12.
ພຣະເຢຊູຄຣິດນຳຄວາມຊື່ນຊົມມາໃຫ້
ຄຳສອນ ແລະ ພັນທະສັນຍາ 101:36
ພຣະບິດາເທິງສະຫວັນຂອງເຈົ້າມີຄວາມສຸກ. ພຣະອົງຕ້ອງການໃຫ້ເຈົ້າ, ລູກຂອງພຣະອົງ, ມີຄວາມຊື່ນຊົມຫລາຍເທົ່າທີ່ຈະຫລາຍໄດ້. ດ້ວຍເຫດນີ້ ພຣະອົງຈຶ່ງໄດ້ກະກຽມແຜນແຫ່ງຄວາມສຸກໄວ້ໃຫ້. ພຣະອົງໄດ້ສົ່ງພຣະບຸດຂອງພຣະອົງ, ພຣະເຢຊູຄຣິດ, ມາເພື່ອໃຫ້ເປັນພຣະຜູ້ຊ່ວຍໃຫ້ລອດຂອງເຈົ້າ ແລະ ສິດສອນພຣະກິດຕິຄຸນຂອງພຣະອົງ. ຄຳວ່າ ພຣະກິດຕິຄຸນ ໝາຍຄວາມວ່າ “ຂ່າວດີ,” ແລະ ຂ່າວດີນັ້ນກໍຄືວ່າ ເພາະພຣະເຢຊູຄຣິດ, ເຈົ້າຈຶ່ງສາມາດມີຄວາມສຸກໃນຊີວິດນີ້ ແລະ ມີຄວາມຊື່ນຊົມອັນສົມບູນຊົ່ວນິລັນດອນ.
ຄວາມຈິງນິລັນດອນ
ເຈົ້າຖືກກຳນົດໃຫ້ມີຄວາມສຸກ ແລະ ຄວາມຊື່ນຊົມ. ນັ້ນຄືຈຸດປະສົງຂອງຊີວິດເຈົ້າ. ມັນຄືຈຸດປະສົງຂອງແຜນແຫ່ງຄວາມສຸກຂອງພຣະບິດາເທິງສະຫວັນ. ນີ້ກໍບໍ່ໄດ້ໝາຍຄວາມວ່າເຈົ້າຈະບໍ່ມີວັນໂສກເສົ້າ ຫລື ມີຊ່ວງເວລາທີ່ຍາກລຳບາກເລີຍ. ແຕ່ມັນໝາຍຄວາມວ່າ ພຣະຜູ້ຊ່ວຍໃຫ້ລອດສາມາດຊ່ວຍເຈົ້າໃຫ້ຜ່ານຜ່າຄວາມຫຍຸ້ງຍາກ ແລະ ພົບຄວາມຊື່ນຊົມໄດ້.
ຄວາມຊື່ນຊົມບໍ່ໄດ້ມາຈາກສະພາບການຂອງເຈົ້າ; ແຕ່ມາຈາກການຕິດຕາມພຣະເຢຊູຄຣິດ. ເຈົ້າອາດຈະມີວັນທີ່ບໍ່ດີ, ອາທິດທີ່ບໍ່ດີ, ຫລື ແມ່ນແຕ່ປີທີ່ບໍ່ດີ. ແຕ່ຄວາມຊື່ນຊົມບໍ່ແມ່ນການທີ່ບໍ່ມີຄວາມໂສກເສົ້າໃນຊີວິດຂອງເຈົ້າ; ມັນຄືການມີພຣະຄຣິດຢູ່ໃນຊີວິດຂອງເຈົ້າ.
ຄວາມຊື່ນຊົມຂອງພຣະຜູ້ຊ່ວຍໃຫ້ລອດຍິ່ງໃຫຍ່ ແລະ ຍືນຍົງກວ່າສິ່ງອື່ນໃດ. ຊາຕານຈະລໍ້ລວງເຈົ້າໃຫ້ສະແຫວງຫາຄວາມມ່ວນຊື່ນ ແລະ ຄວາມພໍໃຈໃນວິທີທີ່ເຫັນແກ່ຕົວ ຫລື ຈາກຄວາມເພິ່ງພໍໃຈທາງໂລກ. ສິ່ງໃດກໍຕາມທີ່ຂັດກັບພຣະເຢຊູຄຣິດ ແລະ ພຣະບັນຍັດຂອງພຣະອົງ ຈະບໍ່ສາມາດນຳຄວາມຊື່ນຊົມ ແລະ ຄວາມສຸກທີ່ແທ້ຈິງ ແລະ ຍືນຍົງມາໃຫ້ເຈົ້າ. ຈົ່ງຈື່ຈຳໄວ້ວ່າ ສິ່ງຕ່າງໆໃນໂລກນີ້ແມ່ນຊົ່ວຄາວ. ພຣະກິດຕິຄຸນຂອງພຣະເຢຊູຄຣິດສະເໜີມອບຄວາມຊື່ນຊົມ ແລະ ຄວາມສຸກທີ່ເລິກເຊິ່ງ, ສັກສິດ, ແລະ ເປັນນິດ.
