ພຣະເຈົ້າຢາກສື່ສານກັບເຈົ້າ

ການຟື້ນຟູພຣະກິດຕິຄຸນໄດ້ເລີ່ມຕົ້ນຂຶ້ນເມື່ອຊາຍໜຸ່ມຄົນໜຶ່ງຊື່ໂຈເຊັບ ສະມິດ ໄດ້ອະທິຖານ, ແລະ ພຣະບິດາເທິງສະຫວັນ ແລະ ພຣະບຸດຂອງພຣະອົງ, ພຣະເຢຊູຄຣິດ, ໄດ້ຕອບຄຳອະທິຖານຂອງເພິ່ນ. ພຣະເຈົ້າຍັງສືບຕໍ່ນຳພາສາດສະໜາຈັກຂອງພຣະອົງຜ່ານທາງສາດສະດາທີ່ມີຊີວິດຢູ່. ພຣະອົງກໍຍັງຕ້ອງການທີ່ຈະກ່າວກັບເຈົ້າ, ລູກຂອງພຣະອົງ, ຜ່ານທາງພຣະວິນຍານບໍລິສຸດນຳອີກ. ການຮຽນຮູ້ທີ່ຈະຮັບຮູ້ວ່າພຣະວິນຍານບໍລິສຸດກ່າວກັບເຈົ້າດ້ວຍວິທີໃດນັ້ນເປັນໜຶ່ງໃນທັກສະທີ່ມີຄຸນຄ່າທີ່ສຸດທີ່ເຈົ້າສາມາດໄດ້ຮັບ.

ຄວາມຈິງນິລັນດອນ

ພຣະວິນຍານນຳພາເຈົ້າໄປຫາພຣະບິດາເທິງສະຫວັນ ແລະ ພຣະເຢຊູຄຣິດ. ນີ້ແມ່ນບົດບາດທີ່ສຳຄັນຂອງພຣະວິນຍານບໍລິສຸດ. ພຣະອົງຍັງຈະດົນໃຈເຈົ້າໃຫ້ກັບໃຈ ແລະ ຕິດຕາມພຣະເຢຊູຄຣິດ ເພື່ອວ່າເຈົ້າຈະສາມາດໄດ້ຮັບພອນຂອງການຊົດໃຊ້ຂອງພຣະອົງ. ເມື່ອເຈົ້າກັບໃຈ, ພຣະວິນຍານຈະເຮັດໃຫ້ເຈົ້າບໍລິສຸດ ແລະ ຊ່ວຍເຫລືອເຈົ້າໃຫ້ປ່ຽນແປງ.

ພຣະວິນຍານບໍລິສຸດກ່າວກັບຈິດໃຈ ແລະ ຫົວໃຈຂອງເຈົ້າ. ຂ່າວສານຈາກພຣະວິນຍານສາມາດເຂົ້າມາສູ່ຈິດໃຈຂອງເຈົ້າໃນຫລາຍວິທີ—ຜ່ານທາງຄວາມຄິດທີ່ໄດ້ຮັບການດົນໃຈ, ການເຕືອນ, ການເຂົ້າໃຈທີ່ແຈ່ມແຈ້ງ, ແລະ ຄວາມຊົງຈຳທາງວິນຍານ. ພຣະວິນຍານບໍລິສຸດສາມາດກ່າວກັບຫົວໃຈຂອງເຈົ້າຜ່ານທາງຄວາມຮູ້ສຶກທີ່ເຊີດຊູໃຈເຊັ່ນ ປອບໂຍນ, ໝັ້ນໃຈ, ສັນຕິສຸກ, ຄວາມຮັກ, ຄວາມຊື່ນຊົມ, ຄວາມຖ່ອມຕົວ, ຄວາມກະຕັນຍູ, ແລະ ຄວາມອົດທົນ.

ຄຳເຊື້ອເຊີນ

“ຮັບພຣະວິນຍານບໍລິສຸດ.” ຄຳເວົ້າເຫລົ່ານີ້ໄດ້ກ່າວໄວ້ໃນຕອນທີ່ເຈົ້າໄດ້ຮັບການຢືນຢັນເປັນສະມາຊິກຂອງສາດສະໜາຈັກຂອງພຣະຄຣິດ. ເຈົ້າໄດ້ຮັບພຣະວິນຍານບໍລິສຸດແນວໃດ? ໂດຍການເຊື່ອຟັງຄຳສອນຂອງພຣະເຢຊູຄຣິດ. ພຣະອົງເປັນຄວາມເຂັ້ມແຂງຂອງເຈົ້າ. ການຕິດຕາມພຣະອົງແມ່ນເຊື້ອເຊີນພຣະວິນຍານບໍລິສຸດໃຫ້ມາສະຖິດຢູ່ໃນຊີວິດຂອງເຈົ້າ.

