Ko e palani ʻa e ʻOtuá maʻau

Ko e Tamai Hēvaní naʻá Ne faʻu ʻa e palaní. Ko e Tamai Ia ho laumālié, pea ʻokú Ne ʻofa ʻiate koe. ʻOkú Ne finangalo ke foaki kiate koe ʻEne tāpuaki maʻongoʻonga tahá—ʻa e moʻui taʻengata mo Iá. ʻI hono fakalea ʻe tahá, ʻokú Ne finangalo ke ke hoko ʻo tatau ange mo Iá ʻo maʻu e moʻui fiefia mo nāunauʻia ʻokú Ne maʻú. ʻOkú Ne maʻu e mafimafi kotoa pē pea tokaimaʻananga ʻa e meʻa kotoa. Te ke lava ʻo falala kiate Ia, ʻo aʻu ki he taimi ʻoku faingataʻa ai e moʻuí.

ʻOku ʻai ʻe Sīsū Kalaisi ke malava ʻo hoko ʻa e palaní. Kimuʻa pea faʻu e māmaní, naʻe fili Ia ʻe he Tamai Hēvaní ke hoko ko hoʻo Fakamoʻui. Ko Sīsū Kalaisi pē taha te Ne lava ʻo fakafoki mai koe ki hoʻo Tamai ʻi Hēvaní. Ko e ʻuhinga ʻeni ʻoku tau fili ai ke muimui ʻiate Iá. ʻOku fakafalala e meʻa kotoa pē ʻi he fili ko iá!

ʻOku mahuʻinga ʻa e nofo-malí mo e fāmilí ki he palani ʻa e ʻOtuá. Ko e konga kimoutolu ʻo e fāmili ʻo e ʻOtuá, pea ʻoku haʻu kotoa ʻEne fānau fakalaumālié ki māmani ʻo fakafou ʻi ha faʻē mo ha tamai. ʻOku finangalo ʻa e ʻOtuá ke fakalakalaka fakataha Hono ngaahi ʻofefiné mo e ngaahi fohá ki he haohaoa taʻengatá. ʻOku fakatou tokoni tatau pē ʻa e houʻeiki tangatá mo e houʻeiki fafiné ki ha nofo-mali ʻofa mo uouangataha. ʻE lava ke ʻomi ʻe he moʻui fakafāmili ʻi he māmaní ha fiefia lahi—neongo e ngaahi tōnounou kotoa aí. ʻOku fakataumuʻa ia ke tokoni ke teuteuʻi koe ki he moʻui taʻengata mo e ʻOtuá.

Pukepuke ha fakakaukau ʻoku taʻengatá. Ko ha taimi pē te ke fehangahangai ai mo e ngaahi ʻahiʻahí, ngaahi faingataʻá, loto-mamahí, pe ngaahi fili ʻoku faingataʻá, fakamanatu kiate koe e palani ʻa e ʻOtuá. Vakai ki he founga ʻe lava ke tokoniʻi ai koe ʻe he ngaahi moʻoni taʻengata ʻokú ke ʻilo fekauʻaki mo ʻEne palaní ke kehe hoʻo vakai ki ho ngaahi faingataʻaʻiá.

Fekumi ki he toʻukupú ʻo e ʻOtuá ʻi hoʻo moʻuí. Fakatokangaʻi e ngaahi founga ʻoku tāpuekina ai koe ʻe he ʻOtuá. Mahalo ko ha tōʻonga ʻofa ia mei ha taha, ko ha momeniti ʻo e nonga, pe ko ha tali ki ha lotu.

Fili ke ke muimui ki he palani ʻa e ʻOtuá. Ako ki he meʻa ʻoku finangalo hoʻo Tamai Hēvaní ke ke fakahokó. Kolea ʻEne fakahinohinó ʻi hoʻo ako ʻa e ngaahi folofolá, lea ʻa e kau palōfita moʻuí, fanongonongo ʻo e fāmilí, pea mo hoʻo tāpuaki fakapēteliaké. ʻE tokoni ʻeni ke ke teuteu ai ke ngāue maʻá e ʻEikí, ʻi hoʻo hoko ko ha faifekaú pea ʻi he kotoa hoʻo moʻuí. Fakamuʻomuʻa taha e ngāue maʻá e ʻEikí, mali taʻengatá, mo e ohi hake ʻo e fānaú. Fakahoko hoʻo tafaʻakí ke maʻu ha fāmili fiefia he taimi ní ʻaki hoʻo muimui ki he ngaahi akonaki ʻa Sīsū Kalaisí.

Te ke lava ʻo fehangahangai mo e ngaahi ʻahiʻahi ʻo e moʻuí ʻi he loto-toʻa mo e ʻamanaki lelei ʻia Kalaisi. Koeʻuhí ʻokú ke ʻilo fekauʻaki mo e palani taʻengata ʻa e ʻOtuá, ʻokú ke maʻu ai ha meʻangāue mahuʻinga ʻe ala tokoni atu ʻi he lolotonga ʻo e ngaahi taimi faingataʻá. ʻOkú ke ʻilo ʻoku ʻi ai ha taumuʻa mahuʻinga ange ʻi he moʻuí ʻi he meʻa ʻoku hoko mei he fanauʻí ki he maté. ʻOkú ke ʻiloʻi ko hai moʻoni koe, ko e hā hoʻo taumuʻá, mo e tuʻunga te ke lava ʻo aʻusiá ʻi he tokoni ʻa e Fakamoʻuí. Ko Sīsū Kalaisi ho mālohingá!

Te ke lava ʻo maʻu ʻa e moʻui taʻengatá ʻi hoʻo muimui kia Sīsū Kalaisí. Te Ne ʻoatu kiate koe ʻa e mālohi ke ke hoko ʻo hangē ange ko Iá, toe foki ki hoʻo ongomātuʻa fakalangí, pea moʻui fiefia fakataha mo ho ngaahi ʻofaʻangá ʻo taʻengata. Falala kia Sīsū Kalaisi.