Te ke lava ʻo tokoni ʻi he ngāue ʻa e ʻOtuá

Ko e ngāue mo e nāunau ʻo e ʻOtuá ke fakahoko hoʻo moʻui taʻe-faʻa-maté mo e moʻui taʻengatá. Ko e moʻui taʻe-faʻa-maté ke moʻui ʻo lauikuonga ʻi ha sino kuo toetuʻu. Ko e moʻui taʻengatá, pe hakeakiʻí, ko e hoko ʻo tatau mo e ʻOtuá pea nofo taʻengata mo Ia ko e ngaahi fāmili. ʻOku malava kotoa ʻeni koeʻuhí ko Sīsū Kalaisi mo ʻEne Fakaleleí. Te tau lava ʻo falala kiate Ia.

Te ke lava ʻo tokoni ki he ngāue ʻa e ʻOtuá ʻaki haʻo haʻu kia Kalaisi mo tokoniʻi e niʻihi kehé ke nau fai e meʻa tatau. Ko e taimi pē ʻokú ke fai ai ha faʻahinga meʻa ke tokoniʻi ha taha ke muimui ʻia Sīsū Kalaisi, ʻokú ke tokoni ai ki he ngāue ʻa e ʻOtuá.

Moʻui ʻaki e ongoongoleleí. Fakatupulaki hoʻo tui kia Sīsū Kalaisí. Fakatomala fakaʻaho. Maʻu e ngaahi ouau ʻo e lakanga fakataulaʻeiki ʻo e ʻOtuá pea tauhi hoʻo ngaahi fuakavá. ʻAi ke hoko ia ko e sīpinga ki he toenga hoʻo moʻuí.

Tokangaʻi ʻa kinautolu ʻoku faingataʻaʻiá. Kumi ha ngaahi founga ke tokoni mo ngāue fakaetauhi ai ki he niʻihi kehé, kau ai ho fāmilí, ho ngaahi kaungāmeʻá, pea mo ho tukui koló. Ko ha founga lelei ʻe taha ke tokoniʻi ai e kakai faingataʻaʻiá ko e talangofua ki he fono ʻo e ʻaukaí mo fai e foaki ʻaukaí.

Fakaafeʻi ʻa e tokotaha kotoa pē ke nau tali ʻa e ongoongoleleí. Tuku ke hāsino ʻi hoʻo ngaahi leá mo e tōʻongá hoʻo tui kia Sīsū Kalaisí. Mateuteu ke ke vahevahe ki ha taha pē ʻoku fehuʻi atu fekauʻaki mo e ʻamanaki lelei mo e fiefia ʻokú ke ongoʻi ʻi hoʻo hoko ko ʻEne ākongá. Ki he kau talavoú, ko e ngāue fakafaifekau taimi kakató ko ha fatongia ia ʻo e lakanga fakataulaʻeikí. Ki he kau finemuí, ko ha faingamālie lelei moʻoni ia; lotua ke ke ʻiloʻi pe ʻe finangalo ʻa e ʻEikí ke ke ngāue. Teuteu ke vahevahe ʻa e ongoongoleleí ʻi hoʻo moʻuí kotoa.

Fakatahaʻi ʻa e ngaahi fāmilí ke taʻengata ʻaki hono fakahoko e hisitōlia fakafāmilí mo e ngāue fakatemipalé. Ako fekauʻaki mo hoʻo ngaahi kuí. ʻAi ke ʻiloʻi pe ko hai ʻokú ne fiemaʻu e ngaahi ouau fakatemipalé. Toutou ʻalu ki he temipalé ʻi he lahi taha te ke lavá ke papitaiso mo hilifakinima maʻanautolu. Kapau ʻokú ke fiemaʻu tokoni, ʻalu ki he FamilySearch.org.

Te ke maʻu e tokoni ʻa e ʻOtuá. ʻOku ʻikai ʻamanaki e Tamai Hēvaní ia ke ke fai ʻa e ngāué ni ʻiate koe pē. ʻOkú Ne ʻiate koe. Ko e taimi ʻokú ke foaki loto-fakatōkilalo ai ho taimí mo e lotó, te Ne fakahoko ha ngaahi meʻa fakaofo ʻo fakafou ʻiate koe. Ko Sīsū Kalaisi ho mālohingá!

ʻE fakafonu ʻaki koe ʻa e fiefia. Ko ha ngāue fakafiefia ʻa e ngāue ʻa e ʻOtuá! ʻI hoʻo kau aí, te ke lava ʻo ongoʻi ʻa e fiefia ʻokú Ne ongoʻí. Fakakaukauloto ki he fiefia te ke vahevahe mo e Tamai Hēvaní mo ʻEne fānau ʻa ia kuó ke tokoni ke ʻomi kiate Iá!