ສະແຫວງຫາພຣະບິດາເທິງສະຫວັນຂອງເຈົ້າໃນການອະທິຖານ. ທຸ້ມເທໃຈຂອງເຈົ້າແດ່ພຣະອົງ. ຈົ່ງຂອບພຣະໄທພຣະອົງສຳລັບພອນອັນປະເສີດທັງຫລາຍທີ່ພຣະອົງປະທານໃຫ້ແກ່ເຈົ້າ. ແບ່ງປັນຄວາມສຸກ, ຄວາມກັງວົນ, ແລະ ຄຳຖາມຕ່າງໆຂອງເຈົ້າກັບພຣະອົງ. ຈົ່ງສະຫງົບ ແລະ ຕັ້ງໃຈຟັງຄຳຕອບຈາກພຣະອົງ, ຊຶ່ງອາດຈະມາໃນຮູບແບບຂອງຄວາມຮູ້ສຶກສະຫງົບ, ຄວາມນຶກຄິດໃນຈິດໃຈຂອງເຈົ້າ, ຫລື ແຮງບັນດານໃຈໃຫ້ເຮັດບາງສິ່ງບາງຢ່າງ.

ຟັງສຸລະສຽງຂອງພຣະເຈົ້າຢູ່ໃນພຣະຄຳພີ. ພຣະຄຳພີແມ່ນພຣະຄຳຂອງພຣະເຈົ້າເຖິງເຈົ້າ! ຈົ່ງຮຽນຮູ້ຈາກມັນທຸກວັນເພື່ອຄົ້ນພົບສຸລະສຽງຂອງພຣະອົງ ແລະ ຮູ້ສຶກເຖິງຄວາມຮັກຂອງພຣະອົງ. ຂະນະທີ່ເຈົ້າອ່ານ, ຈົ່ງໄຕ່ຕອງສິ່ງທີ່ພຣະອົງອາດຈະກຳລັງສິດສອນເຈົ້າ, ແລະ ຂຽນຄວາມປະທັບໃຈທີ່ໄດ້ຮັບລົງໄວ້. ເຮັດໃຫ້ເປັນນິໄສປະຈຳວັນທີ່ຈະສຶກສາພຣະຄຳພີ—ໂດຍສະເພາະພຣະຄຳພີມໍມອນ—ຕະຫລອດຊີວິດຂອງເຈົ້າ.

ເຮັດຕາມຄວາມປະທັບໃຈທາງວິນຍານທີ່ເຈົ້າໄດ້ຮັບ. ຖ້າຫາກເຈົ້າມີຄວາມຄິດ ຫລື ຄວາມປະທັບໃຈທີ່ຈະເຮັດບາງສິ່ງບາງຢ່າງທີ່ດີ ທີ່ຈະເປັນພອນໃຫ້ກັບຄົນໃດຄົນໜຶ່ງ, ກໍຈົ່ງເຮັດມັນ! ທຸກສິ່ງທຸກຢ່າງທີ່ດີແມ່ນມາຈາກພຣະເຈົ້າ. ສະແດງໃຫ້ພຣະບິດາເທິງສະຫວັນຂອງເຈົ້າເຫັນວ່າ ພຣະອົງສາມາດໄວ້ວາງພຣະໄທເຈົ້າໄດ້ວ່າຈະເຮັດຕາມຄວາມປະທັບໃຈທີ່ມາຈາກພຣະອົງ.

ພອນທີ່ສັນຍາໄວ້

ພຣະວິນຍານບໍລິສຸດຈະປອບໂຍນ ແລະ ນຳພາເຈົ້າ. ພຣະອົງເປັນທີ່ຮູ້ຈັກວ່າພຣະຜູ້ປອບໂຍນ. ພຣະອົງຈະຊ່ວຍເຫລືອເຈົ້າໃນເວລາແຫ່ງການທົດລອງ. ພຣະອົງຈະຊ່ວຍເຈົ້າໃຫ້ຮູ້ສິ່ງທີ່ຈະເວົ້າ ຫລື ເຮັດ. ດ້ວຍອິດທິພົນຂອງພຣະອົງ, ເຈົ້າສາມາດບອກໄດ້ເຖິງຄວາມແຕກຕ່າງລະຫວ່າງສິ່ງທີ່ເປັນຄວາມຈິງ ແລະ ສິ່ງທີ່ບໍ່ຈິງ. ພຣະອົງສາມາດຊ່ວຍໃຫ້ເຈົ້າພົບຄວາມດີໃນຄົນອື່ນ ແລະ ໃນຕົວເຈົ້າເອງ. ພຣະວິນຍານຍັງສາມາດເຕືອນເຈົ້າກ່ຽວກັບອັນຕະລາຍນຳອີກ. ພຣະອົງຈະນຳພາເຈົ້າໄປຫາພຣະເຢຊູຄຣິດ ແລະ ໜີອອກຫ່າງຈາກບາບ.

