Feast Upon the Word [ຊື່ນຊົມດ້ວຍພຣະຄຳ], ໂດຍ ລີສ໌ ລີມັນ ສະວິນໂດ ໄດ້ຮັບອະນຸຍາດຈາກ Havenlight

ຄວາມຈິງຈະເຮັດໃຫ້ເຈົ້າເປັນອິດສະລະ

ໂຢຮັນ 8:32

ພຣະບິດາເທິງສະຫວັນຂອງເຈົ້າຄືພຣະເຈົ້າແຫ່ງຄວາມຈິງ. ພຣະອົງຮູ້ຈັກທຸກສິ່ງ. ຄວາມຈິງທັງໝົດມາຈາກພຣະອົງ ແລະ ນຳໄປສູ່ພຣະອົງ. ເຈົ້າສະແດງໃຫ້ເຫັນວ່າ ເຈົ້າເຫັນຄຸນຄ່າຂອງຄວາມຈິງຂະນະທີ່ເຈົ້າສະແຫວງຫາການຮຽນຮູ້, ດຳລົງຊີວິດດ້ວຍຄວາມຊື່ສັດ, ແລະ ຢືນຢັດຢ່າງກ້າຫານເພື່ອສິ່ງທີ່ເຈົ້າຮູ້ຈັກວ່າຖືກຕ້ອງ—ເຖິງແມ່ນວ່າ ເຈົ້າຈະຢືນຢູ່ຄົນດຽວກໍຕາມ.

ຄວາມຈິງນິລັນດອນ

ພຣະບິດາເທິງສະຫວັນຕ້ອງການໃຫ້ທິດາ ແລະ ບຸດຂອງພຣະອົງຮຽນຮູ້ຕະຫລອດເວລາ. ເຈົ້າມີເຫດຜົນທັງສອງດ້ານຄືທາງໂລກ ແລະ ທາງວິນຍານໃນການສະແຫວງຫາ ແລະ ຮັກການຮຽນຮູ້. ການສຶກສາບໍ່ໄດ້ເປັນພຽງແຕ່ການຫາເງິນເທົ່ານັ້ນ. ມັນເປັນສ່ວນໜຶ່ງຂອງເປົ້າໝາຍນິລັນດອນຂອງເຈົ້າເພື່ອໃຫ້ກາຍເປັນເໝືອນພຣະບິດາເທິງສະຫວັນຫລາຍຂຶ້ນ.

ການດຳລົງຊີວິດດ້ວຍຄວາມຊື່ສັດໝາຍຄວາມວ່າ ເຈົ້າຮັກສິ່ງທີ່ຖືກຕ້ອງໃນສາຍພຣະເນດຂອງພຣະເຈົ້າ—ຫລາຍກວ່າທີ່ເຈົ້າຮັກຄວາມສະບາຍ, ຄ່ານິຍົມ, ຫລື ຄວາມສະດວກສ່ວນຕົວ. ມັນໝາຍຄວາມວ່າ ການເຮັດສິ່ງທີ່ຖືກຕ້ອງພຽງເພາະມັນເປັນສິ່ງທີ່ຖືກຕ້ອງ.

ເຈົ້າມີບາງສິ່ງທີ່ລ້ຳຄ່າທີ່ຈະແບ່ງປັນ. ພຣະກິດຕິຄຸນຂອງພຣະເຢຊູຄຣິດມີຄຳຕອບສຳລັບຄຳຖາມຂອງຊີວິດ. ມັນເປັນທາງທີ່ພາໄປສູ່ສັນຕິສຸກ ແລະ ຄວາມສຸກ. ເຈົ້າອາດຈະບໍ່ຮູ້ທຸກສິ່ງທຸກຢ່າງ, ແຕ່ວ່າເຈົ້າຮູ້ຈັກພຽງພໍທີ່ຈະຮັກເພື່ອນບ້ານຂອງເຈົ້າ, ແບ່ງປັນຫລັກທຳແຫ່ງຄວາມຈິງກັບເຂົາເຈົ້າ, ແລະ ເຊື້ອເຊີນເຂົາເຈົ້າໃຫ້ຮຽນຮູ້ເພີ່ມເຕີມ.

