8.
Angangepinen tempel me pwon mi pin ra ngonuk watten tufich ngeni an Kot kewe feioch
Doctrine and Covenants 95:8
Ekkoch me nein an Samach won Nang feioch ra fokkun pin, I a fen annuku ngeni kich sipwe eimueno auchean, neni mi pin ikewe sia tongeni angeir me ia: tempel. Non ewe tempel, ewe imwen ewe Samon, ka tongeni angei An kewe angangepin mi tekia—ewe endowment me riri fengen—me angei An kewe watten pwon.
Ennet Esemuch
Ewe endowment eu niffangen mirit me manaman. Non ekkewe angangepinen ewe tempel endowment, ka tongeni unusen wata wom iten ewe Chon Amanau. Ka pwon om kopwe aneasochisi Kot, fangeno ne fori An mochen, manaueni ewe kapas allimen Jises Kraist, aneasochisi ewe annukun nimenimoch, me epinano—ika fangeno—manauom me mettoch meinisin met Kot a fen ngonuk ngeni An Mwichefen. Ikkei om kewe pwon. Kot a pwonei epwe efeiochuk ren watten mirit, eppet, me tufich ngeni An manaman. A pwan pwonei an epwe ngonuk manau esemuch ren I. Ren kinikinin ewe endowment, ka angei ewe tufich mi pin ne ufouf ewe garmen ren ewe pristut mi pin. Ewe garmen eu esisinen Jises Kraist me eu achechemen om kewe pwonen tempel mi pin.
Ewe ririn tempel a ochufengeni pea me famini ren fansoun esemuch. Non ewe angangepinen ewe ririn tempel, en me punuwom we oupwe fori eu pwon mi pin ren Kot me ren emon me emon. Kopwe pwonei pwe kopwe unusen nukuchar ngeni Kot me nukuchar fengen, ne tongei me aninis fengen, me ne angang fengen ne apwonueta an Kot annuk. Iei om pwon. Kot a pwonei pwe nefinom me punuwom we me noum kewe semirit ra tongeni repwe tori feinfeino. A pwan pwonei pwe ka tongeni angei ewe tekian ning ren I me non ewe muun selestial ika ka apwonueta om kewe pwon mi pin. Ei feioch a iteni manau mi tekia.
Tingor
Epwe wor noum taropwen mumuta ne tonong non ewe tempel iteiten fanosun. Churi emon chochon om we pisoprik om kopwe angei eu. I epwe eisinuk ekkoch kapaseis ren ifa usun en mi manaueni an ewe Samon nongonong ne tonong non Imwan mi pin. Atona sefani ekkei kapaseis iteitan. (Ka tongeni kuner me non ewe appendix ngeni ei emwen). Ika mwo ka nom towaw seni eu tempel, mut ngeni noum we taropwen mumuta ne tonong non tempel epwe eu esisinen om tong ngeni ewe Samon me om nikitu ngen manaueni An kewe nongonong.
Feinno ngeni ewe tempel fan chommong ren ukukun om tongeni. Ren noum we taropwen mumuta ne tonong non ewe tempel, ka tongeni tonong non imwen ewe Samon me papatais me kapunguno fan iten om kewe neuo, pwe repwe angei ekkewe feioch ka fen angei. Kopwe aea meinisin tufich ne nom non ewe tempel. Kutta ewe Samon non Imwan. Kutta I non ekkewe angangepin, ekkewe esisin, me ewe Ngun ka mefi. Kopwe kuna I.
Monneta ne fori pwon mi pin non imwen ewe Samon. Eu me nein ekkewe murinnon anen om kopwe fori ei ina om kopwe apwonueta om pwonen papatais. Fori epwe eu me nein om kewe kokkoten emwen ne angei ekkewe angangepinen tempel me om kopwe emon nakatamen chon apwonueta pwon mi pin. Poputa iei ne manaueni ekkewe annuk kopwe pwonei ne aneasochisi me non ewe tempel: aneasochis ngeni an Kot annuk, asor, ewe kapas allimen Jises Kraist, nimenimoch, me epinipin. Om famini, pisop, me ekkoch souemwenin Mwichefen ra tongeni anisuk.
