ʻE fakatauʻatāinaʻi koe ʻe he moʻoní

ʻOku finangalo e Tamai Hēvaní ke ako maʻu pē Hono ngaahi ʻofefiné mo Hono ngaahi fohá. ʻOkú ke fakatou maʻu ha ngaahi ʻuhinga fakatuʻasino mo fakalaumālie ke ke fekumi mo manako ai ke ako. ʻOku ʻikai fakataumuʻa ʻataʻatā pē ʻa e akó ki hono maʻu e paʻangá. Ko ha konga ia hoʻo taumuʻa taʻengatá ke ke hoko ʻo hangē ange ko e Tamai Hēvaní.

ʻOku ʻuhinga ʻa e moʻui angatonú ke ke ʻofa ʻi he meʻa ʻoku totonu ʻi he ʻao ʻo e ʻOtuá—ʻo laka ange ʻi hoʻo ʻofa he fiemālie fakafoʻituituí, manakoá, pe faingamālié. ʻOku ʻuhinga ia ke fai ʻa e meʻa ʻoku totonú koeʻuhí pē he ʻoku totonu.

ʻOku ʻi ai ha meʻa mahuʻinga ke ke vahevahe. ʻOku maʻu ʻe he ongoongolelei ʻo Sīsū Kalaisí ʻa e ngaahi tali ki he ʻū fehuʻi ʻo e moʻuí. Ko e hala ia ki he nongá mo e fiefiá. Mahalo he ʻikai ke ke ʻiloʻi e meʻa kotoa pē, ka ʻoku feʻunga pē hoʻo ʻiló ke ke ʻofa ʻi ho kaungāʻapí, vahevahe e ngaahi tefitoʻi moʻoni ʻoku moʻoní mo kinautolu, pea fakaafeʻi kinautolu ke nau ako lahi ange.

Ako maʻu pē. Fekumi ki ha ngaahi faingamālie ke fakalahi ai hoʻo fakakaukaú mo hoʻo ngaahi taukeí. ʻE lava ke kau ʻi he ngaahi faingamālie ko ʻení ʻa e ako fakaʻatamai ʻi he ʻapiakó pe ako ngāué pea pehē ki ha ako mei ha ngaahi maʻuʻanga tokoni ʻokú ke falala ki ai. Fakakau ʻa e ʻEikí ʻi hoʻo ngaahi feingá, pea te Ne tataki koe.

Ako ʻa e ngaahi moʻoni fakalaumālié. ʻI hoʻo ako ko ia fekauʻaki mo e māmani ʻokú ke ʻi aí, ako foki fekauʻaki mo e Fakamoʻuí, ʻa Ia naʻá Ne ngaohi ʻa e māmaní. Ako ʻEne moʻuí mo ʻEne ngaahi akonakí. ʻAi ke hoko ʻa e seminelí, ʻinisititiutí, mo e ako fakafoʻituitui ʻo e ongoongoleleí ko ha konga hoʻo ako ʻi he kotoa hoʻo moʻuí. ʻE lava ke teuteuʻi ai koe ke ke ngāue fakafaifekau mo vahevahe ʻa e ongoongoleleí ʻi he kotoa hoʻo moʻuí.

Moʻui angatonu. ʻOua naʻá ke kaihaʻa, loi, kākā, pe anga kākā ʻi ha faʻahinga founga pē—ʻi he akó, ʻi he ngāué, ʻinitanetí, mo e feituʻu kotoa pē. Hoko ko e tokotaha muimui faivelenga tatau pē ʻo Sīsū Kalaisi ʻi he ʻao ʻo e kakaí pea ʻi he liló.

ʻOku fakatupulaki ʻe he akó hoʻo malava ke tauhi ki he ʻEikí, kau ai mo hoʻo hoko ko ha faifekaú. ʻOku fakaivia koe ke ke tāpuekina e niʻihi kehé, tautautefito ki ho fāmilí. Ko e lahi ange hoʻo akó, ko e lahi ange ia hoʻo lava ʻo tokoni ke langa e puleʻanga ʻo e ʻOtuá mo tākiekina e māmaní ki he leleí.

ʻOku ʻomi ʻe he faitotonú ʻa e nongá mo e fakaʻapaʻapaʻi kitá. Ko e taimi ʻoku fenāpasi ai hoʻo ngaahi leá mo e tōʻongá pea mo e moʻoní, ʻokú ke fakahaaʻi ai ʻe lava ke falala atu kiate koe ʻa e kakai kehé pea mo e ʻEikí.

Ko e taimi ʻokú ke taukaveʻi ai e ngaahi akonaki ʻa Sīsū Kalaisí, ʻokú Ne kau fakataha mo koe. Ko Sīsū Kalaisi ho mālohingá! Mahalo he ʻikai poupou ha niʻihi ki hoʻo tuí, ka ʻe fakatokangaʻi hoʻo loto-toʻá mo e loto-fakamātoató. Tatau ai pē pe ʻe muimui atu ha niʻihi kehe ki hoʻo sīpingá, ka ʻe tupulaki hoʻo fakamoʻoní, loto-falalá, mo e tui kia Kalaisí.