ຄຳເຊື້ອເຊີນ

ຮຽນຮູ້ຢູ່ສະເໝີ. ຈົ່ງຊອກຫາໂອກາດເພື່ອຂະຫຍາຍຄວາມຄິດ ແລະ ທັກສະຂອງເຈົ້າ. ໂອກາດເຫລົ່ານີ້ອາດລວມທັງການສຶກສາຢ່າງເປັນທາງການຢູ່ທີ່ໂຮງຮຽນ ຫລື ການຝຶກອົບຮົມວິຊາຊີບ, ເຊັ່ນດຽວກັນກັບການຮຽນຮູ້ຢ່າງບໍ່ເປັນທາງການຈາກແຫລ່ງທີ່ທ່ານເຊື່ອໃຈໄດ້. ໃຫ້ພຣະຜູ້ເປັນເຈົ້າມີສ່ວນຮ່ວມໃນຄວາມພະຍາຍາມຂອງເຈົ້າ, ແລ້ວພຣະອົງຈະນຳທາງເຈົ້າ.

ຮຽນຮູ້ກ່ຽວກັບຄວາມຈິງທາງວິນຍານ. ຂະນະທີ່ເຈົ້າຮຽນຮູ້ກ່ຽວກັບໂລກຢູ່ອ້ອມຕົວເຈົ້າ, ໃຫ້ຮຽນຮູ້ກ່ຽວກັບພຣະຜູ້ຊ່ວຍໃຫ້ລອດ, ຜູ້ທີ່ໄດ້ສ້າງໂລກນຳອີກ. ສຶກສາກ່ຽວກັບພຣະຊົນຊີບ ແລະ ຄຳສອນຂອງພຣະອົງ. ເຮັດໃຫ້ຫ້ອງຮຽນສາດສະໜາ, ສະຖາບັນ, ແລະ ການສຶກສາພຣະກິດຕິຄຸນສ່ວນຕົວເປັນສ່ວນໜຶ່ງຂອງການຮຽນຮູ້ຕະຫລອດຊີວິດຂອງເຈົ້າ. ມັນສາມາດກຽມເຈົ້າໃຫ້ພ້ອມເພື່ອຮັບໃຊ້ເຜີຍແຜ່ ແລະແບ່ງປັນພຣະກິດຕິຄຸນຕະຫລອດຊີວິດຂອງເຈົ້າ.

ດຳລົງຊີວິດດ້ວຍຄວາມຊື່ສັດ. ຈົ່ງຢ່າລັກ, ຕົວະ, ໂກງ, ຫລື ຫລອກລວງ ໃນທຸກຮູບແບບ—ທັງຢູ່ທີ່ໂຮງຮຽນ, ຢູ່ບ່ອນເຮັດວຽກ, ທາງອອນລາຍ, ທຸກໆບ່ອນ. ຈົ່ງເປັນຜູ້ຕິດຕາມທີ່ຊື່ສັດຄົນດຽວກັນນັ້ນຂອງພຣະເຢຊູຄຣິດ ທັງໃນທີ່ສາທາລະນະ ແລະ ໃນທີ່ສ່ວນຕົວ.

ຜູ້ຄົນກຳລັງຄຸເຂົ່າຢູ່ຕໍ່ໜ້າພຣະເຢຊູຄຣິດທີ່ຟື້ນຄືນພຣະຊົນ

ພອນທີ່ສັນຍາໄວ້

ການສຶກສາເພີ່ມຄວາມສາມາດຂອງເຈົ້າໃນການຮັບໃຊ້ພຣະຜູ້ເປັນເຈົ້າ, ລວມທັງການເປັນຜູ້ສອນສາດສະໜາ. ການສຶກສາຈະໃຫ້ພະລັງແກ່ເຈົ້າເພື່ອເປັນພອນໃຫ້ກັບຄົນອື່ນ, ໂດຍສະເພາະຄອບຄົວຂອງເຈົ້າ. ຍິ່ງເຈົ້າຮຽນຮູ້ຫລາຍເທົ່າໃດ, ເຈົ້າກໍຈະຍິ່ງສາມາດຊ່ວຍສ້າງສາອານາຈັກຂອງພຣະເຈົ້າ ແລະ ມີອິດທິພົນຕໍ່ໂລກໃນທາງທີ່ດີໄດ້ຫລາຍຂຶ້ນ.

