ເລືອກຕາມການດົນໃຈ

ໃນ ສຳລັບຄວາມເຂັ້ມແຂງຂອງຊາວໜຸ່ມ, ເຈົ້າຈະພົບຄຳສອນຂອງພຣະເຢຊູຄຣິດ ແລະ ຄຳສອນຂອງສາດສະດາຂອງພຣະອົງ. ດ້ວຍຄວາມຈິງເຫລົ່ານີ້ເປັນແນວທາງຂອງເຈົ້າ, ເຈົ້າສາມາດເລືອກຕາມການດົນໃຈ ຊຶ່ງຈະເປັນພອນໃຫ້ແກ່ເຈົ້າໃນຕອນນີ້ ແລະ ຕະຫລອດຊົ່ວນິລັນດອນ.

ເຈົ້າເປັນລູກທາງວິນຍານທີ່ຮັກຂອງພຣະເຈົ້າ. ແຜນແຫ່ງຄວາມສຸກອັນຍິ່ງໃຫຍ່ຂອງພຣະອົງຈະເຮັດໃຫ້ເປັນໄປໄດ້ສຳລັບເຈົ້າທີ່ຈະເຕີບໂຕທາງວິນຍານ ແລະ ພັດທະນາສັກກະຍະພາບອັນສູງສົ່ງຂອງເຈົ້າ. ພຣະອົງໄດ້ສົ່ງພຣະເຢຊູຄຣິດມາເປັນພຣະຜູ້ຊ່ວຍໃຫ້ລອດຂອງເຈົ້າ.

ພຣະບິດາຜູ້ສະຖິດຢູ່ໃນສະຫວັນຂອງເຈົ້າໄວ້ວາງພຣະໄທເຈົ້າ. ພຣະອົງໄດ້ປະທານພອນອັນຍິ່ງໃຫຍ່ໃຫ້ແກ່ເຈົ້າ, ລວມທັງຄວາມສົມບູນແຫ່ງພຣະກິດຕິຄຸນ ແລະ ພິທີການ ແລະ ພັນທະສັນຍາອັນສັກສິດ ທີ່ຜູກມັດເຈົ້າໄວ້ກັບພຣະອົງ ແລະ ນຳອຳນາດຂອງພຣະອົງມາສູ່ຊີວິດຂອງເຈົ້າ. ພັນທະສັນຍາເຫລົ່ານີ້ມາພ້ອມກັບຄວາມຊື່ນຊົມ ແລະ ຄວາມຮັບຜິດຊອບເພີ່ມຂຶ້ນ. ພຣະອົງຮູ້ວ່າ ເຈົ້າສາມາດສ້າງຄວາມແຕກຕ່າງຢູ່ໃນໂລກນີ້ໄດ້, ແລະ ໃນຫລາຍໆກໍລະນີ, ນັ້ນຮຽກຮ້ອງໃຫ້ເຈົ້າແຕກຕ່າງຈາກໂລກ. ຈົ່ງສະແຫວງຫາການນຳພາຈາກພຣະບິດາເທິງສະຫວັນ ຂະນະທີ່ເຈົ້າເຮັດການເລືອກ. ພຣະອົງຈະປະທານພອນໃຫ້ເຈົ້າດ້ວຍການດົນໃຈຜ່ານທາງພຣະວິນຍານບໍລິສຸດ.

ພຣະເຢຊູຄຣິດຄືຫົນທາງໄປສູ່ຄວາມຊື່ນຊົມນິລັນດອນ. ເມື່ອເຈົ້າໃຊ້ອິດສະລະພາບໃນການເລືອກທີ່ຈະເຮັດຕາມພຣະເຢຊູຄຣິດ, ເຈົ້າຢູ່ໃນເສັ້ນທາງທີ່ຈະນຳພາໄປສູ່ຄວາມສຸກນິລັນດອນ. ຈົ່ງເຮັດໃຫ້ພຣະເຢຊູຄຣິດເປັນມາດຕະຖານຂອງເຈົ້າ, ເປັນຮາກຖານທີ່ໝັ້ນຄົງຂອງເຈົ້າ. ສ້າງຊີວີດຂອງເຈົ້າຢູ່ເທິງຄຳສອນຂອງພຣະອົງ, ແລະ ວັດແທກການເລືອກຂອງເຈົ້າຈາກຄຳສອນນັ້ນ. ພັນທະສັນຍາທີ່ເຈົ້າເຮັດເມື່ອຮັບບັບຕິສະມາ, ໃນລະຫວ່າງສິນລະລຶກ, ແລະ ໃນພຣະວິຫານເປັນອົງປະກອບສ່ວນສຳຄັນຂອງພື້ນຖານທີ່ໝັ້ນຄົງແໜ້ນໜາຂອງເຈົ້າໃນພຣະຄຣິດ. ເຈົ້າຈະຍັງຄົງປະເຊີນໜ້າກັບບັນຫາ ແລະ ການລໍ້ລວງຕ່າງໆ, ແຕ່ວ່າພຣະບິດາເທິງສະຫວັນ ແລະ ພຣະຜູ້ຊ່ວຍໃຫ້ລອດຈະຊ່ວຍເຈົ້າຜ່ານຜ່າສິ່ງເຫລົ່ານັ້ນທັງໝົດ.

