I Shall Not Want [ຂ້ານ້ອຍມີທຸກສິ່ງທີ່ຕ້ອງການ], ໂດຍ ຢົງຊັງ ຄິມ ໄດ້ຮັບອະນຸຍາດຈາກ Havenlight
5.
ເດີນໄປໃນຄວາມສະຫວ່າງຂອງພຣະເຈົ້າ
ຄາລາເຕຍ 5:25
ເຈົ້າເຮັດການເລືອກໄດ້ດີຂຶ້ນເມື່ອເຈົ້າສາມາດເບິ່ງເຫັນສິ່ງຕ່າງໆໄດ້ຢ່າງຊັດເຈນ. ນັ້ນຄືສາເຫດທີ່ແສງສະຫວ່າງມີຄວາມສຳຄັນຫລາຍ; ແສງສະຫວ່າງເຮັດໃຫ້ເຮົາເຫັນເສັ້ນທາງທີ່ຖືກຕ້ອງໄດ້ງ່າຍຂຶ້ນ. ພຣະບິດາເທິງສະຫວັນໄດ້ປະທານໂອກາດໃຫ້ເຈົ້າເຂົ້າເຖິງແຫລ່ງຂອງແສງສະຫວ່າງແຫ່ງສະຫວັນ—ຂອງປະທານແຫ່ງພຣະວິນຍານບໍລິສຸດ—ເພື່ອຊ່ວຍໃຫ້ເຈົ້າເຫັນຢ່າງຈະແຈ້ງວ່າສິ່ງໃດດີ ແລະ ສິ່ງໃດບໍ່ດີ, ສິ່ງໃດຖືກ ແລະ ສິ່ງໃດຜິດ.
ຄວາມຈິງນິລັນດອນ
ເຈົ້າສາມາດມີພຣະວິນຍານບໍລິສຸດ ສະຖິດຢູ່ເປັນເພື່ອນຕະຫລອດເວລາ. ເມື່ອເຈົ້າໄດ້ຮັບການຢືນຢັນໃຫ້ເປັນສະມາຊິກຂອງສາດສະໜາຈັກ, ເຈົ້າໄດ້ຮັບການເຊື້ອເຊີນໃຫ້ “ຮັບພຣະວິນຍານບໍລິສຸດ.” ໂອກາດທີ່ຈະມີພຣະວິນຍານເປັນເພື່ອນຕະຫລອດເວລາແມ່ນໜຶ່ງໃນຂອງປະທານທີ່ຍິ່ງໃຫຍ່ທີ່ສຸດທີ່ມອບໃຫ້ກັບເຈົ້າ.
ການເລືອກສິ່ງທີ່ດີຈະຊ່ວຍເພີ່ມຄວາມສາມາດຂອງເຈົ້າໃນການຮູ້ສຶກເຖິງພຣະວິນຍານ. ໃນໂລກໃບນີ້ມີຫລາຍສິ່ງຫລາຍຢ່າງທີ່ດີ ແລະ ເປັນປະໂຫຍດ. ເຊັ່ນດຽວກັນກັບທີ່ຮ່າງກາຍຂອງເຈົ້າໄດ້ຮັບຜົນກະທົບຈາກສິ່ງທີ່ເຈົ້າກິນ ແລະ ດື່ມ, ຈິດໃຈ ແລະ ວິນຍານຂອງເຈົ້າກໍໄດ້ຮັບຜົນກະທົບຢ່າງເລິກເຊິ່ງຈາກສິ່ງທີ່ເຈົ້າອ່ານ, ເບິ່ງ, ແລະ ຟັງ.
ຄຳເຊື້ອເຊີນ
ຈັດສັນເວລາໃຫ້ກັບພຣະຜູ້ເປັນເຈົ້າໃນທຸກໆມື້. ຮຽນຮູ້ກ່ຽວກັບພຣະອົງ. ລະນຶກເຖິງພຣະອົງຕະຫລອດເວລາ. ອະທິຖານຫາພຣະບິດາເທິງສະຫວັນຂອງເຈົ້າ. ສຶກສາພຣະຄຳພີສັກສິດ ແລະ ຄຳສອນຂອງສາດສະດາທີ່ມີຊີວິດຢູ່. ແລ້ວພະຍາຍາມດຳລົງຊີວິດຕາມສິ່ງທີ່ເຈົ້າຮຽນຮູ້.
