Fai ha ngaahi fili ʻoku ueʻi fakalangí

Te ke maʻu ʻi he Ki Hono Fakamālohia ʻo e Toʻu Tupú ʻa e ngaahi akonaki ʻa Sīsū Kalaisi mo ʻEne kau palōfitá. ʻI he hoko ʻa e ngaahi moʻoni ko ʻení ko hoʻo fakahinohinó, te ke lava leva ke fai ha ngaahi fili fakalaumālie te ne tāpuekina koe he taimí ni pea ʻi he kotoa ʻo e taʻengatá.

Ko ha fānau fakalaumālie ʻofeina koe ʻa e ʻOtuá. ʻOku hanga ʻe Heʻene palani lahi ʻo e fiefiá ʻo ʻai ke ke malava ʻo tupulaki fakalaumālie mo fakatupulaki ho ivi malava fakalangí. Naʻá ne fekauʻi mai ʻa Sīsū Kalaisi ke hoko ko hoʻo Fakamoʻui.

ʻOku falala atu hoʻo Tamai Hēvaní kiate koe. Kuó Ne foaki atu ha ngaahi tāpuaki maʻongoʻonga, kau ai e kakato ʻo e ongoongoleleí mo e ngaahi ouau mo e ngaahi fuakava toputapu ʻoku nau haʻi koe kiate Ia mo ʻomi Hono mālohí ki hoʻo moʻuí. ʻOku haʻu fakataha mo e ngaahi fuakava ko ʻení ha fiefia mo ha fatongia lahi ange. ʻOkú Ne ʻafioʻi te ke lava ʻo fai ha liliu ʻi he māmaní, pea ʻoku fiemaʻu ia, ʻi ha ngaahi meʻa lahi, ke te kehe mei māmani. Fekumi ki he fakahinohino hoʻo Tamai Hēvaní ʻi hoʻo fai ha ngaahi filí. Te Ne tāpuakiʻi koe ʻaki ha ueʻi fakalangi ʻo fakafou ʻi he Laumālie Māʻoniʻoní.

Ko Sīsū Kalaisi ʻa e hala ki he fiefia taʻengatá. ʻI hoʻo fakaʻaongaʻi hoʻo tauʻatāina ke fili ke muimui ʻia Sīsū Kalaisí, ʻokú ke ʻi he hala ai ʻoku fakatau ki he fiefia taʻengatá. ʻAi ʻa Sīsū Kalaisi ko hoʻo tuʻunga moʻui, ko hoʻo makatuʻunga mālohi mo fefeka. Langa hoʻo moʻuí ʻi Heʻene ngaahi akonakí, pea fuatautau hoʻo ngaahi filí ʻo fakatatau ki ai. Ko e ngaahi fuakava ʻokú ke fai ʻi he papitaisó, lolotonga e sākalamēnití, pea ʻi he temipalé ko e ngaahi konga mahuʻinga ia ʻo ho makatuʻunga mālohi ʻia Kalaisí. Te ke kei fehangahangai pē mo e ngaahi faingataʻá mo e ʻahiʻahí, ka ʻe tokoniʻi koe ʻe he Tamai Hēvaní mo e Fakamoʻuí ʻi he ngaahi meʻá ni kotoa.

ʻOku ʻikai ko e taumuʻa ʻo e Ki Hono Fakamālohia ʻo e Toʻu Tupú ke tali “ʻio” pe “ʻikai” ʻi he ngaahi fili kotoa te ke ala fehangahangai mo iá. Ka, ʻoku fakaafeʻi koe ʻe he ʻEikí ke ke moʻui ʻi ha founga māʻolunga mo māʻoniʻoni ange—ko ha moʻui ʻoku nofotaha ʻi he ngaahi moʻoni taʻengatá mo e ngaahi tāpuaki ʻa e ʻEikí kuo talaʻofa maí. Ko ʻEne foungá ʻeni. ʻE akoʻi koe ʻe he fakahinohino ko ʻení fekauʻaki mo ʻEne foungá. ʻOku fakamatalaʻi ai ha ngaahi moʻoni kuó Ne ʻosi fakahā mai. ʻAi e ngaahi moʻoni ko ʻení ko ha fakahinohino ki hono fakahoko hoʻo ngaahi filí—ngaahi fili lalahi hangē ko hono fakahoko ʻo e ngaahi fuakava ʻi he temipalé mo e ngāue fakafaifekaú, kae pehē ki he ngaahi fili fakaʻahó, hangē ko e meʻa ke fai ʻi he feohi mo e kakaí pe founga fakaʻaongaʻi ho taimí.

Neongo ʻe lava ke tokoniʻi koe ʻe ha niʻihi kehe, ka ko hoʻo tupulaki fakalaumālié ʻoku fakafoʻituitui. Ko ho fatongia ia ʻoʻou. Fai hoʻo lelei tahá ke fakalakalaka he ʻaho takitaha, tauhi e ngaahi fekau ʻa e ʻOtuá mo tauhi hoʻo ngaahi fuakavá, pea tokoni ki he niʻihi kehé ke nau ofi ange ki he Fakamoʻuí.

Vakai, Mōsaia 4:29–30 (ʻoku taʻe-faʻa-laua e ngaahi founga ki he faiangahalá, ko ia kuo pau ke tau tokanga); Hilamani 5:12 (langa ho fakavaʻé ʻia Kalaisi); Tokāteline mo e Ngaahi Fuakava 45:57 (ʻai e Laumālie Māʻoniʻoní ke hoko ko ho faifakahinohino); 25:13 (pīkitai ki hoʻo ngaahi fuakavá).