Makuli mpe mayokani ekopesa yo nzela na na mapamboli ya Nzambe

Makuli ezali kotalisa yo epayi ya Yesu Klisto. Likuli ezali molulu ya bule elongo na bandimbola ya bililingi oyo ezali koteya maye etali Yesu Klisto. Ndakisa, Elambo ezali kaka te lipa mpe mayi. Ekundolisaka biso Mobikisi.

Makuli ezali elembo ya bolingo ya Nzambe, kondimela, mpe bilikya. Ememaka mokangano na yo elongo na Nzambe na etando ya mozindo mpenza. Kosala boyokani elakisaka ete olingi Nzambe mpe omipesi epayi na Ye. Okoki kondimela Ye, mpe Akoki kotyela yo motema. Na bomipesi oyo ya mozindo mpenza eyaka nzela na nguya na Ye mpe lisungi ntango ozali kobatela boyokani na yo.

Osalaka mayokani elongo na Nzambe ntango obatisami mpe okotisami lokola mondimi mpe ntango oliaka elambo. Ntango obatisami, olaki kozwa likolo na yo nkombo ya Yesu Klisto, kosalela Ye, mpe kobatela mitindo na Ye na bomoi na yo mobimba. Na ntango ya elambo, olakaka lisusu komikundola Ye ntango nyonso. Oyo ezali bilaka na yo. Ntango ozali kolinga kobatela yango, Nzambe alaki kopesa yo Molimo Mosantu lokola moninga ya ntango nyonso.

Zwa elambo lokola likabo ya bule. Lakisa bomipesi na yo epayi ya Yesu Klisto na komilengelaka mpo na ntango ya bule na boumeli ya elambo. Manyola oyo okoki kosala mpo na kokomisa likuli oyo likambo ya ntina mingi ya poso na yo.

Luka Nkolo kati na makuli. Ntango ozali kotala to kosangana na likuli moko, mituna yomei, “Nini nazali koyekola uta na yango mpo na Yesu Klisto?” to “Lolenge nini yango ezali komema ngai penepene na Ye?” Tya likebi na oyo Molimo azali koteya yo.

Tika ete mayokani na yo ekamba misala na yo. Ntango ozali na liponi ya kosala, mikundola mokangano na yo ya boyokani na Nzambe. Zala sembo epayi na Ye. Mituna yomei: Ezali eloko oyo koyokana na mayokani na ngai? Ndakisa, nalingi mpe nazali kosalela basusu, kobondisa bato oyo bazali na mposa ya libondisi, mpe kotelema lokola nzeneneke ya Klisto—esika nyonso mpe ntango nyonso?

Okoki kozala na nguya ya kolonga lisenginya, lisumu, mpe mimekano ya bomoi. Kosala mpe kobomba mayokani ekopesa yo nzela na nguya ya Nzambe. Na nguya wana, okoki kobunda na likambo nyonso na elikya. Yesu Klisto azali makasi na yo!

Okoki kozala peto mpe kolimbisama. Eteni ya elaka ya Nzambe epayi na yo mpo na kobomba boyokani na yo ya libatisi ezali kolimbisama ya masumu na yo. Yango elingi koloba ete ntango ozali koyambola mpe kobomba bilaka na yo elongo na Nzambe, Ye akolimbisa yo mpe akosunga yo obonga.

Okoki kozala na Molimo Mosantu elongo na yo ntango nyonso. Elaka mosusu oyo ekangami na libatisi mpe elambo ezali kimoninga ya ntango nyonso ya Molimo mpe lisalisi ya baanzelu. Osengeli te kobunda na mikakatano na yo yomei. Nzambe atikaka te bana na Ye ya boyokani—okoki kondimela na yango.

Okoki kozala na lisungi ya bato ya boyokani ya Nzambe. Ozali na lingomba ya bato ya boyokani kati na Eklezia ya Mobikisi. Bomitombolaka mpe bomilendisa moko na mosusu. Bolelaka elongo mpe bosepelaka elongo. Bomemaka mikumba ya moko na mosusu. Libota na yo, episikopo, bakambi, mpe bandimi mosusu ya Eklezia bazali wana mpo na kosunga yo, mpe okoki kosunga bango.