ຈົ່ງສະແຫວງຫາສິ່ງທີ່ຍົກລະດັບ, ດົນໃຈ, ແລະ ເຊື້ອເຊີນພຣະວິນຍານ. ຂະນະທີ່ເຈົ້າເລືອກກ່ຽວກັບສິ່ງທີ່ຈະເບິ່ງ, ອ່ານ, ຟັງ, ຫລື ມີສ່ວນຮ່ວມນັ້ນ, ຈົ່ງຄິດກ່ຽວກັບວ່າ ສິ່ງນັ້ນຈະເຮັດໃຫ້ເຈົ້າຮູ້ສຶກແນວໃດ. ສິ່ງນັ້ນເຊື້ອເຊີນຄວາມຄິດທີ່ດີຫລືບໍ່? ຈົ່ງຢູ່ຫ່າງຈາກສິ່ງໃດກໍຕາມທີ່ເຍາະເຍີ້ຍສິ່ງສັກສິດ ຫລື ສິ່ງທີ່ຜິດສິນທຳ. ຈົ່ງຢ່າມີສ່ວນຮ່ວມໃນສິ່ງໃດກໍຕາມທີ່ເຮັດໃຫ້ການຕັດສິນ ຫລື ຄວາມຮູ້ສຶກໄວຕໍ່ພຣະວິນຍານຂອງເຈົ້າຫລຸດລົງ, ເຊັ່ນ ຄວາມຮຸນແຮງ, ເຫລົ້າ, ແລະ ຢາເສບຕິດທີ່ເປັນອັນຕະລາຍ. ກ້າທີ່ຈະປິດວິດີໂອ ຫລື ເກມ, ຍ່າງອອກຈາກໂຮງໜັງ ຫລື ງານເຕັ້ນລຳ, ປ່ຽນເພງຂອງເຈົ້າ, ຫລື ຫັນຫລັງໃຫ້ກັບສິ່ງໃດກໍຕາມທີ່ບໍ່ສອດຄ່ອງກັບພຣະວິນຍານ.
ນຳໃຊ້ສື່ສັງຄົມເພື່ອຍົກລະດັບ. ສື່ສັງຄົມສາມາດເປັນເຄື່ອງມືສື່ສານທີ່ມີພະລັງ. ຖ້າວ່າເຈົ້າໃຊ້ມັນ, ໃຫ້ສຸມໃສ່ແສງສະຫວ່າງ, ສັດທາ, ແລະ ຄວາມຈິງ. ຢ່າງປຽບທຽບຊີວິດຂອງເຈົ້າກັບສິ່ງທີ່ເບິ່ງຄືວ່າຄົນອື່ນກຳລັງເປັນຢູ່. ຈົ່ງຈື່ຈຳໄວ້ວ່າ ຄຸນຄ່າຂອງເຈົ້າແມ່ນມາຈາກການເປັນລູກຂອງພຣະບິດາມານດາເທິງສະຫວັນ, ບໍ່ແມ່ນມາຈາກສື່ສັງຄົມ.
ຈົ່ງສະແຫວງຫາປະສົບການທີ່ດີງາມ ແລະ ຄວາມສຳພັນທີ່ແທ້ຈິງ ແລະ ໝັ້ນຄົງຍືນຍາວ. ຈົ່ງລະວັງຢ່າໃຫ້ການໃຊ້ເທັກໂນໂລຈີ ແລະ ສື່ຂອງເຈົ້າມາແທນທີ່ການໃຊ້ເວລາແບບຕົວຕໍ່ຕົວຢູ່ກັບຄອບຄົວ ແລະ ໝູ່ເພື່ອນ. ສື່ສັງຄົມ ແລະ ເທັກໂນໂລຈີອື່ນໆສາມາດກິນເວລາຂອງເຈົ້າຢ່າງຫລວງຫລາຍ ໂດຍບໍ່ໄດ້ໃຫ້ຜົນຕອບແທນທີ່ມີຄ່າຫຍັງຫລາຍ. ພັກຜ່ອນຈາກໂລກອອນລາຍ ແລະ ມາເຊື່ອມຕໍ່ກັບຜູ້ຄົນທີ່ມີຢູ່ໃນຊີວິດຈິງ.