ຄວາມຊື່ສັດນຳຄວາມສະຫງົບສຸກ ແລະ ການເຄົາລົບຕົນເອງມາໃຫ້. ເມື່ອຄຳເວົ້າ ແລະ ການກະທຳຂອງເຈົ້າສອດຄ່ອງກັບຄວາມຈິງ, ເຈົ້າສະແດງໃຫ້ເຫັນວ່າ ເຈົ້າສາມາດເປັນທີ່ໄວ້ວາງໃຈຂອງຄົນອື່ນ ແລະ ຂອງພຣະຜູ້ເປັນເຈົ້າໄດ້.

ເມື່ອເຈົ້າຢືນຢັດໃນຄຳສອນຂອງພຣະເຢຊູຄຣິດ, ພຣະອົງກໍຈະຢືນຢູ່ກັບເຈົ້າ. ພຣະເຢຊູຄຣິດຄືຄວາມເຂັ້ມແຂງຂອງເຈົ້າ! ຄົນອື່ນອາດຈະບໍ່ເຫັນດີກັບຄວາມເຊື່ອຂອງເຈົ້າ, ແຕ່ຄວາມກ້າຫານ ແລະ ຄວາມຈິງໃຈຂອງເຈົ້າຈະຖືກສັງເກດເຫັນໄດ້. ບໍ່ວ່າຄົນອື່ນຈະເຮັດຕາມຕົວຢ່າງຂອງເຈົ້າຫລືບໍ່, ແຕ່ປະຈັກພະຍານ, ຄວາມໝັ້ນໃຈ, ແລະ ສັດທາຂອງເຈົ້າໃນພຣະຄຣິດຈະເຕີບໂຕຂຶ້ນ.

ຄຳຖາມ ແລະ ຄຳຕອບ

ການມີຄຳຖາມກ່ຽວກັບສາດສະໜາຈັກເປັນເລື່ອງທີ່ຜິດບໍ? ຂ້ອຍຈະສາມາດພົບຄຳຕອບໄດ້ແນວໃດ? ການມີຄຳຖາມນັ້ນບໍ່ແມ່ນສັນຍານເຖິງຄວາມອ່ອນແອ ຫລື ການຂາດສັດທາ. ແທ້ຈິງແລ້ວ, ການຖາມຄຳຖາມສາມາດຊ່ວຍສ້າງສັດທາ. ການຟື້ນຟູພຣະກິດຕິຄຸນໄດ້ເລີ່ມຕົ້ນເມື່ອໂຈເຊັບ ສະມິດ ອາຍຸ 14 ປີ ໄດ້ຖາມຄຳຖາມດ້ວຍສັດທາ. ໃຫ້ສະແຫວງຫາຄຳຕອບໃນພຣະຄຳພີ, ໃນຖ້ອຍຄຳຂອງສາດສະດາຂອງພຣະເຈົ້າ, ຈາກຜູ້ນຳ ແລະ ສະມາຊິກໃນຄອບຄົວທີ່ຊື່ສັດຂອງເຈົ້າ, ແລະ ຈາກພຣະເຈົ້າພຣະອົງເອງ. ຖ້າຫາກບໍ່ໄດ້ຮັບຄຳຕອບທັນທີ, ໃຫ້ໄວ້ວາງໃຈວ່າ ເຈົ້າຈະຮຽນຮູ້ເປັນບັນທັດເປັນຂໍ້ເລັກໆນ້ອຍໆ. ຈົ່ງດຳລົງຊີວິດຕາມສິ່ງທີ່ເຈົ້າຮູ້ແລ້ວ, ແລະ ຈົ່ງສືບຕໍ່ສະແຫວງຫາຄວາມຈິງ.

