4.
ʻE tokoniʻi koe ʻe Sīsū Kalaisi
Ko Sīsū Kalaisi ho mālohingá. Kuó Ne fai ʻa e meʻa kotoa pē ʻoku fiemaʻu ke ke fiefia ai ʻi he moʻuí ni mo e taʻengatá. ʻI hoʻo fili Ia mo ʻEne ongoongoleleí, ʻokú ke fili ai ʻa e fiefia mo e nēkeneka taʻengatá.
Naʻa mo e taimi ʻokú ke feinga ai ke fai ho lelei tahá ke fakahoko ʻa e ngaahi fili ʻoku leleí, ʻe ʻi ai pē taimi te ke fai ai ha ngaahi fehālaaki. Te ke fakahoko ha ngaahi meʻa te ke fakaʻamu naʻe ʻikai ke ke fakahoko. ʻOku pehē ʻa e tokotaha kotoa. Ko e taimi ʻoku hoko ai ʻení, ʻoku faingofua ke te ongoʻi loto-foʻi pe fifili pe te te toe lelei feʻunga nai. Ka ʻoku ʻi ai ha ongoongo fakafiefia—ko ha ongoongo fakaʻofoʻofa, mo fakatuʻamelie! Koeʻuhí ʻoku ʻofa ʻa e ʻOtuá ʻiate koe, naʻá Ne fekauʻi mai Hono ʻAlo ko Sīsū Kalaisí, ʻa ia naʻá Ne toʻo kiate Ia hoʻo ngaahi angahalá koeʻuhí ke ke lava ʻo fakatomala, fakamolemoleʻi koe peá ke kei fakalakalaka.
Ngaahi Moʻoni Taʻengatá
ʻE fakamālohia koe ʻe Sīsū Kalaisi. Te Ne tokoniʻi koe ke liliu hoʻo ngaahi holí, ngaahi fakakaukaú, mo hoʻo ngaahi tōʻongá. Ko e taimi ʻokú ke hohaʻa, ilifia, pe faingataʻaʻia ai ʻi ha faʻahinga founga pē, te Ne fakafiemālieʻi koe. Te Ne tokoniʻi koe ʻi he tapa kotoa pē ʻo hoʻo moʻuí. Te ke lava ʻo falala kiate Ia.
Ko e fakatomalá ʻoku ʻikai ko ha tautea ia ʻo e angahalá; ka ko e founga ia ʻoku fakatauʻatāinaʻi ai kitautolu ʻe he Fakamoʻuí mei he angahalá. ʻOku ʻuhinga ʻa e fakatomalá ke liliu—ke tafoki mei he angahalá ʻo hanga ki he ʻOtuá. ʻOku ʻuhinga ia ke fakalakalaka mo maʻu ʻa e fakamolemolé. Ko e faʻahinga liliu ko ʻení ʻoku ʻikai ko ha meʻa ia ʻoku hoko tā tuʻo taha pē; [ka] ko ha founga ia ʻoku hokohoko pē.
Ngaahi Fakaafé
ʻAi ke hoko ʻa Sīsū Kalaisi ko e taumuʻa ʻoku fakatefito ai hoʻo moʻuí. Fekumi ki Heʻene tokoní ʻi he meʻa kotoa pē ʻokú ke faí.
Fakatomala. Tafoki ki he ʻEikí mo ha holi ke fakalakalaka. ʻI he taimi kuó ke fai ai ha meʻa hala, fakahā totonu ia ʻi he ʻao ʻo e ʻOtuá pea, ʻo ka fiemaʻu, ki hoʻo pīsopé mo ha taha pē ne ke uesia. Fai hoʻo lelei tahá ke fakatonutonu e ngaahi meʻá.
Fiefia ʻi he meʻaʻofa ke fai lelei ange pea hoko ʻo toe lelei angé. Naʻa mo e taimi ʻoku ʻikai faingofua ai pea lōloa ange ʻi he meʻa ʻokú ke loto ki aí, ʻoua naʻa teitei tuku hoʻo feingá. Hokohoko atu hoʻo ngāue mo e falala ki he ʻEikí. Te Ne tokoniʻi koe ʻi he foʻi laka kotoa ʻo e fonongá.
