ʻOku finangalo ʻa e ʻOtuá ke fetuʻutaki mo koe

ʻOku tataki koe ʻe he Laumālié ki he Tamai Hēvaní mo Sīsū Kalaisi. Ko e fatongia mahuʻinga ʻeni ʻo e Laumālie Māʻoniʻoní. Te Ne ueʻi foki koe ke ke fakatomala mo muimui kia Sīsū Kalaisi kae lava ke ke maʻu ʻa e ngaahi tāpuaki ʻo ʻEne Fakaleleí. ʻI hoʻo fakatomalá, ʻoku fakamaʻa mo tokoniʻi leva koe ʻe he Laumālié ke ke liliu.

ʻOku folofola ʻa e Laumālie Māʻoniʻoní ki ho ʻatamaí mo ho lotó. ʻE lava ke haʻu ki ho ʻatamaí ʻa e ngaahi pōpoaki mei he Laumālié ʻi ha ngaahi founga lahi—ʻo fakafou ʻi ha ngaahi fakakaukau, fakatokanga, mahino, mo ha ngaahi manatu fakalaumālie. ʻE lava ke folofola ʻa e Laumālie Māʻoniʻoní ki ho lotó ʻo fakafou ʻi he ngaahi ongo langaki moʻui hangē ko ha fakafiemālie, loto-falala, nonga, ʻofa, fiefia, loto-fakatōkilalo, houngaʻia, mo e faʻa kātaki.

“Maʻu ʻa e Laumālie Māʻoniʻoní.” Naʻe lea ʻaki e ngaahi leá ni ʻi he taimi naʻe hilifakinima ai koe ko ha mēmipa ʻo e Siasi ʻo Kalaisí. ʻOkú ke maʻu fēfē ʻa e Laumālie Māʻoniʻoní? ʻI he talangofua ki he ngaahi akonaki ʻa Sīsū Kalaisí. Ko Ia ho mālohingá. ʻOku hanga ʻe he muimui kiate Iá ʻo fakaafeʻi e Laumālie Māʻoniʻoní ki hoʻo moʻuí.

Fekumi ki hoʻo Tamai Hēvaní ʻi he lotu. Lilingi atu ho lotó kiate Ia. Fakafeta‘i kiate Ia ʻi he ngaahi tāpuaki fakaʻofoʻofa lahi kuó Ne ʻoatú. Vahevahe mo Ia hoʻo fiefiá, hohaʻá, mo e ngaahi fehuʻí. Fakalongolongo pea fakafanongo ki Heʻene ngaahi talí, ʻa ia ʻe ala hoko mai ko ha ongo ʻo e nonga, ngaahi fakakaukau ʻi ho ʻatamaí, pe ngaahi ueʻi ke ke fakahoko ha meʻa.

Fanongo ki he leʻo ʻo e ʻOtuá ʻi he ngaahi folofolá. Ko e ngaahi folofolá ko e folofola ia ʻa e ʻOtuá kiate koé! Ako fakaʻaho mei ai ke ʻiloʻi Hono leʻó mo ongoʻi ʻEne ʻofá. ʻI hoʻo laú, fakalaulauloto ki he meʻa te Ne ala akoʻi atu kiate koé, pea hiki e ngaahi ongo ʻe hoko maí. ʻAi ke hoko ia ko ha tōʻonga moʻui fakaʻaho ke ako e folofolá—tautautefito ki he Tohi ʻa Molomoná—ʻi hono kotoa hoʻo moʻuí.

Fakahoko e ngaahi ueʻi fakalaumālie ʻokú ke maʻú. Kapau ʻokú ke maʻu ha fakakaukau pe ueʻi ke ke fai ha faʻahinga angaʻofa te ne tāpuakiʻi ha taha, fai ia! ʻOku haʻu e meʻa lelei kotoa pē mei he ʻOtuá. Fakahā ki hoʻo Tamai Hēvaní te Ne lava ʻo falala atu ke ke muimui ki he ngaahi ueʻi meiate Iá.

ʻE fakafiemālieʻi mo tataki kimoutolu ʻe he Laumālie Māʻoniʻoní. ʻOku ʻiloa Ia ko e Fakafiemālié. Te Ne pouaki koe ʻi he taimi ʻo e faingataʻá. Te Ne tokoniʻi koe ke ke ʻiloʻi ʻa e meʻa ke ke lea ʻakí pe fakahokó. Te ke lava, ʻi Hono ivi tākiekiná, ke tala ʻa e faikehekehe ʻo e meʻa ʻoku moʻoní mo e meʻa ʻoku loí. Te Ne lava ʻo tokoniʻi koe ke ke ʻilo ʻa e lelei ʻi he niʻihi kehé pea ʻiate koé foki. ʻE lava foki ke fakatokanga atu ʻa e Laumālié ʻi ha fakatuʻutāmaki. Te Ne tataki koe kia Sīsū Kalaisi pea mamaʻo mei he angahalá.

Te ke lava ʻo maʻu ha ngaahi meʻafoaki fakalaumālie. ʻOku lahi ha ngaahi meʻafoaki ʻoku foaki ʻe he ʻOtuá ki Heʻene fānaú ʻo fakafou ʻi Hono Laumālié. ʻOku kau ʻi he niʻihi ʻoku hā ʻi he folofolá ʻa e fakahaá, tui kia Sīsū Kalaisí, akonakí, ʻiloʻiló, mo e potó. Lotu ʻo kole ki he Tamai Hēvaní fekauʻaki mo e ngaahi meʻafoaki fakalaumālie kuó Ne foaki atu kiate koé, founga te ke lava ai ʻo fakatupulaki kinautolú, mo e founga ʻokú Ne finangalo ke ke fakaʻaongaʻi ai kinautolu ke tāpuekina e niʻihi kehé.