ຄຳເຊື້ອເຊີນ
ຈົ່ງເລືອກຄວາມຊື່ນຊົມ. ເຖິງແມ່ນວ່າມັນຈະແມ່ນຄວາມຈິງທີ່ວ່າມີຄວາມໂສກເສົ້າ ແລະ ຄວາມຫຍຸ້ງຍາກຢູ່ໃນໂລກນີ້, ແຕ່ພຣະບິດາເທິງສະຫວັນຍັງໄດ້ເຕີມເຕັມໂລກນີ້ດ້ວຍສິ່ງທີ່ສວຍງາມ ແລະ ດີງາມຫລາຍຢ່າງ. ຈົ່ງຊອກຫາພວກມັນ. ພະຍາຍາມສັງເກດເຫດຜົນທີ່ຈະປິຕິຍິນດີໃນທຸກໆມື້—ບາງທີອາດຈະຂຽນມັນລົງໄວ້. ສິ່ງເຫລົ່ານີ້ຄືຂອງປະທານຈາກພຣະບິດາຜູ້ສະຖິດຢູ່ໃນສະຫວັນທີ່ຊົງຮັກຂອງເຈົ້າ.
ນຳຄວາມຊື່ນຊົມ ແລະ ຄວາມສຸກໄປໃຫ້ຄົນອື່ນ. ພຣະເຢຊູຄຣິດໄດ້ພົບຄວາມຊື່ນຊົມອັນສົມບູນໃນການນຳຄວາມຊື່ນຊົມມາໃຫ້ເຮົາ. ເຈົ້າສາມາດເຮັດຕາມຕົວຢ່າງຂອງພຣະອົງໄດ້ໂດຍການຊອກຫາຄວາມຊື່ນຊົມ ແລະ ຄວາມສຸກໃນການຮັບໃຊ້ຄົນອື່ນ. ຊ່ວຍໃຫ້ບາງຄົນຮູ້ສຶກເຖິງຄວາມຮັກ. ກ່າວຊົມເຊີຍຢ່າງຈິງໃຈ. ໃຫ້ກຳລັງໃຈບາງຄົນທີ່ກຳລັງດີ້ນລົນ. ຖ້າຫາກວ່າເຈົ້າເຄີຍຮູ້ສຶກວ່າເຈົ້າຕ້ອງການຄວາມຊື່ນຊົມຫລາຍຂຶ້ນໃນຊີວິດຂອງເຈົ້າ, ລອງນຳເອົາຄວາມຊື່ນຊົມນັ້ນໄປໃຫ້ຄົນອື່ນ.
ຈົ່ງມີຄວາມສຸກໃນການນະມັດສະການພຣະຜູ້ເປັນເຈົ້າ. ເມື່ອເຈົ້າໄປໂບດ, ຈົ່ງສຸມໃຈໃສ່ກັບຄວາມຊື່ນຊົມທີ່ພຣະເຢຊູຄຣິດປະທານໃຫ້ເຈົ້າ, ແລະ ສັນລະເສີນພຣະອົງສຳລັບສິ່ງນັ້ນ! ຈົ່ງເຮັດພາກສ່ວນຂອງເຈົ້າໃນການປະກອບສ່ວນດ້ວຍວິນຍານທີ່ມີຄວາມສຸກ ໃນການປະຊຸມໂບດຂອງເຈົ້າ. ຈົ່ງເຮັດໃຫ້ບົດເພງທີ່ສັກສິດເປັນພາກສ່ວນຂອງການນະມັດສະການຂອງເຈົ້າຢູ່ທີ່ບ້ານ ແລະ ທີ່ໂບດ.
