ʻOku tāpuekina koe ʻe he ngaahi kī mo e mafai ʻo e lakanga fakataulaʻeikí

ʻOku fakafou mai ʻa e ngaahi kī mo e mafai kotoa ʻo e lakanga fakataulaʻeikí ʻia Sīsū Kalaisi. ʻE lava ʻe he tokotaha maʻu lakanga fakataulaʻeiki kotoa pē ʻo fakatotoloʻi hono mafaí ʻo aʻu kiate Ia. ʻOku fakapapauʻi ʻe he Fakamoʻuí pe ko hai te ne maʻu ʻa e mafai ko ʻení pea ko hai te ne maʻu ʻa e ngaahi kī ʻo e lakanga fakataulaʻeikí. ʻOku tau falala ki Heʻene ʻilo haohaoá.

Kuo toe fakafoki mai ʻe Sīsū Kalaisi Hono lakanga fakataulaʻeikí ʻi hotau kuongá. ʻOkú Ne fakahinohino ʻa e founga ʻe fakaʻaongaʻi ai ʻa e lakanga fakataulaʻeikí. Naʻe maʻu ʻe ʻĀtama, Mōsese, Pita, mo ha kau palōfita tokolahi kehe ʻi he hisitōliá kotoa ʻa e ngaahi kī ʻo e lakanga fakataulaʻeikí. ʻI hotau kuongá ni, naʻe maʻu ʻe Siosefa Sāmita ʻa e ngaahi kī ʻo e lakanga fakataulaʻeikí meia Sione Papitaiso, Pita, Mōsese, ʻIlaiase, ʻIlaisiā, mo ha niʻihi kehe. ʻOku maʻu ʻe he kau mēmipa ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻa e ngaahi kī ko ʻení ʻi māmani he ʻahó ni. ʻOku maʻu foki ʻe he kau taki lakanga fakataulaʻeiki fakalotofonuá mo e kau palesiteni fakakōlomú ʻa e ngaahi kī ʻo e lakanga fakataulaʻeikí ki honau ngaahi uiuiʻí. ʻOku puleʻi ʻe he ngaahi kī ʻo e lakanga fakataulaʻeikí ʻa e ngāue ʻa e ʻOtuá. ʻOku nau fakamafaiʻi mo fakaivia ʻa e houʻeiki tangata mo fafine ke nau tokoni ʻi he ngāue ko iá.

ʻOku faitāpuekina ʻe he mafai ʻo e lakanga fakataulaʻeikí ʻa e fānau kotoa ʻa e ʻOtuá. Koeʻuhí naʻe fakafoki mai ʻa e lakanga fakataulaʻeikí, te ke lava ʻo maʻu e ngaahi ouaú mo fakahoko ha ngaahi fuakava mo e ʻOtuá. Te ke lava ʻo ngāue ʻi he huafa ʻo e ʻOtuá ʻi he taimi ʻokú ke maʻu ai ha fatongia pe uiuiʻi mei ha taha ʻokú ne maʻu e mafaí.

Tali e ngaahi uiuiʻi faka-Siasí pea ngāue faivelenga. Ko e taimi ʻokú ke maʻu ai ha uiuiʻi faka-Siasi, ʻoku vaheʻi koe ʻaki ʻa e mafai mei he ʻOtuá ke ke ngāue ʻi he fatongia ko iá. Te ke lava foki ʻo maʻu ha fakahinohino mei he ʻOtuá ki hoʻo ngāué. ʻI hoʻo ngāué, ʻokú ke fakafofongaʻi ai ʻa Sīsū Kalaisi. Fai hoʻo lelei tahá Maʻana.

Poupouʻi ʻa kinautolu kuo uiuiʻi ʻe he ʻOtuá ke ngāué. Ko e poupouʻí ʻoku mahulu hake ia ʻi he hiki pē ho nimá ʻi he taimi ʻoku lau atu ai ha hingoa ʻi he houalotu ʻa e Siasí. ʻOku ʻuhinga ia ke poupouʻi mo tokoniʻi. Kumi ha ngaahi founga ke fakahaaʻi ai ʻokú ke poupouʻi ʻa e kakai kuo uiuiʻi ʻe Sīsū Kalaisi ke ngāue ʻi Hono Siasí.

Fakahoko e ngaahi ngāue kuo vahe atu mei ho kau taki ʻi he Siasí—kau ai mei ho kau palesitenisī fakakōlomú pe kau palesitenisī fakakalasí. ʻOku nau maʻu e mafai mei he ʻOtuá, ʻa ia ʻoku nau foaki atu kiate koe ki he ngāue ko iá. ʻE ala vahe koe ke ke ngāue fakaetauhi ki ha taha, talitali lelei e kakaí ʻi heʻenau aʻu atu ki he houalotu sākalamēnití, pe tokoni ʻi ha ʻekitivitī. Neongo pe ko e hā e fatongiá, lau ia ko ha faingamālie ke hoko ai ko ha ākonga ʻa Sīsū Kalaisi mo tokoniʻi e fānau ʻa e ʻOtuá.

Te ke lava ʻo falala ko e ngaahi ouau ʻokú ke maʻú ʻoku fakamafaiʻi ia ʻe Sīsū Kalaisi. Ko e taha ʻeni ʻo e ngaahi meʻa ʻokú ne ʻai ke makehe ai ʻa e Siasi ʻo Sīsū Kalaisí. ʻOku fakahā e mālohi ʻo e ʻOtuá ʻo fakafou ʻi he ngaahi ouau ʻo e lakanga fakataulaʻeikí.

Te ke hoko ko ha meʻangāue ʻi he toʻukupu ʻo e ʻEikí. ʻI hoʻo ngāue ko ia maʻá e ʻEikí ʻaki Hono mafaí pea ʻi he malumalu ʻo e fakahinohino ʻa ʻEne kau tamaioʻeiki ʻoku nau maʻu ʻa e ngaahi kī ʻo e lakanga fakataulaʻeikí, te Ne tokoniʻi koe ke ke ʻilo e founga ke tokoniʻi ai e niʻihi kehé ʻi Heʻene ngāué. Ko Sīsū Kalaisi ho mālohingá. ʻE tokoni hoʻo ngāué ke ke ofi ange ai kiate Ia mo ke maʻu ai e fiefiá.