ຂ້ອຍຈະຢືນຢັດໃນສິ່ງທີ່ຖືກຕ້ອງໄດ້ແນວໃດໂດຍບໍ່ເຮັດຜິດໃຈຜູ້ທີ່ມີຄວາມເຊື່ອທີ່ແຕກຕ່າງ? ຈົ່ງເລີ່ມຕົ້ນດ້ວຍການຮັບປະກັນວ່າຄຳເວົ້າ ແລະ ການກະທຳຂອງເຈົ້ານັ້ນແມ່ນໄດ້ຮັບການດົນໃຈຈາກຄວາມຮັກທີ່ມີຕໍ່ພຣະເຈົ້າ ແລະ ລູກໆຂອງພຣະອົງ. ການແບ່ງປັນພຣະກິດຕິຄຸນບໍ່ຄວນເຮັດດ້ວຍຈິດໃຈທີ່ຂັດແຍ້ງກັນ ແຕ່ຄວນເຮັດດ້ວຍຄວາມຊັດເຈນ, ຄວາມອ່ອນໂຍນ, ແລະ ຄວາມເມດຕາ. ເຈົ້າສາມາດມີຄວາມຮັກຕໍ່ຄົນອື່ນໄດ້ ເຖິງແມ່ນວ່າ ເຈົ້າຈະບໍ່ເຫັນດີກັບຄວາມຄິດເຫັນຂອງເຂົາເຈົ້າກໍຕາມ. ຈົ່ງເປັນຕົວຢ່າງທີ່ດີຂອງຜູ້ຕິດຕາມຂອງພຣະເຢຊູຄຣິດ ດ້ວຍວິທີທີ່ເຈົ້າດຳລົງຊີວິດ.

ເບິ່ງ ມັດທາຍ 5:14–16 (ຈົ່ງໃຫ້ແສງສະຫວ່າງທີ່ຢູ່ໃນເຈົ້ານັ້ນສ່ອງແຈ້ງ); ໂຢຮັນ 14:6 (ພຣະເຢຊູຄືຄວາມຈິງ); 1 ເປໂຕ 3:15 (ຈົ່ງກຽມພ້ອມສະເໝີທີ່ຈະແບ່ງປັນຄວາມຫວັງຂອງເຈົ້າໃນພຣະຄຣິດ); ຄຳສອນ ແລະ ພັນທະສັນຍາ 88:77–80 (ສິ່ງຕ່າງໆທີ່ພຣະຜູ້ເປັນເຈົ້າຕ້ອງການໃຫ້ເຮົາຮຽນຮູ້); 88:118 (ສະແຫວງຫາຖ້ອຍຄຳແຫ່ງປັນຍາຢູ່ໃນປຶ້ມທີ່ດີທີ່ສຸດ); 93:36 (ລັດສະໝີພາບຂອງພຣະເຈົ້າເປັນຄວາມຮູ້ແຈ້ງ); 124:15 (ຄວາມຊື່ສັດໝາຍເຖິງການຮັກໃນສິ່ງທີ່ຖືກຕ້ອງ); 130:18 (ຄວາມຮູ້ແຈ້ງຈະລຸກຂຶ້ນກັບເຮົາໃນການຟື້ນຄືນຊີວິດ).

ຄຳຖາມກ່ຽວກັບໃບຮັບຮອງເຂົ້າພຣະວິຫານ

ເຈົ້າພະຍາຍາມຊື່ສັດໃນທຸກສິ່ງທີ່ເຈົ້າເຮັດບໍ?
ເຈົ້າສະໜັບສະໜູນ ຫລື ສົ່ງເສີມການສິດສອນ, ການປະຕິບັດ, ຫລື ຄຳສອນຂອງຜູ້ທີ່ຕໍ່ຕ້ານສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍບໍ?