ʻOfa ki he ʻOtuá, ʻofa ki ho kaungāʻapí

ʻOku ʻofa ʻa e ʻOtuá ʻiate koe. Ko hoʻo Tamaí Ia. ʻE lava ke ueʻi koe ʻe Heʻene ʻofa haohaoá ke ke ʻofa ʻiate Ia. ʻI he taimi ʻoku hoko ai hoʻo ʻofa ki he Tamai Hēvaní ko e ivi tākiekina mahuʻinga taha ʻi hoʻo moʻuí, ʻoku fakaʻau ke faingofua ange ha ngaahi fili lahi.

Ko e ongo fekau lahi taha ʻi he ngaahi fekaú kotoa ko e ʻofa ki he ʻOtuá mo e ʻofa ki ho kaungāʻapí. Pea ko hai ho kaungāʻapí? Ko e tokotaha kotoa pē! ʻOku fehokotaki ʻa e meʻa kotoa pē ʻoku akoʻi ʻi he folofolá pea mo e kau palōfitá ki he ongo fekau ko ʻení.

Ko e kakai kotoa pē ko ho ngaahi tokoua, tuongaʻane pe tuofāfine—ʻio, ʻoku kau ai mo e kakai ʻoku kehe meiate koé pe ʻikai fakakaukau tatau mo koé. ʻOku finangalo e Tamai Hēvaní ke feʻofoʻofani ʻEne fanaú. Ko e taimi ʻokú ke tokoniʻi aiʻEne fānaú, ʻokú ke tauhi ai kiate Ia.

Fakahaaʻi ha ʻofa ki he ʻOtuá ʻaki hono tauhi ʻEne ngaahi fekaú. Hangē ko ʻení, ʻi hono tauhi e ʻaho Sāpaté ke māʻoniʻoní, kau ai e teuteu faivelenga ke maʻu e sākalamēnití, ʻokú ke fakahaaʻi ai ki he ʻOtuá ʻokú ke loto-fiemālie ke fakatapui ha ʻaho ʻe taha he uiké kiate Ia. ʻI hoʻo ʻaukai mo totongi vahehongofulu mo e ngaahi foakí, ʻokú ke fakahaaʻi ai ki he ʻOtuá ʻoku mahuʻinga ange ʻEne ngāué kiate koe ʻi he ngaahi meʻa fakamāmaní. ʻI hoʻo fakaʻaongaʻi e huafa ʻo e ʻOtuá mo Kalaisí ʻi he ʻapasiá, ʻo ʻikai teitei tākuanoa pe fakavaʻivaʻingá, ʻokú ke fakahaaʻi ai ʻokú ke houngaʻia ʻi he meʻa kotoa kuó Na fai maʻaú.

Lau ʻa e tokotaha kotoa pē ko ha fānau ʻa e ʻOtuá. ʻI hoʻo hoko ko e ākonga ʻa Sīsū Kalaisí, te ke lava ʻo taki ʻi hono tokangaʻi e kakai ʻo e matakali mo e tui fakalotu kotoa pē pea mo ha toe faʻahinga kulupu pē ʻi he ʻofa mo e fakaʻapaʻapa—ʻo tautautefito kiate kinautolu ʻoku faʻa fakamamahiʻi ʻe he ngaahi lea mo e tōʻonga fakamamahí. Tokoni kiate kinautolu ʻoku siʻi ongoʻi tuēnoa, liʻekina, pe siva ʻenau ʻamanakí. Tokoniʻi ke nau ongoʻi e ʻofa ʻa e Tamai Hēvaní ʻo fakafou ʻiate koe. Vahevahe mo kinautolu e ngaahi tāpuaki kuó Ne foaki maʻaú, pea fakaafeʻi kinautolu ke nau muimui ʻia Sīsū Kalaisi.

Fakapapauʻi ʻoku fakahaaʻi ʻe hoʻo leá hoʻo ʻofa ki he ʻOtuá mo e niʻihi kehé—ʻo tatau ai pē pe ʻokú ke fetuʻutaki tonu pe ʻi he ʻinitanetí. Lea ʻaki ha ngaahi meʻa ʻoku langaki moʻuí—ʻo ʻikai ha meʻa ʻe ala fakamāvahevahe, fakamamahi, pe fakatupuʻita, ʻo aʻu ai pē kapau ko ha fakakata. ʻE lava ke mālohi fau hoʻo ngaahi leá. Tuku ke nau mālohi fau ki he leleí.

Fakahaaʻi e ʻofá ki ho fāmilí. ʻOku kamata ʻi ʻapi ʻa e ʻofa ʻi he fānau kotoa ʻa e ʻOtuá. Fai ho fatongiá ke ngaohi homou ʻapí ko ha feituʻu ʻe lava ke ongoʻi ai ʻe he tokotaha kotoa ʻa e ʻofa ʻa e Fakamoʻuí.

ʻE tupulaki ho vā fetuʻutaki mo e ʻOtuá ʻi hoʻo fakahaaʻi hoʻo ʻofá ʻaki hoʻo talangofua ki Heʻene ngaahi fekaú mo tauhi hoʻo ngaahi fuakava mo Iá.

ʻE tupulaki ho vā fetuʻutaki mo e niʻihi kehé ʻi hoʻo fakahaaʻi hoʻo ʻofá ʻo fakafou ʻi he ngāue tokoni faka-Kalaisí. Te ke maʻu ʻa e fiefiá ʻi hono ʻai ʻa e māmaní ke hoko ko ha feituʻu ʻoku lahi ange ai ʻa e ʻofá.