Pwonen Feioch
Ka tongeni winiti usun Jises Kraist. I epwe anisuk ne winiti emon chon tapweno mwirin wenechar mi nap. Angangepinen tempel me pwon mi pin epwe aituk ifa usun kopwe tonong fan mesen Kot me angei manau esemuch ren I.
Kopwe affout ren an Kot manaman. Pwonen tempel mi fiti ewe pwon pwe ewe manaman me ningen Kot epwe nonnom wom. Noun chon nang repwe tutumunuk.
Fansoun non ewe tempel epwe apacha ngonuk kopwe arap ngeni Jises Kraist me ewe Ngun mi Fel. Kopwe mefi an Kot kinamwe me asoso. Kopwe rongorong Mongungun ren watten fatoch. Ekkewe nang repwe sukuno ngonuk, me kopwe weweochuti Anan. Epwe wor om napenon pochokun ne mesengeni weires pokiten netipom mi pachengeni Netipan.
Ekkewe Kapaseis me Ponuwan
Inet ua tongeni angei ewe endowment? Ewe finata ne angei om endowment pwisin finiom; fori ei pekin finata ren iotek. Ourour fengen me om famini me souemwenin Mwichefen. Om kopwe angei ewe endowment, mi namot kopwe mwaren 18 ier me kosap chiwen nom non high school ika sukun fan iten 12-18 ier. Kopwe endow me mwen kopwe anganga eu misin ika kopwe riri fengen, nge ese namot kopwe witiwiti ren eu me nein ekkei mettoch me mwen kopwe endow. Mi chok namot epwe wor om mochen me monneta ne fori me apwonueta pwan ekkoch pwon mi pin ngeni Semom won Nang. Noum pisop me presetenin pranch ra tongeni anisuk om kopwe sinei ika ka monneta. Kosap nenengeni ewe endowment pwe eu angang won eu tettenin mettoch esemuch kopwe fori. Nenengeni pwe eu ningen me amwararen kinikinin om sai esemuch om kopwe feito ren Kraist me angei an Kot watten feiochun pekin ngun.
Pwata mi namot epwe wor nei eu taropwen mumutan non tempel ne tonong non ewe tempel? Ewe tempel ina imwen ewe Samon, me I a forata ekkewe nongonongen tonong non. Ekkewe angangepin me pwon mi pin ren ewe tempel ir mi pin minne mi auchea epwe wor amonnetan pekin ngun. Ewe interfiun taropwen mumuta ne tonong non tempel a fis pwe epwe tumunochu pwe ka monneta non pekin ngun ren ekkewe tekian tufichin ekkewe pwonen tempel. Samach won Nang a etiwa Noun semirit meinisin ar repwe monneta ne fori pwon ren I me non Imwan mi pin.
Mi namot upwe unusoch ai upwe fori pwonen tempel mi pin? Ese wor emon mi unusoch. Kot a tingoreok kopwe wenechar me mochen apwonueta An kewe annuk. Fori me apwonueta pwon mi pin ren Kot ina met a ngonuk manaman ne winiti mi unusoch me ren Jises Kraist. I om pochokun.
Nengeni Isaiah 2:2–3 (Kot a aiti kich usun An kewe Aan non ewe tempel); Matthew 11:28–30 (wata wom an ewe Chon Amanau chou); 1 Nifaii 14:14 (ewe manamanen Kot a nom won noun kewe aramas mi pwon); Doctrine and Covenants 97:15–16 (Nonnomun Kot me An ning ra nom non Imwan); 109:22 (non ewe tempel sia affout ren an Kot manaman); 131:1–4; 132:4–6, 15–20 (ne angei manau esemuch, emon mwan me fefin repwe riri fengen ren fansoun esemuch seni ewe minafon pwon mi pin ren pupunu esemuch); Abraham 1:2 (Abraham a mochen epwe emon chon tapweno mwirin wenechar mi nap me angei watten mirit).
Kapaseisen Taropwen mumuta ne tonong non ewe tempel
-
En mi ekieki pwe en mi nimenimoch ne tonong non imwen ewe Samon me fori ekkewe angang mi pin non tempel?