ພອນທີ່ສັນຍາໄວ້
ເຈົ້າສາມາດຮູ້ສຶກເຖິງຄວາມຊື່ນຊົມໄດ້ ເຖິງແມ່ນວ່າ ຊີວິດຈະຍາກລຳບາກກໍຕາມ. ເຈົ້າອາດຈະສົງໄສວ່າ ນີ້ເປັນໄປໄດ້ແນວໃດ, ແຕ່ມັນຄືຄວາມຈິງ. ສັດທາຂອງເຈົ້າໃນພຣະເຢຊູຄຣິດ, ອຳນາດແຫ່ງການປິ່ນປົວຂອງພຣະອົງ, ແລະ ຄຳສັນຍານິລັນດອນຂອງພຣະອົງສາມາດໃຫ້ຄວາມຊື່ນຊົມກັບທ່ານຢ່າງຕໍ່ເນື່ອງໄດ້. ຄວາມຊື່ນຊົມຂອງພຣະອົງຈະປົກຄຸມຄວາມໂສກເສົ້າ ແລະ ນຳຄວາມສະຫງົບສຸກທີ່ເກີນກວ່າຄວາມເຂົ້າໃຈທັງໝົດມາໃຫ້.
ຄວາມຊື່ນຊົມອັນສົມບູນລໍຖ້າເຈົ້າຢູ່ໃນອານາຈັກຊັ້ນສູງຂອງພຣະເຈົ້າ. ພຣະເຢຊູຄຣິດໄດ້ເອົາຊະນະທຸກສິ່ງທີ່ສາມາດກີດຂວາງເຈົ້າຈາກການໄດ້ຮັບຄວາມຊື່ນຊົມນິລັນດອນ. ເມື່ອເຈົ້າໄວ້ວາງໃຈພຣະອົງ ແລະ ຕິດຕາມພຣະອົງ, ຄວາມຊື່ນຊົມນີ້ຈະເປັນຂອງເຈົ້າ.
ຄຳຖາມ ແລະ ຄຳຕອບ
ຖ້າພຣະກິດຕິຄຸນຄືຄວາມຊື່ນຊົມ, ເປັນຫຍັງຂ້ອຍຈຶ່ງຮູ້ສຶກໂສກເສົ້າແທ້? ຄວາມຮູ້ສຶກໂສກເສົ້າບໍ່ແມ່ນສັນຍານວ່າ ເຈົ້າບໍ່ໄດ້ກຳລັງດຳລົງຊີວິດຕາມພຣະກິດຕິຄຸນ. ຊີວິດຂອງທຸກໆຄົນລ້ວນແລ້ວແຕ່ປະກອບດ້ວຍຄວາມຍາກລຳບາກ, ການທົດລອງ, ແລະ ຄວາມໂສກເສົ້າ. ການຕິດຕາມພຣະເຢຊູຄຣິດບໍ່ໄດ້ປ່ຽນແປງສິ່ງນີ້, ແຕ່ມັນຈະເຊື່ອມຕໍ່ເຈົ້າກັບພຣະຜູ້ຊ່ວຍໃຫ້ລອດຜູ້ທີ່ສາມາດປອບໂຍນເຈົ້າ ແລະ ຊ່ວຍເຈົ້າໃຫ້ພົບຄວາມຊື່ນຊົມ ແລະ ຄວາມສຸກ.
