Pōpoaki mei he Kau Palesitenisī ʻUluakí

ʻOku mau ʻofa mo falala atu kiate kimoutolu. ʻOku mou kau moʻoni ʻi he ngaahi laumālie fili ʻa e Tamai Hēvaní, kuo fekau mai ki māmani ʻi he kuongá ni ke fakahoko ha ngaahi meʻa mahuʻinga.

ʻOku mou mālohi mo ivi lahi ange ʻi he meʻa ʻokú mou fakatokangaʻí. Pea ko e taimi ʻoku mou falala ai ki he Fakamoʻuí, ʻoku toe tupulaki lahi ange homou iví. Ko Ia ʻa e “mālohinga ʻo e toʻu tupú.”

ʻE tokoni atu ʻa e fakahinohino ko ʻení ke mou langa ha makatuʻunga mālohi ki hono fakahoko e ngaahi fili ke nofo maʻu ʻi he hala ʻoku fakatau ki he moʻui taʻengatá. ʻE tokoni atu ia ke mou teuteu ke fakahoko ha ngaahi fuakava toputapu ʻi he temipalé, teuteu ke ngāue fakafaifekau, pea maʻu e fiefiá ʻi he muimui kia Sīsū Kalaisí ʻi he kotoa hoʻomou moʻuí. ʻOku ʻi ai hamou tuʻunga mahuʻinga ʻi Hono Siasí. ʻE tokoniʻi kimoutolu ʻe Sīsū Kalaisi ke ke fakahoko ʻEne ngaahi taumuʻa maʻamoutolú.

ʻOku mau ʻilo ʻoku moʻui ʻa e ʻOtuá. ʻOku mau lotua ke mou tuʻu maʻu ʻi he hala ʻo e fuakavá—ʻa e hala ʻo hono fakahoko mo tauhi e ngaahi fuakava toputapu mo e ʻOtuá. Ko e hala ia ʻoku fakatau ki hoʻomou Tamai ʻi Hēvaní. ʻI hoʻomou fai iá, te mou hoko ai ko ha ivi tākiekina ki he leleí, ʻi hono vahevahe fiefia ʻa e ongoongoleleí mo tānaki fakataha e fānau ʻa e ʻOtuá, pea mo hono teuteuʻi ʻo e māmani ki he Hāʻele ʻAnga Ua Mai ʻa e Fakamoʻuí. Manatuʻi: Ko Sīsū Kalaisi ho mālohingá!