Nzoto na yo ezali ya bule

Nzoto na yo ezali na elilingi ya Nzambe—Moto oyo aleki na nkembo, aleki lokumu kati na mokili mobimba. Makomi ekokanisaka banzoto na biso na tempelo esantu, esika oyo wapi Molimo ekoki kofanda. Ya solo, nzoto na yo ezali ya kobonga nie sikawa te. Kasi makambo ozali kokutana na yango na nzoto na yo ekoki kolengela yo mpo na kozwa mokolo moko nzoto ebonga nie, oyo esekwi, mpe ya nkembo.

Mayele na yo ekelami uta na nzoto mpe molimo na yo. Mpo na ntina oyo, bokolongono ya nzoto mpe molimo ezali ya kokangisama mpenza. Mobikisi amonisaki Liloba ya Bwanya mpo na koteya mitinda ya kobatela nzoto na yo mpe kolaka mapamboli ya nzoto mpe molimo.

Mayoki ya bosangisi nzoto ezali eteni ya motuya ya mwango ya Nzambe mpo na kokela mabala ya esengo mpe mabota ya seko. Mayoki oyo ezali lisumu te—ezali ya bule. Mpo ete mayoki ya kosangisa nzoto ezali ya bule mpenza mpe na nguya mpenza, Nzambe apesi yo mobeko na Ye ya bopeto mpo na kolengela yo na kosalela mayoki oyo ndenge Ye azali kokanisa. Mobeko ya bopeto elobi ete Nzambe andimi bosangisi nzoto bobele kati ya mobali mpe mwasi oyo babalani. Bato mingi babosanaka to kutu batyolaka mobeko ya Nzambe, kasi Nkolo abengisi biso tozala bayekoli na Ye mpe tobika motindo oyo eleki malamu.

Salela nzoto na yo—mpe banzoto ya bato mosusu—na limemya. Ntango ozali kozwa bikateli etali elateli na yo, suki, mpe lolenge ozali komonana, mituna yo moko, “Ezali ngai kotosa nzoto na ngai lokola likabo ya bule uta na Nzambe?” Tata na Lola alingi biso tomimona moko na mosusu mpo na oyo tozali ya solo: bobele te mpo na banzoto na biso ya mosuni kasi mpo na bana na Ye oyo bazali na atandele ya seko. Kima bilateli oyo ezali kobeta nsete to kobenda makanisi ebongi te na nzoto na yo ya mosuni na esika ya oyo ozali lokola mwana ya Nzambe na lobi ya seko. Tika ete bopeto ya bizaleli mpe bolingo mpo na Nzambe ekamba maponi na yo. Solola na libota na yo.

Sala makambo oyo ekolendisa nzoto na yo, te makambo oyo ekosala yango mabe to kobebisa yango. Sepela na botondi makambo mingi ya malamu Nzambe apesi. Mikundola ete masanga, likaya, cafe, tii, mpe bilangwiseli mpe bangi mosusu ya mabe ezali mpo na nzoto to molimo na yo te. Ata kutu biloko ya ntina, lokola bankisi oyo monganga akomi, ekoki koboma soki esalelami malamu te.

Bomba bosangisi nzoto mpe mayoki ya kosangisa nzoto ya bule. Yango esengeli te ezala eloko ya liseki to ya lisano. Libanda ya libala kati na mwasi mpe mobali, ezali mabe kosimba biteni ya bule ya nzoto ya moto mosusu, ata soki alati bilamba. Kati na maponi na yo etali oyo ozali kosala, kotala, kotanga, koyoka, kokanisela, kotya, to kotinda na internet, boya eloko nyonso oyo ekoki kolamusa mposa ya kosangisa nzoto epayi na yo moko to bato mosusu. Yango esangisi polonogalafi na lolenge nyonso. Soki omoni ete makambo to milulu ezali kokomisa masenginya makasi, kima yango. Oyebi nini makambo mpe milulu oyo ezali. Mpe soki oyebi te, Molimo, libota na yo, mpe bakambi na yo bakoki kosunga yo oyeba. Lakisa Tata na yo na Lola ete ozali kotosa mpe kopesa limemya na nguya ya bule ya kokela bomoi.

Limemya na yo mpo yomoko mpe basusu ekokola ntango ozali kopesa nzoto na yo lokumu na nzela ya bizaleli na yo, lolenge na yo, mpe elateli.

Nkolo alaki biloko a motuya mingi ya boyebi na baye bazali kobomba Liloba ya Bwanya. Nzoto ya bokolongono malamu, ekangami na bokakemi te, ekolisaka mpe likoki na yo ya kozwa emoniseli na yo moko, kokanisa polele mpenza, mpe kosalela Nkolo.

Kobika mobeko ya bopeto ememaka bondimami ya Nzambe mpe nguya ya molimo ya moto ye moko. Ezali kobatela yo mpe libota na yo ya lobi. Ntango obali, mobeko oyo ekomema bolingo monene, kondima, mpe bomoko na libala na yo. Kotosaka mobeko oyo ekokomisa yango ya solo mpo na yo kokende liboso mpo na seko mpe kokoma mingi lokola Tata na yo na Lola. Elikya na yo ekokola ntango ozali kobika lokola moyekoli ya Yesu Klisto.