ເປັນຫຍັງໂລກນີ້ຈຶ່ງມີຄວາມທຸກທໍລະມານຫລາຍແທ້? ຄວາມທຸກທໍລະມານບາງຢ່າງໃນໂລກນີ້ເກີດຂຶ້ນຍ້ອນຜູ້ຄົນໃຊ້ອຳເພີໃຈຂອງເຂົາໃນການເລືອກສິ່ງທີ່ຜິດ. ສິ່ງນີ້ເຮັດໃຫ້ເກີດຄວາມທຸກທໍລະມານໃຫ້ກັບເຂົາເອງ ແລະ ຜູ້ອື່ນ. ໃນກໍລະນີອື່ນໆ, ຄວາມທຸກທໍລະມານບໍ່ແມ່ນຄວາມຜິດຂອງໃຜ—ມັນເປັນພຽງຜົນໄດ້ຮັບຈາກການດຳລົງຊີວິດຢູ່ໃນໂລກທີ່ບໍ່ສົມບູນແບບ. ບໍ່ວ່າຈະເປັນໃນກໍລະນີໃດກໍຕາມ, ມັນອາດຈະເປັນເລື່ອງທີ່ເຈັບປວດໃຈທີ່ເຫັນຜູ້ໃດຜູ້ໜຶ່ງທຸກທໍລະມານ, ໂດຍສະເພາະຄົນທີ່ເຈົ້າຮັກ. ຈົ່ງໝັ້ນໃຈໄດ້ວ່າ ພຣະເຈົ້າກໍເສົ້າພຣະໄທເຊັ່ນກັນ ເມື່ອເຈົ້າທຸກທໍລະມານ. ພຣະອົງປ່ອຍໃຫ້ການທົດລອງໃນຊີວິດມະຕະເກີດຂຶ້ນ ເພື່ອຊ່ວຍເຈົ້າໃຫ້ເຕີບໂຕ ແລະ ກຽມພ້ອມສໍາລັບຄວາມຊື່ນຊົມນິລັນດອນກັບພຣະອົງ, ແຕ່ພຣະອົງບໍ່ໄດ້ປະໃຫ້ເຈົ້າທົນທຸກທໍລະມານຢູ່ຜູ້ດຽວ. ພຣະອົງໄດ້ສົ່ງພຣະເຢຊູຄຣິດມາເພື່ອຮັບເອົາຄວາມເຈັບປວດຂອງເຈົ້າໄວ້ກັບພຣະອົງ ເພື່ອວ່າພຣະອົງຈະສາມາດຊ່ວຍເຈົ້າໄດ້. ພຣະເຢຊູຄຣິດຄືຄວາມເຂັ້ມແຂງຂອງເຈົ້າ! ແລະ ພຣະອົງເຊື້ອເຊີນເຈົ້າ, ໃນຖານະຜູ້ຕິດຕາມຂອງພຣະອົງ, ໃຫ້ເຮັດສິ່ງທີ່ເຈົ້າສາມາດເຮັດໄດ້ເພື່ອຊ່ວຍແບ່ງເບົາຄວາມທຸກທໍລະມານຂອງຄົນອື່ນ.
ເບິ່ງ ເພງສັນລະເສີນ 16:11 (ຢູ່ຊ້ອງໜ້າພຣະອົງນັ້ນມີຄວາມຊື່ນຊົມ); 95:1 (ຈົ່ງຮ້ອງເພງຖວາຍແດ່ພຣະຜູ້ເປັນເຈົ້າ); ໂຢຮັນ 16:33 (ຈົ່ງຊື່ນໃຈເທາະ; ເພາະພຣະເຢຊູຄຣິດໄດ້ຊະນະໂລກແລ້ວ); ຄາລາເຕຍ 5:22 (ຜົນຂອງພຣະວິນຍານນັ້ນຄືຄວາມຊື່ນຊົມ); ເຮັບເຣີ 12:2 (ພຣະເຢຊູອົດທົນຕໍ່ຄວາມເຈັບປວດຂອງພຣະອົງຍ້ອນຄວາມຊື່ນຊົມໃນການຊ່ວຍລູກໆຂອງພຣະເຈົ້າ); 2 ນີໄຟ 2:25 (ພຣະເຈົ້າຕ້ອງການໃຫ້ເຈົ້າມີຄວາມສຸກ); ແອວມາ 26:15–16 (ການເຮັດວຽກງານຂອງພຣະເຈົ້ານຳພາໄປສູ່ຄວາມຊື່ນຊົມ); ຄຳສອນ ແລະ ພັນທະສັນຍາ 18:15–16 (ຄວາມຊື່ນຊົມຂອງເຈົ້າຈະຍິ່ງໃຫຍ່ພຽງໃດເມື່ອເຈົ້າຊ່ວຍເຫລືອຄົນອື່ນໃຫ້ມາຫາພຣະຄຣິດ).
ຄຳຖາມກ່ຽວກັບໃບຮັບຮອງເຂົ້າພຣະວິຫານ
-
ເຈົ້າມີປະຈັກພະຍານເຖິງການຊົດໃຊ້ຂອງພຣະເຢຊູຄຣິດ ແລະ ເຖິງບົດບາດຂອງພຣະອົງ ໃນການເປັນພຣະຜູ້ຊ່ວຍໃຫ້ລອດ ແລະ ເປັນພຣະຜູ້ໄຖ່ຂອງເຈົ້າບໍ?