ເຈົ້າສາມາດຊ່ວຍວຽກງານຂອງພຣະເຈົ້າ

ພຣະບິດາເທິງສະຫວັນຮັກລູກໆຂອງພຣະອົງທຸກຄົນ. ພຣະອົງຕ້ອງການຊ່ວຍເຫລືອເຂົາເຈົ້າໃຫ້ພົບຄວາມສຸກ ແລະ ຄວາມຊື່ນຊົມ, ກັບຄືນໄປຫາພຣະອົງ, ແລະ ໄດ້ຮັບຊີວິດນິລັນດອນ. ນີ້ເອີ້ນວ່າວຽກງານແຫ່ງຄວາມລອດ ແລະ ຄວາມສູງສົ່ງຂອງພຣະອົງ, ແລະ ພຣະອົງເຊື້ອເຊີນເຈົ້າໃຫ້ຊ່ວຍ!

ຄວາມຈິງນິລັນດອນ

ວຽກງານ ແລະ ລັດສະໝີພາບຂອງພຣະເຈົ້າຄືການທີ່ຈະເຮັດໃຫ້ເກີດຄວາມເປັນອະມະຕະ ແລະ ຊີວິດນິລັນດອນຂອງເຈົ້າ. ຄວາມເປັນອະມະຕະແມ່ນການມີຊີວິດຕະຫລອດໄປ ພ້ອມກັບຮ່າງກາຍທີ່ຟື້ນຄືນຊີວິດ. ຊີວິດນິລັນດອນ, ຫລື ຄວາມສູງສົ່ງ, ຄືການເປັນເໝືອນກັບພຣະເຈົ້າ ແລະ ດຳລົງຊິວິດຢູ່ກັບພຣະອົງຊົ່ວນິລັນດອນເປັນຄອບຄົວ. ທັງໝົດນີ້ເປັນໄປໄດ້ຍ້ອນພຣະເຢຊູຄຣິດ ແລະ ການຊົດໃຊ້ຂອງພຣະອົງ. ເຈົ້າສາມາດໄວ້ວາງໃຈພຣະອົງໄດ້.

ເຈົ້າສາມາດຊ່ວຍວຽກງານຂອງພຣະເຈົ້າໄດ້ໂດຍການມາຫາພຣະຄຣິດ ແລະ ຊ່ວຍເຫລືອຄົນອື່ນໃຫ້ເຮັດເຊັ່ນດຽວກັນ. ທຸກຄັ້ງທີ່ເຈົ້າເຮັດສິ່ງໃດສິ່ງໜຶ່ງໃນການຊ່ວຍຄົນໃດຄົນໜຶ່ງໃຫ້ເຮັດຕາມພຣະເຢຊູຄຣິດ, ເຈົ້າກຳລັງຊ່ວຍວຽກງານຂອງພຣະເຈົ້າ.

ຄຳເຊື້ອເຊີນ

ດຳລົງຊີວິດຕາມພຣະກິດຕິຄຸນ. ສ້າງສັດທາຂອງເຈົ້າໃນພຣະເຢຊູຄຣິດ. ກັບໃຈທຸກວັນ. ຮັບເອົາພິທີການຂອງຖານະປະໂລຫິດຂອງພຣະເຈົ້າ ແລະ ຮັກສາພັນທະສັນຍາຂອງເຈົ້າ. ຈົ່ງຍຶດຖືແບບຢ່າງນັ້ນໄປຕະຫລອດຊີວິດຂອງເຈົ້າ.

ດູແລຄົນຂັດສົນ. ຈົ່ງຊອກຫາວິທີທີ່ຈະຮັບໃຊ້ ແລະ ປະຕິບັດສາດສະໜາກິດກັບຄົນອື່ນ, ລວມທັງຄອບຄົວ, ໝູ່ເພື່ອນ, ແລະ ຊຸມຊົນຂອງເຈົ້າ. ວິທີທີ່ດີຢ່າງໜຶ່ງໃນການຊ່ວຍເຫລືອຜູ້ຄົນຂັດສົນ ແມ່ນການເຊື່ອຟັງກົດຂອງການຖືສິນອົດເຂົ້າ ແລະ ມອບການບໍລິຈາກຖືສິນອົດເຂົ້າ.

