Makuli mpe mayokani ya Tempelo ekopesa yo nzela monene na mapamboli ya Nzambe

Dotasio ezali likabo ya boyebi mpe nguya. Kati na makuli ya dotasio ya tempelo, ozwaka nkombo mobimba ya Mobikisi likolo na yomei. Oyokanaka mpo na kotosa Nzambe, omipesaka mpo na kosala bolingi na Ye, kosalela nsango malamu ya Yesu Klisto, kotosa mobeko ya bopeto, mpe kobulisa—to kopesa—bomoi na yo mpe nyonso oyo Nzambe apesi yo na Eklezia. Oyo ezali bilaka na yo. Nzambe alaki kopambola yo na boyebi monene mpenza, libateli, mpe nzela na nguya na Ye. Alaki lisusu kopesa yo bomoi ya seko elongo na Ye. Lokola eteni ya dotasio, ozwaka libaku ya bule ya kolata garma ya bonganganzambe esantu. Garma ezali elembo ya Yesu Klisto mpe ekundweli ya mayokani na yo ya tempelo.

Bokangisi ya tempelo esangisaka balongani mpe mabota mpo na seko. Kati na likuli ya bokangisi ya tempelo, yo mpe molongani na yo bokosala boyokani elongo na Nzambe mpe moko na mosusu. Okolaka kozala sembo mpenza epayi ya Nzambe mpe epayi ya moko na mosusu, kolinga mpe kosalela moko na mosusu, mpe kosala elongo mpo na kobatela mibeko ya Nzambe. Oyo ezali elaka na yo. Nzambe alaki ete mokangano na yo elongo na molongani na yo mpe bana na bino ekoki kowumela mpo na libela. Alaki lisusu ete okoki nkembo ya likolo makasi elongo na Ye kati na bokonzi ya selestiale ntango ozali kobatela mayokani na yo. Lipamboli oyo ebengami bonetoli.

Zala ntango nyonso ndingisa mpo na Tempelo. Kutana na moto moko ya episikopo na yo mpo na kozwa moko. Akotuna yo mituna etali lolenge nini ozali kobika mitinda ya Nkolo mpo na kokota na ndako na Ye esantu. Tala lisusu mituna yango mingimingi. (Okoki kozwa yango na mabakisi ya bokambi oyo.) Ata soki ozali mosika uta na tempelo, tika ete ndingisa na yo ya tempelo ezala elembo ya bolingo na yo mpo na Nkolo mpe bomipesi na yo mpo na kobika mitinda na Ye.

Kende na tempelo mbala na mbala soki makoki epesami. Na ndingisa na yo mpo na tempelo, okoki kokota ndako ya Nkolo mpe kobatisama mpe kokotisama mpo na bankoko na yo, na yango okokq kozwa mapamboli oyo opesami. Salela mabaku nyonso ya kozala kati na tempelo. Luka Nkolo kati na ndako na Ye. Luka Ye kati ya makuli, bililingi, mpe Molimo oyo ozali koyoka. Okozwa Ye.

Milengela mpo na kosala mayokani kati na ndako ya Nkolo. Moko ya ndenge malamu ya kosala yango ezali ya kobomba boyokani na yo ya libatisi. Sala yango moko ya mikano ya ntina mpo na kozwa makuli ya tempelo mpe kozala mobombi ya boyokani ya bomoi mobimba. Banda sikawa kobika mibeko oyo okolaka kotosa kati na tempelo: botosi na mitindo ya Nzambe, libonza, nsango malamu ya Yesu Klisto, bopeto, mpe bobulisi. Libota na yo, episikopo, mpe bakambi mosusu ya Eklezia bakoki kosunga yo.

Okoki kokoma mingi lokola Yesu Klisto. Akosalisa yo okoma moyekoli monene ya boyengebene. Makuli mpe mayokani ya tempelo ekoteya yo lolenge ya kokota liboso ya Nzambe mpe kozwa bomoi ya seko elongo na Ye.

Okolatisama na nguya ya Nzambe. Mayokani ya tempelo eyaka na elaka ete nguya mpe nkembo ya Nzambe ekozala likolo na yo. Baanzelu na Ye bakobatela yo.

Ngonga okosala kati na tempelo ekokangisa yo mingi penepene na Yesu Klisto mpe Molimo Mosantu. Okoyoka kimia mpe bopemi ya Nzambe. Okoyoka mongongo na Ye na bososoli monene. Balola ekofungwamela yo, mpe okososola malamu banzela na Ye. Okozala na makasi mingi mpo na kobunda na mikakatano na yo mpo motema na yo ekangami na oyo ya Ye.