Ngaahi Tāpuaki Kuo Talaʻofa Maí
ʻE fakamolemoleʻi mo fakamoʻui koe ʻe he Tamai Hēvaní ʻi hoʻo fakatomalá. Te Ne fetongi hoʻo ongoʻi halaiá ʻaki ha nonga mo ha fiefia. He ʻikai ke Ne toe manatu ki hoʻo ngaahi angahalá. Ko Sīsū Kalaisi ho mālohingá, pea ʻi Hono mālohí, ʻe tupulaki ai hoʻo holi ke tauhi ʻEne ngaahi fekaú.
Te Ne liliu ho lotó mo hoʻo moʻuí. Te ke tupulaki māmālie pea hoko ʻo hangē ange ko Iá.
Ngaahi Fehuʻí mo e Ngaahi Talí
Te u ʻilo fēfē kuo fakamolemoleʻi au ʻe he ʻOtuá? ʻOku talaʻofa mai ʻa e ʻOtuá te Ne fakamolemoleʻi ʻa kinautolu ʻoku fakatomalá. ʻI he taimi te ke ongoʻi ai e fakafiemālie mei he Laumālié, te ke lava ʻo ʻiloʻi ai e mālohi huhuʻi ʻo e Fakamoʻuí ʻoku ngāue ʻi hoʻo moʻuí.
Ko e fē e taimi te u fiemaʻu ai e tokoni ʻa e pīsopé ke fakatomalá? ʻOku maʻu ʻe hoʻo pīsopé ʻa e ngaahi kī ʻo e lakanga fakataulaʻeikí pea maʻu mo ha ngaahi meʻafoaki fakalaumālie ke tokoniʻi koe ke fakatomala. Te ke lava ʻo fekumi ki heʻene tokoní mo ʻene akonakí ʻi ha faʻahinga taimi pē. Kapau kuó ke fai ha ngaahi fehalaaki mamafa, hangē ko hono maumauʻi e fono ʻo e angamaʻá, talanoa mo hoʻo pīsopé. He ʻikai ke Ne fakaangaʻi koe. Ko ha fakafofonga ia ʻo Sīsū Kalaisi pea te ne tokoniʻi koe ke ke ʻiloʻi ʻa e founga ke fakatomala kakato ai mo maʻu ʻa e mālohi faifakamoʻui mo fakaivia ʻo e Fakamoʻuí.
ʻOku ou feinga ke fakatomala, ka ʻoku ou kei fai pē ʻa e ngaahi fehalaaki tatau. Ko e hā e meʻa ʻoku totonu ke u faí? ʻOua te ke foʻi. Tafoki kia Kalaisi, pea tui kiate Ia. ʻOku feʻunga ‘a ʻEne ʻaloʻofá. Toe feinga pē. ʻOku ʻikai ke ke teitei tuenoa ʻi hoʻo feinga ke fakalakalaká. ʻOku ʻiate koe maʻu pē ʻa Sīsū Kalaisi.
Vakai, ʻĪnosi 1:6 (ʻe lava ke matafi atu ʻa e ongoʻi halaiá); Mōsaia 4:3 (ʻoku ʻai ʻe he ʻOtuá ke ke ʻiloʻi kuo fakamolemoleʻi koe, ʻo fakafou ʻi he Laumālie Māʻoniʻoní); 26:30 (ʻoku fakamolemoleʻi kitautolu ʻe he Fakamoʻuí ʻo fakatatau ki heʻetau toutou fakatomalá); ʻEta 12:27 (ʻe lava ke fakamālohia ʻe he ʻaloʻofa ʻa e Fakamoʻuí ʻa e ngaahi meʻa ʻoku vaivaí); Molonai 6:8 (ʻoku fakamolemoleʻi ʻa kinautolu ʻoku fakatomalá); 10:32 (hoko ʻo haohaoa ʻia Kalaisi); Tokāteline mo e Ngaahi Fuakava 1:32 (ʻoku fakamolemoleʻi ʻe he ʻEikí ʻa kinautolu ʻoku fakatomalá); 58:42–43 (ʻoku kau ʻi he fakatomalá ʻa hono vete mo siʻaki e faiangahalá).
Ngaahi Fehuʻi Lekomeni Temipalé
-
ʻOku ʻi ai haʻo fakamoʻoni ki he Fakalelei ʻa Sīsū Kalaisí mo Hono tufakanga ko ho Fakamoʻui mo e Huhuʻí?
-
ʻOku ʻi ai ha faʻahinga angahala mamafa ʻi hoʻo moʻuí ʻoku fiemaʻu ke fakaleleiʻi mo e kau maʻu mafai ʻo e lakanga fakataulaʻeikí ko ha konga ʻo hoʻo fakatomalá?