ເຊື້ອເຊີນທຸກຄົນໃຫ້ຮັບເອົາພຣະກິດຕິຄຸນ. ຈົ່ງເຮັດໃຫ້ຄຳເວົ້າ ແລະ ການກະທຳຂອງເຈົ້າສະທ້ອນໃຫ້ເຫັນສັດທາຂອງເຈົ້າໃນພຣະເຢຊູຄຣິດ. ຈົ່ງມີໃຈພ້ອມທີ່ຈະບອກກັບໃຜກໍຕາມທີ່ຖາມເຈົ້າກ່ຽວກັບຄວາມຫວັງ ແລະ ຄວາມສຸກທີ່ເຈົ້າຮູ້ສຶກໄດ້ໃນຖານະທີ່ເປັນສານຸສິດຂອງພຣະອົງ. ສຳລັບຊາຍໜຸ່ມ, ການຮັບໃຊ້ເຜີຍແຜ່ເຕັມເວລາຄືໜ້າທີ່ຮັບຜິດຊອບຂອງຖານະປະໂລຫິດ. ສຳລັບຍິງໜຸ່ມ, ມັນຄືໂອກາດທີ່ມີພະລັງ; ຈົ່ງອະທິຖານເພື່ອຈະຮູ້ວ່າ ພຣະຜູ້ເປັນເຈົ້າຈະໃຫ້ເຈົ້າຮັບໃຊ້ຫຍັງ. ກຽມພ້ອມທີ່ຈະແບ່ງປັນພຣະກິດຕິຄຸນຕະຫລອດຊີວິດຂອງເຈົ້າ.

ຮວບຮວມຄອບຄົວເຂົ້າກັນຊົ່ວນິລັນດອນ ໂດຍການເຮັດວຽກງານປະຫວັດຄອບຄົວ ແລະ ວຽກງານພຣະວິຫານ. ຮຽນຮູ້ກ່ຽວກັບບັນພະບຸລຸດຂອງເຈົ້າ. ຊອກຫາຂໍ້ມູນວ່າແມ່ນໃຜທີ່ຕ້ອງການພິທີການພຣະວິຫານ. ໃຫ້ໄປພຣະວິຫານເລື້ອຍໆເທົ່າທີ່ເຈົ້າສາມາດເຮັດໄດ້ເພື່ອຮັບບັບຕິສະມາ ແລະ ຮັບການຢືນຢັນແທນພວກເພິ່ນ. ຖ້າຫາກເຈົ້າຕ້ອງການຄວາມຊ່ວຍເຫລືອ, ໄປທີ່ FamilySearch.org.

ພຣະເຢຊູຄຣິດກຳລັງປະຕິບັດສາດສະໜາກິດໃນທະວີບອາເມຣິກາ

ພອນທີ່ສັນຍາໄວ້

ເຈົ້າຈະໄດ້ຮັບການຊ່ວຍເຫລືອຈາກພຣະເຈົ້າ. ພຣະບິດາເທິງສະຫວັນບໍ່ໄດ້ຄາດຫວັງວ່າເຈົ້າຈະເຮັດວຽກງານນີ້ດ້ວຍຕົວຄົນດຽວ. ພຣະອົງສະຖິດຢູ່ກັບເຈົ້າ. ເມື່ອເຈົ້າຖວາຍເວລາ ແລະ ໃຈຂອງເຈົ້າຢ່າງຖ່ອມໃຈ, ພຣະອົງຈະເຮັດສິ່ງອັດສະຈັນຜ່ານຕົວເຈົ້າ. ພຣະເຢຊູຄຣິດຄືຄວາມເຂັ້ມແຂງຂອງເຈົ້າ!

ເຈົ້າຈະເຕັມໄປດ້ວຍຄວາມສຸກ. ວຽກງານຂອງພຣະເຈົ້າເປັນວຽກງານທີ່ມີຄວາມສຸກ! ເມື່ອເຈົ້າມີສ່ວນຮ່ວມໃນວຽກງານ, ເຈົ້າຈະສາມາດຮູ້ສຶກເຖິງຄວາມສຸກທີ່ພຣະອົງຮູ້ສຶກ. ໃຫ້ຈິນຕະນາການເຖິງຄວາມສຸກທີ່ເຈົ້າຈະມີຮ່ວມກັນກັບພຣະບິດາເທິງສະຫວັນ ແລະ ລູກໆຂອງພຣະອົງຜູ້ທີ່ເຈົ້າຊ່ວຍນຳມາສູ່ພຣະອົງ!