ຈຸດປະສົງຂອງ ສຳລັບຄວາມເຂັ້ມແຂງຂອງຊາວໜຸ່ມ ບໍ່ແມ່ນເພື່ອໃຫ້ໄດ້ຄຳຕອບ “ແມ່ນ” ຫລື “ບໍ່ແມ່ນ” ກ່ຽວກັບທຸກທາງເລືອກທີ່ເປັນໄປໄດ້ທີ່ເຈົ້າອາດຈະພົບພໍ້. ກົງກັນຂ້າມ, ພຣະຜູ້ເປັນເຈົ້າກຳລັງເຊື້ອເຊີນໃຫ້ເຈົ້າດຳລົງຊີວິດໃນທາງທີ່ສູງສົ່ງ ແລະ ສັກສິດກວ່າ—ຊີວິດທີ່ສຸມໃຈໃສ່ໃນຄວາມຈິງນິລັນດອນ ແລະ ພອນທີ່ສັນຍາໄວ້ຂອງພຣະຜູ້ເປັນເຈົ້າ. ນີ້ຄືວິທີຂອງພຣະອົງ. ຄູ່ມືນີ້ຈະສິດສອນເຈົ້າກ່ຽວກັບວິທີຂອງພຣະອົງ. ມັນອະທິບາຍຄວາມຈິງທີ່ພຣະອົງໄດ້ເປີດເຜີຍ. ຈົ່ງເຮັດໃຫ້ຄວາມຈິງເຫລົ່ານີ້ເປັນຄູ່ມືໃນການເລືອກຂອງເຈົ້າ—ການເລືອກຄັ້ງໃຫຍ່, ເຊັ່ນການເຮັດພັນທະສັນຍາໃນພຣະວິຫານ ແລະ ການຮັບໃຊ້ເຜີຍແຜ່, ຕະຫລອດເຖິງການເລືອກໃນແຕ່ລະມື້, ເຊັ່ນວິທີປະຕິບັດກັບຜູ້ຄົນ ຫລື ວິທີໃນການໃຊ້ເວລາຂອງເຈົ້າແນວໃດ.

ເຖິງແມ່ນຜູ້ອື່ນຈະສາມາດຊ່ວຍເຈົ້າໄດ້, ແຕ່ການເຕີບໂຕທາງວິນຍານຂອງເຈົ້າເປັນເລື່ອງສ່ວນຕົວ. ມັນເປັນຄວາມຮັບຜິດຊອບຂອງເຈົ້າ. ຈົ່ງເຮັດໃຫ້ດີທີ່ສຸດເພື່ອປັບປຸງໃນແຕ່ລະມື້, ຮັກສາພຣະບັນຍັດຂອງພຣະເຈົ້າ ແລະ ໃຫ້ກຽດຕໍ່ພັນທະສັນຍາຂອງເຈົ້າ, ແລະ ຊ່ວຍເຫລືອຄົນອື່ນໃຫ້ເຂົ້າໃກ້ພຣະຜູ້ຊ່ວຍໃຫ້ລອດຫລາຍຂຶ້ນ.

ເບິ່ງ ໂມໄຊຢາ 4:29–30 (ວິທີທາງໃນການເຮັດບາບມີນັບບໍ່ຖ້ວນ, ສະນັ້ນເຮົາຕ້ອງລະວັງຕົວເອງ); ຮີລາມັນ 5:12 (ສ້າງຮາກຖານຂອງເຈົ້າໄວ້ໃນພຣະຄຣິດ); ຄຳສອນ ແລະ ພັນທະສັນຍາ 45:57 (ໃຫ້ພຣະວິນຍານສັກສິດເປັນຜູ້ນຳທາງເຈົ້າ); 25:13 (ຍຶດໝັ້ນໃນພັນທະສັນຍາຂອງເຈົ້າ).

ວິທີຈັດລະບຽບຄູ່ມືນີ້

ແຕ່ລະຫົວຂໍ້ມີສາມພາກສ່ວນດັ່ງນີ້:

ຄວາມຈິງນິລັນດອນ, ຫລື ຄຳສອນຂອງພຣະກິດຕິຄຸນທີ່ຖືກຟື້ນຟູຂອງພຣະເຢຊູຄຣິດ
ການເຊື້ອເຊີນ ໃຫ້ປະຕິບັດຕາມຄວາມຈິງເຫລົ່ານັ້ນ
ພອນທີ່ສັນຍາໄວ້ ທີ່ພຣະຜູ້ເປັນເຈົ້າໄດ້ມອບໃຫ້ແກ່ຜູ້ທີ່ດຳລົງຊີວິດຕາມຄຳສອນຂອງພຣະອົງ