ເຈົ້າສາມາດໄດ້ຮັບຂອງປະທານແຫ່ງວິນຍານ. ມີຂອງປະທານຫລາຍຢ່າງທີ່ພຣະເຈົ້າມອບໃຫ້ກັບລູກໆຂອງພຣະອົງຜ່ານທາງພຣະວິນຍານຂອງພຣະອົງ. ບາງຢ່າງທີ່ໄດ້ກ່າວໄວ້ໃນພຣະຄຳພີແມ່ນລວມທັງ ການເປີດເຜີຍ, ການເຊື່ອໃນພຣະເຢຊູຄຣິດ, ການສິດສອນ, ການຮູ້ຈັກແຍກແຍະ, ແລະ ປັນຍາ. ຈົ່ງອະທິຖານທູນຖາມພຣະບິດາເທິງສະຫວັນກ່ຽວກັບຂອງປະທານແຫ່ງວິນຍານທີ່ພຣະອົງໄດ້ປະທານໃຫ້ກັບເຈົ້າ, ເຈົ້າສາມາດພັດທະນາມັນວິທີໃດ, ແລະ ພຣະອົງຕ້ອງການໃຫ້ເຈົ້ານຳໃຊ້ມັນແນວໃດເພື່ອເປັນພອນໃຫ້ກັບຄົນອື່ນ.

ຄຳຖາມ ແລະ ຄຳຕອບ

ເປັນຫຍັງຄົນອື່ນຈຶ່ງມີປະສົບການທາງວິນຍານທີ່ຍິ່ງໃຫຍ່ກວ່າຂ້ອຍ? ບໍ່ແມ່ນປະສົບການທາງວິນຍານຈະເປັນທີ່ໜ້າຕື່ນເຕັ້ນ ຫລື ມະຫັດສະຈັນທັງໝົດ. ສ່ວນຫລາຍແລ້ວ, ພຣະເຈົ້າກ່າວກັບເຮົາຜ່ານທາງຄວາມຄິດສູ່ຈິດໃຈຂອງເຮົາ ຫລື ຄວາມຮູ້ສຶກທີ່ອ່ອນໂຍນສູ່ຫົວໃຈຂອງເຮົາ. ນີ້ແມ່ນການກະຊິບທີ່ງຽບສະຫງົບຂອງສຽງກະຊິບເບົາໆ, ດັງແວ່ວມາ. ເຈົ້າອາດຈະກຳລັງຮູ້ສຶກເຖິງພຣະວິນຍານ ແລະ ຍັງບໍ່ທັນຮັບຮູ້ໄດ້ເທື່ອ. ຈົ່ງອະທິຖານຕໍ່ໄປ. ຈົ່ງສຶກສາພຣະຄຳຂອງພຣະເຈົ້າຕໍ່ໄປ. ດ້ວຍເວລາ ແລະ ການຝຶກຊ້ອມ, ເຈົ້າຈະຮຽນຮູ້ທີ່ຈະຮູ້ຈັກພຣະວິນຍານໃນຫລາຍວິທີ.

ເບິ່ງ 1 ກະສັດ 19:11–12 (ພຣະເຈົ້າກ່າວດ້ວຍສຽງກະຊິບເບົາໆ, ດັງແວ່ວມາ); ໂຢຮັນ 15:26 (ພຣະວິນຍານຂອງພຣະເຈົ້າເປັນພະຍານເຖິງພຣະຄຣິດ); ໂມໂຣໄນ 10:3–5 (ຮູ້ຈັກຄວາມຈິງດ້ວຍພຣະວິນຍານ); ຄຳສອນ ແລະ ພັນທະສັນຍາ 11:12–13 (ພຣະວິນຍານພາໃຫ້ເຮັດຄວາມດີ); 45:57 (ຮັບເອົາພຣະວິນຍານເພື່ອການນຳພາ); 46:8–26 (ຂອງປະທານແຫ່ງວິນຍານ).

ຄຳຖາມກ່ຽວກັບໃບຮັບຮອງເຂົ້າພຣະວິຫານ

ເຈົ້າມີສັດທາໃນພຣະເຈົ້າ ແລະ ມີປະຈັກພະຍານເຖິງພຣະເຈົ້າ, ພຣະບິດາຜູ້ສະຖິດນິລັນດອນ; ພຣະບຸດຂອງພຣະອົງ, ພຣະເຢຊູຄຣິດ; ແລະ ໃນພຣະວິນຍານບໍລິສຸດບໍ?