ພອນທີ່ສັນຍາໄວ້
ເຈົ້າສາມາດມີພຣະວິນຍານສະຖິດຢູ່ກັບເຈົ້າຕະຫລອດເວລາ. ຄຳສັນຍານີ້ເປັນພາກສ່ວນໜຶ່ງຂອງພັນທະສັນຍາທີ່ເຈົ້າເຮັດໃນທຸກຄັ້ງທີ່ເຈົ້າຮັບສ່ວນສິນລະລຶກ. ພຣະວິນຍານບໍລິສຸດຈະເປັນພະຍານຕໍ່ເຈົ້າເຖິງພຣະບິດາເທິງສະຫວັນ ແລະ ພຣະເຢຊູຄຣິດ. ພຣະອົງຈະປອບໂຍນ, ນຳພາ, ເຕືອນ, ແລະ ຊຳລະເຈົ້າໃຫ້ບໍລິສຸດ. ພຣະອົງຈະຊ່ວຍເຈົ້າໃຫ້ຮັບຮູ້ຄວາມຈິງ ແລະ ເຫັນຄວາມດີໃນໂລກນີ້.
ຄຳຖາມ ແລະ ຄຳຕອບ
ຂ້ອຍຈະຮູ້ຈັກໄດ້ແນວໃດວ່າຂ້ອຍກຳລັງຮູ້ສຶກເຖິງພຣະວິນຍານບໍລິສຸດ? ການຮຽນຮູ້ທີ່ຈະຮັບຮູ້ເຖິງພຣະວິນຍານນັ້ນຕ້ອງໃຊ້ເວລາ, ການຝຶກຝົນ, ແລະ ຄວາມອົດທົນ. ພຣະອົງກ່າວກັບແຕ່ລະຄົນໃນວິທີທີ່ແຕກຕ່າງກັນ. ຢ່າເບິ່ງຂ້າມສິ່ງທີ່ລຽບງ່າຍ—ຄວາມຮູ້ສຶກສະຫງົບສຸກທີ່ເຈົ້າໄດ້ຮັບເມື່ອໄດ້ຍິນປະຈັກພະຍານຂອງຄົນໃດຄົນໜຶ່ງ ຫລື ຄວາມຮູ້ສຶກບໍ່ສະບາຍໃຈຫລັງຈາກການເລືອກທີ່ຜິດພາດຂອງເຈົ້າ. ຄົ້ນຫາພຣະຄຳພີກ່ຽວກັບວິທີຕ່າງໆທີ່ພຣະວິນຍານສື່ສານ, ອະທິຖານກ່ຽວກັບມັນ, ແລະ ຊອກຫາໂອກາດທີ່ຈະຮູ້ສຶກເຖິງພຣະວິນຍານນັ້ນຕໍ່ໄປ.