ຄຳຖາມ ແລະ ຄຳຕອບ

ພຣະເຈົ້າສາມາດໃຊ້ຂ້ອຍໃນວຽກງານຂອງພຣະອົງໄດ້ແທ້ຫລືບໍ່? ໄດ້! ມີຫລາຍວິທີທາງໃນການຊ່ວຍວຽກງານນີ້. ມັນອາດຈະເບິ່ງຄືວ່າຄົນອື່ນມີພອນສະຫວັນ ຫລື ທັກສະຫລາຍກວ່າ, ແຕ່ວ່າພຣະບິດາເທິງສະຫວັນຂອງເຈົ້າເຫັນສັກກະຍະພາບຂອງເຈົ້າ. ພຣະອົງໄດ້ມອບຂອງປະທານໃຫ້ແກ່ເຈົ້າ ທີ່ເຈົ້າຈະສາມາດນຳໃຊ້ໃນການຮັບໃຊ້ ແລະ ເຕົ້າໂຮມລູກໆຂອງພຣະອົງ. ບໍ່ເປັນຫຍັງເລີຍທີ່ ຂອງປະທານເຫລົ່ານີ້ຈະແຕກຕ່າງຈາກທີ່ຄົນອື່ນໆມີ. ໃນຄວາມເປັນຈິງ, ນັ້ນຄືເຫດຜົນທີ່ເຮັດໃຫ້ຂອງປະທານຂອງເຈົ້າມີຄຸນຄ່າຫລາຍ. ເຈົ້າເປັນທີ່ຕ້ອງການ!

ເບິ່ງ ມັດທາຍ 10:39 (ຖ້າເຈົ້າເສຍຊີວິດຂອງເຈົ້າໃນການຮັບໃຊ້ພຣະຜູ້ຊ່ວຍໃຫ້ລອດ, ເຈົ້າກໍຈະໄດ້ຊີວິດ); 1 ໂກຣິນໂທ 12:14–27 (ສະມາຊິກທຸກຄົນມີຄວາມຈຳເປັນຕໍ່ພຣະກາຍຂອງພຣະຄຣິດ); ຟີລິບປອຍ 1:6 (ຈົ່ງໝັ້ນໃຈວ່າພຣະເຈົ້າກຳລັງເຮັດວຽກໃນເຈົ້າ); ຢາໂຄບ 5:72 (ເຈົ້ານາຍຂອງສວນອະງຸ່ນໄດ້ອອກແຮງງານຮ່ວມກັບເຈົ້າ); ຄຳສອນ ແລະ ພັນທະສັນຍາ 18:15–16 (ເຈົ້າຈະມີຄວາມຊື່ນຊົມຫລາຍພຽງໃດກັບຜູ້ທີ່ເຈົ້າໄດ້ນຳມາຫາພຣະຄຣິດ); 64:33–34 (ວຽກງານອັນຍິ່ງໃຫຍ່ແມ່ນມາຈາກສິ່ງເລັກນ້ອຍ ແລະ ລຽບງ່າຍ); ໂມເຊ 1:6 (“ເຮົາມີວຽກງານຢ່າງໜຶ່ງສຳລັບເຈົ້າ”); 6:31–34 (ພຣະເຈົ້າເຮັດໃຫ້ຜູ້ທີ່ພຣະອົງເອີ້ນມີຄຸນສົມບັດ, ເຖິງແມ່ນວ່າເຂົາເຈົ້າຈະຮູ້ສຶກວ່າຕົວເອງບໍ່ເໝາະສົມກໍຕາມ).

ຄຳຖາມກ່ຽວກັບໃບຮັບຮອງເຂົ້າພຣະວິຫານ

ເຈົ້າມີປະຈັກພະຍານເຖິງການຟື້ນຟູພຣະກິດຕິຄຸນຂອງພຣະເຢຊູຄຣິດບໍ?