ʻOku ʻoatu ʻe he ngaahi ouaú mo e ngaahi fuakavá ha faingamālie ki he ngaahi tāpuaki ʻa e ʻOtuá

ʻOku taki koe ʻe he ngaahi ouaú kia Sīsū Kalaisi. Ko e ouaú ko ha founga toputapu ia ʻoku ʻi ai hano ngaahi ʻuhinga fakataipe ʻokú ne akoʻi fekauʻaki mo Sīsū Kalaisi. Hangē ko ʻení, ko e sākalamēnití ʻoku ʻikai ko e maá pē mo e vaí. ʻOkú ne fakamanatu mai kiate kitautolu ʻa e Fakamoʻuí.

Ko e ngaahi fuakavá ko ha fakaʻilonga ia ʻo e ʻofa, falala, mo e ngaahi fiemaʻu ʻa e ʻOtuá. ʻOku nau ʻave ho fetuʻutaki mo e ʻOtuá ki ha tuʻunga loloto ange. ʻOku fakahaaʻi ʻe he fakahoko ha fuakavá ʻokú ke ʻofa ʻi he ʻOtuá pea ʻokú ke tukupā kiate Ia. Te ke lava ʻo falala kiate Ia, pea te Ne lava ʻo falala atu kiate koe. ʻI he tukupā loloto ange ko iá, ʻoku ʻomi ai ha faingamālie lahi ange ki Hono mālohí mo e tokoní ʻi hoʻo tauhi ho ngaahi fuakavá.

ʻOkú ke fai ha ngaahi fuakava mo e ʻOtuá ʻi he taimi ʻokú ke papitaiso mo hilifakinima aí pea mo e taimi ʻokú ke maʻu ai e sākalamēnití. Ko e taimi ʻoku papitaiso ai koé, ʻokú ke palōmesi ke toʻo kiate koe ʻa e huafa ʻo Sīsū Kalaisí, tauhi kiate Ia, mo tauhi ʻEne ngaahi fekaú ʻi he kotoa hoʻo moʻuí. ʻOkú ke toe palōmesi foki ʻi he lolotonga ʻo e sākalamēnití, ke manatu maʻu ai pē kiate Ia. Ko hoʻo ngaahi palōmesí ʻeni. ʻI hoʻo loto-fiemālie ke tauhi kinautolú, ʻoku palōmesi leva ʻa e ʻOtuá te Ne foaki atu ʻa e Laumālie Māʻoniʻoní ko hoʻo takaua maʻu pē.

ʻAi ʻa e sākalamēnití ke hangē ha meʻaʻofa toputapú. Fakahaaʻi hoʻo tukupā kia Sīsū Kalaisí ʻaki haʻo teuteu ki ha aʻusia toputapu he lolotonga e sākalamēnití. Fakalaulauloto ki he meʻa te ke lava ʻo fai ke hoko ai ʻa e ouau ko ʻení ko ha meʻa mahuʻinga fakalaumālie ʻi ho uiké.

Fekumi ki he Fakamoʻuí ʻi he ngaahi ouaú. Ko e taimi ʻokú ke mamata pe kau ai ʻi ha ouau, fehuʻi pē kiate koe, “Ko e hā e meʻa ʻoku ou ako mei heni fekauʻaki mo Sīsū Kalaisí?” pe “ʻOkú ne ʻomi fēfē au ke u ofi ange kiate Iá?” Tokanga ki he meʻa ʻoku akoʻi atu ʻe he Laumālié.

Tuku ke tataki ʻe hoʻo ngaahi fuakavá ʻa hoʻo tōʻongá. Ko e taimi ʻoku ʻi ai ai haʻo fili ke faí, manatuʻi hoʻo vā fetuʻutaki fakafuakava mo e ʻOtuá. Līʻoa kiate Ia. Fehuʻi pē kiate koe: ʻOku fenāpasi nai ʻeni mo ʻeku ngaahi fuakavá? Hangē ko ʻení, ʻoku ou ʻofa mo tokoni nai ki he niʻihi kehé, fakafiemālieʻi e kakai ʻoku nau fiemaʻu ʻa e fakafiemālié, mo tuʻu ko ha fakamoʻoni ʻo Kalaisi—ʻi he feituʻu kotoa pē pea maʻu ai pē?

Te ke lava ʻo maʻu e mālohi ke ikunaʻi ʻa e ʻahiʻahí, angahalá, mo e ngaahi faingataʻa ʻo e moʻuí. ʻOku hanga ʻe he fakahoko mo e tauhi ʻo e ngaahi fuakavá ʻo ʻoatu e faingamālie ke ke maʻu e mālohi ʻo e ʻOtuá. Te ke lava ʻi he mālohi ko iá ke fehangahangai mo ha faʻahinga meʻa pē ʻi he loto-falala. Ko Sīsū Kalaisi ho mālohingá!

ʻE lava ke ke maʻa mo fakamolemoleʻi koe. Ko ha konga ʻo e talaʻofa ʻa e ʻOtuá kiate koe ʻi hoʻo tauhi hoʻo fuakava ʻi he papitaisó ko hano fakamolemoleʻi ho ngaahi angahalá. ʻOku ʻuhinga ia ko e taimi ʻokú ke fakatomala ai mo tauhi hoʻo ngaahi palōmesi mo e ʻOtuá, te Ne fakamolemoleʻi koe mo tokoniʻi koe ke ke fakalakalaka.

ʻE lava ke ʻiate koe maʻu pē ʻa e Laumālie Māʻoniʻoní. Ko ha talaʻofa ʻe taha ʻoku fekauʻaki mo e papitaisó mo e sākalamēnití ko e takaua maʻu pē ʻo Hono Laumālié pea mo e tauhi mai ʻa e kau ʻāngeló. He ʻikai ke ke teitei fehangahangai toko taha pē mo ho ngaahi faingataʻaʻiá. He ʻikai teitei liʻaki ʻe he ʻOtuá ʻEne fānau ʻo e fuakavá—te ke lava ʻo falala ki ai.

Te ke lava ʻo maʻu e poupou ʻa e kakai fuakava ʻo e ʻOtuá. ʻOkú ke kau ki ha kakai fuakava ʻi he Siasi ʻo e Fakamoʻuí. ʻOku mou fepoupouaki mo fefakalotolahiʻaki. ʻOku mou tangi fakataha mo fiefia fakataha. ʻOku mou fefuaʻaki hoʻomou ngaahi kavengá. ʻOku ʻi heni ho fāmilí, pīsopé, kau takí, mo e kāingalotu kehe ʻo e Siasí ke tokoniʻi koe, pea te ke lava ʻo tokoniʻi kinautolu.