Yesu Klisto amemaka esengo

Okelama mpo na kozala na bosepeli mpe esengo. Oyo nde ntina ya bomoi na yo. Ezali ntina ya mwango ya esengo ya Tata na Lola. Oyo elingi kolona ete okotikala te kozala na mawa to kozala na bangonga ya mpasi. Kasi elakisi ete Mobikisi akoki kosunga yo otelema ngwi na bangonga ya mpasi mpe ozwa esengo.

Esengo ewutaka na makambo na yo te; ewutaka na kolandaka Yesu Klisto. Okoki kozala na mokolo mabe ntango mosusu, poso mabe, to mobu ya mabe Kasi esengo ezali te bozangi ya mawa na bomoi na yo; ezali bozali ya Klisto na bomoi na yo.

Esengo ya Mobikisi ezali monene mpe ewumelaka libela koleka eloko nyonso mosusu. Satana akomeka yo mpo na koluka maseki mpe bosepeli na banzela na yo moko to uta na bisengo ya mokili. Eloko nyonso oyo ezali te na boyokani na Yesu Klisto mpe mitindo na Ye ekoki te komemela yo esengo na bosepeli ya solo mpe ya libela. Mikundola ete biloko ya mokili oyo ezali ya ntango mokuse. Nsango malamu ya Yesu Klisto epesaka esengo mpe bosepeli oyo ezali ya mozindo, esantu, mpe ya seko.

Pona esengo. Atako ezala ya solo ete ezali na mawa mpe mpasi kati na mokili oyo, Tata na Lola atondisi mpe mokili na biloko mingi ya malamu mpe kitoko. Luka yango. Meka koyeba bantina ya kosepela mokolo na mokolo—mbala mosusu koma yango kutu. Yango ezali makabo uta na Tata na yo ya bolingo na Lola.

Mema esengo mpe bosepeli epayi ya basusu. Yesu Klisto azwaki litondi ya esengo na komemela biso esengo. Okoki kolanda ndakisa na Ye na kozwaka esengo mpe bosepeli kati na kosalela basusu. Sunga moto moko amiyoka ya kolingama. Pesa longonya ya solosolo. Lendisa moto moko oyo azali kobunda na mikakatano. Soki oyokaka lokola ozali na mposa ya esengo mingi kati na bomoi na yo, meka komema esengo epayi ya moto mosusu.

Zala na esengo na kokumbamelaka Nkolo. Ntango okendaka eklezia, tya makanisi na esengo oyo Yesu Klisto apesi yo, mpe kumisa Ye mpo na yango! Sala ya yo mokumba mpo na kosalisa na bozali ya molimo ya esengo kati na mayangani na yo ssya Eklezia. Komisa miziki ya bule eteni ya bokumbameli na yo na ndako mpe na eklezia.

Okoki koyoka esengo atako ntango bomoi ezali mpasi. Okoki komituna lolenge nini yango ekosalema, kasi ezali solo. Bondimi na Yesu Klisto, nguya na Ye ya kobikisa, mpe bilaka na Ye ya seko ekoki kopesa yo esengo ya ntango nyonso. Esengo na Ye ezipaka mawa mpe ememaka kimia oyo elekeli bososoli nyonso.

Litondi ya esengo ezali kozela yo na bokonzi ya selestiale ya Nzambe. Yesu Klisto alongaki makambo nyonso oyo ekokaki kopekisa yo uta na kozwa esengo ya seko. Ntango ozali kondimela Ye mpe kolanda Ye, esengo oyo ekozala ya yo.