ຮູບພາບລາມົກແມ່ນຫຍັງ? ເປັນຫຍັງຂ້ອຍຈຶ່ງຄວນຫລີກລ້ຽງມັນ? ຮູບພາບລາມົກແມ່ນການນຳສະເໜີ ບໍ່ວ່າຈະເປັນ, ຮູບພາບ ຫລື ຄຳເວົ້າຕ່າງໆ, ທີ່ອອກແບບມາເພື່ອກະຕຸ້ນຄວາມຮູ້ສຶກທາງເພດ. ຮູບພາບລາມົກມີມາໃນຫລາຍຮູບແບບ, ລວມທັງວີດີໂອ, ຮູບພາບ, ປຶ້ມ, ເກມ, ແລະ ເພງ. ຂໍ້ຄວາມຕ່າງໆ ຫລື ຮູບພາບທີ່ຖືກສົ່ງໄປມາຫາກັນລະຫວ່າງໝູ່ເພື່ອນກໍຍັງແມ່ນໄດ້ອີກເຊັ່ນກັນ. ຮູບພາບລາມົກປະຕິບັດຕໍ່ສິ່ງທີ່ສັກສິດ—ບໍ່ວ່າຈະເປັນຮ່າງກາຍ ແລະ ຄວາມຮູ້ສຶກທາງເພດຂອງເຮົາ—ດ້ວຍຄວາມບໍ່ເຄົາລົບ. ເຈົ້າອາດຈະພົບຮູບພາບລາມົກໂດຍບໍ່ໄດ້ຕັ້ງໃຈ. ບໍ່ວ່າເຈົ້າຈະພົບຮູບພາບລາມົກໂດຍຕັ້ງໃຈ ຫລື ບໍ່ນັ້ນກໍຕາມ, ຈົ່ງຫັນໜີໄປຈາກສິ່ງນັ້ນທັນທີ. ເຈົ້າຍັງສາມາດເວົ້າລົມກັບພໍ່ແມ່ ຫລື ຜູ້ໃຫຍ່ຄົນອື່ນໆທີ່ໄວ້ໃຈໄດ້. ການຕັ້ງໃຈເບິ່ງຮູບພາບລາມົກຖືວ່າເປັນບາບ ແລະ ເປັນອັນຕະລາຍຕໍ່ຄວາມສາມາດຂອງເຈົ້າໃນການຮູ້ສຶກເຖິງພຣະວິນຍານ. ມັນຈະເຮັດໃຫ້ການຄວບຄຸມຕົນເອງຂອງເຈົ້າອ່ອນແອລົງ ແລະ ບິດເບືອນວິທີທີ່ເຈົ້າເບິ່ງຕົວເອງ ແລະ ຄົນອື່ນ. ພຣະເຢຊູຄຣິດມີອຳນາດທີ່ຈະຊ່ວຍເຈົ້າໃຫ້ຕ້ານທານກັບຮູບພາບລາມົກ ແລະ ກັບໃຈ. ຫັນໄປຫາພຣະອົງ ແລະ ຫັນຫລັງໃຫ້ກັບຄວາມມືດ. ອະທິການຂອງເຈົ້າສາມາດຊ່ວຍເຈົ້າໃຫ້ໄດ້ຮັບຄວາມເຂັ້ມແຂງ ແລະ ການໃຫ້ອະໄພໄດ້ ຜ່ານທາງພຣະຜູ້ຊ່ວຍໃຫ້ລອດ. ພຣະເຢຊູຄຣິດຄືຄວາມເຂັ້ມແຂງຂອງເຈົ້າ!
ເບິ່ງ ເພງສັນລະເສີນ 119:105 (ພຣະຄຳຂອງພຣະເຈົ້າເປັນແສງແຈ້ງສຳລັບທາງເດີນໃຫ້ເຮົາ); ອາໂມດ 5:14 (ສະແຫວງຫາສິ່ງທີ່ດີ); ຄາລາເຕຍ 5:22–23 (ຜົນຂອງພຣະວິນຍານ); ໂມໂຣໄນ 7:18–19 (ຄວາມສະຫວ່າງຂອງພຣະຄຣິດ); ຄຳສອນ ແລະ ພັນທະສັນຍາ 6:23 (ພຣະຜູ້ເປັນເຈົ້າກ່າວໃນຄວາມສະຫງົບ); 20:77, 79 (ບົດສວດສິນລະລຶກ).
ຄຳຖາມກ່ຽວກັບໃບຮັບຮອງເຂົ້າພຣະວິຫານ
-
ພຣະຜູ້ເປັນເຈົ້າໄດ້ກ່າວວ່າ ທຸກສິ່ງຕ້ອງຖືກ “ສຳເລັດໃນຄວາມສະອາດ” ຕໍ່ພຣະອົງ (ຄຳສອນ ແລະ ພັນທະສັນຍາ 42:41). ເຈົ້າພະຍາຍາມໃຫ້ຕົນເອງສະອາດທາງສິນທຳໃນຄວາມຄິດ ແລະ ການປະພຶດບໍ?