ʻOku ʻomi ʻe Sīsū Kalaisi ʻa e fiefiá

ʻOku fakataumuʻa ke ke maʻu ʻa e fiefiá mo e nēkeneká. Ko e taumuʻa ia hoʻo moʻuí. Ko e taumuʻa ia ʻo e palani ʻa e Tamai Hēvaní ki he fiefiá. ʻOku ʻikai ʻuhinga ʻeni ia he ʻikai ke ke teitei loto-mamahi pe faingataʻaʻia ʻi ha taimi. Ka ʻoku ʻuhinga ia ʻe lava ke tokoniʻi koe ʻe he Fakamoʻuí ke ke kātekina e ngaahi taimi faingataʻá pea maʻu ʻa e fiefiá.

ʻOku ʻikai maʻu ʻa e fiefiá ia mei he ngaahi tūkunga ʻokú ke ʻi aí; ʻoku maʻu ia mei he muimui kia Sīsū Kalaisí. Mahalo te ke aʻusia ha ʻaho pe uike pe ko ha taʻu ʻoku ʻikai lelei. Ka ko e fiefiá ʻoku ʻikai ko e taʻe-ha-mamahi ʻi hoʻo moʻuí; ka ko e ʻafio ʻa Kalaisi ʻi hoʻo moʻuí.

ʻOku lahi mo tolonga ange e fiefia ʻa e Fakamoʻuí ʻi ha toe meʻa. ʻE fakataueleʻi koe ʻe Sētane ke ke kumi ʻa e mālié mo e fiemālié ʻi ha ngaahi founga siokita pe mei he ngaahi fiefia fakamāmaní. He ʻikai lava ʻe ha faʻahinga meʻa ʻoku fehangahangai mo Sīsū Kalaisi mo ʻEne ngaahi fekaú ʻo ʻomi kiate koe ʻa e fiefia mo e nēkeneka ʻoku moʻoni mo tuʻuloá. Manatuʻi ʻoku fakataimi pē ʻa e ngaahi meʻa ʻo e māmani ko ʻení. ʻOku foaki ʻe he ongoongolelei ʻo Sīsū Kalaisí ʻa e nēkeneka mo e fiefia ko ē ʻoku loloto, māʻoniʻoni, mo taʻengatá.

Fili ʻa e fiefiá. Neongo ʻoku moʻoni ʻoku ʻi ai e mamahi mo e faingataʻa ʻi he māmaní, ka kuo ʻosi fakafonu foki ʻe he Tamai Hēvaní ʻa e māmaní ʻaki ha ngaahi meʻa fakaʻofoʻofa mo lelei lahi fau. Fekumi kiate kinautolu. Feinga ke ke fakatokangaʻi ha ngaahi ʻuhinga ke fiefia ai ʻi he ʻaho kotoa pē—pea aʻu pē ki haʻo tohi kinautolu. Ko ha ngaahi meʻaʻofa ʻeni mei hoʻo Tamai ‘i Hēvani ʻofá.

ʻOmi ha fiefia mo e nēkeneka ki he niʻihi kehé. Naʻe maʻu ʻe Sīsū Kalaisi ʻa e fiefia kakató ʻi Heʻene ʻomi kiate kitautolu ʻa e fiefiá. Te ke lava ʻo muimui ki Heʻene sīpingá ʻaki haʻo maʻu e nēkeneká mo e fiefia ʻi hono tokoniʻi e niʻihi kehé. Tokoniʻi ha taha ke ne ongoʻi ʻoku ʻofaʻi. Fai ha fakahīkihiki ʻi he loto-fakamātoato. Fakalotolahiʻi ha taha ʻoku siʻi faingataʻaʻia. Kapau ʻe faifaiangé peá ke ongoʻi ʻokú ke fiemaʻu ha fiefia lahi ange ʻi hoʻo moʻuí, feinga ke ke ʻai ha taha kehe ke fiefia.

Fiefia ʻi he moihū ki he ʻEikí. ʻI hoʻo ʻalu ki he lotú, tokanga taha ki he fiefia ʻoku ʻoatu ʻe Sīsū Kalaisí, pea fakafetaʻi kiate Ia ʻi he meʻa ko iá! Fai hoʻo tafaʻakí ke tokoni ki ha laumālie fiefia ʻi hoʻomou ngaahi houalotu ʻi he Siasí. ʻAi ke hoko ʻa e hiva toputapú ko ha konga ʻo hoʻo moihū ʻi ʻapí pea ʻi he lotú.

Te ke lava ʻo ongoʻi fiefia neongoe faingataʻa ʻa e moʻuí. Mahalo te ke fifili pe ʻoku malava fēfē nai ʻení, ka ʻoku moʻoni ia. ʻE lava ke hanga ʻe hoʻo tui kia Sīsū Kalaisí, Hono mālohi faifakamoʻuí, mo ʻEne ngaahi talaʻofa taʻengatá, ʻo ʻoatu maʻu pē ʻa e fiefiá. ʻOku ʻuʻufi ʻe Heʻene fiefiá ʻa e loto-mamahí mo ʻomi e nonga ʻoku mahulu hake ʻi he mahino kotoa pē.

ʻOku fakatatali mai e fiefia kakató kiate koe ʻi he puleʻanga fakasilesitiale ʻo e ʻOtuá. Naʻe ikunaʻi ʻe Sīsū Kalaisi ʻa e meʻa kotoa pē te ne ala taʻofi koe mei hono maʻu e fiefia taʻengatá. ʻI hoʻo falala kiate Ia mo muimui kiate Iá, ʻe ʻaʻau ʻa e fiefiá ni.