. Fori om tongeni ne murinnono iteiten ran, apwonueta an Kot annuk me asufonu om pwon mi pin, me anisi ekkoch repwe arap ngeni ewe Chon Amanau.

Nengeni Mosaia 4:29–30 (ewe aan ngeni tipis mi chommong, iwe mi namot sipwe tumunuochu kich); Ilaman 5:12 (aueta om nongonong won Kraist); Doctrine and Covenants 45:57 (angei ewe Ngun mi Fel epwe om emwen); 25:13 (kamwochunuk om kepwe pwon mi pin).